1 Corintios

3 Wa xlakata natalan, nila kkatachuwinan chuna la lakchixkuwin tiku kapulalima xʼespíritu Dios, wata xtachuna la tiku kgalhikgo xtalakapastakni kakilhtamaku, xtachuna la lakgskgatan xpalakata Cristo. 2 Kkamawin leche, ni wa kkamawin palha liwat, xlakata nina lu lakgtliwakga xwanitantit. Chu asta uku, nina lu lakgtliwakga wixin, 3 xlakata wixin kgalhiyatitku talakapastakni xalak kakilhtamaku. Xlakata lalakgkatsalakapinatit chu lakilhniyatit, ¿ni kgalhiyatit xtalakapastakni kakilhtamaku chu lapatit xtachuna la latamanin xalak kakilhtamaku? 4 Xlakata akxni wi tiku wan «Akit ktapakgsini Pablo», pero atanu wan «Akit ktapakgsini Apolos», ¿ni likatsipatit xtachuna la latamanin xalak kakilhtamaku?

5 Wa xlakata, ¿tuku litaxtu Apolos? Chuna, ¿tuku litaxtu Pablo? Skujnin, tiku makgantaxtimakgolh taskujut nema Malana* kalakgayawalh, xpalakatakan tiku wixin kanajlatit. 6 Akit kchalh, Apolos munuwililh, pero Dios tlawatilhalh pi chuntiya kstakli, 7 wa xlakata, ni wa xlakaskinka litaxtu tiku chan, nipara tiku munuwili, wata Dios tiku tlawa pi nastaka. 8 Chu tiku chan chu tiku munuwili, watiya tuku makgantaxtiputunkgo, pero chatunu chatunu namakglhtinan xtatlaja chuna la skujli. 9 Xlakata akinin xtaskujnin Dios. Wixin xkatakuxtu Dios niku chananama, akgtum chiki nema Dios tlawanit.

10 Xlakata Dios kilakgalhamalh, akit klitaxtulh chuna la chatum chixku tiku lu katsini tlawa chiki. Kmatijulh xkilhtsukut pero wi tiku atanu kgalhtsapswilima. Pero chatunu chatunu chuntiya kaʼakxilhtilhalh chuna la kgalhtsapswilima. 11 Xlakata ni anan tiku tlan wili atanu xkilhtsukut kajwatiya tuku wija, Jesucristo. 12 Chu komo wi tiku kgalhtsapswili kxkgalhni uma kilhtsukut chu maklakaskin oro, plata, lakstlan chiwix, kiwi, xaskakni tuwan* chu sakgat, 13 xtaskujut chatunu chatunu natasiya, kkilhtamaku akxni naputsanankan, natasiya tuku chatunu chatunu tlawanit, xlakata lhkuyat putum namasiya chu namasiya tuku litlawanit xtaskujut chatunu chatunu. 14 Komo xtaskujut tiku kgalhwilinit xkilhtsukut, lhkuyat ni namalakgsputu, xla nasikulunatlawakan; 15 komo xtaskujut chatum chixku putum malakgsputukan, xla namakgatsankganan, pero xla nalakgtaxtu; nalitaxtu chuna la chatum chixku tiku tsalataxtu niku lhkunanama.

16 ¿Ni katsiyatit pi wixin xtemplo Dios chu xʼespíritu Dios wi kmilakgstipankan? 17 Komo wi tiku malakgsputu xtemplo Dios, Dios na namalakgsputu uma chixku; xlakata xtemplo Dios xasanto, chu wixin xtemplo.

18 Niti xʼakstu kataʼakgskgawilh; komo wi tiku kmilakgstipankan lakpuwan pi skgalala kʼuma kakilhtamaku,* xatonto kalitaxtulh,* xlakata xaskgalala nawan. 19 Xlakata liskgalala xalak uma kakilhtamaku nitu litaxtu kxlakatin Dios, xlakata tatsokgnit: «Dios tlawa pi tiku lakgskgalalan xʼakstukan napatikgo kxliʼakgtalatkan».* 20 Chu amakgtum tatsokgparanit: «Jehová katsi pi xtalakapastaknikan tiku lakgskgalalan nitu litaxtu». 21 Wa xlakata, niti kalitatlankilh tuku tlawakgo latamanin; xlakata putum katapakgsiniyan wixin, 22 komo akit, o Apolos, o Cefas,* o kakilhtamaku, o latamat, o linin, o tuku anan uku, o tuku aku namin, putum katapakgsiniyan; 23 nachuna wixin tapakgsiniyatit Cristo; chu Cristo tapakgsini Dios.