Lucas

20 Akgtum kilhtamaku, akxni xkamasiyanima latamanin ktemplo chu xlichuwinama xatlan tamakatsinin, xanapuxkun sacerdotes chu lakgtsokgkinanin kataminkgolh xpulalinanin judíos 2 chu wanikgolh: «Kakinkawani, ¿tukuya limapakgsin litlawaya putum uma? ¿Chu tiku maxkin uma limapakgsin?». 3 Xla kakgalhtilh: «Akit na wi tuku nakkakgalhskinan, chu kakiwanitit: 4 ¿Tiku malakgachalh Juan xlakata namununan? ¿Dios xalak akgapun o wa lakchixkuwin?». 5 Alistalh xlakan tsukukgolh lawanikgo: «Komo nawanaw: “Dios xalak akgapun”, nakinkawaniyan: “¿Tuku xlakata ni kanajlanitit?”. 6 Pero komo nawanaw pi “wa lakchixkuwin”, putum latamanin nakinkaʼaktalamakgnikgoyan xlakata xputumkan kanajlakgo pi Juan palakachuwina xwanit». 7 Wa xlakata wankgolh pi ni xkatsikgo tiku xmalakgachanit. 8 Jesús na kakgalhtilh: «Na ni ktikawanin tukuya limapakgsin klitlawa putum uma».

9 Alistalh tsukulh kalitachuwinan latamanin uma liʼakxilhtit: «Chatum chixku chalh uvas chu pakawililh chu karrentarlinilh* tiku xliskujkgolh chu xla alh kʼatanu país makgas kilhtamaku. 10 Akxni chalh kilhtamaku napuxkan uvas, xla malakgachalh kskujni xlakata xmaxkika tuku xlakgchan niku chankanit uvas. Pero xkuentajtlawananin wilinikgolh chu nitu maxkikgolh akxni malakgachakgolh. 11 Pero alistalh malakgachapa atanu skujni. Uma na wilinikgolh chu mamaxanikgolh chu nitu tamalakgachakgolh. 12 Pero kamalakgachanipa xlikgalhtutu; uma na lakgkgaxiwilikgolh chu tamakxtukgolh. 13 Alistalh xmalana niku xchankanit uvas wa: “¿Tuku kilitlawat? Nakmalakgacha kinkgawasa, tiku lu kpaxki. Max namaxkikgo kakni”. 14 Akxni xkuentajtlawananin pukuxtu akxilhkgolh, tsukukgolh lawanikgo: “Wa uma tiku namakglhtinan pukuxtu. Kamakgniw xlakata kilakan nawan tuku lakgchan”. 15 Wa xlakata tamakxtukgolh niku xchankanit uvas chu makgnikgolh. Wa xlakata, ¿tuku nakatlawani xmalana niku chankanit uvas? 16 Namin, chu nakamakgni xkuentajtlawananin pukuxtu chu nakamaxki atanu tiku nakuentajtlawakgo».

Akxni kgaxmatkgolh uma, xlakan wankgolh: «¡Nikxni chuna katilalh!». 17 Pero xla kaks kalakaʼakxilhli, chu wa: «Komo chuna, ¿tuku kilhchanima tachuwin nema tatsokgnit: “Chiwix nema xtlawananin chiki lakgmakgankgolh, wa uma litaxtulh chiwix nema limakilhastuknankan talhman kchastun”?* 18 Putum tiku naʼakgchakgxa kxkgalhni uma chiwix laktsu laktsu nala. Chu tiku naʼaktawila uma chiwix pokgxni natlawa».

19 Lakgtsokgkinanin chu xanapuxkun sacerdotes xchipaputunkgo ama kilhtamaku, xlakata katsikgolh pi wa xkalichuwinama akxni wa uma liʼakxilhtit, pero xkapekuanikgo latamanin. 20 Xlakan xputsamakgolh chuna la nachipakgo Jesús, wa xlakata kamalakgachakgolh makgapitsi lakchixkuwin tiku xkaxokgonikgonit xlakata xlimasiyakgolh pi xaʼakgstitum xwankgonit chu xtlawakgolh pi Jesús xwa tuku ni xlilat, chu tlan xmakamastakgolh kxmakan gobernador. 21 Chu kgalhskinkgolh: «Makgalhtawakgena, kkatsiyaw pi xalakatitum chuwinana chu masiyaya chu ni laksakpaxkinana, wata masiyaya xlakata Dios chuna la xlilat: 22 ¿Xlilat nakmaxkiyaw lilakgaxokgon César, o ni?». 23 Pero Jesús xkatsi tuku lu nitlan xlakpuwamakgolh, wa xlakata kawanilh: 24 «Kakimasiyanitit okgxtum denario.* ¿Tiku xlakapun uma chu tiku xtukuwani talhkanit?». Xlakan kgalhtikgolh: «Xla César». 25 Xla kawanilh: «Wa xlakata, wixin milixokgonitkan César tuku lakgchan César, pero kamaxkitit Dios tuku lakgchan Dios». 26 Wa xlakata, nila liʼakgchipakgolh tuku wa kxlakatinkan latamanin, pero kaks lilakawankgolh la kakgalhtilh, chu nialhtu wankgolh.

27 Pero makgapitsi saduceos tiku wankgo pi ni anan talakastakwanat, minkgolh chu kgalhskinkgolh: 28 «Makgalhtawakgena, Moisés tsokgli: “Komo niy xtala kgawasa chatum chixku, chu makgxtakga xpuskat,* pero ni kgalhi kamanan, uma chixku xlitatamakgaxtokgat xyasta, xlakata natawila xkamanan xtala tiku nilh”. 29 Xwilakgolh kgalhtujun linatalan. Xapulana tamakgaxtokgli pero nilh chu ni kgalhilh kamanan. 30 Nachuna xlichatiy 31 chu xlikgalhtutu na tatamakgaxtokgli xyasta. Xkgalhtujunkan chuna tlawakgolh; nikgolh chu ni kgalhikgolh kamanan. 32 Alistalh na nilh puskat. 33 Wa xlakata, akxni nalakastakwanankgo, ¿tiku xpuskat nalitaxtu? Xlakata xkgalhtujunkan xtatamakgaxtokgkgonit».

34 Jesús kakgalhtilh: «Latamanin xalak uma kakilhtamaku* tamakgaxtokgkgo, 35 pero tiku kaʼakxilhkanit pi xlilat nakalakgchan kilhtamaku nema aku mima chu nalakastakwanankgo kkalinin ni katitamakgaxtokgkgolh. 36 Xlakan asta nialhla katinikgolh, xtachuna la ángeles nawankgo, chu xlakata nakamalakastakwanikan nalitaxtukgo xkamanan Dios. 37 Pero xlakata nalakastakwanankgo tiku nikgonita, asta Moisés na masiyalh ktatsokgni xlakata aktsu kiwi nema xkgalhi xalhtukun, akxni limapakuwi Jehová “xDios Abrahán chu xDios Isaac chu xDios Jacob”. 38 Xla ni xDioskan tiku nikgonita, wata xDioskan tiku staknankgo, xlakata kxlakatin putum staknamakgolh». 39 Makgapitsin lakgtsokgkinanin wanikgolh: «Makgalhtawakgena, lu tlan chuna la kgalhtinanti». 40 Xlakata nialh xtlawaniputunkgo nipara akgtum takgalhskinin.

41 Wa xlakata Jesús kakgalhskilh: «¿Tuku xlakata wankan pi Cristo wa xkgawasa David? 42 Xlakata David wan anta klibro xla Salmos: “Jehová wanilh kiMalana: «Katawila kkimpakgastakat* 43 asta akxni nakkawili mintalatlawananin kxtampin mintantun»”. 44 Komo David limapakuwi Malana, ¿la* tlan xkgawasa nalitaxtu?».

45 Alistalh, akxni putum latamanin xkgaxmatnimakgolh, kawanilh xtamakgalhtawakgen: 46 «Skgalalh katawilatit xlakata lakgtsokgkinanin tiku lakgatikgo lhakgakgo xalaklhman klhakgatkan akxni lapulakgo, chu lakgatikgo kakamaxkika kakni akxni katachuwinankan kplaza niku stanankan chu lakgatikgo xapulana* laktawilh nema wilakgolh ksinagogas* chu tlakg xlakaskinka laktawilh kpaskua, 47 chu kamakgkgalhankgo tuku katapakgsini lakpuskatin tiku nikgonita xchixkukan, chu kaj xlakata tlan nakaʼakxilhkan tlawakgo laklhman oraciones. Xlakan tlakg nakamapatinikan nixawa amakgapitsin».