Éxodo
33 Jehová na wanipa Moisés: «Chuntiya kakalipi kachikin nema katamakxtu kxtiyat Egipto. Kapit ktiyat nema kkalitayanilh Abrahán, Isaac chu Jacob akxni kkawanilh: “Nakkamaxki minkamanan”. 2 Nakmalakgachaniyan chatum ángel tiku napulanitilhayan chu nakkatamakxtu cananeos, amorreos, hititas, perizitas, heveos chu jebuseos. 3 Kapit ktiyat niku anan lhuwa leche chu ksakgsi cera.* Pero akit ni ktikataʼan, xlakata wixin akgtum lu xatsakat kachikin chu tlan nakkamasputuyan ktiji».
4 Akxni israelitas kgaxmatkgolh umakgolh tachuwin, lu lipuwankgolh, chu nipara chatum maklakaskilh xlitakaxtay. 5 Chu Jehová wanilh Moisés: «Kakawani israelitas: “Wixin akgtum lu xatsakat kachikin. Tlan lakapala xaktitaxtulh kmilakgstipankan chu xakkamasputun. Wa xlakata ni kamaklakaskintit militakaxtaykan xlakata aku klilakpuwama tuku nakkatatlawayan”». 6 Chu lata ksipi Horeb israelitas nialh maklakaskinkgolh xlitakaxtaykan.
7 Alistalh Moisés yawalh xchik xaxuwa tsinu lakgamakgat niku xwi kachikin chu limapakuwilh chiki niku tamakxtumikan. Putum tiku wi tuku xkgalhskimputun Jehová xʼan kchiki niku xtamakxtumikan, nema xya kxkilhtin kachikin. 8 Makgatunu akxni Moisés xʼan kchiki niku xtamakxtumikan, putum israelitas xtayakgo niku xlaktanukan kxchikkan xaxuwa, chu chuntiya xʼakxilhkgo Moisés asta akxni xtanuyacha kchiki. 9 Akxni Moisés xtanuyacha chu Dios xtachuwinan, puklhni xtakta chu xtamakgxtakga niku xlaktanukan kchiki. 10 Akxni israelitas xʼakxilhkgo puklhni niku xlaktanukan kchiki niku xtamakxtumikan, putum xtakilhputakgo niku xlaktanukan kxchikkan. 11 Chu Jehová xtachuwinan Moisés chuna la kgalhchuwinankgo chatiy lakchixkuwin. Akxni Moisés xtaspita niku xwilakgo israelitas, Josué, xkgawasa Nun tiku xmakgtayana chu kskujni xlitaxtu, ni xtapanu kchiki niku xtamakxtumikan.
12 Wa xlakata Moisés wanilh Jehová: «Wix kiwanipat “Kapulalipi uma kachikin”. Pero nina kiwaniya tiku nakintamalakgachaya. Nachuna, kiwaninita “Liwana klakgapasan* chu kimakgapaxuwaya”. 13 Komo kmakgapaxuwayan, katlawa litlan, kakimasiyani mintiji xlakata tlan naklakgapasan chu chuntiya nakmakgapaxuwayan. Kalakapastakti pi uma kachikin, minkachikin». 14 Wa xlakata xla kgalhtilh: «Akit naktaʼanan chu nakmajaxayan». 15 Chu Moisés wanilh: «Komo wix ni nakinkatapina, ni katlawa pi naktaxtuyaw unu. 16 ¿Tuku nalitasiya pi akit chu minkachikin kkamakgapaxuwayan? Komo nakinkatapina, minkachikin chu akit ni xtachuna ktilitaxtuw chuna la amakgapitsi kachikinin nema anankgo kkatiyatni».
17 Jehová wanilh Moisés: «Na naktlawa uma tuku kiskinipat, xlakata kimakgapaxuwaya chu liwana klakgapasan». 18 Xla kgalhtilh: «Katlawa litlan, kakimaʼakxilhni mililanka». 19 Xla wanilh: «Naktitaxtu kmilakatin chu naʼakxilha pi lu tlan klikatsi, chu naklitachuwinanan kintukuwani, Jehová. Chu tlan naklikatsini tiku tlan naklikatsiniputun, chu naklimasiyani talakgalhaman tiku naklimasiyaniputun talakgalhaman». 20 Chu wanipa: «Nila kintilakaʼakxilhti, xlakata lataman tiku nakiʼakxilha, nani».
21 Nachuna, Jehová wanilh: «Unu lakatsu niku kwi, wi akgtum chiwix, kataya kxkgalhni 22 chu akxni titaxtuma nawan kililanka, nakmatsekgan niku taskganit chiwix chu naklimatsekgan kimakan asta akxni akit ktitaxtunit nawan. 23 Alistalh nakmapanu kimakan chu naʼakxilha kiʼakglhchan. Pero nila kintilakaʼakxilhti».