Lucas
16 Alistalh Jesús kawanilh xtamakgalhtawakgen: «Chatum chixku tiku lhuwa tuku xkgalhi, wanika: “Miskujni* nitlan limaklakaskima tuku tapakgsiniyan”. 2 Wa xlakata xla tasanilh chu wanilh: “Nitlan tuku kkgaxmatma mimpalakata. Kapit chu katsokgwili chuna la limaklakaskinita kintumin, nialh ktimaxkin talakaskin nakuentajtlawaya kinchik”. 3 Alistalh skujni xʼakstu lakpuwa: “¿Tuku naktlawa, xlakata kimalana kimakglhtima kintaskujut tuku xaklakgaya? Nialh kkgalhi litliwakga xlakata nakskuja kpukuxtu, chu kmaxanan nakskiwayan. 4 Aya kkatsi tuku naktlawa xlakata akxni nakimakglhtikan taskujut nema klakgaya, naʼanan tiku nakimakgamakglhtinankgo kxchikkan”. 5 Chu xla katasanilh chatunu chatunu tiku xlaklinikgo xmalana. Wanilh xapulana: “¿La* xlilhuwa laklipiniya kimalana?”. 6 Xla kgalhtilh: “Akgtiy mil akgtiy ciento litro* aceite xla oliva”. Xla wanilh: “Uwi minkapsnat niku kintalakkaxla, katawila chu tunkun katsokgti, akgtum mil akgtum ciento litro aceite”. 7 Alistalh, wanilh achatum: “Chu wix, ¿la* xlilhuwa laklipina?”. Xla wa: “Akgtum ciento kuxtalh* xla trigo”. Xla wanilh: “Uwi minkapsnat niku kintalakkaxla, katsokgti tatipuxam”. 8 Chu xmalana tlan akxilhli tuku xtlawanit kskujni, maski ni xaʼakgstitum xwanit, xlakata limaklakaskilh xliskgalala. Chuna kkawaniyan, xlakata xlakgkgawasan uma kakilhtamaku* tlakg lakgskgalalan xlakata tuku tlawakgo, nixawa xlakgkgawasan xkgakganat.
9 »Nachuna kkawaniyan: kalimaklakaskintit tuku xtapalh kgalhiyatit kkakilhtamaku xlakata nakgalhiyatit tiku nakatalalinan, xlakata akxni tuku kgalhiyatit nasputkgo, umakgolh tiku katalalinan nakamakgamakglhtinankgoyan anta niku putum kilhtamaku tlan tawilakan. 10 Tiku ni makgatsankganani Dios akxni ni lhuwa, na ni makgatsankganani akxni lhuwa. Chu tiku ni tlawa tuku xaʼakgstitum akxni ni lhuwa, na ni tlawa tuku xaʼakgstitum akxni lhuwa. 11 Wa xlakata, komo wixin ni limasiyanitantit pi tlan maklakaskinatit tuku xtapalh kgalhiyatit nema nitlan, ¿tiku nakalakgayawayan tuku xlikana kgalhi xtapalh? 12 Chu komo wixin ni limasiyanitantit pi tlan maklakaskinatit tuku tapakgsini achatum, ¿tiku nakamaxkiyan tuku milakan nawan? 13 Ni anan chatum skujni tiku tlan naskujnani chatiy malana, xlakata nasitsini chatum chu napaxki achatum, o namaxki kakni chatum chu nalakgmakgan achatum. Nila nalitaxtuyatit xlakskujnin Dios chu xlakskujnin Tumin».
14 Ama kilhtamaku, fariseos tiku lu xpaxkikgo tumin, xkgaxmatmakgolh putum uma chu lixkajni xlakawanikgo. 15 Wa xlakata kawanilh: «Wixin tiku miʼakstukan xaʼakgstitum kalimaxtukanatit kxlakatinkan latamanin, pero Dios lakgapasa minakujkan. Xlakata tuku latamanin lakpuwankgo pi kgalhi kakni, Dios xalixkajni akxilha.
16 »Xtatsokgnikan Palakachuwinanin chu Limapakgsin lichuwinankgolh asta kxkilhtamaku Juan. Lata ama kilhtamaku, xatlan tamakatsinin xlakata xTamapakgsin Dios lichuwinamaka, chu putum latamanin lu liskujkgo xlakata natanukgo. 17 Xlikana, tlakg tuwa pi ni nakgantaxtu tuku litatakgatsi letra xla Limapakgsin, nixawa natitaxtukgo akgapun chu katiyatni.
18 »Putum chixku tiku lakxtlawa xtamakgaxtokgat, chu tatamakgaxtokga atanu puskat, tlawama talakgxtumit nema ni xlitatlawat,* chu chixku tiku natatamakgaxtokga chatum puskat tiku lakxtlawanit xtamakgaxtokgat na tlawama talakgxtumit nema ni xlitatlawat.
19 »Xwi chatum chixku tiku lhuwa tuku xkgalhi chu xlismani xlilhakganan xalaktapalaxla lhakgat, chu chali chali xlipaxuwa tuku laktlan xkgalhi. 20 Pero kxmalakcha xwilikan chatum tiku kskiwayan xwanikan Lázaro, uma chixku xputuminika xmaktsitsin 21 chu lu xwaputun tuku xtakta kxmesa chixku tiku lhuwa tuku xkgalhi. Chuna, asta chichi xlakgminkgo chu kslipinikgo xtsitsi. 22 Titaxtulh kilhtamaku, nilh chixku tiku kskiwayan chu ángeles linkgolh kxpaxtun Abrahán.
»Nachuna, nilh chixku tiku lhuwa tuku xkgalhi chu maknuka.* 23 Chu akxni xwilacha kPutaknun* chu xpatinama, talakayawalh chu lakgamakgat akxilhli Abrahán chu kxpaxtun xya Lázaro. 24 Wa xlakata tasanilh chu wanilh: “Tlat* Abrahán, kakilakgalhamanti chu kamalakgacha Lázaro xlakata namakgankgaju aktsu xmakan kchuchut chu namaskgawiwi kisimakgat, xlakata lu kpatinama kʼuma lhkuyat nema lakgpasama”. 25 Pero Abrahán wanilh: “Kinkgawasa, kalakapastakti pi kmilatamat lipaxuwa putum tuku tlan, pero Lázaro makglhtinalh tuku nitlan. Pero uku, xla tlan mamakgkatsinimaka unu, chu wix patinampat. 26 Chu nachuna, pulhman tapapitsinit tiyat nema kinkamapapitsiyan wixin chu akinin, wa xlakata tiku kalakgamputunachan nila kalakganachan, chu wantiku kinkalakgmimputunan nila kinkalakgminan”. 27 Alistalh wa: “Tlat, komo chuna, kskiniyan pi kamalakgacha kxchik kintlat, 28 xlakata kkgalhi kgalhkitsis kinatalan* lakgkgawasan, chu nakamakatsini xlakata xlakan ni naminkgo unu niku patinankan”. 29 Pero Abrahán wanilh: “Xlakan kgalhikgo xtatsokgnikan Palakachuwinanin chu xtatsokgni Moisés; wa kakakgaxmatnikgolh”. 30 Alistalh xla wa: “Tlat Abrahán, xlakan ni katikakgaxmatnikgolh, pero komo wi tiku nalakastakwanan kkalinin chu nakalakgan, namakgxtakgkgo xtalakgalhinkan”. 31 Pero Abrahán wanilh: “Komo ni kakgaxmatnikgo Moisés chu Palakachuwinanin, na ni katikgaxmatnikgolh chixku tiku nalakastakwanan kkalinin”».