MAKANI AAYEEME AMUTWEUULI ACIVWUMBYO | INO BAKAMBONI BA JEHOVA MBAANI?
Mbantu Bali Buti?
Tobakamboni ba Jehova, tuli mbunga yanyika yoonse iitaswaangene atubunga twabukombi tumbi. Nokuba kuti maofesi eesu mapati ali ku United States, bunji bwa Bakamboni ba Jehova bakkala muzisi zimbi. Alimwi toonse notubalilwa ku 8 miliyoni tulayiisya bantu Bbaibbele mumasi aainda ku 230. Tulacita oobo kutobela majwi aa Jesu aakuti: “Makani mabotu aa Bwami aaya ayookambaukwa munyika yoonse kuti bukabe bumboni kumasi oonse.”—Matayo 24:14.
Kufwumbwa naa tukkala kuli, tulasolekesya kutobela milawo yacisi. Nokuba boobo, tatutoli lubazu mutwaambo twacisi. Cili boobu akaambo kakuti tutobela malailile aa Jesu ngaakapa Banakristo aakuti ‘tatuli banyika.’ Aboobo tatutoli lubazu mutwaambo twacisi nokuba kugwasyilizya munkondo. (Johane 15:19; 17:16) Ciindi nokwakali Nkondo Yabili Yanyika Yoonse, Bakamboni ba Jehova bakaangwa, mane buya bakapenzyegwa akaambo kakutatola lubazu mutwaambo twacisi. Kujatikizya mbabo, mwaalumi iwakali bishopo ku German kaindi wakaamba kuti: “Cileelela kuti inga baamba kuti mbembabo balikke ibatakatola lubazu mutwaambo twacisi mu Bweendelezi Bwatatu ibwakali kweendelezyegwa a Hitler.”
“[Bakamboni ba Jehova] balijisi citondezyo cibotu cakulilemeka. Tulakonzya kubelesya bantu batalisumpuli ibali boobu muzyuuno zyaatala zyamapolitikisi—pele tabakonzyi kuzumina pe. . . . Balabulemeka bweendelezi bwamfwulumende pele basyoma kuti bulikke Bwami bwa Leza mbobukonzya kumana mapenzi aabantu oonse.—Muteende uutegwa Nová Svoboda waku Czech Republic.
Nokuba boobo, tatulizanduli pe. Jesu wakapailila basikumutobela kuli Leza naakati: “Tandikulombi kuti ubagusye munyika.” (Johane 17:15) Aboobo, mulakonzya kutubona mucilawo katubeleka, katuula zintu, alimwi akuunka kucikolo.