Colosenses

3 Pero komo wixin chu Cristo akxtum kamaxkikantit latamat, chuntiya kaputsatit tuku xalak akgapun, niku wi Cristo kxpakgastakat* Dios. 2 Chuntiya kalilakapastaktit tuku wilakgolh kʼakgapun chu ni wa tuku wilakgolh kkatiyatni. 3 Xlakata wixin nitit, chu milatamatkan matsekgkanit kCristo, tiku akxtum tawi Dios. 4 Akxni Cristo tiku masta latamat, namasiya xlitliwakga, na natasiya pi wixin na kgalhiyatit xlikakni.

5 Wa xlakata, kamakgnitit putum tuku tlawaputun tuku litakgatsi mimaknikan, talakgxtumit nema ni xlitatlawat,* tlawaputunkan tuku lu lixkajni, talakgxtumit nema nila machokgokan, tlawaputunkan tuku nitlan chu lhuwa tuku kgalhiputunkan, uma xtachuna la kakninanikan tatlawamakgxtu.* 6 Dios nakamalakgaxokge* tiku tlawakgo umakgolh. 7 Akxni wixin xlapatit chuna la xlakan, nachuna xtlawayatit umakgolh. 8 Pero uku, mililakgmakganatkan tasitsi, lu sitsikan, tuku nitlan, nitlan tachuwin, chu laklixkajni tachuwin ni nataxtu kminkilhnikan. 9 Ni kalaʼakgskgawitit. Kamakgxtakgtit xamakgan mintayatkan chu tuku xtlawayatit xapulana, 10 chu kakgalhitit xasasti tayat nema masta Dios. Akxni tlakg nalakgapasatit Dios, tlakg tlan nawan mintayatkan, xlakata mintayatkan xtachuna la xtayat Dios nawan, 11 niku ni anan griego nipara judío, nipara tiku akstilichukunikanit kxuwa xlichixku* chu tiku ni, tiku xalak alakatanu kachikin, tiku kkakiwin wi,* tiku skujni o ni skujni litaxtu; wata tuku tlakg xlakaskinka wa pi Cristo makgtanuma putum tuku anan chu akxtum tawilaw.

12 Xlakata Dios kalaksakni chu wixin xasantos xkamanan chu kapaxkiyan, kakgalhitit talakgalhaman chu tapaxkit, tlan kalikatsitit, katataktujutit,* xatsatata naku kakgalhitit chu kakgalhkgalhinantit. 13 Chuntiya kalatatayanitit chu lu kalatapatiputuntit maski wi tuku nakalimakgasitsikanatit. Chuna la Jehová lu katapatin wixin, nachuna wixin militlawatkan. 14 Pero ni kajwatiya uma, nachuna kalimasiyatit tapaxkit, xlakata uma tlawa pi latamanin makxtum nalakgo.

15 Nachuna, xtakaksni Cristo kamapakgsinalh kminakujkan, xlakata Dios kalaksaknitan xlakata akgtum makni nalitaxtuyatit chu nakgalhiyatit takaksni. Chu putum kilhtamaku kapaxtikatsininantit. 16 Minakujkan lu kalitatsamalh xtamasiy Cristo. Chuna skgalala nawanatit. Chuntiya kalamasiyanitit chu kalalimaʼakgpuwantinitit* salmos, kamalankitit Dios, chu takilhtlin nema lipaxtikatsiniyatit Dios, kakilhtlinitit Jehová kminakujkan. 17 Putum tuku nawanatit o natlawayatit chuna katlawatit kxtukuwani Malana* Jesús, kxtukuwani kapaxtikatsinitit Dios, xaTlat.*

18 Lakpuskatin, kakgalhakgaxpattit minchixkukan xlakata uma chuna xlilat kxlakatin Malana. 19 Lakchixkuwin, chuntiya kakapaxkitit mimpuskatkan chu ni kakasitsinitit. 20 Kamanan, putum kilhtamaku kakakgalhakgaxpattit minatlatnikan xlakata uma makgapaxuwa Malana. 21 Natlatni,* ni kakamakgasitsitit minkamanankan, xlakata xlakan ni nataxlajwanikgo. 22 Skujnin, putum kilhtamaku kakgalhakgaxpattit mimalanakan unu kkatiyatni, ni kaj akxni kaʼakxilhmakgon, xlakata kaj nakamakgapaxuwayatit lakchixkuwin, wata xliputum minakujkan chu xlakata maxkiyatit kakni Jehová. 23 Putum tuku tlawapatit, kaliskujtit xliputum minakujkan chu militliwakgakan xtachuna la skujnanipatit Jehová chu ni wa lakchixkuwin, 24 xlakata wixin katsiyatit pi wa Jehová nakamaxkiyan tatlaja, wa tatlaja nema kamalaknuninitan. Kaskujtit chuna la kskujnin Malana, Cristo. 25 Xlikana, tiku natlawa tuku ni xaʼakgstitum nalimalakgaxokgekan xlakata tuku natlawa nema ni xaʼakgstitum, chu Dios ni laksakpaxkinan.