MAKANI AAYEEME AMUTWEUULI ACIVWUMBYO | INO BAKAMBONI BA JEHOVA MBAANI?
Ino Bakamboni ba Jehova basyoma nzi?
Bakamboni ba Jehova basyoma kuti “Magwalo oonse akasololelwa a Leza alimwi alagwasya.” (2 Timoteyo 3:16) Tulalibelesya Bbaibbele kutugwasya kuzyiba Mulengi alimwi akupona buumi bulaampindu.
Ibbaibbele lyaamba kuti: “Bantu abazyibe kuti yebo, oojisi zina lyakuti Jehova, yebo olikke ndonduwe Mupatikampatila atala aanyika yoonse.” (Intembauzyo 83:18) Aboobo, tukomba buyo Jehova Leza alikke alimwi mbotuli bakamboni bakwe tulasolekesya kuzyibya bantu zina lyakwe.—Isaya 43:10-12.
Mbotuli Banakristo, tusyoma kuti Jesu, “Mwana wa Leza,”a wakaboola anyika akuba Mesiya. (Johane 1:34, 41; 4:25, 26) Naakafwa, Jesu wakabusyigwa akuunka kujulu. (1 Bakorinto 15:3, 4) Mukuya kwaciindi wakaba Mwami wa Bwami bwa Leza. (Ciyubunuzyo 11:15) Bwami oobo nimfwulumende iini-ini iiyoleta Paradaiso anyika. (Daniele 2:44) Ibbaibbele lyaamba kuti: “Babombe myoyo bayookona nyika, eelyo bayoobotelwa kapati muluumuno lunji.”—Intembauzyo 37:11, 29.
“Ciindi nobabala mu Bbaibbele, basyoma kuti Leza ulaambaula kulimbabo. Kufwumbwa ciindi nobajana mapenzi mubuumi bwabo, balabala Jwi lya Leza kutegwa bazyibe mbobakonzya kwaamana mapenzi aayo. . . . Kulimbabo, Ijwi lya Leza licili aabuumi.”—Basololi baci Katolika ba Benjamin Cherayath, muteende uutegwa Münsterländische Volkszeitung waku Germany
Bakamboni ba Jehova basyoma kuti njiisyo zyamu Bbaibbele zilakonzya kubagwasya bantu naaba mazuba aano. (Isaya 48:17, 18) Aboobo, tulazitobela njiisyo eezyi mubuumi bwesu. Mucikozyanyo, akaambo kakuti Bbaibbele litucenjezya kutantamuka zintu zikonzya kunyonganya mizeezo alimwi amibili yesu, tatufwebi naa kubelesya misamu iikola munzila iiteelede. (2 Bakorinto 7:1) Alimwi tulazitantamuka zintu zikasyigwa mu Bbaibbele mbuli bucakolwa, bwaamu, alimwi akubba.—1 Bakorinto 6:9-11.
a Ibbaibbele alimwi lyaamba kuti Jesu “mwana wa Leza simuzyalwaalikke” nkaambo nguwakasaanguna kulengwa alimwi ncecilenge cilikke cakalengwa a Jehova kumugama.—Johane 3:18; Bakolose 1:13-15.