Muswaangano Uutakalubwi

MU August 15-18, 1963, basikumwaya banji kuzwa mucisi coonse ca Indonesia alimwi abeenzu ibali 122 ibakazwa kumasi aambi bakaswaangana mudolopo lya Bandung, West Java. Bakaboolede kumuswaangano wamasi wakusaanguna mucisi ca Indonesia iwakajisi mutwe wakuti “Everlasting Good News” (“Makani Mabotu Aatamani.”)

Nobakali kulibambila muswaangano ooyu, bakwesu bakajana mapenzi manji. Busena bwakuswaanganina bwakacincwa ziindi zyotatwe akaambo kazisobano zyakusekelela Buzuba Bwalwaanguluko lwacisi. Eelyo mali aakukkwezya naakayungizyigwa a 400 pesenti akaambo kakudula kwazintu, basimuswaangano bamwi bakaile kubelesya buyo nzila zimbi zyakweendela. Mukwesu umwi wakeenda amaulu kwamazuba aali cisambomwe kuti aboole kumuswaangano. Basimuswaangano ibali 70 ibazwa ku Sulawesi bakeenda kwamazuba osanwe mumato aazwide bantu kutegwa bakajanike kumuswaangano.

Kumuswaangano ooyu, bakwesu baku Indonesia bakakkomana kuswaangana ababunyina Banakristo bazwa kumasi aambi, kubikkilizya abakwesu bobilo bamukabunga keendelezya, ba Frederick Franz aba Grant Suiter. Mukwesu umwi mweenzu wakaamba kuti: “Bakwesu balibonya kuti balikkomene kapati kuno; baile kuseka-seka akumweta-mweta.”

Bantu bainda ku 750 bakajanika kumuswaangano ooyu, alimwi ibali 34 bakabbapatizyigwa. Ba Ronald Jacka bakaamba kuti: “Muswaangano ooyu mupati wakapa kuti bantu bajisi luyandisisyo banji bakajatisye kasimpe. Alimwi wakapa kuti bakwesu basungwaale mumulimo wa Leza.”