1 Tesalonicenses

5 Chu xpalakata kilhtamaku nema talhkatawilanit, natalan, ni maklakaskinatit pi wi tuku nakatsokgnanikanatit. 2 Xlakata wixin liwana katsiyatit pi xkilhtamaku Jehová namin xtachuna la chatum kgalhana min katsisni. 3 Akxni lakchixkuwin nawankgo «¡Uku kgalhiyaw takaksni kkilatamatkan chu nitu kinkamakgapekuanan!», kaj lakapala nakalakgmin lisputni akxni ni kgalhkgalhimakgo, xtachuna la chatum puskat tiku nakgalhi kskgata kaj lakapala tsuku katsanajwan* xlakata nalakachin kskgata, chu ni katilakgtaxtukgolh. 4 Pero wixin, natalan, ni wilatit niku kapukswa xtachuna la kgalhananin, xlakata ama kilhtamaku ni nakalakgchinan akxni ni kgalhkgalhipatit, 5 xlakata putum wixin xkamanan xkgakganat chu xkamanan kakuwani. Akinin ni tapakgsiniyaw katsisni chu niku kapukswa.

6 Wa xlakata, ni kalhtataw chuna la amakgapitsin, wata skgalalh katawilaw chu kakgalhiw tlan talakapastakni. 7 Xlakata tiku lhtatakgo, katsisni lhtatakgo, chu tiku kgachikgo, katsisni kgachikgo. 8 Pero akinin tiku wilaw kxkgakganat, chuntiya kakgalhiw tlan talakapastakni chu kalitakuxmumakgtayaw takanajla chu tapaxkit chu kalilakpuwaw lakgtaxtut xlakata nalitaxtu xtachuna akgtum takgnu xalikan, 9 xlakata Dios ni kinkalaksakni xlakata nakinkamalakgaxokgeyan, wata kinkalaksakni xlakata xlakgtaxtuw xpalakata tuku tlawalh kiMalanakan* Jesucristo. 10 Xla nilh kimpalakatakan, xlakata komo lamaw o niyaw, akxtum natalatamayaw. 11 Wa xlakata, chuntiya kalamatliwakglhtit* chu kalamakgtayatit chatunu chatunu, chuna la tlawapatita.

12 Chu kkaskiniyan, natalan, pi kakamaxkitit kakni tiku palha skujkgo kmilakgstipankan chu kapulalinkgoyan kxtaskujut Malana chu kastakyawakgoyan, 13 chu tlakg tlan kakalikatsinitit chu kakapaxkitit kaj xlakata xtaskujutkan. Chu ni kalatakgalhitit taʼakglhuwit. 14 Nachuna, kkalimapakgsiyan, natalan, palha kakastakyawatit tiku akglakgwa lamakgolh, kakawanitit tachuwin nema tlan nakalimamakgkatsiniyatit amakgolh tiku taxlajwanikgonit, kakamakgtayatit tiku ni lakgtliwakgan, ni lakapala kakasitsinitit putum latamanin. 15 Liwana kakuentajtlawatit pi niti nalamaspitni tuku nitlan, wata putum kilhtamaku kalatlawanitit tuku tlan chu nachuna kakalikatsinitit putum amakgapitsin.

16 Putum kilhtamaku kapaxuwatit. 17 Ankgalhin katlawatit oración. 18 Putum kalipaxtikatsinitit Dios, wa uma xtalakaskin xpalakata kstalaninanin Cristo Jesús. 19 Ni kamamixitit xlhkuyat espíritu. 20 Ni kalakgmakgantit tuku Dios makatsininan. 21 Putum kalakputsananitit xlakata nakatsiyatit komo xlikana chu putum kilhtamaku katlawatit tuku xatlan. 22 Kalakgmakgantit putum tuku lixkajni.

23 Dios tiku masta takaksni xatakgatsin kakamasantujlin. Chu laktlan tayat* nema limasiyayatit chu milatamatkan* chu mimaknikan, natalan, xliputuminika tlan katawilalh chu nitu kalixkajwanantit kkilhtamaku akxni kiMalanakan Jesucristo kinkatawilan nawan. 24 Dios tiku kalaksakni,* xlikana natlawa putum uma, xlakata xla ni makgxtakgnan.

25 Natalan, ni kalimakgxtakgtit chuna la tlawayatit oración kimpalakatakan.

26 Kakamaxkitit xasanto tatsukni* putum natalan akxni nakamakgamakglhtinanatit.

27 Kkatasaskiniyan kxtukuwani Malana pi kakalikgalhtawakganika uma tatsokgni putum natalan.

28 KiMalanakan Jesucristo kakamaxkin xtalakgalhaman nema ni anan xtachuna.*