1 Corintios
1 Pablo, tiku laksakka xʼapóstol Cristo Jesús nalitaxtu xlakata xtalakaskin Dios, chu Sóstenes kintalakan, 2 kkatsokgnaniman wixin tiku wilatit kcongregación anta kCorinto, wixin tiku Dios kamasantujlinitan la* xtamakgalhtawakgen Cristo Jesús. Dios kalaksaknitan xlakata xasantos nalitaxtuyatit, chu nachuna putum tiku kaniwa mapakuwimakgo xtukuwani kiMalanakan* Jesucristo, xMalanakan chu kiMalanakan:
3 KinTlatkan* Dios chu Malana Jesucristo kakamaxkin talakgalhaman nema ni anan xtachuna* chu takaksni.
4 Putum kilhtamaku kpaxtikatsini kiDios mimpalakatakan, xlakata kamaxkinitan talakgalhaman nema ni anan xtachuna* xpalakata Cristo Jesús. 5 Xlakata akxtum tawilatit Cristo, katuwa tuku makgamakglhtinanitantit, liwana lichuwinanatit chu lakgapasatit xtachuwin Dios, 6 chuna la tamasiyat xpalakata Cristo tliwakglh wilikanit kmilakgstipankan, 7 wa xlakata kgalhiyatit putum tuku maklakaskinatit, lata lu kgalhkgalhipatit pi kiMalanakan Jesucristo kalimasiyalh xlitliwakga. 8 Dios na nakamatliwakglhan asta kxlisputni, xlakata kkilhtamaku akxni namin kiMalanakan Jesucristo nitu nakalimawakakanatit. 9 Dios makgantaxti xtachuwin, xla kalaksaknitan xlakata akxtum natatawilayatit* xKgawasa, kiMalanakan Jesucristo.
10 Natalan, uku kkastakyawayan kxtukuwani kiMalanakan Jesucristo, pi kalakkaxlatit tuku nalichuwinanatit, chu ni kaʼanalh tapapitsit kmilakgstipankan, wata akgtum talakapastakni chu akgtum tapuwan kakgalhitit. 11 Xlakata makgapitsi tiku xalak xchik Cloe, kimakatsinikgolh mimpalakatakan, natalan, pi lasitsiniyatit. 12 Wa kkaliwaniyan, xlakata wixin wanatit: «Akit ktapakgsini Pablo», amakgapitsin wankgo: «Akit ktapakgsini Apolos», chu amakgapitsin wankgo: «Akit ktapakgsini Cefas»,* chu amakgapitsin: «Akit ktapakgsini Cristo». 13 ¿Wamputun uma pi Cristo tapapitsinit? Pablo ni nilh* mimpalakatakan, ¿ni xlikana? ¿O kamunukantit wixin kxtukuwani Pablo? 14 Kpaxtikatsini Dios pi lata wixin, nipara chatum kkamunun, kajwatiya Crispo chu Gayo, 15 xlakata ni naʼanan tiku nawan pi wixin kamunukantit kkintukuwani. 16 Xlikana, na kkamunulh tiku xalak xchik tala chixku Estéfanas. Xpalakata amakgapitsin, nialh klakapastaka komo kkamunulh. 17 Xlakata Cristo ni kimalakgachalh xlakata nakmununan, wata kimalakgachalh xlakata naklichuwinan xatlan tamakatsinin; chu ni xaklimaklakaskilh xtachuwinkan tiku lhuwa kgalhtawakgakgonit, xlakata uma ni natlawa pi nitu nalitaxtu kiwi nema makgapatinan* niku xtokgowakaka Cristo.
18 Xlikana, tuku masiyayaw xlakata kiwi nema makgapatinan* nitu litaxtu xpalakata tiku amaka kamalakgsputukan, pero kimpalakatakan, tiku kinkalakgmaxtumakan, litasiya xlitliwakga Dios. 19 Xlakata tatsokgnit: «Nakmalakgsputu xliskgalala tiku skgalala, chu xtalakapastakni tiku skgalala ni ktimakgamakglhtinalh». 20 ¿Niku wi tiku skgalala? ¿Niku wi lakgtsokgkina? ¿Niku wi tiku lakapastaknan* xalak uma kakilhtamaku?* ¿Ni tlawanit Dios pi xliskgalala kakilhtamaku nitu nalitaxtu? 21 Latamanin xalak uma kakilhtamaku lipawankgo xliskgalalakan, wa xlakata ni lakgapaskgo Dios. Tuku lichuwinanaw nitu litaxtu xpalakata amakgapitsin, pero xpalakata uma tuku lichuwinanaw, Dios lakkaxwililh nakalilakgmaxtu tiku kanajlakgo. Xlakata uma, tasiyanit xliskgalala Dios.
22 Xlakata judíos skinkgo milagros chuna la griegos putsakgo liskgalala; 23 pero akinin lichuwinanaw pi Cristo makgnika kkiwi; judíos kamaʼakgchakgxni uma, chu xpalakatakan atanu kachikinin nitu litaxtu. 24 Pero xpalakata tiku kalaksakkanit, judíos chu griegos, Cristo litasiya xlitliwakga chu xliskgalala Dios. 25 Latamanin max naʼakxilhkgo chuna la tuku nitu litaxtu chu ni kgalhi litliwakga tuku xla Dios, pero putum uma tlakg lakgskgalalan chu tlakg lakgtliwakgan nixawa xlakan.
26 Natalan, wixin akxilhatit kmilakgstipankan tiku kalaksakkanitantit, pi ni lhuwa wilakgolh tiku lakgskgalalan litaxtukgo kxlakatinkan latamanin, chu ni lhuwa tiku lakgtliwakgan, chu ni lhuwa tiku minkgoyacha kxlakaskinka familias, 27 wata Dios kalaksakli tuku nitu litaxtukgo xalak kakilhtamaku xlakata nakamamaxani lakgskgalalan lakchixkuwin; chu Dios kalaksakli tuku ni kgalhikgo litliwakga xalak kakilhtamaku xlakata nakamamaxani tuku kgalhikgo litliwakga; 28 chu Dios kalaksakli tuku nitu litaxtukgo kkakilhtamaku chu tuku kalakgmakgankanit, tuku latamanin ni xlakaskinka akxilhkgo, xlakata nakamalakgsputu tuku latamanin xlakaskinka akxilhkgo, 29 xlakata niti lanka namakgkatsikan kxlakatin Dios. 30 Xpalakata Dios wixin akxtum tawilatit Cristo Jesús. Xla limasiya xliskgalala chu tuku xaʼakgstitum tlawa Dios. Xpalakata Jesús lakchixkuwin tlan xasantos nalitaxtukgo, chu tlan nalilakgtaxtukgo talakgmaxtut, 31 xlakata nala chuna la tatsokgnit: «Tiku lanka makgkatsikan, lanka kamakgkatsika xpalakata putum tuku Jehová tlawanit».