Éxodo

12 Chu Jehová kawanilh Moisés chu Aarón kxtiyat Egipto: 2 «Uma papaʼ nalitsuku akgatunu papaʼ; akgatunu kata wa uma papaʼ xapulana nalitaxtu mimpalakatakan. 3 Kakatachuwinantit israelitas chu kakawanitit: “Kkilhtamaku akgkaw xla uma papaʼ, kʼakgatunu familia* milichipatkan tantum borrego, tantum borrego kʼakgatunu chiki. 4 Pero komo kmifamiliajkan ni katiwakgotit tantum borrego xlakata ni minchalhuwakan, militasanitkan mintalakatsukan xlakata nakatawayatit. Milimaʼakgpitsitkan chuna la xlilhuwa latamanin wilakgolh chu chuna la xlilhuwa nawayatit minchatunukan. 5 Xakgawasa borrego ni xatatatla xliwanat chu akgtum kata xlikgalhit. Tlan nalaksakatit tantum xakgawasa borrego o tantum xakgawasa cabra. 6 Milimakitkan asta akxni nalakgchan xlikgalhkutati uma papaʼ, chu putum kachikin Israel namakgni akxni natsiswan.* 7 Alistalh, kchiki niku nawayatit, nalitsakglhmaniyatit kgalhni xkilhpanin chu xʼakpun malakcha* niku laktanukan.

8 »”Miliwatkan xaliwa watiya uma katsisni. Naxpupuyatit chu natawayatit kaxtalanchu nema ni kgalhi limaxkutin chu xastakga verduras. 9 Ni nawayatit xastakga nipara xatalapu. Putum milixpuputkan klhkuyat, xʼakgxakga, xtantun chu tuku kgalhi kxpulakni. 10 Liwa nema naʼakgataxtu, ni namakiyatit. Tuku naʼakgataxtu lichali, mililhkuyutkan. 11 Akxni nawayatit uma, wilinitantit nawan militatampulakgchinkan, mintatunukan chu chipanitantit nawan milixtokgokan. Nachuna, lakapala miliwatkan. Uma Pascua wa xla Jehová. 12 Uma katsisni naktitaxtu putum kxtiyat Egipto chu nakkamakgni putum xanapuxkun lakgkgawasan chu animales nema pulana lakachinkgonit. Nakkalakputsanani chu nakkamalakgaxokge putum xdioseskan egipcios. Akit Jehová. 13 Kgalhni nalitasiya chiki niku wixin natawilayatit. Akxni nakakxilha kgalhni nitu ktikatlawanin. Chu akxni naklimalakgaxokge xtiyat Egipto tuku nitlan, wixin ni katinitit.

14 »”Uma kilhtamaku wixin mililakapastakatkan. Wixin, minkamanankan chu putum tiku aku nalakachintilhakgo militlawatkan uma akgatunu kata chuna la akgtum fiesta xpalakata Jehová. Uma akgtum limapakgsin nema lhuwa kilhtamaku namakgapala. 15 Akgtujun kilhtamaku miliwatkan kaxtalanchu nema ni kgalhi limaxkutin. Wa xlakata lata xapulana kilhtamaku militamakxtutkan kminchikkan skitit* nema kgalhi limaxkutin. Xlakata putum tiku nawa tuku kgalhi limaxkutin lata kxapulana asta kxliʼakgtujun kilhtamaku, namakgnikan. 16 Xapulana kilhtamaku militlawatkan akgtum xasanto tamakxtumit, chu kilhtamaku akgtujun, militlawatkan atanu xasanto tamakxtumit. Niti xliskujat umakgolh kilhtamaku, kajwatiya xlikaxtlawatkan liwat nema chatunu nawakgo.

17 »”Wixin militlawatkan Fiesta xla Kaxtalanchu nema ni kgalhi Limaxkutin xlakata watiya uma kilhtamaku mimputumkan nakkatamakxtuyan kxtiyat Egipto. Minkamanankan chu putum tiku aku nalakachintilhakgo xlilakapastakatkan uma kilhtamaku. Uma akgtum limapakgsin nema lhuwa kilhtamaku namakgapala. 18 Kxapulana papaʼ, kkilhtamaku akgkutati, kakgotanun miliwatkan kaxtalanchu nema ni kgalhi limaxkutin asta kxkakgotanun kilhtamaku puxamatum 19 Akgtujun kilhtamaku ni xliʼanat kminchikkan skitit nema kgalhi limaxkutin. Komo chatum tiku xalak atanu país o tiku xalak país nawa tuku kgalhi limaxkutin, namakgnikan. 20 Ni nawayatit tuku kgalhi limaxkutin. Kminchikkan kajwatiya nawayatit tuku ni kgalhi limaxkutin”».

21 Wa xlakata Moisés tunkun katasanilh putum lakgkgolotsin xalak Israel chu kawanilh: «Chatunu wixin kapitit chu kalaksaktit tantum xakgawasa animal* nema nakatawayatit mifamiliajkan chu kamakgnitit animal xlakata nawayatit kPascua. 22 Alistalh katiyatit pixtum xatuwan hisopo,* kalimastajatit kgalhni nema mastokgnitantit chu kalitsakglhmanitit xkilhpanin chu xʼakpun malakcha niku laktanukan. Niti xlitaxtut kxchik asta akxni naxkgakga. 23 Akxni Jehová natitaxtu xlakata nakamalakgaxokge egipcios chu naʼakxilha kgalhni kxkilhpanin chu xʼakpun malakcha niku laktanukan, Jehová nakalakatsala umakgolh malakcha. Xla ni katikamakgnilh tiku tanumakgo kʼumakgolh chiki.

24 »Wixin mililakapastakatkan uma kilhtamaku. Uma akgtum limapakgsin mimpalakatakan chu xpalakatakan minkamanankan nema namakgapala lhuwa kilhtamaku. 25 Chu akxni natanuyatit ktiyat nema Jehová kawaninitan pi nakamaxkiyan, chuntiya mililakapastakatkan uma kilhtamaku. 26 Akxni minkamanankan nakakgalhskinkgoyan “¿Tuku kilhchanima uma fiesta?”, 27 wixin nakakgalhtiyatit: “Kmakgniw uma animal xlakata nakwayaw kxPascua Jehová. Xla nitu katlawanilh xchikkan israelitas kʼEgipto chu kalakgmaxtulh kifamiliajkan akxni kamalakgaxokgelh egipcios”».

Wa xlakata israelitas tatsokgostakgolh chu takilhputakgolh. 28 Chu tsukukgolh tlawakgo chuna la Jehová xkalimapakgsinit Moisés chu Aarón. Tlawakgolh chuna la xla xkawaninit.

29 Chu itat tsisni, Jehová kamakgnilh putum xanapuxkun lakgkgawasan nema xwilakgo kʼEgipto. Lata xapuxku xkgawasa mapakgsina faraón asta xapuxku xkgawasa tiku xtanuma kpulachin.* Na kamakgnilh putum animales nema pulana xlakachinkgonit. 30 Uma katsisni takilh faraón, kskujnin chu putum amakgapitsi egipcios, chu analh akgtum lanka talipuwan kxlikalanka Egipto, xlakata ni xʼanan akgtum chiki niku ni xnikanit. 31 Watiya uma katsisni, faraón tunkun kamatasaninalh Moisés chu Aarón chu kawanilh: «¡Kapitita! Katamakgatlinitit kinkachikin, wixin chu amakgapitsi israelitas. Kapitit kakninaniyatit Jehová, chuna la xwanitantit. 32 Na kakalipitit miborregoskan chu miwakaxkan, chuna la wantit. Nachuna, kakisikulunatlawatit».

33 Chu egipcios tsukukgolh kamalakapalikgo israelitas xlakata xtaxtukgolh kpaís chu xwankgo: «¡Komo ni nataxtukgo, kimputumkan naniyaw!». 34 Wa xlakata israelitas tiyakgolh skitit xaʼharina nema ni xkgalhi limaxkutin chu niku xʼamakgo lakgwilhakgo. Xlakan xlimakgswitkgonit klhakgatkan chu kukakgolh. 35 Nachuna, israelitas tlawakgolh tuku Moisés xkawaninit: kaskinikgolh egipcios tuku xlitatlawanit plata, tuku xlitatlawanit oro chu lhakgat. 36 Jehová tlawalh pi egipcios tlan xkalikatsinikgolh israelitas, wa xlakata kamaxkikgolh putum tuku kaskinikgolh. Alistalh israelitas kamakglhtikgolh egipcios tuku xkgalhikgo.

37 Wa xlakata israelitas taxtukgolh kRamesés chu ankgolh kSucot. Akgchaxan ciento mil lakchixkuwin tiku katantun ankgolh chu ni kataputlekgeka laktsu kamanan. 38 Nachuna, katataxtukgolh lhuwa latamanin tiku tanu tanu xkilhtsukutkan.* Na kalinkgolh borregos chu wakax, lhuwa animales kalinkgolh. 39 Skitit nema tamakxtukgolh kʼEgipto litlawakgolh lakstilili kaxtalanchu nema ni xkgalhi limaxkutin. Kaxtalanchu ni xkgalhi limaxkutin xlakata lakapala katlakgaxtuka kʼEgipto chu nila makaxkgolh tuku xʼamakgo maklakaskinkgo.

40 Israelitas latamakgolh kʼEgipto 430 kata. 41 Watiya kilhtamaku akxni takgatsilh 430 kata, putum xkachikin* Jehová taxtulh kxtiyat Egipto. 42 Uma katsisni xlakan xlitlawatkan akgtum fiesta xlakata Jehová katamakxtulh kʼEgipto. Uma katsisni, putum kachikin Israel xlitlawat akgtum fiesta xpalakata Jehová, chu tiku aku nalakachintilhakgo nachuna xlitlawatkan.

43 Wa xlakata Jehová kawanilh Moisés chu Aarón: «Wa uma limapakgsin xla Pascua. Nipara chatum tiku xalak atanu país tlan nawa animal nema namakamastakan kPascua. 44 Komo wi tiku kgalhi chatum skujni nema tamawanit, xliʼakstilichukunit kxuwa xlichixku. Kajwatiya chuna, skujni tlan nawa animal. 45 Ni xliwatkan liwa xla tamakamastan tiku xalak atanu país nema lamakgolh kmilakgstipankan, chu skujnin xalak atanu país tiku kamaskgawikan na ni xliwatkan. 46 Xliwatkan borrego kʼakgtum chiki. Ni xlimaxtutkan xaliwa kxkilhtin chiki chu na ni xlilaktukxnitkan xlukut. 47 Putum israelitas xlitlawatkan uma Pascua. 48 Komo chatum tiku xalak atanu país lama kmilakgstipankan chu na makgtlawaputun xPascua Jehová, putum lakchixkuwin tiku tapakgsikgo kxchikkan xkaliʼakstilichukunitkan kxuwa xlichixkukan. Kajwatiya chuna tlan natalakatsuwikgo chu namakgtlawakgo Pascua, chu nalitaxtu chuna la tiku xalak país. Nipara chatum tiku ni akstilichukunikanit kxuwa xlichixku tlan nawa animal nema makamastakan kPascua. 49 Limapakgsin nema xlimakgantaxtit tiku xalak uma país na xlimakgantaxtit tiku xalak atanu país nema lama kmilakgstipankan».

50 Wa xlakata putum israelitas tlawakgolh chuna la Jehová xkalimapakgsinit Moisés chu Aarón. Tlawakgolh chuna la xla xwanit. 51 Watiya uma kilhtamaku, Jehová katamakxtulh israelitas kxtiyat Egipto.