Apocalipsis
19 Alistalh kkgaxmatli pixlanka* tachuwin xtachuna la xtachuwinkan lhuwa ángeles anta kʼakgapun. Xwankgo: «¡Kamalankitit Jehová!* KiDioskan kalakgmaxtu putum latamanin chu kgalhi lhuwa litliwakga chu likakni, 2 xlakata chuna la lakputsanan tlan lipawankan chu xaʼakgstitum. Xlakata malakgsputulh puskat tiku sta xmakni, tiku limaxkajwanilh katiyatni xtalakgxtumit nema ni xlitatlawat,* chu malakgaxokgelh xlakata xkgalhnikan xlakskujnin nema listajmakgalh xmakan». 3 Chu tunkun wankgolh xlimakgtiy: «¡Kamalankitit Jehová!* Xjini kachikin chuntiya natatalhmani putum kilhtamaku».
4 Chu puxamatati lakgkgolotsin chu kgalhtati querubines* lakgtatsokgostakgolh chu kakninanikgolh Dios, tiku wi anta kpumapakgsin, chu wankgolh: «¡Chuna kalalh! ¡Kamalankitit Jehová!».*
5 Nachuna, taxtucha akgtum tachuwin kpumapakgsin, nema wa: «Kamalankitit kiDioskan putum wixin, tiku skujni litaxtuniyatit, tiku pekuaniyatit, tiku ni xlakaskinka litaxtukgo chu tiku xlakaskinka litaxtukgo».
6 Chu kkgaxmatli pi wi tuku xmakasanama xtachuna la xtachuwinkan lhuwa ángeles, xmakasanan xtachuna la lhuwa chuchut chu xmakasanan xtachuna la akxni tliwakga jilinan. Xwankgo: «¡Kamalankitit Jehová!* ¡Xlakata wa Jehová kiDioskan, Tiku kgalhi putum litliwakga, tsukunita mapakgsinan! 7 Lu kalipaxuwaw chu kamaxkiw kakni xlakata chanita xkilhtamaku xlakata natamakgaxtokga Borrego chu takaxnita tiku xpuskat* nalitaxtu. 8 Chuna, xla maxkikanit talakaskin nalilhakganan xatlan lino, nema xaslipwa chu skulunku, xlakata xatlan lino kilhchanima xaʼakgstitum xtatlawkan tiku xasantos».
9 Chu ángel kiwanilh: «Katsokgwili uma: “Paxuwakgo tiku Dios kawaninit pi naminkgo klanka taway xla xputamakgaxtokgni Borrego”». Chu wampa: «Umakgolh xtachuwin Dios tlan lipawankan». 10 Chu wa xlakata, ktatsokgostalh xlakata nakkakninani. Pero xla kiwanilh: «¡Ni! ¡Nichuna katlawa! Xlakata akit kaj chatum lakskujni chuna la wix chu minatalan, tiku lakgayakgolh nalichuwinankgo xlakata Jesús. ¡Wa Dios kakakninani! Xlakata tuku wankanit pi aku nala, chuna wankanit xlakata namakatsininankan tuku xaxlikana xlakata Jesús».
11 Chu kakxilhli pi xtalakkinit akgapun, chu kaj xalan tasiyalh tantum xasnapapa kawayu. Tiku kgewi wanikan Tiku ni makgxtakgnan chu Ama tiku wan tuku xaxlikana, chu xaʼakgstitum chuna la lakputsanan chu xaʼakgstitum tlawa guerra. 12 Xlakgastapu xtachuna la lhkuyat, chu kxʼakgxakga kgalhi lhuwa coronas. Talhkatawilaninit akgtum tukuwani nema kajwatiya xla lakgapasa, chu niti atanu. 13 Lilhakgananit akgtum lhakgat nema tsakglhmaninit kgalhni, chu xtukuwani wa xTachuwin Dios. 14 Nachuna, lhuwa soldados xalak akgapun kstalanimakgolh, xkgewilakgolh xalaksnapapa kawayu chu xlilhakganankgonit xatlan lino, snapapa chu skulunku. 15 Kxkilhni taxtu kgantum lhman espada chu stakaka* xlakata nakalimalakgsputu kachikinin. Chu nakalimapakgsi xlixtokgo xalikan. Nachuna, laktayami uvas anta niku lakgchitkan nema kilhchanima lhuwa xtasitsi Dios, Tiku kgalhi putum litliwakga. 16 Chu klhakgat, lata kxʼakglhtantun,* tatsokgtawilanit akgtum tukuwani: xMapakgsinakan mapakgsinanin chu xMalanakan* malananin.
17 Nachuna, kakxilhli chatum ángel tiku xya kxlakatin chichini. Chu xla pixlanka kawanilh putum tsiktsi* xalak akgapun:* «¡Katantit* unu! Katamakgstokgtit kxalanka xtaway Dios. 18 Kawatit xmakliwakan mapakgsinanin, comandantes tiku pulalinkgo lhuwa soldados chu lakgtliwakga lakchixkuwin, chu xaliwa kawayu chu tiku kgewilakgolh; putum xmakliwakan, tiku ni skujni litaxtu, nachuna tiku skujni litaxtu, nachuna xmakliwakan tiku ni xlakaskinka litaxtukgo chu tiku xlakaskinka litaxtukgo».
19 Chu kakxilhli xaluku lapanit, mapakgsinanin xalak katiyatni chu ksoldados, putum xtamakxtumikgonit xlakata natalalakatawakakgo kʼguerra ama tiku kgewi kawayu chu ksoldados. 20 Tiku kgewi kawayu chipalh xaluku lapanit chu nachuna ni xaxlikana palakachuwina. Tiku tlawalh milagros kxlakatin xaluku lapanit nema kaliʼakgskgawilh ama tiku makglhtinankgolh xlilhka* xaluku lapanit chu tiku kakninanikgo xtatlawamakgxtu.* Kstaknamakgolhku lhkgen kamakanka niku lakatum wi lanka lhkuyat chu lilakgpasawi azufre. 21 Pero tiku akgataxtukgolh kalimakgnika xalhman espada nema xtaxtu kxkilhni tiku xkgewi kawayu. Chu putum tsiktsi* likgalhkgaskgolh xmakliwakan tiku nikgolh.