Éxodo
38 Nachuna, tlawalh niku klhkuyukan tamakamastan, litlawalh kiwi xla acacia. Statijwa* xwanit, xkgalhi tsinu liwaka akgtiy metro* xlilhman, tsinu liwaka akgtiy metro xlitilanka, chu xlitalhman tsinu liwaka akgtum metro. 2 Tlawanilh akgalokgot lakatati kxchastunin. Pumakamastan chu xʼakgalokgot akgtuma xwanit. Alistalh pumakamastan limaktlawalh cobre. 3 Na katlawalh putum tuku xʼama tamaklakaskin kpumakamastan: cubeta xlakata ksakka lhkaka, pala, xalakpulhman pulatu, laklanka tenedor chu niku xtajukgo jalanat. Putum umakgolh xacobre xwankgonit. 4 Na tlawanilh pumakamastan akgtum puskuyun xacobre, xtachuna la tsalh xwanit, tamaknulh uma puskuyun kxlakʼitat pumakamastan, kxpakgalhu xkilhpan. 5 Mastalankilh likan xlakata nakatlawa akgtati anillos chu kawilinilh klakatati xchastunin lakatsu niku xwaka puskuyun xacobre xlakata anta xkatamaknulh xalaklhman kiwi. 6 Na katlawalh xalaklhman kiwi chu kalichatlawalh cobre. 7 Alistalh katamaknulh xalaklhman kiwi kʼanillos nema xwilakgo kxlakpanin pumakamastan xlakata tlan xlimalakxijka. Pumakamastan pulakglhokgokgo xwanit xtachuna la akgtum caja chu xlitlawakanit tablones.
8 Na tlawalh niku xmakgachakgankan chu xlaktawilh, cobre kalitlawalh. Maklakaskilh espejos xacobre nema xliminkgonit lakpuskatin tiku kskujkgo lakatsu niku xlaktanukan ktabernáculo.
9 Nachuna tlawanilh xkilhtin. Xkilhtin nema xwi ksur tlawanilh cortinas, litlawalh xatlan lino chu xkgalhi tipuxamatati metro aitat xlilhman. 10 Xkgalhi kgampuxam talayaw chu akgpuxam tuku xlaktaya* nema xacobre xwankgonit. Xganchos talayaw chu xʼanillos xaplata xwankgonit. 11 Kxnorte na xkgalhi cortinas chu tipuxamatati metro aitat xlilhman xwanit. Kgampuxan xtalayaw chu akgpuxam tuku xlaktaya xacobre xwankgonit. Xganchos talayaw chu xʼanillos xaplata xwankgonit. 12 Pero kʼoeste, xkgalhi cortinas nema puxamatiy metro xlilhman xwanit. Xkgalhi kgankaw talayaw chu akgkaw tuku xlaktayakgo. Xganchos talayaw chu xʼanillos xaplata xwankgonit. 13 Chu kxʼeste, anta niku taxtu chichini, xkgalhi puxamatiy metro xlitilanka. 14 Kxpakgastakat niku xlaktanukan, xcortinas xkgalhi tsinu liwaka akgchaxan metro aitat, xkgalhi kgantutu talayaw chu akgtutu tuku xlaktayakgo. 15 Chu kxpakgxwiki, cortinas na xkgalhi tsinu liwaka akgchaxan metro aitat, na xkgalhi kgantutu talayaw chu akgtutu tuku xlaktayakgo. 16 Putum cortinas nema xlistilikanit kilhtin, xlitlawakanit xatlan lino. 17 Tuku xlaktayakgo talayaw xacobre xwanit chu xkaliʼakputlawakanit plata; xganchos chu xʼanillos xaplata xwankgonit. Putum talayaw nema xyakgo kkilhtin xkgalhikgo anillo xaplata.
18 Cortina nema xwaka niku laktanukan xlitatlawanit xaspupuku hilo, lana nema xamantajwa* xmanikanit, lu xaspinini hilo chu xatlan lino. Xkgalhi akgnajatsa metro xlilhman chu tsinu liwaka akgtiy metro xlitalhman. Watiya xlitalhman xkgalhi chuna la cortinas xalak kilhtin. 19 Kgantati xtalayaw chu akgtati tuku xlaktayakgo xacobre xwankgonit chu xkaliʼakputlawakanit plata. Xganchos chu xʼanillos xaplata xwankgonit. 20 Laklanka xclavo tabernáculo chu laklanka xclavo kilhtin xacobre xwankgonit.
21 Uma akgtum lista nema masiya tuku tamaklakaskilh xlakata xtlawaka tabernáculo, tabernáculo niku xwi arca xla talakkaxlan. Moisés matlawinalh uma lista chu levitas makgantaxtikgolh uma taskujut, tiku kapulalilh wa Itamar, xkgawasa sacerdote Aarón. 22 Bezalel, xtlat xwanikan Urí, xkgawasa Hur, xalak xtribu Judá, tlawalh putum tuku Jehová xlimapakgsinit Moisés. 23 Makgtayalh Oholiab xkgawasa Ahisamac, xalak xtribu Dan. Xla xtlawa tipalhuwa taskujut, xlitsapanan chu xlistawanan xaspupuku hilo, lana nema xamantajwa xmanikanit, lu xaspinini hilo chu xatlan lino.
24 Oro nema maklakaskinka xlakata xtlawaka tabernáculo wa oro nema makamastaka chuna la xatalakchikini* tamakamastan, uma xtsinkan akgtum mil kilo,* chuna la xpulhkanankan niku xasanto. 25 Xlilhuwa plata nema linkgolh lakchixkuwin tiku xkalhkawilikanit, wa uma: 3,440 kilos,* chuna la xpulhkanankan niku xasanto. 26 Chatunu lakchixkuwin tiku xkalhkawilikanit chu xkgalhikgo akgpuxam kata o liwaka, linkgolh akgchaxan gramo plata, chuna la xpulhkanankan niku xasanto. Xliputum lakchixkuwin 603,550 xwankgonit.
27 Mastalankika 3,420 kilos xla plata xlakata xlitlawaka xlaktay tabernáculo chu xlaktay cortina* nema xmapitsi; maklakaskinka 3,420 kilos xlakata xtlawaka akgtum ciento xlaktay, uma wamputun, pi akgatunu xlaktay litlawaka puxamakutati kilo chu akgtiy gramo. 28 Chu maklakaskilh akgpuxam kilo xla plata xlakata xkalitlawalh xkganchos talayaw, kaliʼakputlawalh talayaw chu kamalakgnulh.
29 Cobre nema makamastaka* xtsinkan 2,420 kilos.* 30 Putum uma litlawalh xlaktay niku xlaktanukan ktabernáculo, pumakamastan xacobre, xpuskuyun xacobre chu putum tuku xtamaklakaskilh kpumakamastan, 31 xlaktay nema xwilakgo xlistilili kilhtin chu xlaktay nema xwilakgo niku xlaktanukan kkilhtin, xalaklhman xclavo tabernáculo chu xalaklhman clavo nema xwilakgo kxlistilili kilhtin.