1 Corintios
11 Kastalanitit kiliʼakxilhtit, chuna la akit kstalanima xliʼakxilhtit Cristo.
2 Kkamalankiyan xlakata kilakapastakatit xliputum tuku tlawayatit chu chuna tlawapatit putum tuku akit kkamasiyaninitan, wa xlakata kkawaniputunan pi lu tlan tuku tlawapatit. 3 Pero klakaskin kakatsitit pi xʼakgxakga putum chixku wa Cristo; chu xʼakgxakga puskat wa chixku; chu xʼakgxakga Cristo wa Dios. 4 Putum chixku tiku taʼakgtlapa akxni tlawa oración o palakachuwinan Dios mamaxani xʼakgxakga; 5 pero putum puskat tiku ni taʼakgtlapa akxni tlawa oración o palakachuwinan Dios mamaxani xʼakgxakga, xlakata xtachuna la puskat tiku tutsu taʼakgsitnit. 6 Komo puskat ni taʼakgtlapa, tutsu xlitaʼakgsitat; pero komo puskat maxanan tutsu taʼakgsita, xlitaʼakgtlapat.
7 Xlakata chixku ni xlitaʼakgtlapat, xlakata xla litasiya Dios chu xlilanka, pero puskat wa limaxkikan kakni chixku. 8 Xlakata Dios ni limalakatsukilh chixku xmakni puskat, Dios limalakatsukilh puskat xmakni chixku. 9 Chu nachuna, chixku ni malakatsukika xpalakata puskat, wa puskat malakatsukika xpalakata chixku. 10 Wa xlakata puskat wi tuku nalitaʼakgtlapa xlakata nalitasiya pi wi tiku mapakgsi, xpalakata ángeles.
11 Anta kxcongregación Malana,* chixku maklakaskin puskat chu puskat maklakaskin chixku. 12 Xlakata chuna la limaklakaskinka xmakni chixku xlakata namalakatsukikan puskat, nachuna puskat malakachini chixku, pero putum tuku anan malakatsukinit Dios. 13 Wixin kalakputsananitit: ¿xlilat pi puskat natlawani oración Dios akxni ni taʼakgtlapanit? 14 ¿Ni kamasiyaniyan chuna la kamalakatsukikanit latamanin pi komo laklhman xchixit chixku uma mamaxani, 15 pero komo puskat laklhman xchixit, uma limaxkikan kakni? Xlakata xla maxkikanit xchixit chu ni kaj tuku litaʼakgtlapa. 16 Pero komo wi tiku ni matlani uma talismanin, akinin ni kkgalhiyaw atanu, nipara xcongregaciones Dios.
17 Pero ni kkamalankiyan akxni kkamaxkiyan uma tastakyaw; xlakata mintamakxtumitkan ni kamakgtayayan, wata tlakg katlawaniyan tuku nitlan. 18 Xlakata xapulana, kkgaxmata pi akxni tamakxtupiyatit kcongregación anan tapapitsit kmilakgstipankan; chu tsinu kkanajla. 19 Xlakata xlikana pi naʼanan sectas* kmilakgstipankan, xlakata tiku tlan kaʼakxilha Dios na natasiyakgo.
20 Akxni wi niku tamakxtupiyatit xlakata nawayatit xTaway Malana ni tlawayatit chuna la xlilat. 21 Xlakata akxni wayatit, chatunu chatunu alipulana way xliwat tuku liminit; wa xlakata chatum tsinksma, pero achatum kgachiya. 22 ¿Ni kgalhiyatit minchikkan niku tlan nawayanatit chu nakgotnanatit?* ¿O nitu liʼakxilhatit xcongregación Dios chu kamamaxaniyatit tiku nitu kgalhikgo? ¿Tuku tlan nakkawaniyan? ¿Nakkamalankiyan? Xlakata uma ni ktikamalankin.
23 Xlakata chuna la Malana kimasiyanilh nachuna kkamasiyanin, pi Malana Jesús, katsisni akxni xʼamaka makamastakan, tiyalh maktum kaxtalanchu, 24 chu akxni xmaxkinita paxtikatsinit Dios, lakgchakgalh* chu chuna wa: «Uma kilhchanima kimakni, nema natamasta mimpalakatakan. Chuntiya katlawatit uma xlakata nakililakapastakatit». 25 Nachuna tlawalh xlakata copa, akxni xlakan xwayankgonita, wa: «Uma copa kilhchanima xasasti talakkaxlan nema natsuku akxni kinkgalhni nastajtamakgan. Chuntiya katlawatit uma, chu ankgalhin kakililakapastaktit akxni nalikgotnanatit». 26 Xlakata xliʼankgalhin akxni nawayatit uma kaxtalanchu chu nalikgotnanatit uma copa, chuntiya lichuwinampatit nawan akxni nilh Malana, asta akxni xla namin.
27 Wa xlakata, putum tiku way kaxtalanchu o likgotnan xcopa Malana komo ni lakgchan, nalitawila kuenta xpalakata xmakni chu xkgalhni Malana. 28 Pulana kaʼakstuputsananika komo lakgchan, chu kajwatiya akxni chuna tlawanita kawalh kaxtalanchu chu kalikgotnalh copa. 29 Komo wi tiku ni katsi pi umakgolh kilhchanima xmakni kiMalanakan, akstu litawila kuenta komo way chu likgotnan. 30 Wa xlakata lhuwa kmilakgstipankan xaxlajwananin chu xatatatlanin chu lhuwa ninitantita.* 31 Pero komo akstu xkinkaputsananikan komo kinkalakgchanan, ni xkinkalakputsananikan. 32 Pero akxni kinkalakputsananikanan, wa Jehová kinkastakyawayan, xlakata ni lakxtum nakinkatamalakgchanikanan tuku lakgchan kakilhtamaku. 33 Wa xlakata, natalan,* akxni nawayatit xTaway Malana kalakgalhkgalhitit asta akxni mimputumkan makxtum wilatit nawan. 34 Komo wi tiku tsinksma, kawayancha anta kxchik, xlakata akxni natamakxtupiyatit ni nalakputsananikan. Pero akxni nakchanacha naklakkaxtlawa tuku kitsankgama.