Lucas

24 Xapulana kilhtamaku* xla semana, xlakan lu tsisa ankgolh kputaknun, xlimakgolh xalakmuksun tuwan* nema xlakkaxtlawakgonit. 2 Pero tekgskgolh pi xmapanukanit chiwix nema xlilakgatalakanit putaknun, 3 chu akxni tanukgolh, ni tekgskgolh xmakni Malana Jesús. 4 Akxni xlakan lu kaks xlilakawankgonit uma, ¡kaʼakxilhti!, kapaxtutayakgolh chatiy lakchixkuwin nema lu xmakgxkgakganankgo klhakgatkan. 5 Lakpuskatin lu pekuankgolh, takilhputakgolh chu ni xlakaʼakxilhputunkgo lakchixkuwin, wa xlakata xlakan kawanikgolh: «¿Tuku xlakata putsayatit tiku staknan kxlakgstipankan tiku nikgonita? 6 Ni unu wi, xla malakastakwanikanit. Kalakapastaktit tuku kalitachuwinan akxni xlamajku kʼGalilea, 7 xwan pi xKgawasa chixku xʼamaka makamastakan kxmakankan makglakgalhinanin lakchixkuwin chu xʼamaka makgnikan kkiwi, pero x’amaka malakastakwanikan xliʼakgtutu kilhtamaku». 8 Wa xlakata, lakpuskatin lakapastakkgolh xtachuwin, 9 kitaspitkgolh kputaknun chu kamakatsinikgolh putum uma tuku lalh kgalhkawitu chu amakgapitsin. 10 Wa María Magdalena, Juana, chu María xtse Santiago. Nachuna, amakgapitsin lakpuskatin tiku xkatayakgolh chuna xkawanimakgolh apóstoles. 11 Pero uma tuku kawanika kaj takgalhkgaman liʼakxilhkgolh, ni kakanajlaniputunkgolh lakpuskatin.

12 Pero Pedro tayalh chu tokgosun* alh kputaknun, chu akxni takilhputalh xlakata natalakanu kajwatiya akxilhli lhakgat xalino. Wa xlakata alh, chu lu kaks lilakawa tuku xlanit.

13 Pero ¡kaʼakxilhti!, watiya ama kilhtamaku, chatiy xʼamakgolh kʼakgtum aktsu kachikin nema wanikan Emaús, xwi max akgkawitu kilómetros* lata taxtukanacha kJerusalén, 14 chu xlikgalhchuwinantilhakgo xlakata putum tuku xlanit.

15 Alistalh, akxni xkgalhchuwinantilhakgo chu xlichuwinamakgolh uma, Jesús kalakgtalakatsuwilh chu akxtum tsukulh katatlawan, 16 pero xlakan nila lakgapaskgolh. 17 Xla kawanilh: «¿Tuku litaʼakglhuwitilhayatit ktiji?». Chu xlakan tachokgokgolh chu xtasiya pi xlakalipuwamakgolh. 18 Tiku xwanikan Cleopas kgalhtilh: «¿Ni xala unu wix chu miʼakstu wila kJerusalén, wa xlakata ni katsiya tuku anta lanit umakgolh kilhtamaku?». 19 Xla kakgalhskilh: «¿Tuku lanit?». Xlakan kgalhtikgolh: «Tuku lalh xlakata Jesús xalak Nazaret, tiku limasiyalh pi palakachuwina xwanit, xlakata tuku xtlawa chu xwan xlimasiya pi xkgalhi litliwakga kxlakatin Dios chu latamanin; 20 chu chuna la makamastakgolh xanapuxkun kisacerdoteskan chu mapakgsinanin xlakata xmakgnika, chu xtokgowakaka kkiwi. 21 Pero akinin xaklakpuwanaw pi wa uma xwanit tiku xlaksakkanit xlakata xlakgmaxtulh Israel. Chuna, chu ni kajwatiya uma, uku xliʼakgtutu kilhtamaku lata lalh putum uma. 22 Pero nachuna, makgapitsi lakpuskatin tiku na tamakgalhtawakgen kaks kinkalimalakawanikgon tuku kinkamakatsinikgon, xlakata lu tsisa kilakgolh kputaknun, 23 chu akxni xlakan ni tekgskgolh xmakni Jesús, taspitkgolh chu wankgolh pi na xʼakxilhkgonit ángeles tiku xkawanikgonit pi Jesús kstaknama. 24 Wa xlakata makgapitsi tiku akxtum xkinkatawilakgon ankgolh kputaknun, chu tekgskgolh chuna la xwankgonit lakpuskatin, pero ni akxilhkgolh Jesús».

25 Wa xlakata xla kawanilh: «¡Katsankganiyan talakapastakni xlakata ni kanajlaputunatit tuku lichuwinankgolh palakachuwinanin! 26 ¿Ni xlilat xwanit pi Cristo xlipatinalh putum uma chu alistalh xmaxkika kakni?». 27 Chu kalitachuwinalh putum tuku Tatsokgni xwan xpalakata. Tsukulh kalimaʼakgatekgsni lata xtatsokgni Moisés chu putum Palakachuwinanin.

28 Alistalh talakatsuwikgolh kʼaktsu kachikin niku xlakan xʼamakgolh, chu xla tlawalh pi tlakg makgat niku xʼama. 29 Pero xlakan tsukukgolh wanikgo: «Kakinkatatamakgxtakgti, xlakata natanuya chichini chu natsiswan». Wa xlakata, xla katatamakgxtakgli. 30 Chu akxni xkatawayama, tiyalh kaxtalanchu, sikulunatlawalh chu lakgchakgalh,* chu tsukulh kamaxki. 31 Akxni chuna tlawalh, xlakan katsikgolh tiku xwanit chu lakgapaskgolh; pero xla nialh katasiyanilh. 32 Chu xlakan tsukulh lawanikgo xchatunukan: «¿Ni xlikana pi xtachuwin xlakgchan kinakujkan akxni xkinkatachuwinantilhayan ktiji chu liwana xkinkamaʼakgatekgsniman xTachuwin Dios?». 33 Chu ama kilhtamaku takaxkgolh chu taspitkgolh kJerusalén, chu tekgskgolh pi xtamakxtumikgonit kgalhkawitu chu amakgapitsi tamakgalhtawakgen, 34 chu xwankgo: «¡Xlikana pi Malana malakastakwanikanit! ¡Chu tasiyanilh Simón!». 35 Nachuna, xlakan lichuwinankgolh tuku xlanit ktiji, chu la katsikgolh tiku xwanit xlakata chuna la lakgchakgalh kaxtalanchu.

36 Akxni xlichuwinamakgolhku uma, Jesús tayalh kxlakgstipankan chu kawanilh: «Kakgalhitit takaksni». 37 Pero xlakata lu kaks xlakawankgonit chu xpekuankgonit lakpuwankgolh pi xkamalakawanimaka. 38 Wa xlakata kawanilh: «¿Tuku xlakata lu pekuampatit chu nila kanajlayatit? 39 Kaʼakxilhtit kimakan chu kintantun, pi watiya akit, xlakata espíritu ni kgalhi xmakni chu xlukut chuna la akxilhatit pi kkgalhi». 40 Chu akxni chuna wa kamasiyanilh xmakan chu xtantun. 41 Pero xlakan lu xpaxuwamakgolh chu kaks xlilakawankgo, wa xlakata ni xkanajlakgo, chu kawanilh: «¿Kgalhiyatit liwat?». 42 Wa xlakata maxkikgolh xataxpupu skiti,* 43 chu tiyalh, chu walh kxlakatinkan.

44 Alistalh xla kawanilh: «Wa uma tuku kkawanin akxni xakkatawilanku, pi putum tuku tatsokgnit kimpalakata kxLimapakgsin Moisés chu kxtatsokgnikan Palakachuwinanin chu kSalmos xlikgantaxtut xwanit». 45 Wa xlakata, xla kamakgtayalh xlakata tlan liwana xʼakgatekgskgolh* tuku xkilhchanima Tatsokgni, 46 chu kawanilh: «Wa uma tuku tatsokgnit: pi Cristo xʼama patinan chu xʼama lakastakwanan kxlakgstipankan ninin xliʼakgtutu kilhtamaku, 47 chu anta kxtukuwani, xʼama talichuwinan pi putum kachikinin xmakgxtakgkgolh xtalakgalhinkan xlakata tlan xkatapatika... xmatsukika kJerusalén. 48 Wixin nalichuwinanatit umakgolh. 49 Chu ¡kaʼakxilhtit! Kkamalakgachaniman tuku kinTlat malaknulh. Wixin anta katamakgxtakgtit kkachikin asta akxni namakglhtinanatit litliwakga xala talhman».

50 Alistalh katataxtulh asta kBetania, chu chaxli xmakan chu kasikulunatlawalh. 51 Akxni xkasikulunatlawama, xla kamakgxtakgli chu Dios lilh kʼakgapun. 52 Chu xlakan maxkikgolh kakni* chu akxni taspitkgolh kJerusalén lu xpaxuwakgo. 53 Chu chali chali xwilakgolh ktemplo, xmalankimakgolh Dios.