Sena Mubili wa Jesu Wakali Wanyama Naa Wamuuya Naakabusyigwa?
Bwiinguzi bwamu Bbaibbele
Bbaibbele lyaamba kuti Jesu “wakajaigwa kali amubili wanyama pele wakabusyigwa amubili wamuuya.”—1 Petro 3:18; Milimo 13:34; 1 Bakorinto 15:45; 2 Bakorinto 5:16.
Majwi ngaakaamba Jesu atondezya kuti tanaakali kuyoobusyigwa amubili wanyama uujisi bulowa. Wakaamba kuti wakali kuyoopa cinunuzyo kubantu kwiinda mukupa ‘mubili wakwe kutegwa nyika ibe abuumi.’ (Johane 6:51; Matayo 20:28) Ikuti naakabusyigwa amubili wanyama, naatakapa cituuzyo cacinunuzyo. Pele eeci nocatakacitika akaambo kakuti Bbaibbele lyaamba kuti wakatuula mubili wakwe abulowa “ciindi comwe buyo.”—Bahebrayo 9:11, 12.
Ikuti Jesu wakabusyigwa amubili wamuuya, ino basikwiiya bakwe bakamubona buti?
Zilenge zyamuuya zilakonzya kusama mibili yanyama. Mucikozyanyo, kaindi bangelo ibakacita oobo bakali kulya akunywa antoomwe abantu. (Matalikilo 18:1-8; 19:1-3) Nokuba boobo, bakacili zilenge zyamuuya alimwi bakali kukonzya kwiisamununa mibili yanyama.—Babetesi 13:15-21.
Naakabusyigwa Jesu, wakasama mubili wabuntu kwakaindi kasyoonto, mbubwenya mbobakali kucita bangelo kaindi. Pele mbwaanga wakali cilenge camuuya, wakali kulibonya mpoonya akuzibaana mukaindi kasyoonto. (Luka 24:31; Johane 20:19, 26) Mibili yanyama njaakali kusama tiiyakali kukozyanya. Aboobo, nobaba balongwe bakwe Jesu bakali kumuzyibila kujwi naa zintu nzyaakali kucita.—Luka 24:30, 31, 35; Johane 20:14-16; 21:6, 7.
Ciindi Jesu naakalibonya kumwaapostolo Tomasi, wakasamide mubili wakajisi zibata zyazilonda. Wakacita oobo kutegwa ayumye lusyomo lwa Tomasi akaambo kakuti Tomasi wakali kudooneka kuti Jesu wakabusyigwa.—Johane 20:24-29.