Lucas
17 Alistalh kawanilh xtamakgalhtawakgen: «Putum kilhtamaku naʼanan tuku namatlawinan talakgalhin. Pero ¡kgoxota ama chixku tiku matlawinan talakgalhin! 2 Tlakg tlan xwa komo xpixchiwakaka akgtum chiwix xla molino chu xmakanka kpupunu nixawa namaʼakgchakgxni chatum tiku litaxtukgo xtachuna laktsu kamanan. 3 Kuentajkatlawatit. Komo mintala* tlawa akgtum talakgalhin, kastakyawa; komo namakgxtakga xtalakgalhin, katapati. 4 Maski asta makgtujun lata tantaku xtlawanin tuku nitlan chu makgtujun xlakgtaspitni, chu xwanin “Kakintapati”, xlilat natapatiya».
5 Alistalh, apóstoles wanikgolh Malana: «Tlakg kakinkamaxki takanajla». 6 Chu Malana wa: «Komo xkgalhitit mintakanajlakan xtachuna xlilanka xtalhtsi mostaza, xwanitit uma xakiwi mora “¡Katapulhu chu katachanti kpupunu!”, chu xkakgalhakgaxmatnin.
7 »Komo chatum miskujnikan lakgwaxnama kkapukuxtun, o kuentajtlawama borregos, ¿la* xmakgamakglhtinantit akxni xkitaspitli kpukuxtu? ¿Xwanitit “Tunkun katat unu chu kawayanti”? 8 Nichuna katitlawatit, wata nawaniyatit “Wi tuku kakinkaxtlawani xlakata nakwayan, chu kawili milakatitawakat chu kakimaxki tuku kmaklakaskin asta akxni nakwayankgo, chu alistalh na tlan nawayana”. 9 ¿Ni xlikana pi malana ni katipaxtikatsinilh skujni xlakata tlawalh tuku limapakgsilh? 10 Nachuna, akxni namakgantaxtikgoyatit putum tuku kalimapakgsikanitantit, kawantit: “Akinin skujnin tiku nitu klitaxtuyaw. Tuku ktlawanitaw wa tuku kilitlawatkan xwanit”».
11 Akxni xʼama kJerusalén, xtitaxtuma niku xtakilhstukkgo Samaria chu Galilea. 12 Chu akxni xtanuma kʼakgtum aktsu kachikin, tatanokglhkgolh kgalhkaw lakchixkuwin tiku xkgalhikgo lepra, pero lakgamakgat tayakgocha. 13 Chu pixlanka* chuwinankgolh chu xwankgo: «¡Jesús, Makgalhtawakgena, kakilalakgalhamaw!». 14 Akxni kaʼakxilhli, kawanilh: «Kakalakgpitit sacerdotes xlakata nakaʼakxilhkgoyan». Akxni xʼamakgolhku ktiji, pakskgolh. 15 Chatum, akxni akxilhli pi xmapaksakanit, taspitli, chu pixlanka xmalankitilha Dios. 16 Chu lakgtakilhputalh kxtantun Jesús, chu paxtikatsinilh. Chu xla xalak Samaria xwanit. 17 Jesús kgalhtinalh: «Xkgalhkawkan pakskgolh, ¿ni xlikana? Wa xlakata, ¿niku wilakgolh akgalhnajatsa? 18 ¿Nitiku achatum taspitli xlakata namalanki Dios, kajwatiya uma chixku tiku xalak atanu kachikin?». 19 Alistalh wanilh: «Kataya chu kapit; mintakanajla mapaksanitan».
20 Akxni fariseos kgalhskinkgolh tuku kilhtamaku xʼama min xTamapakgsin Dios, kakgalhtilh: «Wa xTamapakgsin Dios ni katimilh lata tlan naʼakxilhkan; 21 niti katiwa “¡Kaʼakxilhtit unu!”, o, “¡Amacha!”. Xlakata ¡kaʼakxilhtit!, xTamapakgsin Dios anta wi kmilakgstipankan».
22 Alistalh kawanilh xtamakgalhtawakgen: «Namin kilhtamaku akxni lu naʼakxilhputunatit akgtum xkilhtamaku xKgawasa chixku, pero ni katiʼakxilhtit. 23 Chu nakawanikanatit “¡Kaʼakxilhtit amacha!”, o, “¡Kaʼakxilhtit unu!”. Ni kataxtutit chu ni tokgosun* kakastalanitit. 24 Xlakata chuna la makglipni makaxkgakge lakatum kxtampin akgapun asta alakatum kxtampin akgapun, chuna nawan kxkilhtamaku xKgawasa chixku. 25 Pulana, talakaskin pi lhuwa tuku napati, chu nalakgmakgankgo tiku xla uma kilhtamaku. 26 Chu chuna la lalh kxkilhtamaku Noé, nachuna nawan kxkilhtamaku xKgawasa chixku: 27 xlakan xwayamakgolh, xkgotnamakgolh, lakchixkuwin xtamakgaxtokgmakgolh, lakpuskatin xkamakamastamaka xlakata natamakgaxtokgkgo, asta akxni Noé tanulh kʼarca, chu milh Munkaklat* chu putum kamalakgsputulh. 28 Na xtachuna la lalh kxkilhtamaku Lot: xwayamakgolh, xkgotnamakgolh, xtamawanamakgolh, kstanamakgolh, xchananamakgolh, xtlawamakgolh chiki. 29 Pero kilhtamaku akxni Lot taxtulh kSodoma, taktachi kʼakgapun lhkuyat chu azufre* chu putum kamalakgsputulh. 30 Nachuna nawan ama kilhtamaku akxni xKgawasa chixku nakatasiyani latamanin.
31 »Ama kilhtamaku, tiku waka kxʼakgstin chiki, pero tuku kgalhi tanuma kxchik, ni kataktalh xlakata namaxtu; nachuna, tiku lama kxpukuxtu ni kataspitli xlakata naʼan tiya tuku makgxtakgli. 32 Kalakapastaktit xpuskat* Lot. 33 Putum tiku nalakgmaxtuputun xlatamat, namakgatsankga. Pero putum tiku namakgatsankga xlatamat, nakgalhipara. 34 Kkawaniyan: ama katsisni chatiy lataman makgolh nawan kʼakgtum putama; chatum nalinkan, pero achatum naʼakgxtakgmikan. 35 Chatiy lakpuskatin swakganamakgolh nawan kʼakgtum molino; chatum nalinkan, pero achatum naʼakgxtakgmikan». 36 *—— 37 Wa xlakata, kgalhtikgolh: «¿Niku Malana?». Xla kawanilh: «Niku natama xmakni nin, na anta natamakgstokgkgo águilas».*