1 Tesalonicenses

1 Akit, Pablo, Silvano* chu Timoteo kkamalakgachaniman uma tatsokgni wixin tiku wilatit kcongregación xalak Tesalónica, tiku tapakgsiniyatit Dios xaTlat* chu Malana* Jesucristo:

Kakgalhitit talakgalhaman nema ni anan xtachuna* chu takaksni.

2 Putum kilhtamaku kpaxtikatsiniyaw Dios akxni kkalakapastakan mimputumkan akxni ktlawayaw kioracioneskan, 3 xlakata kxlakatin Dios kinTlatkan putum kilhtamaku klakapastakaw taskujut nema tlawatit xlakata mintakanajlakan chu mintapaxkitkan, chu chuna la tayanitit tuku tuwa xlakata takgalhkgalhin nema kgalhiniyatit Malana. 4 Xlakata kkatsiyaw, natalan tiku kapaxki Dios, pi xla kalaksaknitan, 5 xlakata kkalitachuwinan xatlan tamakatsinin, chu ni kaj tachuwin, wata xkgalhi litliwakga umakgolh tamakatsinin, chu kalakgchan xlakata xtamakgtay espíritu santo chu liwana xakkanajlayaw pi xaxlikana tuku kkalitachuwinan. Chu wixin katsiyatit pi klikatsiw chuna la tlan xkakitaxtunin. 6 Xlakata tapaxuwan nema masta espíritu santo wixin makgamakglhtinantit tachuwin maski kgalhitit talakgaputsit, chu wixin nachuna likatsitit xtachuna la Malana chu xtachuna akinin, 7 wixin kawilinitit liʼakxilhtit putum kanajlanin xalak Macedonia chu xalak Acaya.

8 Mimpalakatakan putum latamanin xalak Macedonia chu xalak Acaya kgaxmatkgonit xtachuwin Jehová chu xlakata la kanajlaniyatit Dios, wa xlakata akinin nialh talakaskin naklichuwinanaw. 9 Xlakata xlakan chuntiya lichuwinamakgolh akxni xlimakgtumku lalakgapaswi chu chuna la wixin lakgmakgantit mintatlawamakgxtukan* chu lakgtaspittit Dios xlakata xlakskujnin nalitaxtuniyatit chatum xastakna chu xaxlikana Dios, 10 chu xlakata nakgalhkgalhiyatit pi xKgawasa naminacha kʼakgapun, tiku xla malakastakwanilh kkalinin, uma kilhchanima Jesús, tiku nakinkalakgmaxtuyan kxtasitsi Dios.