Lucas
10 Alistalh, Malana kalaksakli atanu tutupuxamakaw xtamakgalhtawakgen chu lichatiyun kamalakgachalh kʼakgatunu laklanka kachikinin chu niku na xlakpuwanit naʼan. 2 Alistalh kawanilh: «Chuna, tachanan lu lhuwa, pero skujnin ni chalhuwa. Wa xlakata, lu kaskinitit xMalana tachanan pi kakamalakgachalh tiku namakikgo xtachanan. 3 Wa xlakata kapitit, pero ¡kuentajkatlawatit! Kkamalakgachaman xtachuna la borregos kxlakgstipankan lobos.* 4 Ni kalipitit xpumakikan mintuminkan o mimurralhkan xla xuwa o mintatunukan, chu niti natachuwinanatit* ktiji. 5 Kaniwa niku natanuyatit kʼakgtum chiki, pulana kawantit: “Kakgalhilh takaksni uma chiki”. 6 Chu komo wi chatum tiku paxki takaksni, mintakaksnikan natamakgxtakgni. Pero komo ni anan, nakalakgtaspitparayan. 7 Wa xlakata katamakgxtakgtit kʼama chiki, kawatit chu kalikgotnantit tuku nakamaxkikanatit, xlakata chatum skujni lakgchan namakglhtinan xtaskgaw. Ni lakatum lakatum kapitit kʼatanu chiki.
8 »Nachuna, anta niku natanuyatit kʼakgtum lanka kachikin chu nakamakgamakglhtinankanatit, kawatit tuku nawilikan kmilakatinkan 9 chu kakamapaksatit tatatlanin xala anta chu kakawanitit: “Wa xTamapakgsin Dios kalakgtalakatsuwinitan”. 10 Pero anta niku natanuyatit kʼakgtum lanka kachikin chu ni nakamakgamakglhtinankanatit, kapitit anta niku lhuwa tlawankan* chu kawantit: 11 “Ktinkxaktiyaw asta pokgxni nema kinkatantutawakan xalak minkachikinkan. Pero, kakatsitit uma, pi xTamapakgsin Dios talakatsuwinit”. 12 Kkawaniyan pi tlakg nitlan katikitaxtunilh ama kachikin nixawa Sodoma kKilhtamaku akxni Nalakputsanankan.
13 »¡Kgoxota wix, Corazín! ¡Kgoxota wix, Betsaida!, komo anta kTiro chu kSidón xtitatlawalh lhuwa milagros nema tatlawalh kmilakgstipankan, lata makgan xtilhakgakgolh lhakgat xla talipuwan* chu xtilaktawilakgolh lhkaka.* 14 Wa xlakata, tlakg nitlan katikakitaxtunin wixin nixawa Tiro chu Sidón kKilhtamaku akxni Nalakputsanankan. 15 Chu wix, Capernaúm, ¿max namalankikana asta kʼakgapun? ¡Asta kPutaknun* nachipina!
16 »Putum tiku wixin kakgaxmatniyan, akit kinkgaxmatni. Chu putum tiku kalakgmakganan wixin, na kilakgmakgama. Nachuna, putum tiku kilakgmakgan, na lakgmakgama tiku kimalakgachanit».
17 Alistalh tutupuxamakaw tamakgalhtawakgen xatapaxuwan taspitkgolh chu wankgolh: «Malana, asta demonios kinkakgalhakgaxmatnikgoyan akxni kmaklakaskinaw mintukuwani». 18 Akxni kgaxmatli uma, xla kawanilh: «Kakxilha pi Satanás tamokgosnita xtachuna la makglipni takta kʼakgapun. 19 ¡Kaʼakxilhtit! Kkamaxkinitan limapakgsin xlakata nakalaktayapiyatit luwa chu taskuyu,* chu litliwakga xlakata namakgatlajayatit xlitliwakga talatlawana, chu nitu katikatlawanin tuku nitlan. 20 Pero ni kalipaxuwatit pi xalaklixkajni espíritus kakgalhakgaxmatnikgoyan, wata kalipaxuwatit pi Dios katsokgwilinita mintukuwanikan kʼakgapun». 21 Ama kilhtamaku, Dios maxkilh Jesús espíritu santo, wa xlakata lu paxuwalh chu wa: «Tlat,* xMalana akgapun chu katiyatni, kmalankiyan kxlakatin latamanin, xlakata liwana kamatsekgninita putum uma tiku kgalhtawakgakgonit chu tiku lakgskgalalan chu wa kamasiyaninita tiku taktujukgo* xtachuna laktsu kamanan. Chuna, kinTlat, xlakata wix chuna lakaskinti». 22 Chu wampa: «Putum kimakamaxkinit kinTlat, chu niti katsi tiku xaKgawasa, kajwatiya xaTlat, chu niti katsi tiku xaTlat, kajwatiya xaKgawasa chu na nakatsi putum tiku xaKgawasa namalakgapasniputun».
23 Alistalh xla kajwatiya katachuwinalh xtamakgalhtawakgen chu kawanilh: «Paxuwakgo tiku akxilhkgo tuku wixin akxilhpatit. 24 Xlakata kkawaniyan, lhuwa palakachuwinanin chu mapakgsinanin lu xʼakxilhputunkgo tuku wixin akxilhpatit, pero xlakan ni akxilhkgolh, chu xkgaxmatputunkgo tuku wixin kgaxpatpatit, pero ni kgaxmatkgolh».
25 Chu ¡kaʼakxilhti!, chatum chixku tiku lu xlakgapasa Limapakgsin tayalh xlakata naliʼakxilha chu wa: «Makgalhtawakgena, ¿tuku kilitlawat xlakata nakmakglhtinan latamat nema ni kgalhi xlisputni?». 26 Xla kgalhtilh: «¿Tuku tatsokgnit kLimapakgsin? ¿Tuku akgatekgsa?». 27 Chixku kgalhtinalh: «“Milipaxkit Jehová miDios xliputum minaku chu xliputum milatamat* chu xliputum militliwakga chu xliputum mintalakapastakni” chu “milipaxkit atanu latamanin chuna la miʼakstu paxkikana”». 28 Xla wanilh: «Lu tlan kgalhtinanti; chuntiya katlawa uma chu nakgalhiya latamat».
29 Pero xlakata xlimasiyaputun pi xaʼakgstitum xwanit, chixku wanilh Jesús: «¿Tiku atanu latamanin kilipaxkit?». 30 Jesús kgalhtilh: «Chatum chixku xtaktamachi, mincha kJerusalén chu xʼama kJericó, chu chipakgolh kgalhananin, xlakan mapuxtukgolh klhakgat, kgaxikgolh chu atsinu ni xmakgnikgo akxni ankgolh. 31 Chu na antiya kʼama tiji, xtaktamachi chatum sacerdote, pero akxni akxilhli, sacerdote akglhkgamakgalh. 32 Nachuna, chatum levita, akxni chalh anta chu akxilhli, akglhkgamakgalh. 33 Pero chatum chixku xalak Samaria tiku xmima ktiji, chilh niku xma, chu akxni akxilhli lakgalhamalh. 34 Wa xlakata, xla talakatsuwinilh chu limakgchilh* laktitsu lhakgat anta niku xkgaxikanit, chu mawakanilh aceite chu vino. Alistalh mawakalh kxburro chu lilh kʼakgtum aktsu hotel chu kuentajtlawalh. 35 Lichali maxkilh okgxtiy denarios* xkuentajtlawana aktsu hotel chu wanilh: “Kakuentajtlawa, chu akxni naktaspita akit nakxokgoniyan tuku natilaktlawaya”. 36 ¿Tiku lata xlikgalhtutu lakpuwana wix pi paxkilh chixku tiku makgkgalhananka?». 37 Chixku wa: «Wa tiku limasiyanilh pi xlakgalhaman». Alistalh Jesús wanilh: «Kapit chu nachuna katlawa».
38 Alistalh, xlakan chuntiya ankgolh kxtijikan chu tanukgolh kʼaktsu kachikin. Anta chatum puskat tiku xwanikan Marta makgamakglhtinalh kxchik. 39 Xla na xkgalhi chatum xtala tsumat tiku xwanikan María, xla tawilalh lakatsu kxtantun Malana chu anta tamakgxtakgli xlakata xkgaxmatnilh tuku xlichuwinama.* 40 Pero Marta, atanu tuku xlitaʼakgatsankgetanuma xlakata taskujut. Wa xlakata lakgmilh Jesús chu wanilh: «Malana, ¿ni akxilha pi kintala tsumat kiʼakstu kimakgxtakgli xlakata naktlawa taskujut? Kawani pi kamilh chu kakimakgtayalh». 41 Malana kgalhtilh: «Marta, Marta, lhuwa tuku lilakgaputsapat. 42 Pero kaj ni lhuwa tuku talakaskin, o kaj pulaktum. Pero María laksakli tuku tlakg xatlan, chu ni katimakglhtika».