Nkamu Iitegwa Bibelkring

KUMAMANINO kwama 1930, inkamu yabukombi mpya iitegwa Bibelkring (ibbala lyaci Dutch ilyaamba kuti “nkamu yabasikwiiya Bbaibbele”) yakatalika kufwaafwi acizyiba citegwa Lake Toba, ku North Sumatra. Nkamu eeyi yakatalika ciindi bamayi bamwi nobakatambula mabbuku kumupainiya iwakaswaide, uulangilwa kuti ooyu mukwesu Eric Ewins, walo iwakakambaukila mubusena bwa Lake Toba mumwaka wa 1936. Nzyobakabala bamayi aaba zyakabakulwaizya kuzwa mucikombelo ca Batak Protestant Church akutalisya tukamu twakwiiya Bbaibbele. Tukamu ooto twakakomena akumwaika kusikila mane aabo ibazulilwa mulintuto bakavwula kusika kumyaanda.a

Kwiinda mukubelesya mabbuku aakamwaigwa amupainiya ooyu, bamunkamu ya Bibelkring ibakusaanguna bakazyiba kasimpe kamu Bbaibbele kujatikizya twaambo twiindene-indene. Ba Dame Simbolon, ibakali bankamu eeyi balo ibakatambula kasimpe mu 1972 bakaamba kuti: “Bakali kukaka kusalyuuta ndembela alimwi akusekelela Kkilisimasi amazuba aakuzyalwa. Mane buya bamwi akati kabo bakali kukambauka kuŋanda aŋanda.” Nokuba boobo, akaambo kakuti tiibakali kusololelwa ambunga ya Leza, tiilyakalampa pe, nkamu eeyi yakatalika kulanga zintu munzila yabuntu. Ba Limeria Nadap-Dap, abalo ibakali munkamu eeyi pele lino ibali mbacizyi besu kumuuya bakaamba kuti: “Bamakaintu tiibakali kuzumizyigwa kulipenta, kunana pauda, kusama masikkiyo atulungu, kusama zisani zyamazuba aano, nokuba kusama mabbusu. Alimwi bamunkamu eeyi bakali kukasyigwa kubweza cinyongole camutwe, imakani aakainyemya kapati mfwulumende.”

Nkamu ya Bibelkring mukuya kwaciindi yakaandaana mutubunga-bunga tunji kumane yakamana. Ciindi bapainiya nobakajokela kubusena bwa Lake Toba, bantu banji ibakali munkamu ya Bibelkring bakakatambula kasimpe.