1 Corintios

8 Chu xlakata liwat nema kamakamaxkikanit tatlawamakgxtu:* akinin katsiyaw pi putum kgalhiyaw takatsin. Takatsin lanka mamakgkatsininan, pero tapaxkit matliwakglhnan. 2 Komo wi tiku lakpuwan pi wi tuku katsi, xla nina putum katsi chuna la xlilat. 3 Pero komo wi tiku paxki Dios, Dios lakgapasa.

4 Chu xlakata wakan liwat nema kamakamaxkikanit tatlawamakgxtu, katsiyaw pi akgtum tatlawamakgxtu nitu litaxtu kkakilhtamaku chu pi ni anan atanu dios, kajwatiya xaxlikana Dios. 5 Lhuwa tuku anan nema kalimapakuwikan pi mat dioses, anta kʼakgapun o anta kkatiyatni, xlikana pi anan lhuwa «dioses» chu «malananin», 6 pero kimpalakatakan kaj chatum Dios anan, wa xaTlat,* tiku tapakgsini putum tuku anan chu akinin tapakgsiniyaw; chu anan kaj chatum Malana,* Jesucristo, tiku Dios limaklakaskilh namalakatsuki putum tuku anan chu akinin lamaw xpalakata.

7 Pero ni putum kgalhikgo uma takatsin. Pero makgapitsin, xlakata xkakninanikgo tatlawamakgxtu, akxni wakgo liwat tuku kamakamaxkikanit tatlawamakgxtu, lakpuwankgo pi wa kakninanimakgolh tatlawamakgxtu, chu xtalakapastaknikan nema ni lakgtliwakgan, taxkajwani. 8 Pero liwat ni tlawa pi tlakg natalakatsuwiniyaw Dios; komo ni nawayaw liwat nitu makgatsankgayaw, komo nawayaw liwat ni tlawa pi tlakg tlan nakinkaʼakxilhan Dios. 9 Pero chuntiya kuentajkatlawatit pi tuku kalakgchanan nalaksakatit ni nakalimaʼakgchakgxniyatit tiku ni tliwakga xtalakapastaknikan. 10 Komo wi tiku xʼakxilhni pi wix tiku kgalhiya takatsin wayampat kʼakgtum templo niku kakninanikan tatlawamakgxtu,* ¿ni katitlawalh pi tiku ni tliwakga xtalakapastakni na nawaputun liwat nema kamakamaxkikanit tatlawamakgxtu? 11 Chuna, kaj xlakata mintakatsin, chixku tiku ni tliwakga xtakanajla nalakla, mintala* tiku Cristo palakanilh. 12 Akxni wixin chuna kamakglakgalhiyatit minatalankan chu kamatlawiyatit tuku xtalakapasktaknikan ni kamaxki talakaskin natlawakgo, wa makglakgalhipatit Cristo. 13 Wa xlakata komo liwat maʼakgchakgxni kintala, nialh makgstum ktiwapa liway, xlakata ni nakmaʼakgchakgxni kintala.