Filipenses
3 Wa xlakata, kinatalan, chuntiya kalipaxuwatit xpalakata Malana.* Ni ktlakgwan amakgtum kkatsokgnaniparayan, xlakata tlan nakakitaxtuniyan.
2 Kuentajkatlawatit xpalakata tiku likatsikgo xtachuna la chichi;* kuentajkatlawatit xpalakata tiku tlawakgo tuku lu nitlan; kuentajkatlawatit xpalakata tiku lakaskinkgo pi kakaʼakstilichukunikantit kxuwa milichixkukan.* 3 Xlakata akinin tiku xlikana kinkaʼakstilichukunikanitan kxuwa kilichixkukan,* tiku skujnaniyaw Dios xpalakata xʼespíritu, tiku lipaxuwayaw xpalakata tuku tlawalh Cristo Jesús, akinin ni wa lipawanaw tuku lipawankgo latamanin.
4 Komo anan tiku lanka limakgkatsikan tuku lipawan, akit tlakg lanka kimakgkatsikan nixawa xla: 5 xliʼakgtsayan kilhtamaku kiʼakstilichukunika kxuwa kilichixku, akit xalak kachikin Israel, ktaxtucha klanka xfamilia Benjamín, kinatlatni* hebreos; fariseo tiku liwana xkgalhakgaxmata Limapakgsin; 6 lu xakpaxki xtamasiykan judíos, wa xlakata xakputsastalani congregación; xlakata kkgalhakgaxmatli limapakgsin, klimasiyalh pi ni xaklin kuenta. 7 Pero tuku xlakaskinka xakakxilha, la uku* xatapaxuwan klakgmakgalh xpalakata Cristo. 8 Chuna, tlakg xlakaskinka kakxilha takatsin xpalakata Cristo Jesús kiMalana nixawa putum tuku klakgmakgalh. Xpalakata Cristo putum klakgmakganit chu kliʼakxilha la* lhuwa palhma,* xlakata Cristo tlan nakiʼakxilha 9 chu kstalanina nakiliʼakxilhkan. Pero ni kwan pi xaʼakgstitum akit xlakata kkgalhakgaxmata Limapakgsin, wata xaʼakgstitum kiliʼakxilhkan xlakata klipawan Cristo. Xlikana, Dios xaʼakgstitum kaliʼakxilha tiku lipawankgo Cristo. 10 Klakgapasputun xla chu litliwakga nema malakastakwanilh kkalinin. Kpatiputun chuna la xla chu kniputun chuna la xla nilh, 11 xlakata nakakxilha komo tlan nakmakglhtinan xapulana talakastakwanat kxlakgstipankan tiku nikgonita.
12 Ni wa para kmakglhtinanita tatlaja nipara wa pi nialh kkgalhi talakgalhin, wata chuntiya kliskujma xlakata nakmakglhtinan tatlaja, xlakata kkatsi pi Cristo Jesús kilaksakli* xlakata nakmakglhtinan. 13 Natalan, ni klakpuwan pi klakgchanita tatlaja; pero tuku xlikana: nialh klakapastaka tuku xapulana, chu chuntiya kliskujma xlakata nakmakglhtinan tuku aku namin, 14 lu kliskujma xlakata nakmakglhtinan tatlaja. Uma tatlaja wa latamat kʼakgapun, nema nakamaxki Dios tiku kalilaksakli Cristo Jesús. 15 Wa xlakata, tiku tliwakga takanajla kgalhiyaw, kalilakpuwaw umakgolh tuku kkalitachuwinan, pero komo nichuna lakpuwanatit, Dios nakamakgtayayan chuna nalakpuwanatit. 16 Maski chuna, chuna la tatliwakglhnita kintakanajlakan, chuntiya kaʼaw ktiji niku amaw.
17 Natalan, makxtum kastalanitit kiliʼakxilhtit, katlawatit chuna la tiku limakgolh xlatamatkan chuna la kkawilinin liʼakxilhtit. 18 Xlakata lhuwa tiku lakgmakgamakgolh pi Cristo nilh kkiwi nema makgapatinan.* Putum kilhtamaku xakkalichuwinan, ¿ni xlikana? Pero uku asta ktasa akxni kkalichuwinan. 19 Xlakan kkalinin nakichankgo, tuku tlawaputun xmaknikan wa xdioskan litaxtu chu lanka kalimakgkatsikan tuku xlimaxanankgolh chu kaj lilakpuwankgo tuku xalak katiyatni. 20 Pero akinin tapakgsiyaw kʼakgapun chu lu lakaskinawa kachilh chatum lakgmaxtuna xala anta, Malana Jesucristo, 21 xla namaklakaskin xlitliwakga nema makglhtinalh xlakata nakamapakgsi putum tuku anan chu nalakgpali xaxlajwani kimaknikan xlakata nakgalhi likakni chuna la xmakni.