Xlimaktum Samuel

18 Akxni David tachuwinankgolh Saúl, Jonatán chu David tsukulh latalalin, chu Jonatán tsukulh paxki chuna la xʼakstu xpaxkikan. 2 Lata amacha kilhtamaku, Saúl tlawalh pi David xtatamakgxtakgli chu nialh maxkilh talakaskin naʼan xchik xtlat. 3 Jonatán xpaxki David chuna la xʼakstu xpaxkikan, wa xlakata xla chu David tlawakgolh akgtum talakkaxlan. 4 Nachuna, Jonatán tamakgxtulh xapakgaxtuluwa klhakgat nema klhakganit chu maxkilh David, chu na maxkilh klhakgat nema klhakga akxni xtalatlawanan, xʼespada, xʼarco chu tuku xlitatampulakgchi. 5 David tsukulh an ktatalachipat chu kaniwa niku xmalakgacha Saúl, ankgalhin tlan xkitaxtuni.* Wa xlakata Saúl xpuxkukan soldados limaxtulh. Chu xlakskujnin Saúl chu putum kachikin tlan akxilhkgolh.

6 Akxni David chu soldados xkitaspitmakgolh chuna la xkamakgatlajakgonit filisteos, xliputum kachikinin xalak Israel xtaxtukgo lakpuskatin xlakata xmakgamakglhtinankgolh mapakgsina Saúl. Xatapaxuwan xkilhtlitilhamakgo chu xtantlitilhamakgo, xtlakgtilhamakgo xpanderetaskan chu xlitlakgnikan nema kgalhi kgantutu cuerda. 7 Lakpuskatin tiku xlipaxuwamakgo la xtlajanankgonit xkilhtlimakgo:

8 Saúl lu sitsilh. Nipara tsinu xlakgati uma takilhtlin. Wa: «Wankan pi David kamakgatlajalh akglhuwa ciento mil, pero kimpalakata pi kaj akglhuwa mil kkamakgatlajanit. ¡Kajwatiya kitsankgama pi mapakgsina nalimaxtukan!». 9 Lata ama kilhtamaku Saúl nialh lipawa David.

10 Lichali Dios mastalh talakaskin pi akgtum ni xatlan talakapastakni xmakgapatinalh Saúl, chu xla la akgwiti* tsukulh likatsi kchiki. Uma chuna lalh akxni David xtlakgma arpa chuna la amakgapitsi kilhtamaku. Alistalh Saúl, tiku xchipanit akgtum lanza, 11 lhkgen makgosunilh David. Lakpuwa: «¡Nakxtokgowaka kpatsaps!». Uma makgtiy chuna lalh, chu umakgolh makgtiy David tsalanilh. 12 Wa xlakata Saúl pekuanilh David, xlakata Jehová xmakgtayama David pero xtamakgatlininit Saúl. 13 Wa xlakata, Saúl mamakgatlilh chu xpuxkukan akgtum mil soldados limaxtulh. David wa tiku xkapulalin soldados ktatalachipat.* 14 David xlimasiya liskgalala xliputum tuku xtlawa, chu Jehová xmakgtaya. 15 Xlakata Saúl xʼakxilha pi David lu tlan xkitaxtuni, tsukulh pekuani. 16 Pero putum Israel chu Judá xpaxkikgo David xlakata wa xkapulalin akxni xtalachipanankgo.

17 Alistalh Saúl wanilh David: «Nakmaxkiyan Merab, tlakg xalankata kintsumat, xlakata natatamakgaxtokga. Kajwatiya kskiniyan pi ni kapekuanti chu chuntiya kakiskujnani chu katalachipananti kxguerras Jehová». Xlakata Saúl xlakpuwan: «Ni akit kaktimakgnilh. Wa filisteos kamakgnikgocha». 18 Pero David kgalhtilh Saúl: «¿Tiku klitaxtu chu tuku litaxtukgo kintalilakgapasni, xfamilia kintlat anta kʼIsrael xlakata akit xpuwiti* mapakgsina naklitaxtu?». 19 Pero akxni chalh kilhtamaku xlakata Merab, xtsumat Saúl, xmakamaxkika David, xtamamakgaxtokgkanita Adriel tiku xalak Meholá* xwanit.

20 Pero Mical, achatum xtsumat Saúl, xlakgati David. Wa xlakata Saúl lipaxuwalh akxni litachuwinanka uma. 21 Saúl lakpuwa: «Nakwani pi katatamakgaxtokgli, chuna xla nalitaxtuni la akgsiyat xlakata filisteos namakgnikgo». Wa xlakata xlimakgtiy, Saúl wanilh David: «La uku kimpuwiti* nalitaxtuya». 22 Wa xlakata, Saúl kalimapakgsilh xlakskujnin: «Tsekg kawanitit David: “Wix lu makgapaxuwaya mapakgsina, chu putum xlakskujnin lakgkatsankgoyan. Wa xlakata xpuwiti mapakgsina kalitaxtu”». 23 Akxni xlakskujnin Saúl wanikgolh David putum uma, xla kakgalhtilh: «¿Lakpuwanatit pi ni tuwa xpuwiti mapakgsina nalitaxtu chatum chixku chuna la akit, tiku limaxkgen chu nitu litaxtu?». 24 Wa xlakata xlakskujnin Saúl litachuwinankgolh tuku xwanit David.

25 Pero Saúl kalimapakgsilh: «Kawanitit uma David: “Kajwatiya tuku mapakgsina lakaskin xlakata nalixokgoniya xtsumat wa akgtum ciento kxuwa xlichixkukan filisteos, xlakata nakamalakgaxokge xtalatlawananin”». Xlakata Saúl xlakkaxwilinit pi filisteos xmakgnikgolh David. 26 Xlakskujnin Saúl makatsinikgolh David uma, chu xla tlan akxilhli xpuwiti mapakgsina nalitaxtu. Akxni nina xlakgchan kilhtamaku nema xlaklhkawilinikanit, 27 David kataʼalh ksoldados, kamakgnilh akgtiy ciento filisteos chu linilh mapakgsina putum kxuwa xlichixkukan xlakata xpuwiti nalitaxtu. Wa xlakata, Saúl makamaxkilh xtsumat Mical xlakata xpuskat xlitaxtulh. 28 Saúl akxilhli pi Jehová xmakgtayama David chu pi xtsumat, Mical, lu xpaxki. 29 Uma tlawalh pi Saúl tlakg xpekuanilh David. Chu Saúl xtalatlawana litaxtulh David xliputum xlatamat.

30 Akxni xnapuxkun filisteos xʼankgo talatlawanankgo, David tlakg tlan xkitaxtuni* nixawa amakgapitsin xlakskujnin Saúl, chu xtukuwani lu xlakgachixkuwikan.