Colosenses
4 Malananin,* xaʼakgstitum chu chuna la xlilat kakalikatsinitit milakskujninkan, xlakata wixin katsiyatit pi na kgalhiyatit chatum Malana kʼakgapun.
2 Ni kalimakgxtakgtit chuna la tlawayatit mioracionkan, chu akxni chuna natlawayatit, skgalalh katawilatit chu kapaxtikatsinitit Dios. 3 Nachuna, katlawatit oración kimpalakatakan, xlakata Dios nakinkamalakkiniyan akgtum malakcha* xlakata tlan naklichuwinanaw xtachuwin, xlakata tlan nakmakatsininanaw tuku tsekg wi xla Dios xpalakata Cristo, xpalakata tuku akit klitanuma kpulachin, 4 na katlawatit oración xlakata tlan naklichuwinan chuna la xlilat.
5 Kalimasiyatit liskgalala kxlakatinkan tiku ni makgtapakgsikgo kcongregación, liwana kalimaklakaskintit minkilhtamakujkan* xlakata natlawayatit tuku xlakaskinka. 6 Putum kilhtamaku tlan katakgaxmatli mintachuwinkan, xtachuna la xlimakgamitit matsat, xlakata nakatsiyatit chuna la nakakgalhtiyatit chatunu chatunu lataman.
7 Tíquico, tala tiku kpaxki, kintaskujni chu kskujni Malana tiku ni makgxtakga, putum nakalitachuwinanan tuku kiʼakgspulama. 8 Kkamalakgachaniman xlakata nakatsiyatit la* kwilanaw chu xlakata tlan namamakgkatsini minakujkan. 9 Akxtum taʼamacha Onésimo, kintala tiku lu paxkikan chu ni makgxtakgnan, tiku mintachikikan; xlakan nakawanikgoyan tuku lama unu.
10 Aristarco, tiku akxtum kintatanuma kpulachin, kamalakgachaniyan tamakgachipat chu nachuna Marcos xtapuxnimat Bernabé (ama tiku kkalistakyawan pi xatapaxuwan namakgamakglhtinanatit komo xkalakganchan), 11 chu Jesús tiku wanikan Justo, tiku makgtapakgsikgo ama tiku kaʼakstilichukunikanit kxuwa xlichixkukan.* Kajwatiya umakgolh akxtum kintaskujmakgo xlakata naklichuwinan xTamapakgsin Dios, chu xlakan litaxtukgonit tiku tlan kimamakgkatsinikgo.* 12 Epafras, mintachikikan tiku kskujni Cristo Jesús, kamalakgachaniyan tamakgachipat. Xla putum kilhtamaku tlawa oración mimpalakatakan xliputum xnaku, xlakata tliwakga takanajla nakgalhiyatit chu xlakata liwana nakatsiyatit pi Dios natlawa putum tuku wan. 13 Xlakata akit liwana kkatsi pi lu liskuja mimpalakatakan chu xpalakatakan natalan xalak Laodicea chu xalak Hierápolis.
14 Tala tiku lu paxkikan, makuchina Lucas, kamalakgachaniyan tamakgachipat, chu nachuna Demas. 15 Kakamaxkitit kintamakgachipat natalan xalak Laodicea chu nachuna Ninfa chu congregación nema tamakxtumi kxchik. 16 Akxni likgalhtawakganitantita nawan uma tatsokgni, kamalakgachatit kcongregación xalak Laodicea, xlakata na nalikgalhtawakgakan anta, chu kaskintit pi kakamalakgachanikantit tatsokgni nema kmalakgachalh kLaodicea xlakata na nakalikgalhtawakganikanatit. 17 Nachuna, kawanitit Arquipo: «Chuntiya lu kaskujti xlakata namakgantaxtiya taskujut nema maxkin Malana».
18 Akit, Pablo, kkatsokgnaniman kintamakgachipat. Chuntiya kalakapastaktit pi ktanuma kpulachin. Kakgalhitit xtalakgalhaman Dios nema ni anan xtachuna.*