Xlimaktum Samuel
24 Akxni Saúl xkitaspitnita chuna la xkakitalatlawanit filisteos, makatsinika: «David wi kxakaskakni tiyat xla En-Guedí».
2 Wa xlakata Saúl kalilh akgtutu milh tlakg xalaktlan soldados xalak Israel chu alh putsa David chu ksoldados kxakachiwixni talhpan* niku anankgo cabras xalak kakiwin. 3 Alistalh Saúl chalh niku xkalakgatalanukan borregos. Uma niku xkalakgatalanukan borregos xkalitlawakanit chiwix chu xwilakgolh lakatsu ktiji. Anta xwi akgtum lanka lhuku chu tanulh anta xlakata naʼan kbaño. Pero David chu ksoldados na anta xtanumakgolh. 4 Ksoldados David wanikgolh: «Uma kilhtamaku Jehová waniman: “Kaʼakxilhti, kmakamaxkiyan mintalatlawana. Katlawani tuku wix tlan akxilha”». Wa xlakata David tayalh, chu tsekg chukunilh xkilhpan xapakgaxtuluwa klhakgat Saúl. 5 Pero alistalh David nitlan xlimakgkatsima kxnaku* xlakata chukunilh xkilhpan xapakgaxtuluwa klhakgat Saúl. 6 Kawanilh ksoldados: «Nila ktlawani uma kimalana, xlakata wa xtalaksakni Jehová. Xlakata kkatsi la akxilha Jehová, nikxni xaktlawanilh tuku nitlan xtalaksakni Jehová». 7 Umakgolh tachuwin, David kalimachokgolh* ksoldados chu ni mastalh talakaskin pi xtlawanikgolh tuku nitlan Saúl. Pero Saúl taxtulh klhuku chu chuntiya tlawalh.
8 Alistalh David tayalh chu taxtulh klhuku chu pixlanka lakgkilhalh Saúl: «¡Kimapakgsina, tiku lhuwa kgalhi kakni!». Akxni Saúl talakgaspitli, David talakgatsokgostalh chu takilhputalh. 9 David kgalhskilh Saúl: «¿Tuku xlakata kakgaxpatniya tiku wanikgoyan “David tlawaniputunan tuku nitlan”? 10 La uku tlan akxilha pi Jehová xmakamastanitan kkimakan klhuku. Kiwanika pi xakmakgnin, pero klakgalhaman chu klakpuwa: “Ni kaktitlawanilh tuku nitlan kimalana, xlakata wa xtalaksakni Jehová”. 11 Chu kaʼakxilhti, kintlat, kaʼakxilhti xkilhpan xapakgaxtuluwa milhakgat nema kchipanit. Akxni kchukulh, tlan xaktimakgnin, pero nichuna ktlawalh. La uku tlan akxilha pi ni ktlawaniputunan tuku nitlan nipara klakatakiputunan. Akit ni kmakglakgalhinanit kmilakatin. Pero wix kimputsapat xlakata kimakgniputuna. 12 Jehová kakinkalakputsananin wix chu akit. Wa Jehová kamalakgaxokgen kimpalakata. Pero akit, akit ni klakpuwan pi wi tuku naktlawaniyan. 13 Chuna la wan xamakgan proverbio, “Tiku nitlan likatsikgo tlawakgo tuku nitlan”. Wa xlakata akit ni kaktitlawanin tuku nitlan. 14 ¿Tiku chipaputun mapakgsina xalak Israel? ¿Tiku putsastalanipat? ¿Akit, tiku klitaxtu la tantum xanin chichi, kaj tantum akgtsis? 15 Jehová juez kalitaxtulh chu kakinkalakputsananin wix chu akit. Xla naʼakxilha uma chu nakinkgalhmakgtaya. Natlawa tuku xaʼakgstitum kimpalakata chu nakilakgmaxtu kmimakan».
16 Akxni David wanikgolh uma tachuwin, Saúl kgalhskilh: «David, kinkgawasa, ¿wix tiku chuwinampat?». Chu Saúl pixlanka tsukulh tasa. 17 Chu wanilh David: «Wix tlakg xaʼakgstitum nixawa akit, xlakata wix tlan kilikatsininita chu akit lu nitlan klikatsininitan. 18 Kiwaninita tuku tlawanita kimpalakata, xlakata Jehová kimakamastalh kmimakan pero ni kimakgni. 19 ¿Tiku tekgsa xtalatlawana chu nitu tlawani? Jehová nasikulunatlawayan xlakata tuku tlawanita kimpalakata. 20 Kakinkgaxpatni, la uku liwana kkatsi pi wix mapakgsina nalitaxtuya chu putum kilhtamaku namapakgsinana kʼIsrael. 21 Chu la uku, kakimalaknuni kxtukuwani Jehová pi ni katikamasputu kinkamanan akxni akit nialh klama nawan. Kakimalaknuni pi ni katimalakgsputu kintukuwani kxfamilia kintlat». 22 Wa xlakata David chuna malaknunilh Saúl. Alistalh Saúl alh kxchik chu David katatalakakxtulh ksoldados niku xtatsekgmakgo.