Amulibambile Mumoyo

Ciindi notwiiya Bbaibbele, tuyanda kuti zintu nzyotwiiya kujatikizya Jehova zitusike amoyo. Ezara wakasiya cikozyanyo cibotu mumakani aaya nkaambo ‘wakalibambila mumoyo wakwe kuti avwuntauzye Mulawo wa Jehova.’ (Ezr. 7:10) Mbuti mbotukonzya kumwiiya?

Amupaile. Amupaile kamutanatalika kwiiya. Amumulombe Jehova kuti amugwasye kuzimvwisya alimwi akuzibelesya nzyomwiiya.—Int. 119:​18, 34.

Amulicesye. Leza ulakasisa kasimpe kuli baabo ibalisumpula alimwi ibayeeya kuti tabayandiki lugwasyo lwakwe kutegwa balimvwisye Bbaibbele. (Lk. 10:21) Aboobo tamweelede kuvwuntauzya akaambo buyo kakuyanda kutondezya bamwi kuti muzyi zinji. Kunze lyaboobo, cakulicesya amucince kuti naa mwabona kuti kuyeeya kwanu takweendelani akuyanda kwa Leza.

Amuswiilile lwiimbo lumwi lwa Bwami. Nyimbo zilakonzya kutusika amoyo. Aboobo ikuti twasaanguna kuswiilila nyimbo katutanatalika kwiiya, cilakonzya kutugwasya kubikkila maano kutegwa zintu nzyotwiiya kujatikizya Jehova zitusike amoyo.