1 Timoteo

4 Pero xlimakgatliwakga Dios wan pi kkilhtamaku nema aku mima makgapitsin nialh katikanajlanikgolh Dios, wata nakgaxmatkgo ni xaxlikana tamakatsinin nema tasiya pi mat Dios mastanit chu nakgaxmatkgo xtamasiykan demonios, 2 chu xlakan nakakgaxmatnikgo lakgaputiyunanin tiku lichuwinankgo taʼakgsanin, nema xtalakapastaknikan litaxtunit xtachuna la xtutu nema tawila akxni likan lilhkuyunankan. 3 Xlakan ni mastakgo talakaskin pi natamakgaxtokgkan chu kalimapakgsikgo latamanin pi ni nawakgo liwat nema Dios malakatsukinit xlakata tiku kgalhikgo takanajla chu liwana lakgapaskgo xaxlikana nawakgo chu napaxtikatsinikgo Dios. 4 Xlakata putum tuku Dios malakatsukinit lu xatlan, chu nitu nalakgmakgankan komo paxtikatsinikan Dios akxni nawakan, 5 xlakata xtachuwin Dios chu oración maskulunki liwat.

6 Akxni nakamaxkiya uma tastakyaw natalan, nalimasiyaya pi wix lu tlan kskujni Cristo Jesús, tiku stakma chu tatliwakglhma xlakata tachuwin nema kinkamakgtayayan nalipawanaw Dios chu xatlan tamasiy nema wix lu liwana makgantaxtinita. 7 Pero kalakgmakganti cuentos nema ni maxkikgo kakni Dios, xtachuna nema lichuwinankgo laktsikanan.* Wata kamakgatawakga chu kamakaʼakchipimputu naskujnaniya Dios. 8 Xlakata makgatawakgakan* kaj tsinu makgtayanan, pero komo chatum lataman ni makgxtakgnan xliputum makgtaya, xlakata namakglhtinan tasikulunalin kʼuma kilhtamaku chu nema aku mima. 9 Uma tachuwin lakgchan lu nakanajlaniyaw chu xaxlikana. 10 Wa xlakata akinin chuntiya kiliskujatkan chu ni natlakgwanaw* chu lu kaliskujwi putum tuku matlaniyaw. Chuna tlawayaw xlakata lipawanaw xastakna Dios, tiku xLakgmaxtunakan putum latamanin, pero tlakg liwaka tiku ni makgxtakgkgo chu lipawankgo.

11 Chuntiya kalimapakgsinanti chu kamasiya putum uma. 12 Nikxni kamasta talakaskin pi wi tiku nalakgmakganan kaj xlakata kgawasaku wix. Wata akgtum tlan liʼakxilhtit kakalitaxtuni tiku skujnanikgo Dios chu lipawankgo, xlakata la chuwinana, chuna la kgalhiya mintayat, mintapaxkit, mintakanajla, chuna la xaʼakgstitum* lipina milatamat. 13 Chuntiya kaliskujti nakgalhtawakgaya kxlakatinkan amakgapitsin, chuntiya kakastakyawa* chu kakamasiyani amakgapitsin, asta akxni nakchanacha. 14 Ni kamakgxtakgti tamaskiwin* nema maxkinitan Dios, nema maxkikanti akxni palakachuwinanin lichuwinankgolh mimpalakata, akxni putum lakgkgolotsin akwilikgon xmakankan. 15 Lu kalilakpuwanti uma; lu katamakamastani uma, xlakata putum latamanin liwana naʼakxilhkgo pi maliwakipat mintakanajla. 16 Kuentajkatlawa chuna la lipina milatamat chu tuku masiyaya. Chuntiya lu kaliskujti xlakata nakamakgantaxtiya umakgolh, komo chuna natlawaya nalakgtaxtuya wix chu nachuna tiku nakgaxmatnikgoyan.