Jueces
13 Israelitas tsukuparakgolh tlawakgo tuku nitlan kxlakatin Jehová. Wa xlakata tipuxam kata Jehová kamakgxtakgli kxmakankan filisteos.
2 Ama kilhtamaku latamalh chatum chixku tiku xwanikan Manóah, tiku xalak Zorá xwanit, xalak xfamiliajkan danitas. Xpuskat nila xkgalhi kamanan. 3 Akgtum kilhtamaku xʼángel Jehová tasiyanilh uma puskat chu wanilh: «La uku nila kgalhiya kamanan, pero nakgalhiya skgata chu namalakachitaniya chatum kgawasa. 4 Kuenta katlawa ni nalikgotnana vino nipara atanu tuku likgachikan, chu ni kawat tuku xaxkajwani. 5 Kaʼakxilhti, nakgalhiya skgata chu namalakachitaniya chatum kgawasa. Nikxni nachukunikan xchixit, xlakata uma aktsu kgawasa nazareo nalitaxtu lata akxni nalakachin,* tanu nawilikan xlakata naskujnani Dios, chu xla natsuku kalakgmaxtu Israel kxmakankan filisteos».
6 Alistalh puskat alh chu litachuwinalh xchixku. Wanilh: «Chatum chixku tiku tapakgsini xaxlikana Dios kilakgmilh. Lu kaks kimalakawanilh chuna la xtasiya, xtachuna la chatum xʼángel xaxlikana Dios. Ni kkgalhskilh niku xminacha, chu xla na ni kiwanilh xtukuwani. 7 Pero kiwanilh: “Kaʼakxilhti, nakgalhiya skgata chu namalakachitaniya chatum kgawasa. Ni kalikgotnanti vino nipara atanu tuku likgachikan chu ni kawat tuku xaxkajwani, xlakata aktsu kgawasa nazareo nalitaxtu lata akxni nalakachin asta akxni nani”».
8 Manóah tasaskinilh Jehová: «Kakintapati, Jehová, pero katlawa litlan, miskujni tiku makata amakgtum kamimpa xlakata nakinkawaniyan tuku naktlawayaw xpalakata uma kgawasa nema nalakachin». 9 Xaxlikana Dios kgaxmatnilh Manóah, wa xlakata, akxni xpuskat xwi kkapukuxtun, xʼángel xaxlikana Dios amakgtum lakgmimpa. Pero Manóah, xchixku, ni anta xtawi. 10 Puskat lakapala alh wani xchixku: «¡Kaʼakxilhti, kintasiyanipa chixku tiku xkilanitanchi!».
11 Manóah tayalh chu taʼalh xpuskat niku xwi chixku, chu kgalhskilh: «¿Wix chixku tiku tachuwinanti kimpuskat?». Xla kgalhtinalh: «Chuna, akit». 12 Chu Manóah wanilh: «¡Kakgantaxtulh mintachuwin! Pero, kakilawaniw ¿la nalin xlatamat uma aktsu kgawasa? ¿Chu tuku natlawa?». 13 Xʼángel Jehová kgalhtilh Manóah: «Mimpuskat ni xliwat putum tuku kwanilh. 14 Ni xliwat putum tuku litatlawanit uva, ni nalikgotnan vino chu atanu tuku likgachikan chu ni xliwat tuku xaxkajwani. Xlitlawat putum tuku klimapakgsinit».
15 Alistalh Manóah wanilh xʼángel Jehová: «Katlawa litlan, nina kapit. Nakkaxpupuniyan tantum aktsu cabra». 16 Pero xʼángel Jehová wanilh Manóah: «Komo naktamakgxtakga, ni kaktiwalh miliwat. Pero, komo nalakaskina, tlan namakamaxkiya Jehová akgtum xalhkun tamakamastan». Manóah ni xkatsi pi xʼángel Jehová xwanit. 17 Alistalh, Manóah wanilh xʼángel Jehová: «¿Tuku wanikana? Kkatsiputunaw xlakata nakkamaxkiyan kakni akxni nakgantaxtu putum tuku wanti». 18 Pero xʼángel Jehová kgalhtilh: «¿Tuku xlakata kinkgalhskina tuku kiwanikan? ¿Ni katsiya pi akgtum lu stlan tukuwani?».
19 Chu Manóah tiyalh aktsu cabra chu tamakamastan xla talhtsi, chu makamaxkilh Jehová kʼakgtum chiwix. Alistalh Dios tlawalh tuku kaks malakawaninan akxni Manóah chu xpuskat xʼakxilhmakgo. 20 Akxni lhkuyat xalak pumakamastan tachayawalh kʼakgapun, Manóah chu xpuskat akxilhkgolh pi xʼangel Jehová laktakxtulh klhkuyat. Chu tunkun talakgatsokgostakgolh. 21 Chu Manóah katsilh pi chatum xʼángel Jehová xwanit. Xʼángel Jehová nialh katasiyanilh Manóah chu xpuskat. 22 Chu Manóah wanilh xpuskat: «¡Amaw niyaw xlakata wa Dios tiku akxilhnitaw!». 23 Pero xpuskat wanilh: «Komo Jehová xkintikamakgniputun ni xmakgamakglhtinalh xalhkun kintamakamastankan nipara talhtsi nema makamaxkiw. Na ni xkinkamasiyanin putum uma chu ni xkinkawanin putum tuku kinkawanin».
24 Alistalh, xpuskat Manóah malakachinilh chatum kgawasa chu limapakuwilh Sansón. Chuna la kstaktilhama aktsu kgawasa Jehová ksikulunatlawama. 25 Titaxtulh kilhtamaku, xʼespíritu Jehová wi tuku tsukulh matlawi kMahané-Dan, kxlakʼitat Zorá chu Estaol.