Ino Mbaani Baunka Kujulu?
Bwiinguzi bwamu Bbaibbele
Leza wasala mweelwe musyoonto wa Banakristo basyomeka balo ibayoobusyigwa akuunka kujulu. (1 Petro 1:3, 4) Kufwumbwa basalwa, beelede kuzumanana kuba alusyomo luyumu lwa Bunakristo alimwi akuzumanana kuba bukkale busalala kutegwa bakatambule cikono cabo cakujulu.—Baefeso 5:5; Bafilipi 3:12-14.
Ino aabo baunka kujulu banoocita nzi ooko?
Banoobelekela antoomwe a Jesu kabali bami abapaizi kwamyaka iili 1,000. (Ciyubunuzyo 5:9, 10; 20:6) Bayoopanga “majulu mapya,” naa mfwulumende yakujulu yalo iiyoolela “nyika mpya,” naa ciinga cabantu anyika. Aabo baleli bakujulu bayoogwasya bantu kuba mubukkale bubotu alimwi bwalo Leza mbwaakali kuyanda kuzwa kumatalikilo.—Isaya 65:17; 2 Petro 3:13.
Ino bali bongaye ibayoobusyigwa kuunka kujulu?
Ibbaibbele lyaamba kuti bantu bali 144,000 bayoobusyigwa akuunka kuyoopona kujulu. (Ciyubunuzyo 7:4) Mucilengaano cilembedwe mulugwalo lwa Ciyubunuzyo 14:1-3, mwaapostolo Johane wakabona “Mwanaambelele kaimvwi aa Cilundu ca Ziyoni.” Mucilengaano eeci, “Mwanaambelele” wiiminina Jesu iwakabusyigwa. (Johane 1:29; 1 Petro 1:19) “Cilundu ca Ziyoni” ciiminina ciimo cisumpukide ca Jesu alimwi aba 144,000 ibayoolela anguwe kujulu.—Intembauzyo 2:6; Bahebrayo 12:22.
Aabo “ibakaitwa, ibakasalwa” kuyoolela a Kristo mu Bwami bwaamba kuti ‘katanga kaniini.’ (Ciyubunuzyo 17:14; Luka 12:32) Eeci caamba kuti banooli buyo basyoonto kweezyanisya amweelwe woonse wambelele zya Jesu.—Johane 10:16.
Mizeezo iitaluzi kujatikizya baabo baunka kujulu
Muzeezo uutaluzi: Bantu boonse bacita zintu zibotu baunka kujulu.
Kaambo kaluzi: Leza ubasyomezya buumi butamani anyika bantu banji bacita zintu zibotu.—Intembauzyo 37:11, 29, 34.
Jesu wakaamba kuti: “unyina muntu wakatanta kuya kujulu.” (Johane 3:13) Aboobo wakatondezya kuti bantu ibakali kucita zintu zibotu ibakafwa katanafwa walo, mbuli Abrahamu, Musa, Jobu, alimwi a Davida tiibakaunka kujulu pe. (Milimo 2:29, 34) Muciindi caboobo, bakajisi bulangizi bwakubusyigwa akupona anyika.—Jobu 14:13-15.
Bubuke bwabuumi bwakujulu bwiitwa kuti ‘bubuke bwakusaanguna.’ (Ciyubunuzyo 20:6) Eeci citondezya kuti kunooli bubuke abumbi. Bunooli bubuke bwabaabo ibayookkala anyika.
Bbaibbele liyiisya kuti mubweendelezi bwa Bwami bwa Leza, “lufwu talukabi limbi.” (Ciyubunuzyo 21:3, 4) Cisyomezyo eeci kweelede kuti caamba anyika, nkaambo kayi kujulu takunabede lufwu.
Muzeezo uutaluzi: Muntu umwi aumwi ulalisalila kuti naa uyanda buumi bwakujulu naa bwaanyika.
Kaambo kaluzi: Leza nguusala Banakristo basyomeka ibatambula “bulumbu bwakujulu,” nkokuti bulangizi bwabuumi bwakujulu. (Bafilipi 3:14) Kulombozya kwamuntu naa makanze kunyina lubazu mukusalwa kwamuntu.—Matayo 20:20-23.
Muzeezo uutaluzi: Bulangizi bwabuumi butamani anyika mbwaansi kapati, ibupegwa buyo baabo ibateeleli kuunka kujulu.
Kaambo kaluzi: Leza waamba baabo ibayootambula buumi butamani anyika kuti ‘bantu bangu,’ “basale bangu,” alimwi akuti “balelekedwe a Jehova.” (Isaya 65:21-23) Bayooba acoolwe cakuzuzikizya makanze aa Leza aakusaanguna kujatikizya bantu—buumi butamani kabalondokede muparadaiso anyika.—Matalikilo 1:28; Intembauzyo 115:16; Isaya 45:18.
Muzeezo uutaluzi: Mweelwe wa 144,000 waambidwe mulugwalo lwa Ciyubunuzyo ngwacikozyanyo, tauli mweelwe wini.
Kaambo kaluzi: Nokuba kuti lugwalo lwa Ciyubunuzyo lujisi manamba aacikozyanyo, manamba amwi aabelesyedwe manamba eeni. Mucikozyanyo, lwaamba “mazina aali 12 aabaapostolo bali 12 ba Mwanaambelele.” (Ciyubunuzyo 21:14) Amubone bumboni bupa kusinizya kuti mweelwe wa 144,000 awalo weelede kubonwa kuti mweelwe wini.
Lugwalo lwa Ciyubunuzyo 7:4 lwaamba “mweelwe wabaabo bakabikkwa ciganto [naa, ibali masimpe kuti baunka kujulu], bakali 144,000.” Tupango tujatikizya kapango aaka, tulaamba nkamu yabili: “nkamu mpati yabantu batakonzyi kubalwa amuntu uuli woonse.” Aabo ibali ‘munkamu mpati’ abalo balafwutulwa a Leza. (Ciyubunuzyo 7:9, 10) Ikuti naa mweelwe wa 144,000 ncikozyanyo buyo, kwaamba nkamu iinyina mweelwe, nkokuti kwiindana akati kankamu zyobilo eezyi inga tiikwalibonya.a
Kuyungizya waawo, ba 144,000 baambwa kuti “bakaulwa akati kabantu kuti babe micelo mitaanzi.” (Ciyubunuzyo 14:4) Majwi aakuti “micelo mitaanzi” aamba bantu basyoonto buyo ibasalwa kuti babe baiminizi. Aamba baabo ibayoolela a Kristo kujulu, ikulela bantu bataambidwe mweelwe ibanooli anyika.—Ciyubunuzyo 5:10.
a Mbubwenya buyo, Professor Robert L. Thomas, wakalemba boobu kujatikizya mweelwe wa 144,000 waambidwe mulugwalo lwa Ciyubunuzyo 7:4: “Eeyi ninamba ini mukwiimpana anamba yaambidwe kuli 7:9. Ikuti naa yaambwa kuti njacikozyanyo, nkokuti kunyina namba iili mubbuku iikonzya kwaambwa kuti ninamba ini.”—Ciyubunuzyo 1-7: An Exegetical Commentary, page 474.