Xlimaktum Samuel
15 Samuel wanilh Saúl: «Jehová kimalakgachalh xlakata naklaksakan la mapakgsina xalak xkachikin Israel. La uku kakgaxpatti tuku Jehová waniputunan. 2 Wa uma tuku wan Jehová tiku kapulalin lhuwa soldados: “Nakkamalakgaxokge amalequitas xlakata tuku tlawanikgolh Israel, xlakata katalatlawakgolh israelitas akxni taxtukgolh kʼEgipto. 3 Wa xlakata kapit katalatlawaya amalequitas. Kakamalakgsputukgo chu putum tuku kgalhikgo. Ni kakatapati.* Kakamakgni lakchixkuwin chu lakpuskatin, laktsu kamanan chu lakgskgatan, toros chu borregos, camellos chu burros”». 4 Wa xlakata Saúl kamamakxtumilh soldados chu kaputlekgelh lakchixkuwin anta kTelaim. Xwilakgolh akgtiy ciento mil lakchixkuwin tiku katantun xʼankgo chu akgkaw mil lakchixkuwin xalak Judá.
5 Saúl chalh asta kkachikin Amalec chu lakkaxwililh tsekg nakalipataxtu anta niku kaxtum. 6 Alistalh Saúl kawanilh quenitas: «Kapitit, kakatamakgatlinitit amalequitas xlakata ni nakkatamalakgsputuyan. Xlakata wixin kalimasiyanitit tapaxkit nema ni makgxtakgnan putum israelitas akxni taxtukgolh kʼEgipto». Wa xlakata quenitas katamakgatlinikgolh amalequitas. 7 Alistalh, Saúl kamakgatlajatilhalh amalequitas lata kʼHavilá asta kSur, nema wi kxpaxtun Egipto. 8 Putum latamanin kalimakgnilh espada, pero Agag xmapakgsina Amalec, ni makgnilh. 9 Saúl chu ksoldados ni kamakgnikgolh* Agag, tlakg xalaktlan borregos chu wakax, animales nema tlakg lakgkgoniwa xwankgonit, chu nachuna xalakgkgawasan borregos, chu ni malakgsputukgolh putum tuku lhuwa xtapalh xwanit. Ni kamakgniputunkgolh. Pero malakgsputukgolh putum tuku ni xlakgatikgo chu ni xʼamakgo maklakaskinkgo.
10 Chu Jehová maxkilh Samuel uma tamakatsin: 11 «Lu nitlan klimakgkatsi xlakata mapakgsina klimaxtulh Saúl, xlakata xla nialh kistalaninit chu ni kgalhakgaxmatnit kintachuwin». Samuel lu lilakgaputsalh chu tantaskaka tasaskinilh Jehová. 12 Lichali, Samuel lu tsisa takilh xlakata natatanokglha Saúl, pero wanika: «Saúl alh kCarmelo chu anta yawalh akgtum lanka chiwix nema xlilakapastakka. Alistalh alh chu taktalh kʼGuilgal». 13 Akxni Samuel tatanokglhli, Saúl wanilh: «Jehová kasikulunatlawan. Kkgalhakgaxmatnit xtachuwin Jehová». 14 Pero Samuel kgalhskilh: «Komo chuna, ¿tuku xlakata kkakgaxmata pi tasamakgo borregos chu wakax?». 15 Chu Saúl kgalhtinalh: «Wa xkatapakgsini amalequitas. Wa soldados ni kamakgniputunkgolh tlakg xalaktlan borregos chu wakax xlakata namakamaxkikgo Jehová miDios. Pero putum atanu kmalakgsputuw». 16 Chu Samuel wanilh Saúl: «¡Nialhtu kawanti! Kama waniyan tuku Jehová kimakatsinilh katsisni». Saúl kgalhtilh: «Kakiwani».
17 Samuel wanilh: «¿Lakapastaka pi xlakpuwana pi ni lu xlakaskinka xlitaxtuya akxni xpulalinakan tribus xalak Israel limaxtuka, chu akxni Jehová laksakni la mapakgsina xalak Israel? 18 Alistalh Jehová malakgachan xlakata xmakgantaxti akgtum taskujut chu wanin: “Kakamakgni umakgolh makglakgalhinanin amalequitas. Kakatalatlawa asta nakamalakgsputuya”. 19 Komo chuna, ¿tuku xlakata ni kgalhakgaxpatti xtachuwin Jehová? Wata, ¡tunkun akgchipaputu tuku xkatapakgsini mintalamakgasitsin chu tlawa tuku nitlan kxlakatin Jehová!».
20 Pero Saúl wanilh Samuel: «¡Pero akit kkgalhakgaxmatli xtachuwin Jehová! Kalh makgantaxti taskujut nema Jehová kimaxkilh, kkamasputulh amalequitas chu klimilh Agag, mapakgsina xalak Amalec. 21 Pero xliputum tuku xkatapakgsini kintalamakgasitsinkan, tuku tanu xwilikanit xlakata namalakgsputukan, soldados tiyakgolh borregos chu wakax xlakata namakamaxkikgo Jehová miDios anta kʼGuilgal».
22 Samuel kgalhtilh: «¿Tuku tlakg makgapaxuwa Jehová: xalhkun tamakamastan xla animales o pi nakgalhakgaxmatkan tuku wan Jehová?* Liwana tasiya: kgalhakgaxmatnankan tlakg xlakaskinka nixawa tlawakan akgtum tamakamastan, chu tlakg xlakaskinka namakgantaxtiya tuku nawanikana, nixawa namakamastaya xmantecajkan xalakgkgawasan borregos. 23 Xlakata ni kgalhakgaxmatnankan lu nitlan litaxtu xtachuna la akxni wankan tuku aku nala, chu tatlankikan xtachuna litaxtu la limaklakaskinkan magia chu kakninanikan tatlawamakgxtu.* Wix lakgmakganti xtachuwin Jehová, wa xlakata xla lakgmakganan la mapakgsina».
24 Chu Saúl wanilh Samuel: «Ktlawanit talakgalhin. Ni kkgalhakgaxmatli tuku Jehová kilimapakgsilh chu tuku wix kiwani, xlakata kkapekuanilh latamanin chu kkakgaxmatnilh tuku xlakan wankgolh. 25 Chu la uku, katlawa litlan, kakintapati kintalakgalhin chu kakintataspitti xlakata naklakgtakilhputa Jehová». 26 Pero Samuel kgalhtilh Saúl: «Ni ktitataspitni, xlakata lakgmakganti xtachuwin Jehová chu la uku Jehová lakgmakganan xlakata nialh mapakgsina xalak Israel nalitaxtuya». 27 Akxni Samuel talakgaspitli xlakata naʼan, Saúl chipalh xkilhpan xapakgaxtuluwa klhakgat, pero uma taxtitli. 28 Chu Samuel wanilh: «Chuna makglhtinitan Jehová la uku xtamapakgsin Israel. Namaxki tiku tlakg lakgchan namapakgsinan nixawa wix. 29 Nachuna, Dios xalak Israel, tiku lhuwa kakni kgalhi, namakgantaxti xtachuwin chu ni katilakgpalilh xtapuwan, xlakata xla ni lakgpali xtapuwan chuna la tlawakgo latamanin».
30 Chu xla kgalhtilh: «Xlikana, klakgalhinanit. Pero, katlawa litlan, kakilakgachixkuwi kxlakatin lakgkgolotsin xalak kinkachikin chu kxlakatin Israel. Kakintataspitti, chu naklakgtakilhputa Jehová miDios». 31 Wa xlakata Samuel tataspitli Saúl, chu Saúl lakgtakilhputalh Jehová. 32 Chu Samuel wa: «Kakilitanitit Agag, mapakgsina xalak Amalec». Alistalh Agag xatasitsi lakgtalakatsuwilh,* xlakata xlakpuwanit: «Max nialh kintimakgnika». 33 Pero Samuel wa: «Chuna la miʼespada kamakglhtilh xkamanankan lhuwa lakpuskatin, mintse na namakglhtikan xkamanan». Akxni wankgolh uma, Samuel laktsu laktsu tlawalh Agag kxlakatin Jehová anta kʼGuilgal.
34 Alistalh Samuel alh kRamá, chu Saúl talakakxtulh kxchik anta kʼGuibeá niku xlama. 35 Xliputum xlatamat* Samuel nialh makgtum akxilhli Saúl, pero lu lilipuwa xpalakata. Chu Jehová lu nitlan limakgkatsilh xlakata mapakgsina tlawalh Saúl anta kʼIsrael.