Bwami bwa Leza ngomutwe wamakani aamu Bbaibbele uuyandika kapati. Jehova uyoobelesya Bwami oobu kuzuzikizya makanze aakwe aakumatalikilo kujatikizya nyika. Ino Bwami ninzi? Ino tuzyi buti kuti bulalela lino? Ino nzintu nzi nzyobwacita kale? Alimwi nzintu nzi nzyobuyoocita kumbele? Ciiyo eeci alimwi aziiyo zyobilo zitobela zilayiingula mibuzyo eeyi.

1. Ino Bwami bwa Leza ninzi, alimwi nguni Mwami wambubo?

Bwami nimfwulumende iyakatalisyigwa a Jehova Leza. Jesu Kristo, Mwami wambubo, ulalela kali kujulu. (Matayo 4:17; Johane 18:36) Bbaibbele lyaamba Jesu kuti: “Unooli Mwami uuyoolela . . . kukabe kutamani.” (Luka 1:32, 33) Mbwali Mwami wa Bwami bwa Leza, Jesu uyoolela bantu boonse munyika.

2. Mbaani ibayoolela a Jesu?

Jesu takaleli alikke pe. Bantu bazwa “kumisyobo yoonse amilaka yoonse amikowa yoonse azisi zyoonse . . . bayooba bami ibayoolela nyika.” (Ciyubunuzyo 5:9, 10) Ino bali bongaye ibayoolela a Kristo? Kuzwa ciindi Jesu naakaboola anyika, Banakristo banji baba basikumutobela. Pele balikke ibali 144,000 mbabaunka kujulu kuyoolela a Jesu. (Amubale Ciyubunuzyo 14:1-4.) Banakristo bambi boonse banooli balelwa ba Bwami anyika.—Intembauzyo 37:29.

3. Mbuti Bwami bwa Leza mbobusumpukide kwiinda mfwulumende zyabantu?

Noliba leelyo beendelezi bantunsi nobasoleka kucita zintu zibotu, tabajisi nguzu zyakucita zyoonse nzyobayanda. Mukuya kwaciindi banjililwa busena abeendelezi bambi ibaliyanda alimwi batabikkili maano kubalelwa babo. Pele Muleli wa Bwami bwa Leza, Jesu, kunyina nayoonjililwa busena amuntu uuli woonse. Leza ‘wakabikka bwami ibutakanyonyoonwi pe.’ (Daniele 2:44) Jesu uyoolela munyika yoonse, alimwi kunyina nayootondezya lusalululo. Ngusiluyando, siluzyalo alimwi uucita zintu cabululami, aboobo uyooyiisya bantu kuti kabeendelezyanya munzila njiyonya, nkokuti caluyando, caluzyalo alimwi acabululami.—Amubale Isaya 11:9.

4. Mfwulumende iili anguzu kapati iyoolela nyika yoonse

Jesu Kristo ulijisi nguzu kapati zyakweendelezya kwiinda muleli uuli woonse iwakaponede. Amubale Matayo 28:18, akubandika mubuzyo ooyu:

• Mbuti bweendelezi bwa Jesu mbobusumpukide kwiinda bwamuleli muntunsi uuli woonse?

Kanji-kanji mfwulumende zyabantu zilacinca, alimwi umwi aumwi ulela buyo kabeela kamwi kamunyika. Ino mbuti kujatikizya Bwami bwa Leza? Amubale Daniele 7:14, akubandika mibuzyo eeyi:

• Nkaambo nzi ncocikkomanisya kuzyiba kuti Bwami bwa Leza ‘tabukanyonyoonwi’?

• Nkaambo nzi ncocikkomanisya kuzyiba kuti Bwami bwa Leza buyakweendelezya nyika yoonse?

5. Bulelo bwabantu bweelede kunjililwa busena

Nkaambo nzi Bwami bwa Leza ncobweelede kunjila mubusena bwamfwulumende zyabantu? Atweebelele VIDIYO, akubandika mubuzyo uutobela.

VIDIYO: Ino Bwami bwa Leza Ninzi?​—Kabeela Buyo (1:41)

• Nzintu nzi izyacitika akaambo kabulelo bwabantu?

Amubale Mukambausi 8:9, akubandika mibuzyo eeyi:

• Sena muyeeya kuti Bwami bwa Leza bweelede kunjila mubusena bwamfwulumende zyabantu? Nkaambo nzi?

6. Bwami bwa Leza bujisi baleli ibabuzyi kabotu bukkale bwesu

Akaambo kakuti Mwami wesu Jesu wakapona kali muntu, ulakonzya “kutweetelela mukubula nguzu kwesu.” (Bahebrayo 4:15) Baalumi alimwi abamakaintu basyomeka ibali 144,000 ibayoolela a Jesu, bakasalwa a Jehova “kuzwa kumisyobo yoonse amilaka yoonse amikowa yoonse azisi zyoonse.”—Ciyubunuzyo 5:9.

• Sena cilamuumbulizya kuzyiba kuti Jesu abaabo mbayoolela limwi balizyi mbotulimvwa alimwi amapenzi ngotujisi? Nkaambo nzi?

7. Bwami bwa Leza bujisi milawo iisumpukide

Mfwulumende zilabikka milawo iyeelede kugwasya alimwi akukwabilila balelwa banzizyo. Abwalo Bwami bwa Leza bulijisi milawo njobeelede kutobela balelwa bambubo. Amubale 1 Bakorinto 6:9-11, akubandika mibuzyo eeyi:

• Ino muyeeya kuti nyika iyooba buti ciindi boonse baakutalika kutobela milawo ya Leza yakulilemeka?a

• Sena muyeeya kuti Jehova ulijisi nguzu zyakubona kuti balelwa ba Bwami beelede kwiitobela milawo eeyi? Nkaambo nzi?

• Ncinzi citondezya kuti bantu ibatatobeli milawo eeyi balakonzya kucinca?—Amubone kapango 11.

MUBUFWAAFWI

Bwami bwa Leza nimfwulumende iini-ini yakujulu iiyoolela nyika yoonse.

Ncinzi Ncomwaiya?

• Ino baleli ba Bwami bwa Leza mbaani?

• Ino Bwami bwa Leza busumpukide buti kwiinda mfwulumende yabantu iili yoonse?

• Ncinzi Jehova ncalangila kubalelwa ba Bwami?

AMUZYIBE ZINJI

Amubone ncaakayiisya Jesu kujatikizya busena nkobubede Bwami.

“Sena Bwami bwa Leza Buli Mumoyo Wanu?” (Cibalo caaintaneti)

Nkaambo nzi Bakamboni ba Jehova ncobasala kusyomeka ku Bwami bwa Leza muciindi cakusyomeka kubulelo bwabantu?

Ibalyaabide ku Bwami bwa Leza (1:43)

Amulange-lange ncolyaamba Bbaibbele kujatikizya ba 144,000 aabo Jehova mbaakasala kuyoolela a Jesu.

“Ino Mbaani Baunka Kujulu?” (Cibalo caaintaneti)

Ncinzi cakapa mukaintu umwi iwakali muntolongo kusyoma kuti alikke Leza nguukonzya kuleta nyika yabululami?

“Mbondakazyiba Uuyoomanizya Kutalulama” (Sinsimuka!, November 2011)

Bwami bwa Leza bwakatalika kulela kujulu mu 1914. Alimwi eeci nceciindi camazuba aamamanino aabweendelezi bwabantu nobwakatalika. Ino tuzyi buti oobo? Atulange-lange businsimi bwamu Bbaibbele, zintu zicitika munyika alimwi ambobalilemeka bantu kuzwa mu 1914.

1. Ino businsimi bwamu Bbaibbele butondezya nzi?

Bbuku lyamu Bbaibbele lya Daniele litondezya kuti Bwami bwa Leza bwakali kuyootalika kulela kumamanino aaciindi ciitwa kuti “ziindi zili ciloba.” (Daniele 4:16, 17) Nokwakainda myaanda yamyaka, Jesu wakaamba ciindi nciconya eeco kuti “ciindi cibikkidwe camasi,” alimwi wakayiisya kuti ciindi eeco tiicakaningamana. (Luka 21:24) Mbubwenya mbotutiibone, ziindi zili ciloba zyakamana mu 1914.

2. Nzintu nzi zicitika munyika alimwi ino bantu balilemeka buti kuzwa mu 1914?

Basikwiiya ba Jesu bakamubuzya kuti: “Ncinzi ciyooba citondezyo cakubako kwako acamamanino aabweende bwazintu?” (Matayo 24:3) Mukwiingula Jesu wakasinsima zintu zinji izyakali kuyoocitika aakutalika kulela kujulu kali Mwami wa Bwami bwa Leza. Zimwi akati kazintu eezyi ninkondo, nzala alimwi amizuzumo yanyika. (Amubale Matayo 24:7.) Alimwi Bbaibbele lyakasinsima kuti akaambo kambobanoolilemeka bantu ‘mumazuba aamamanino’ buumi ‘bunookatazya ncobeni.’ (2 Timoteyo 3:1-5) Zintu eezyi alimwi ambobalilemeka bantu zyakalibonya kapati kwaambisya kuzwa mu 1914.

3. Nkaambo nzi zintu ncozyaindila kubija kuzwa Bwami bwa Leza nobwakatalika kulela?

Nokwakainda ciindi cisyoonto buyo Jesu naakabikkwa kuba Mwami wa Bwami bwa Leza kujulu, wakalwana a Saatani alimwi amadaimona aakwe. Saatani wakazundwa munkondo eeyo. Bbaibbele lyaamba kuti “wakawaalwa ansi, anyika, abalo bangelo bakwe bakawaalwa ansi antoomwe anguwe.” (Ciyubunuzyo 12:9, 10, 12) Kuzwa ciindi eeco, Saatani ulinyemede kapati nkaambo ulizyi kuti uyoonyonyoonwa. Aboobo nguupa kuti munyika yoonse kakuli kucisa alimwi akupenga. Nkakaambo kaako zintu munyika zilibijide kapati! Pele Bwami bwa Leza buyakwaagusya mapenzi oonse aaya anyika.

AMWIIYE ZINJI

4. Businsimi bwamu Bbaibbele butondezya kuti Bwami bwa Leza bwakatalika kulela mu 1914

VIDIYO: Bwami bwa Leza Bwakatalika Kulela mu 1914 (5:02)

Leza wakapa kuti Mwami Nebukadinezara wa Babuloni wansiku alote ciloto cakajisi businsimi. Ciloto eeco abupanduluzi mbwaakapa Daniele, zitondezya kuti ciloto eeci cijatikizya bweendelezi bwa Nebukadinezara alimwi a Bwami bwa Leza.—Amubale Daniele 4:17.a

Amubale Daniele 4:20-26, akubelesya ccaati kutegwa mwiingule mibuzyo iitobela:

• (A) Ino Nebukadinezara wakabona nzi muciloto cakwe?​—Amubone kapango 20 a 21.

• (B) Ncinzi cakali kuyoocitika kucisamu?​—Amubone kapango 23.

• (C) Ncinzi cakali kuyoocitika kumamanino ‘aaziindi zili ciloba’?​—Amubone kapango 26.

Ciloto ca Cisamu Mbociswaangene a Bwami bwa Leza

BUSINSIMI (Daniele 4:20-36)

Bweendelezi

(A) Cisamu cipati kapati

Bweendelezi bwanyonganizyigwa

(B) “Amucigonke cisamu eeco,” alimwi acilekwe “mane kwiinde ziindi zili ciloba”

Bweendelezi bwatalika alimwi

(C) “Bwami bwako buyoopilusyigwa kulinduwe”

Mukuzuzikizyigwa kwakusaanguna kwabusinsimi oobu . . .

• (D) Ino cisamu cakali kwiiminina ni?—Amubone kapango 22.

• (E) Ino ndilili bweendelezi nobwakanyonganizyigwa?​—Amubale Daniele 4:29-33.

• (F) Ncinzi cakacitika kuli Nebukadinezara kumamanino ‘aaziindi zili ciloba’?​—Amubale Daniele 4:34-36.

KUZUZIKIZYIGWA KWAKUSAANGUNA

Bweendelezi

(D) Nebukadinezara, Mwami wa Babuloni

Bweendelezi bwanyonganizyigwa

(E) Nowakainda mwaka wa 606 B.C.E., Nebukadinezara wakasondoka alimwi tanaakacili kweendelezya kwamyaka iini iili ciloba

Bweendelezi bwatalika alimwi

(F) Nebukadinezara wakapona akutalika kulela alimwi

Mukuzuzikizyigwa kwabili kwabusinsimi oobu . . .

• (G) Ino cisamu cakali kwiiminina ni?​—Amubale 1 Makani 29:23.

• (H) Ino ndilili bweendelezi nobwakanyonganizyigwa? Ino tuzyi buti kuti bweendelezi bwakacilinyongene ciindi Jesu naakacili aanyika?​—Amubale Luka 21:24.

• (I) Ndilili alimwi nkuli bweendelezi oobu nkobwakatalika kweendelezya alimwi?

KUZUZIKIZYIGWA KWABILI

Bweendelezi

• (G) Bami bana Israyeli ibaiminina bweendelezi bwa Leza

Bweendelezi bwanyonganizyigwa

• (H) Jerusalemu wakanyonyoonwa, bweendelezi bwabami bana Israyeli bwakanyonganizyigwa kwamyaka iili 2,520

Bweendelezi bwatalika alimwi

• (I) Jesu wakatalika kulela kujulu kali Mwami wa Bwami bwa Leza

5. Nyika yakacinca kuzwa mu 1914

Atweebelele VIDIYO.

VIDIYO: Nyika Yakacinca Kuzwa mu 1914 (1:10)

Jesu wakasinsima kujatikizya mbozyakali kunooba zintu munyika aakuba Mwami. Amubale Luka 21:9-11, akubandika mubuzyo ooyu:

• Nzintu nzi akati kazyeezi nzyomubona naa kumvwa?

Mwaapostolo Paulo wakaamba kujatikizya bantu mbobanoobede mumazuba aamamanino aabweendelezi bwabantu. Amubale 2 Timoteyo 3:1-5, akubandika mubuzyo ooyu:

• Mbube nzi akati kaboobu mbomubona mubantu mazuba aano?

6. Bweendelezi bwa Bwami bwa Leza bweelede kutukulwaizya

Amubale Matayo 24:3, 14, akubandika mibuzyo eeyi:

• Mulimo nzi uuyandika kapati uutondezya kuti Bwami bwa Leza bulalela lino?

• Mbuti mbomukonzya kutola lubazu mumulimo ooyu?

Bwami bwa Leza bulalela lino, alimwi buzuba nobuyakweendelezya cakumaninina bulaafwaafwi. Amubale Bahebrayo 10:24, 25, akubandika mubuzyo ooyu:

• Ncinzi umwi aumwi wesu nceelede kucita ‘mbotubwene kuti buzuba bwaswena afwaafwi’?

MUBUFWAAFWI

Businsimi bwamu Bbaibbele alimwi azintu zicitika munyika zitondezya kuti Bwami bwa Leza bulalela lino. Tulatondezya kuti tulacisyoma eeci kwiinda mukukambauka kujatikizya mbubo alimwi akujanika kumiswaangano yambungano.

Ncinzi Ncomwaiya?

• Ncinzi cakacitika kumamanino aaziindi zili ciloba izyakasinsimwa mubbuku lyamu Bbaibbele lya Daniele?

• Ncinzi cimupa kusyoma kuti Bwami bwa Leza bwakatalika kulela mu 1914?

• Mbuti mbomukonzya kutondezya kuti mulasyoma kuti Bwami bulalela lino?

AMUZYIBE ZINJI

Amubone basyaazibwene mumakani aakaindi alimwi abamwi ncobaamba kujatikizya kucinca ikuli munyika kuzwa mu 1914.

“Ciindi Zyeelelo Zyakulilemeka Nozyakayaansi Kapati” (Sinsimuka!, April 2007)

Amubone businsimi ibuli kulugwalo lwa Matayo 24:14 mbobwakacinca buumi bwamwaalumi umwi.

“Ndakali Kuciyandisya Kapati Cisobano ca Baseball Kwiinda Cintu Cili Coonse!” (Ngazi Yamulindizi No. 3 2017)

Ino tuzyi buti kuti businsimi ibuli kuli Daniele caandaano 4 bwaamba Bwami bwa Leza?

“Ino Bwami Bwa Leza Bwakatalika Lili Kulela? (Cibeela 1)” (Ngazi Yamulindizi, October 1, 2014)

Ncinzi citondezya kuti “ziindi zili ciloba” izyaambidwe kuli Daniele caandaano 4 zyakamana mu 1914?

“Ino Bwami Bwa Leza Bwakatalika Lili Kulela? (Cibeela 2)” (Ngazi Yamulindizi, November 1, 2014)

Bwami bwa Leza bwakatalika kale kulela. Lino-lino buyoocinca zintu kutegwa buumi munyika bukabote kapati. Atulange-lange zintu zimwi zibotu nzyotukonzya kulangila mubweendelezi bwa Bwami oobu.

1. Mbuti Bwami bwa Leza mbobuyooleta luumuno alimwi abululami anyika?

Jesu, Mwami wa Bwami bwa Leza, uyoobanyonyoona bantu babyaabi alimwi amfwulumende lyankondo ya Amagedoni. (Ciyubunuzyo 16:14, 16) Aciindi eeco, cisyomezyo camu Bbaibbele eeci citobela ciyoozuzikizyigwa cakumaninina: “Kusyeede kaindi kaniini buyo, ibantu babi tabakabi limbi pe.” (Intembauzyo 37:10) Kwiinda mu Bwami, Jesu uyoobona masimpe kuti kuli luumuno alimwi abululami munyika yoonse mbwiizulwa.—Amubale Isaya 11:4.

2. Ino buumi bunooli buti ciindi kuyanda kwa Leza kwaakucitwa anyika?

Mubweendelezi bwa Bwami bwa Leza, “balulami bayookona nyika, alimwi bayookkala alinjiyo lyoonse mane kukabe kutamani.” (Intembauzyo 37:29) Amweezeezye buyo kupona munyika mwalo bantu boonse mobanooluleme, ibamuyanda Jehova alimwi akuyandana! Kunyina uuyoociswa alimwi bantu boonse bayoopona kukabe kutamani.

3. Ncinzi Bwami bwa Leza ncobuyoozuzikizya ciindi bantu babi baakunyonyoonwa?

Bantu babi baakunyonyoonwa, Jesu uyoolela kali Mwami kwamyaka iili 1,000. Kuciindi eeco, walo alimwi aba 144,000 mbayoolela limwi bayoogwasya bantu ibanooli anyika kuti balondoke. Kumamanino aamyaka eeyo, nyika inooli paradaiso yeebeka, iizwide bantu bakkomene ibatobela buyo milawo ya Jehova. Mpoonya Jesu uyoopilusya bweendelezi kuli Bausyi, nkokuti Jehova. Kwiinda lyoonse, ‘zina lya Jehova liyoosalazyigwa.’ (Matayo 6:9, 10) Aciindi eeco, boonse bayoosinizya kuti Jehova Mweendelezi mubotu uubabikkila maano balelwa bakwe. Mpoonya Jehova uyoomunyonyoona Saatani, madaimona alimwi abaabo boonse ibayoosala kuzangila bweendelezi bwakwe. (Ciyubunuzyo 20:7-10) Bukkale bulondokede ibuyooletwa a Bwami bwa Leza buyoozumanana mane kukabe kutamani.

AMWIIYE ZINJI

4. Bwami bwa Leza buyoomanizya bweendelezi bwabantu

‘Muntu weendelezya muntunyina munzila iimuletela mapenzi.’ (Mukambausi 8:9) Kwiinda mu Bwami bwakwe, Jehova uyookumanizya kutalulama ooku.

Amubale Daniele 2:44 alimwi a 2 Batesalonika 1:6-8, akubandika mibuzyo eeyi:

• Ncinzi Jehova a Mwanaakwe Jesu ncobayoocita kumfwulumende zyabantu akuli baabo bazigwasyilizya?

• Mbuti nzyomwaiya kujatikizya Jehova a Jesu mbozimupa kusyoma kuti bayoocita zintu munzila yabululami alimwi akutasalulula?

5. Jesu Mwami mubotu kapati

Mbwaanga Mwami wa Bwami bwa Leza, Jesu uyoobacitila zintu zinji zibotu balelwa bakwe anyika. Atweebelele VIDIYO kutegwa tubone Jesu mbwaakatondezya kale kuti ulayandisya alimwi wakapegwa nguzu a Leza zyakugwasya bantu.

VIDIYO: Jesu Wakatondezya Zintu Nzyobuyoozuzikizya Bwami (1:13)

Naakali anyika, Jesu wakatondezya kale nzyobuyoozuzikizya Bwami. Nzilongezyo nzi akati kazyeezyi zyaambidwe waawa nzyomuyandisya kuyoobona? Amubale magwalo aabikkidwe aamba zilongezyo eezyo.

6. Bwami bwa Leza buyooleta buumi bubotu kumbele

VIDIYO: Citondezyo Cabuumi Bwakumbele Bubotu (4:38)

Amubale Intembauzyo 145:16, akubandika mubuzyo ooyu:

• Mbuti mbomulimvwa kuzyiba kuti Jehova ‘uyookkutya cilenge coonse cipona kwiinda mukucipa ncociyanda’?

MUBUFWAAFWI

Bwami bwa Leza buyakwaazuzikizya makanze aambubo. Buyoosandula nyika kuba paradaiso iizwide bantu babotu ibanookomba buyo Jehova mane kukabe kutamani.

Ncinzi Ncomwaiya?

• Mbuti Bwami bwa Leza mbobuyoolisalazya zina lya Jehova?

• Nkaambo nzi ncotukonzya kusyoma kuti Bwami bwa Leza buyoozizuzikizya zisyomezyo zyamu Bbaibbele?

• Nzintu nzi nzyobuyoozuzikizya Bwami nzyomulangila kapati?

AMUZYIBE ZINJI

Amubone ncoyaamba Amagedoni.

“Ino Nkondo ya Amagedoni Ninzi?” (Cibalo caaintaneti)

Amulange-lange zintu ziyoocitika lya “mapenzi mapati” kweelana ambwaakaamba Jesu.—Matayo 24:21.

“Ino Mapenzi Mapati Ninzi?” (Cibalo caaintaneti)

Amubone mikwasyi mboikonzya kweezyeezya kuba antoomwe mu Paradaiso.

Amweezyeezye Kuti Muli mu Paradaiso (1:50)

Mucibalo cakuti “Ndakajisi Mibuzyo Minji Kapati Yalo Iyakali Kundikatazya,” amubone sikuzangila mfwulumende mbwaakajana bwiinguzi kumibuzyo iyakali kumukatazya.

“Ibbaibbele Lilakonzya Kubacinca Bantu” (Ngazi Yamulindizi, January 1, 2012)