Lucas
21 Alistalh, akxni Jesús lakglakachalh niku xmujukan tumin, akxilhli pi tiku lhuwa tuku xkgalhikgo xmujumakgolh xtamakamastankan. 2 Ama kilhtamaku akxilhli pi chatum xalimaxkgen* puskat tiku xninita xchixku mujulh okgxtiy laktsu tumin nema ni lhuwa xtapalh,* 3 chu wa: «Xlikana kkawaniyan pi uma limaxkgen puskat tiku ninita xchixku tlakg lhuwa mujulh nixawa amakgapitsin. 4 Xlakata xputumkan mujukgolh tuku xkaʼakgataxtuni, pero xla, maski ni lhuwa tuku xkgalhi, mujulh putum tuku xkgalhi».
5 Alistalh, akxni makgapitsi xlichuwinamakgolh templo, la xlikaxtlawakanit xalakstlan chiwix chu tuku xmakamaxkikanit Dios 6 xla wa: «Putum uma tuku wixin akxilhpatit uku, namin kilhtamaku akxni nipara akgtum xatalaktsapsni chiwix katitawi unu nema ni katilaktilhwilika». 7 Wa xlakata kgalhskinkgolh: «Makgalhtawakgena, ¿tukuya kilhtamaku chuna nala, chu tuku nalitasiya pi nakgantaxtu putum uma?». 8 Jesús wa: «Kuentajkatlawatit pi ni nakaʼakgskgawikanatit, xlakata lhuwa tiku naminkgo chu namaklakaskinkgo kintukuwani chu nawankgo “Akit Cristo”, chu “Talakatsuwinit kilhtamaku akxni chuna xlilat”. Ni kakastalanitit. 9 Nachuna, akxni wixin nakgaxpatatit pi lama guerras chu taʼakglhuwit, ni kapekuantit. Xlakata putum uma pulana xlikgantaxtut, pero ni tunkun katimilh xlisputni kakilhtamaku».
10 Alistalh kawanilh: «Nalatalatlawa laklanka kachikinin chu nalatalatlawa tamapakgsin. 11 Kaniwa lu natachiki tiyat, chu lakatum lakatum naʼanan tatsinksni chu laklixkajni tajatat; chu natasiya tuku makgapekuanan chu kʼakgapun natasiya tuku ni anan xtachuna.
12 »Pero akxni nina kgantaxtu putum uma, nakachipakanatit chu nakaputsastalanikanatit chu nakamakamastakanatit ksinagogas* chu nakatamaknukanatit kpulachin. Chu nakalipinkanatit kxlakatin mapakgsinanin chu gobernadores xpalakata kintukuwani. 13 Uma natlawa pi napinatit kxlakatinkan chu nakilichuwinanatit. 14 Wa xlakata, liwana kalakkaxwilitit kminakujkan pi ni talakaskin alisokg nakatsiniyatit tuku nalikgalhtinanatit, 15 akit nakkamaxkiyan liskgalala chu nakkamakgtayayan xlakata nakatsiyatit tuku nawanatit chu tiku kasitsinikgoyan nila tuku katikalikgalhtikgon. 16 Nachuna, nakamakamastakgoyan asta minatlatnikan chu minatalankan* chu tiku xalak xfamiliajkan chu miʼamigoskan, chu makgapitsi nakamakgnikanatit, 17 chu putum latamanin ni katikaʼakxilhputunkgon kaj xlakata kintukuwani. 18 Pero nipara kgantum miʼakchixitkan katikitsankgalh. 19 Chu xlakata natayaniyatit asta kxlisputni, namakglhtinanatit milatamatkan.
20 »Pero akxni naʼakxilhatit pi lhuwa soldados stiliwilikgonit Jerusalén, kakatsitit pi talakatsuwinit xlisputni. 21 Wa xlakata tiku wilakgolh kJudea katsalakgolh kkasipijni, chu tiku wilakgolh kxlakʼitat Jerusalén kataxtukgolh, chu tiku wilakgolh klaktsu kachikinin kxkilhapan ni katanukgolh, 22 xlakata ama kilhtamaku nachin xtasitsi Dios chu nakgantaxtu putum tuku tatsokgnit. 23 ¡Kgoxotanin lakpuskatin tiku nakgalhikgo kskgatakan chu tiku matsikinamakgolh ama kilhtamaku! Xlakata naʼanan lhuwa talakgaputsit kkatiyatni chu Dios nakamalakgaxokge latamanin. 24 Chu xlakan nakalimakgnikan espada chu nakachilinkan klakalhuwa kachikinin; chu kachikinin nalaktayamikgo Jerusalén asta akxni natakgatsi kilhtamaku nema laklhkawilinikanit kachikinin.
25 »Nachuna, wi tuku natasiya kchichini, kpapaʼ chu kstaku, chu kkatiyatni laklanka kachikinin lu nalakgaputsakgo xlakata ni nakatsikgo tuku natlawakgo xlakata chuna la makasanama pupunu chu taʼakgayawama. 26 Chu latamanin nalitakatalakgo kaj xlakata xtapekuakan chu xlakata kgalhkgalhimakgolh nawan tuku nialh makgas nala kkatiyatni, chu tuku anan kʼakgapun nalakchikikgokan. 27 Chu naʼakxilhkgo xKgawasa chixku mima kxkgalhni puklhni chu nalimin xlitliwakga chu lhuwa lilanka. 28 Pero akxni natsuku kgantaxtu uma, tliwakga kawantit chu ni kapekuantit xlakata milakgtaxtutkan talakatsuwinit».
29 Alistalh kalitachuwinalh akgtum liʼakxilhtit: «Kaʼakxilhtit xakiwi higo chu putum atanu kiwi. 30 Akxni akgapumakgolh, wixin akxilhatit chu katsiyatit pi talakatsuwinita akxni kiwi namastakgo xtawakatkan. 31 Nachuna, akxni wixin naʼakxilhatit pi kgantaxtumakgolh putum uma, kakatsitit pi xTamapakgsin Dios talakatsuwinit. 32 Xlikana kkawaniyan pi latamanin xalak uma kilhtamaku ni katinikgolh asta akxni nakgantaxtu putum uma. 33 Akgapun chu katiyatni nalakgsputkgo, pero kintachuwin nikxni katilakgsputli.*
34 »Pero kuentajkatlawatit xlakata lhuwa wayankan chu lhuwa kgotkan chu lu lilakgaputsakan tuku maklakaskinkan ni nalaktlawa xatlan mintalakapastaknikan, komo chuna, xalakapala nakalakgchinan ama kilhtamaku 35 xtachuna la akgsiyat. Xlakata nakalakgchin putum tiku wilakgolh kxlilakgatum katiyatni. 36 Wa xlakata skgalalh katawilatit, chu chuntiya kaskinitit Dios xliputum minakujkan, xlakata tlan nalakgtaxtuniyatit putum tuku xlikgantaxtut chu tlan natayayatit kxlakatin xKgawasa chixku».
37 Wa xlakata kakuwani xmasiya ktemplo, pero katsisni xtaxtu chu anta xtamakgxtakga ksipi nema wanikan sipi xla Olivos. 38 Chu putum latamanin lu tsisa xlakgminkgo xlakata xkgaxmatnikgolh ktemplo.