Cikolo Cabapainiya kufwaafwi a Zugdidi
GEORGIA | 1998-2006
Zilongezyo “Muziindi Zili Kabotu Amuziindi Zyamapenzi.”—2Tim. 4:2.
KUTALIKILA kumamanino aamyaka yamuma 1990 kuyakumbele, Bakamboni mucisi ca Georgia bakakkomana akuyungizyika kwamweelwe wabasikumwaya alimwi abasikutondezya luyandisisyo. Mu 1998, bantu bataleli ku 32,409 bakajanika ku Ciibalusyo calufwu lwa Kristo.
Nokuba boobo, basikumwaya banji, kubikkilizya abaalu, bakali bapya mukasimpe alimwi tiibakajisi luzyibo lunji. Banji bakali kuyandika kuyiisyigwa zintu ziindene-indene kujatikizya milimo yakumuuya. Pele ino lwiiyo luli boobu lwakali kuyoopegwa buti?
Mbunga ya Jehova Yapa Lugwasyo Luyungizyidwe
Ba Arno aba Sonja Tüngler, basikumanizya lwiiyo lwa Gileadi ku Germany, bakatumwa kuyoobelekela kucisi ca Georgia mu March 1998. Mumwaka nguwenya ooyu, Kabunga Keendelezya kakazumizya kuti kube ofesi mucisi ca Georgia, eeyi ofesi yakali kunikweendelezyegwa amutabi wakucisi ca Russia.
Kkomiti Yamucisi ca Georgia cakufwambaana yakatalika kweendelezya mulimo wakukambauka. Milimo yesu mboyakazumizyigwa buyo amfwulumende, mabbuku aamba zyamu Bbaibbele akatalika kutumwa kuzwa kumutabi eeco ciindi iwakali kwiitwa kuti mutabi wacisi ca Germany (lino wiitwa kuti mutabi wa Central Europe. Kuzumizyigwa mumulawo amfwulumende kwakapa kuti cikonzyeke kuula masena aakali kuyooyakilwa Maanda aa Bwami alimwi amaofesi aamutabi.
Ciindi Cakuyiisya Zintu Zyakumuuya
Basikumwaya banji tiibakaningakambaukide cakwaanguluka kuŋanda aŋanda mumyaka minji mulimo wesu nowakakasyidwe ansi abweendelezi bwa Soviet Union. Ba Arno Tüngler balayeeya kuti: “Basikumwaya banji bakali kukambaukila mumigwagwa, pele tabali boonse ibakazyibide kukambauka kuŋanda aŋanda alimwi ibakali kupilukila kubantu ibatondezya luyandisisyo.”
Ba Arno aba Sonja Tüngler
Ba Davit Devidze, ibakatalika kubeleka mukkomiti mpya yamucisi mu May 1999 bakaamba kuti: “Kwakali mulimo mupati wakubeleka mumuunda aku Bbeteli. Kwakali zintu nzyotwakabalide pele nzyotwatakazyi mbozicitwa. Aboobo twakali kulangilila akwiiya kubakwesu bajisi luzyibo ibakali kutumwa a Kabunga Keendelezya.”
Ciindi cakubayiisya cakulomya bakwesu bamucisi ca Georgia cakatalika. Pele mbubwenya mbocibede kuli baabo ibaunka kuyoobelekela kubusena kubulide, bubotu bujanika mukuyiisya bamwi tabuli buyo kulubazu lomwe. (Tus. 27:17) Masimpe aabo boonse ibakaboolela kugwasyilizya bakaiya zinji kuzwa kubakwesu abacizyi banyenzi.
Bakamboni Banyenzi Batondezya Bube Bubotu
Ba Arno aba Sonja balayeeya zintu zikkomanisya kujatikizya mbobakatambulwa caluyando abakwesu nobakasika mucisi ca Georgia. Bakwesu abacizyi banyenzi bakacita nzyobakali kukonzya kutegwa babagwasye kuzyibila mumulimo wabo mupya.
Ba Sonja balayeeya mbobakatondezyegwa bwaabi. Bakaamba kuti: “Banabukwetene ibakali kukkala munsi-munsi bakali kutuletela zyakulya zibotu. Mucizyi umwi iwakali kweenda andiswe mumulimo wamumuunda, wakatugwasya kwiizyiba mbungano yesu mpya, alimwi wakali kutwaambila zinji kujatikizya zilengwa zyamucisi ca Georgia. Mucizyi uumbi cakukkazika moyo wakatuyiisya mwaambo waci Georgian.”
Ba Warren aba Leslie Shewfelt, ibakatumwa kuyoobelekela kucisi ca Georgia kuzwa kucisi ca Canada mu 1999 bakaamba kuti: “Twakakkomana akulumba kapati akaambo kaluyando ndobakali kutondezya kulindiswe bakwesu abacizyi bakucisi ca Georgia. Boonse kubikkilizya abana, bakali kutondezya mbobakali kulimvwa akutondezya luyando kuli umwi aumwi.”
Bakwesu banyenzi bakali kubelekela antoomwe abamisyinali ibakajisi luzyibo kuofesi yamucisi
Aabo ibakali kutumwa kuyoobelekela kucisi ca Georgia kuzwa kumasi aambi bakali kubikkila maano kubube bubotu bwabantu bamucisi eeci kutali kubuyumuyumu mbobakali kujana. Kulicesya alimwi akucita zintu munzila yaluyando kwabamisyinali aaba kwakapa kuti bayandwe kapati abakwesu bamucisi ca Georgia.
Bantu Bayoowa Leza Batambula Kasimpe
Mumyaka yamuma 1990 yoonse, bantu banji babombe myoyo bakazumanana kutambula kasimpe. Mumwaka wa 1998 ulikke, bantu bali 1,724 bakabbapatizyigwa. Ino ncinzi cakapa kuti bantu banji boobu bakucisi ca Georgia batondezye luyandisisyo mukasimpe?
Ba Tamazi Biblaia, ibakabeleka kwamyaka minji kabali mulangizi weendeenda bakaamba kuti: “Kuyanda Jehova cakali cintu cimwi ncobakali kukulwaizyigwa bantu. Aboobo ciindi notwakali kubaambila mulumbe wamu Bbaibbele, bakali kuutambula munzila iitakatazyi.”
Ba Davit Samkharadze, ibayiisya mu Cikolo Cabakambausi ba Bwami, bakaamba kuti: “Ciindi muntu natalika kwiiya Bbaibbele, kanji-kanji banamukwasyi abasimukobonyina balanyonganya. Ciindi nobasoleka kumutyompya kuti aleke kwiiya Bbaibbele, bunji bwabo kanji-kanji abalo balatalika kwiiya Bbaibbele!”
Kasimpe ka Bwami nokakali kuyaabumwaika, bantu banji bakacinca maumi aabo. Mu April 1999, kuyungizyika kwakumuuya kwakasika amweelwe mupya waatala cakuti bantu ibali 36,669 bakajanika ku Ciibalusyo.
“Kuli Basikukazya Banji”
Kujatikizya bukambausi bwakwe mu Efeso yansiku, mwaapostolo Paulo wakalemba kuti: “Nkaambo ndajalwidwa mulyango mupati uutola kumulimo, pele kuli basikukazya banji.” (1Kor. 16:9) Nzyaakaamba zilatondezya kabotu-kabotu bukkale mbobakayaanya Bakamboni mucisi ca Georgia nokwakainda buyo myezi misyoonto kuzwa ciindi eeciya bantu banji nobakajanika ku Ciibalusyo mu 1999.
Mu August mumwaka nguwenya uulya, bantu ibakali kuzulilwa mukabunga kacikombelo ca Orthodox, ibakali kusololelwa a Vasili Mkalavishvili iwakakasyigwa kubeleka mulimo wabupaizi mucikombelo cakwe, bakaumpa mabbuku eesu aantangalala mu Tbilisi. Eeci cakapa kuti ciindi cakupenzyegwa citalike calo icakatola myaka yone.
Kutalikila mu 1999, bantu mucisi ca Georgia bakali kucita manyongwe akaambo ka Bakamboni ba Jehova alimwi Bakamboni bakali kuumpilwa mabbuku akuumwa
Mu October 17, 1999, basimanyongwe aabukombi bakaboola kabali nkamu yabantu ibakali kubalilwa ku 200 akunyonganya muswaangano wambungano ya Gldani mu Tbilisi. Kubelesya zisamu aziingano zyazibulo, bakabauma akubacisa bantu bakajanika kumuswaangano, calo icakapa kuti Bakamboni banji bajatwe mumalo kucibbadela.
Cuusisya ncakuti basimanyongwe aabo tiibakaangwa pe, alimwi kuuma akucisa Bakamboni kwakazumanana. Bapati-pati bamfwulumende kubikkilizya a Pulezidenti Shevardnadze, bakaamba kuti kulwana Bakamboni ooku kwakali kubi, pele kunyina ntaamu yakabwezyegwa pe kumana penzi eeli. Bunji bwaziindi, bamapulisa bakali kusika kabaunkide kale basikulwana.
Aciindi eeci nciconya, umwi wamuŋanda yamilawo, Guram Sharadze, wakatalika kuyunga bantu kwiinda mukwaamba zintu zibi kujatikizya Bakamboni. Wakabejekezya Bakamboni kuti bakali bantu babi kapati. Cakalibonya kuti ‘ziindi zili kabotu’ zyakukambauka makani mabotu zyakalimanide.
Mbunga ya Jehova Yakabweza Ntaamu Kugwasya Bakwesu Kuli Basikukazya
Mbunga ya Jehova yakabweza ntaamu cakufwambaana kugwasya Bakamboni bamucisi ca Georgia. Bakwesu bakatambula malailile aagwasya aajatikizya nzyobakeelede kucita kuti naa bantu babalwana. Alimwi bakayeezyegwa twaambo Banakristo bakasimpe zimwi ziindi ncobaliyumya mukupenzyegwa.—2Tim. 3:12.
Kuyungizya waawo, mbunga ya Jehova yakabweza ntaamu yakukwabilila bakwesu kwiinda mukutola milandu eeyi kunkuta. Mukwesu iwakali kubelekela mu Dipatimenti Yamilawo kumutabi wamucisi ca Georgia ulayeeya mbozyakacitika kati: “Mumyaka eeyo yone, twakalembya kumbunga ziindene-indene alimwi akubeendelezi bamfwulumende milandu iinda ku 800 iijatikizya nzyobakali kucita bamukabunga ka Vasili Mkalavishvili. Twakalomba kugwasyigwa kubapati-pati bamfwulumende kubikkilizya akumbunga zisumpula zyeelelo zyabantu. Maofesi mapati aa Bakamboni ba Jehova akabweza ntaamu yakwaambilizya milandu eeyi kubuleya, pele kulwanwa tiikwakaleka pe.”a
a Kutegwa muzyibe zinji kujatikizya mbotwakalwanina lwaanguluko lwesu lwabukombi, amubone Sinsimuka! yamu Chingisi ya January 22, 2002, mapeeji 18-24.