Lucas
13 Ama kilhtamaku makgapitsi tiku anta xyakgolh, makatsinikgolh pi Pilato kamakgnilh galileos tiku xmakamastamakgolh tamakamastan. 2 Xla kakgalhtilh: «¿Lakpuwanatit pi galileos tiku kaʼakgspulalh uma, tlakg makglakgalhinanin xwankgonit nixawa putum galileos? 3 Ni, kkawaniyan; komo wixin ni namakgxtakgatit mintalakgalhinkan, mimputumkan na nakamalakgsputukanatit. 4 O amakgolh kgalhkutsayan tiku kalaktamalh torre chu kamakgnilh lakatsu kSiloam, ¿lakpuwanatit pi tlakg xlinkgo kuenta nixawa putum lakchixkuwin tiku lamakgolh kJerusalén? 5 Ni, kkawaniyan; komo wixin ni namakgxtakgatit mintalakgalhinkan, mimputumkan na nakamalakgsputukanatit chuna la xlakan».
6 Alistalh kalitachuwinalh uma liʼakxilhtit: «Chatum chixku xchanit akgatum xakiwi higo niku xkachanit uvas, chu milh putsa xatawakat pero nitu tekgsli. 7 Alistalh wanilh xkuentajtlawana niku xchankanit uvas: “Akgtututa kata lata kmin putsa xtawakat uma higo, pero nitu ktekgsnit. ¡Katankapi! ¿Tuku xlakata kaj akgchipama tiyat?”. 8 Xla kgalhtilh chu wanilh: “Malana, kamakgxtakgpara akgtum kata asta akxni naktantuwaxa chu nakmujuni kgatsasa.* 9 Komo kilhtamaku nema aku mima namasta xtawakat, lu tlan; pero komo ni, tlan nakaya”».
10 Alistalh, akxni xmasiyama kʼakgtum sinagoga Sábado xwanit. 11 Chu ¡kaʼakxilhti!, anta xwi chatum puskat tiku akgkutsayan kata xmakgatatatlanit demonio; chu xtapunksnit* chu nila xtaʼaktsaja. 12 Akxni Jesús akxilhli, xla tasanilh puskat chu wanilh: «Puskat mapaksanikana mintajatat». 13 Chu Jesús akwililh xmakan, chu xla tunkun taʼaktsajli chu tsukulh malanki Dios. 14 Pero tiku xpulalinan ksinagoga* sitsilh xlakata Jesús mapaksanalh kSábado, wa xlakata kawanilh lhuwa latamanin: «Akgchaxan kilhtamaku anan xlakata tlan skujkan; wa xlakata katantit* chu kakamapaksakantit amakgolh kilhtamaku, ni akxni Sábado». 15 Pero Malana kgalhtilh: «Lakgaputiyunanin, ¿ni xkutatit wixin kSábado mintorojkan o miburrojkan niku lakgachinunitantit, chu lipinatit xlakata namakgotniyatit? 16 ¿Ni xlilat pi uma puskat tiku chatum xalak xfamilia Abrahán chu tiku Satanás akgkutsayan kata tlawalh pi xpatinalh namapaksanikan xtajatat kSábado?». 17 Chu ama kilhtamaku, akxni chuna wa, putum tiku ksitsinikgo maxanankgolh, pero putum latamanin lu tsukukgolh lipaxuwakgo putum tuku tlawalh nema kaks malakawaninan.
18 Wa xlakata, chuntiya kawanilh: «¿Tuku xtachuna litaxtu xTamapakgsin Dios, chu tuku tlan naktamalakxtumi? 19 Xtachuna la akgtum aktsu xtalhtsi mostaza nema chixku tiyalh chu chalh kxpukuxtu, chu uma stakli chu akgatum kiwi wa, chu tsiktsi* xalak akgapun anta tawilakgolh kxpakganin».
20 Chu amakgtum wampa: «¿Tuku tlan naktamalakxtumi xTamapakgsin Dios? 21 Xtachuna la limaxkutin nema tiyalh chatum puskat chu talakgwilhalh lhuwa harina asta akxni limaxkutin mastakalh putum skitit».
22 Akxni xʼama kJerusalén, Jesús xtitaxtutilha kʼakgatunu laklanka kachikinin chu klaktsu kachikinin, xkamasiyanitilha latamanin. 23 Alistalh chatum chixku wanilh: «Malana, ¿pi kaj ni chalhuwa tiku nalakgtaxtukgo?». Xla kawanilh: 24 «Lu kaliskujtit natanuyatit kxatitsu malakcha,* xlakata kkawaniyan pi lhuwa tiku natanuputunkgo, pero nila katitanukgolh. 25 Akxni xmalana chiki liwana malakchuwanita malakcha, wixin nalakgatlakgtayayatit malakcha kkilhtin,* nawanatit: “Malana, kakilamalakkiniw”. Pero xla nakakgalhtiyan: “Ni kkatsi niku xalanin wixin”. 26 Alistalh wixin natsukuyatit wanatit: “Akinin kkatawayan, chu wix masiya kxalaktilanka kintijikan”. 27 Pero xla nakawaniyan: “Ni kkatsi niku xalanin wixin. ¡Kakintapanunitit, putum wixin xtlawananin tuku ni xaʼakgstitum!”. 28 Anta natasayatit chu namalaksaniyatit mintatsankan, akxni naʼakxilhatit Abrahán, Isaac chu Jacob, chu putum palakachuwinanin kxTamapakgsin Dios, pero wixin nakatamakxtukanatit kkilhtin. 29 Nachuna, latamanin naminkgoyacha niku taxtu chichini chu niku tatsekga chichini chu knorte chu ksur, chu akxtum nawayankgo kxTamapakgsin Dios. 30 Chu ¡kaʼakxilhtit!, makgapitsi tiku xaʼawatiya, xapulana nawankgo, chu makgapitsi tiku xapulana, xaʼawatiya nawankgo».
31 Ama kilhtamaku makgapitsi fariseos lakgtalakatsuwikgolh chu wanikgolh: «Kapit alakatanu, xlakata Herodes makgniputunan». 32 Chu xla kawanilh: «Kapitit chu kawanitit ama wekgni:* “¡Kaʼakxilhti! Kkatamakxtuma demonios chu kkamapaksama latamanin uku chu chali, chu xliʼakgtutu kilhtamaku nakmasputu”. 33 Pero, chuntiya naktlawa kintaskujut uku, chali chu tuxama, xlakata chatum palakachuwina ni xlilat namakgnikan komo ni anta kJerusalén. 34 Jerusalén, Jerusalén, tiku kamakgni palakachuwinanin chu kaʼaktalamakgnikgo tiku kamalakgachanikan..., ¡lu makglhuwa kkamamakgstokgputulh minkamanan chuna la xatse xtilan kamamakxtumi xlakgskgatan kxtampin xpakgan! Pero wixin ni lakaskintit. 35 ¡Kaʼakxilhtit! Dios naʼakgxtakgwili minchikkan. Kkawaniyan, nialh kintiʼakxilhparatit asta akxni nawanatit: “¡Tasikulunatlawanit tiku mima kxtukuwani Jehová!”».