Xlimaktum Samuel
2 Alistalh Ana tlawalh uma oración:
«Kinaku paxuwa xlakata Jehová kimakgtaya,
Jehová kimaxki litliwakga.
Ktakgalhpitsi xlakata nakkakgalhti kintalatlawananin,
xlakata kimakgapaxuwa la lakgmaxtunana.
2 Ni anan tiku xasanto chuna la wix, Jehová.
Ni anan tiku xtachuna la wix.
KiDioskan, kajwatiya wix lu tliwakga chuna la akgtum lanka chiwix.
3 Ni kalitlankajwanantit mintachuwinkan.
Ni kataxtukgolh kminkilhnikan laktlankajwa tachuwin,
xlakata Jehová chatum Dios tiku putum katsi
chu kajwatiya xla tlan wan komo tuku tlawa chatum chixku tlan o nitlan.
4 Kalaktukxmikan xʼarcojkan xalakgtliwakga lakchixkuwin,
pero tiku xlajwanankgo* kamaxkikan litliwakga.
5 Tiku xkaʼakgataxtuni xliwatkan xliskujatkan xlakata nakgalhikgo tuku nawakgo,
pero tiku tsinksnimakgo nialh katikatsankganilh tuku nawakgo.
Puskat tiku nila xkgalhi kskgata, kgalhinit kgalhtujun kamanan,
pero tiku xkgalhi lhuwa kamanan, xʼakstu tamakgxtakgnit.*
6 Jehová masta chu makglhtinan latamat.
Xla tlan tlawa pi chatum lataman naʼan kPutaknun* chu na tlan namalakastakwani.
7 Jehová tlan tlawa pi nitu nakgalhiya chu tlan tlawa pi lhuwa tuku nakgalhiya.
Xla maktujunan chu xla malankinan.
8 Yawa tiku taktuju chu wi kkatutsu
chu yawa limaxkgen tiku lakwi lhuwa lhkaka*
xlakata nakatawili príncipes
chu nakamaxki akgtum laktawilh tiku nakamaxkikan kakni.
Wa Jehová tapakgsini tuku lakwi katiyatni,
chu kxʼakgspun* wili tiyat niku tlan makgalanankan.
9 Xla kuentajtlawa tuku tlawakgo tiku ni makgxtakgkgo,
pero kamalakgsputu niku kapukswa tiku nitlan likatsikgo,
xlakata chatum chixku ni limakgatlajanan xlitliwakga.
Asta kxaʼawatiya xtankgenin katiyatni, Jehová nakalakputsanani.
Namaxki litliwakga xmapakgsina.
Namaxki litliwakga* xtalaksakni».
11 Alistalh Elcaná taspitli kxchik anta kRamá. Pero aktsu kgawasa tamakgxtakgli xlakata kskujnanilh Jehová chu wa sacerdote Elí xkuentajtlawa.
12 Pero, xlakgkgawasan Elí lu lixkajni xlikatsikgo, chu ni xmaxkikgo kakni Jehová. 13 Xlakan ni kajwatiya xtiyakgo tuku xkalakgchan xlakata sacerdotes xalak kachikin xlitaxtukgo, wata wa uma tuku xtlawakgo: akxni chatum chixku xtlawa akgtum tamakamastan, chatum xmakgtayana sacerdote xlin akgtum lanka tenedor akxni xmapupimaka liwa 14 chu xmakgju niku xmapupinamaka, kʼolla nema kgalhi akgtiy xlichipakan, klanka olla o kʼolla nema xkgalhi akgtum xlichipakan. Chu sacerdote xtatamakgxtakga putum tuku xlimakutukan tenedor. Wa uma tuku xkatlawanikgo putum israelitas tiku xʼankgo kSiló. 15 Nachuna, akxni nina klhkuyukan manteca xlakata xmajinika, chatum xmakgtayana sacerdote xwani chixku tiku xliminit tamakamastan: «Kamaxki sacerdote liwa xlakata naxpupu. Ni katimakglhtinalh xapupun liwa. Kajwatiya lakaskin xastakga». 16 Akxni chixku xwani «Pulana kamajinitit manteca. Chu alistalh tlan natiyaya tuku nalakaskina», xmakgtayana sacerdote xwani «Ni, kakimaxkita liwa. Komo ni nakimaxkiya xafuerza nakmakglhtiyan». 17 Jehová lu lanka talakgalhin akxilhli tuku xtlawakgo xmakgtayananin sacerdotes, xlakata ni xmaxkikgo kakni tamakamastan nema xtlawanikan Jehová.
18 Maski kaj chatum aktsu kgawasa xwanit, Samuel kskujnani Jehová chu klhakganit maktum efod nema xlitatlawanit lino. 19 Nachuna, akgatunu kata xtse xtlawani xapakgaxtuluwa lhakgat chu xlini akxni akxtum xtaʼan xchixku kSiló xlakata xlinkgolh tamakamastan nema xtlawakgo akgatunu kata. 20 Chu Elí kasikulunatlawalh Elcaná chu xpuskat. Wa: «Jehová kamaxkin talakaskin natakgalhiparaya uma mimpuskat chatum kgawasa kxlakgxokgo nema xla makamaxkilh Jehová». Chu taspitparakgolh kxchikkan. 21 Jehová lakgalhamalh Ana chu xla kgalhipa kskgata. Kgalhilh kgalhtutu xlakgkgawasan chu chatiy xlaktsuman. Chu aktsu kgawasa Samuel chuntiya stakli kxlakatin Jehová.
22 Elí lu xlina kata, pero xkatsi putum tuku xlakgkgawasan xtlawanikgo Israel. Chu xkatsi pi xkatatalakgxtumikgo lakpuskatin tiku kskujkgo anta niku xlaktanukan ktabernáculo. 23 Xla xkawani xlakgkgawasan: «¿Tuku xlakata tlawayatit uma? Putum kachikin kilitachuwinan putum tuku nitlan tlawayatit. 24 Ni, nichuna katlawatit, kilakgkgawasan. Tuku kilhwama xkachikin Jehová mimpalakatakan nitlan. 25 Komo chatum chixku natlawani tuku nitlan achatum, max wi tiku naskini Jehová pi kamakgtayalh. Pero komo chatum chixku lakgalhinan kxlakatin Jehová, ¿tiku natlawa oración xpalakata?». Pero xlakan ni kgaxmatniputunkgolh xtlatkan, xlakata Jehová xlakkaxwilinit nakamakgni. 26 Chu aktsu kgawasa Samuel chuntiya kstaktilhama, chu chuna la xtitaxtutilha kilhtamaku, Jehová chu latamanin tlakg xpaxkikgo Samuel.
27 Chu chatum kskujni Dios alh wani Elí: «Wa uma tuku wan Jehová: “¿Ni liwana kilakgapasli xfamilia* xamakgan mintlat akxni xwi kʼEgipto chu skujni xlitaxtu kxchik faraón? 28 Xliputum xtribus Israel, xamakgan mintlat laksakka xlakata nakiskujnani la sacerdote. Xla laksakka xlakata nawili tamakamastan kkimpumakamastan, xlakata nalhkuyu incienso* chu xlakata nalin efod kkilakatin. Chu kmaxkilh talakaskin xfamilia xamakgan mintlat xlakata natiyakgo tsinu liwa xla tamakamastan nema israelitas* xkimakamaxkikgo. 29 ¿Tuku xlakata wixin lakgmakganatit* tamakamastan chu tamaskiwin* nema klimapakgsinanit natlawakan kkinchik? ¿Tuku xlakata tlakg kamaxkiya kakni milakgkgawasan nixawa akit? ¿Tuku xlakata wixin liwayanatit tlakg xatlan tamaskiwin nema limin kinkachikin Israel?
30 »”Wa xlakata wa uma tuku wan Jehová, xDios Israel: «Xlikana pi akit kwa pi mifamilia chu xfamilia xamakgan mintlat ankgalhin xʼama kiskujnani».* Pero la uku Jehová wan: «La uku nialh chuna klakpuwan. Xlakata nakkamaxki kakni tiku kimaxkikgo kakni, pero tiku kilakgmakgankgo na nakalakgmakgankan». 31 Chuna, talakatsuwima kilhtamaku akxni nakmakglhtiyan militliwakga chu xlitliwakga xamakgan mintlat.* Nipara chatum chixku xalak mifamilia katikgololh. 32 Xliputum tuku tlan nala kʼIsrael, wix nakgalhiya chatum tiku nalakatakiyan kkinchik, chu kmifamilia nialh katiʼanampa chatum chixku tiku kgolonita nawan. 33 Ama chixku xalak mifamilia tiku akit nakmaxki talakaskin chuntiya nakiskujnani kkimpumakamastan, wa tiku natlawa pi nialh nalakawanana chu lu namalakgaputsiyan. Pero atsinu ni putum tiku xalak minchik nakalimakgnikan xʼespadajkan lakchixkuwin. 34 Chu tuku nakaʼakgspula chatiy milakgkgawasan, Hofní chu Finehás, wa tuku nalikatsiya: akgtum kilhtamaku nanikgo xchatiykan. 35 Alistalh naklaksaka chatum sacerdote tiku nikxni kintimakgxtakgli. Xla namakgantaxti putum xtalakaskin kinaku. Naktlawani akgtum chiki* nema namakgapala putum kilhtamaku, chu xla ankgalhin nalakskujnani* kintalaksakni. 36 Tiku natamakgxtakgkgo kminchik naminkgo lakgtakilhputakgo xlakata naskinikgo taskujut chu kaxtalanchu. Nawankgo: «Katlawa litlan, kakimaxki akgtum taskujut xla sacerdote xlakata nakkgalhi tsinu kaxtalanchu nema nakwa»”».