Éxodo
15 Amacha kilhtamaku, Moisés chu israelitas kilhtlinikgolh Jehová uma takilhtlin:
«Nakkilhtlini Jehová xlakata lu lakgapaskanit xlilanka.
Kawayu chu tiku xkgewilakgo kamakalh kpupunu.
2 Kilitliwakga wa Jehová,* xlakata xla kilakgmaxtuna litaxtunit.
Xla kiDios, chu akit naklichuwinan xlilanka; xla xDios kintlat, chu akit nakmalanki.
3 Jehová chatum tliwakga soldado. Xtukuwani wa Jehová.
4 Kpupunu kamalakgachalh xputlaw chu lhuwa ksoldados faraón,
chu tlakg xalaktlan ksoldados lakgtsankgakgolh kxaSpinini pupunu.
5 Taʼakgayawana kamakgtsilh chu xtachuna la chiwix lakgtsankgakgolh kxtampun.
6 Mimpakgastakat, oh, Jehová, lu tliwakga.
Mimpakgastakat, oh, Jehová, masputu talatlawana.
7 Wix lu lanka chu wa xlakata kamakgatlajaya tiku lakatakikgoyan.
Mintasitsi xtachuna la lhkuyat, chu kalhkuyu chuna la paja.
8 Mijaxanat machayawakgolh chuchut;
tlawa pi pupunu kaks xtawi chu xtachokgokgolh taʼakgayawana.
Kxʼitat pupunu, taʼakgayawana lakpalhalh.
9 Kintalatlawanakan wankgolh: “¡Kakaputsastalaniw chu kakamataxtukwi!
¡Naʼakgchipayaw putum tuku kgalhikgo, nakamakglhtiyaw putum tuku lakaskinaw!
¡Kiʼespadajkan nakalimakgniyaw!”.
10 Wix sunu chuchut, chu pupunu kamakgtsilh.
Xlakan lakgtsankgakgolh chuna la laklanka chiwix ktliwakga chuchut.
11 ¿Tiku Dios xtachuna la wix, oh, Jehová?
Wix lu xasanto, ni anan atanu Dios chuna la wix.
Wix tiku lakgchanan napekuanikana chu nalimalankikana takilhtlin, tiku tlawa tuku kaks malakawaninan.
12 Stonkgti mimpakgastakat, chu tiyat kakgotwalh.
13 Kalipulalipi tapaxkit nema ni makgxtakgnan kachikin nema lakgmaxtu.
Nakalipulalipina militliwakga kxasanto niku lapat.
14 Kachikinin nakgaxmatkgo. Xlakan napekuankgo.
Latamanin xalak Filistea nakgalhikgo lanka takatsanajwat.
15 Uma kilhtamaku, napuxkun* xalak Edom lu napekuankgo.
Lakgtliwakga mapakgsinanin xalak Moab nalhpipikgo.*
Putum latamanin xalak Canaán napekuankgo.
16 Xlakan lu napekuankgo chu nalhpipikgo.
Xlakata mimakxpan lu tliwakga, nila katitatsuwikgolh chuna la akgtum chiwix
asta akxni natitaxtu minkachikin, oh, Jehová,
asta akxni natitaxtu kachikin nema wix lakkaxwilinita.
17 Wix nakalitana chu nakalakkaxwiliya ksipi nema tapakgsiniyan,
sipi nema lakkaxwilinita xlakata mimputawilh nalitaxtu, oh, Jehová,
anta niku xasanto nema mimakan lilakkaxwilinita, oh, Jehová.
18 Jehová putum kilhtamaku namapakgsinan.
19 Akxni kawayu, putlaw nema maklakaskinkan kʼguerra chu tiku xkgewilakgo xkawayu faraón tajukgolh kpupunu,
Jehová tlawalh pi chuchut xtaspitpa chuna la xwi xapulana chu xkamakgtsilh,
pero israelitas tlawankgolh niku xkaskaknit kxʼitat pupunu».
20 Chu palakachuwina Míriam, xtala Aarón, tiyalh akgtum pandereta, chu putum lakpuskatin stalanikgolh, tsukukgolh tantlikgo chu tlakgkgo pandereta. 21 Míriam xkakgalhti lakchixkuwin akxni xkilhtlima chu xwan:
«Kakilhtlinitit Jehová, xlakata talankinit.
Kawayu chu tiku xkgewilakgo kamakalh kpupunu».
22 Alistalh, Moisés katataxtulh israelitas kxaspinini pupunu. Ankgolh kxakaskakni xtiyat Sur chu akgtutu kilhtamaku tlawankgolh kxakaskakni tiyat chu ni xtekgskgo chuchut. 23 Chu chankgolh kMará,* pero nila xwakgo chuchut nema xwi kMará xlakata xun xwanit. Wa xlakata anta limapakuwilh Mará. 24 Wa xlakata kachikin nitlan tsukukgolh lichuwinankgo Moisés. Xwankgo: «¿Tuku nalikgotnanaw?». 25 Moisés tasaskinilh tamakgtay Jehová, chu Jehová lilh niku xya kgantum kiwi. Wa xlakata Moisés makalh kiwi kchuchut chu chuchut xasakgsi wa.
Anta Dios wililh akgtum limapakgsin chu kamasiyanilh tuku xlitlawatkan xwanit, chu Dios xkatsiputun tuku xwi kxnakujkan. 26 Kawanilh: «Akit Jehová, miDioskan, komo kuenta natlawayatit kintachuwin, chu natlawayatit tuku tlan kakxilha, chu komo kuenta natlawayatit tuku kskin chu nakgalhakgaxpatatit kilimapakgsin, ni ktikamalakgachanin tajatat nema kkamalakgachanilh egipcios; xlakata akit, Jehová, kkamapaksaman».
27 Alistalh chankgolh kʼElim, niku xʼanan akgkutiy taxtunu* chu tutumpuxamakaw mokgot. Wa xlakata anta yawakgolh xchikkan xaxuwa, lakatsu kchuchut.