1 Corintios
10 Wa xlakata, natalan, klakaskin nakatsiyatit, pi putum xalakgmakgan kinatlatnikan* tlawankgolh kxtampin puklhni chu xputumkan tipuntaxtukgolh pupunu 2 chu putum kamunuka la* kstalaninanin Moisés akxni xwilakgolh kxlakatin puklhni chu titaxtukgolh kpupunu, 3 chu xputumkan watiya liwat wakgolh nema Dios mastalh 4 chu xputumkan likgotnankgolh chuchut nema Dios mastalh. Makglhuwa likgotnankgolh chuchut klanka chiwix nema xkastalani, uma lanka chiwix xla Dios xwanit chu xkilhchanima Cristo. 5 Pero Dios tlakg lhuwa tiku ni kamakgamakglhtinalh, wa xlakata nikgolh kxakaskakni tiyat.
6 Wa xlakata, putum tuku lalh wi tuku kinkamasiyaniyan, xlakata ni natlawaputunaw tuku nitlan chuna la xlakan tlawakgolh. 7 Nipara xkakninanin tatlawamakgxtu* kalitaxtuw, chuna la tlawakgolh makgapitsin; chuna la tatsokgnit: «Latamanin wayankgolh chu kgotnankgolh, chu tsukukgolh paxuwakgo». 8 Nipara kakgalhiw talismanin natlawayaw talakgxtumit nema ni xlitatlawat,* chuna la makgapitsi xlakan tlawakgolh talakgxtumit nema ni xlitatlawat,* wa xlakata puxamatutu mil nikgolh kaj akgtum kilhtamaku. 9 Nipara kaliʼakxilhwi Jehová, chuna la makgapitsin liʼakxilhkgolh, wa xlakata luwa kaxkakgolh chu nikgolh. 10 Nipara kataʼakglhuwiw, chuna la makgapitsi xlakan taʼakglhuwikgolh, chu chatum ángel* kamakgnilh. 11 Wa xlakata, putum tuku kaʼakgspulalh akgtum liʼakxilhtit litaxtulh chu tsokgwilika xlakata nakinkalistakyawakanan tiku lamaw kxlisputni kakilhtamaku.
12 Tiku lakpuwan pi tliwakglh ya, kuentajkatlawalh ni naʼakgtsankgataya. 13 Tatsakgsan nema kalakgchinan na kalakgchin putum latamanin. Pero Dios ni makgxtakgnan, chu ni katimastalh talakaskin pi nala tuku nialhla natayaniyatit. Wata akxni natitaxtuyatit tuku tuwa, xla natlawa pi wixin nalakgtaxtuniyatit chu nakamakgtayayan natayaniyatit.
14 Wa xlakata, natalan tiku lu kkapaxkiyan, katamakgatlinitit takaknin xla tatlawamakgxtu.* 15 Kkatachuwinanan chuna la tiku lakgskgalalan lakchixkuwin; wixin kalakputsananitit tuku kwan. 16 Copa xla vino nema limaxkiyaw paxtikatsinit Dios kilhchanima xkgalhni Cristo, ¿ni xlikana? Kaxtalanchu nema lakgchakgayaw* na kilhchanima xmakni Cristo, ¿ni xlikana? 17 Kaj maktum kaxtalanchu anan, wa xlakata maski akinin kilhuwakan, kaj akgtum makni litaxtuyaw, xlakata kimputumkan kaj maktum kaxtalanchu wamaw.
18 Kalilakpuwantit israelitas. Akxni xwakgo tuku xmakamastakan kpumakamastan, ¿ni xtachuna xlitaxtu pi xtawayamakgolh Dios? 19 Wa xlakata, ¿tuku klichuwinama? ¿Pi tuku makamaxkikan tatlawamakgxtu* wi tuku litaxtu, o tatlawamakgxtu wi tuku litaxtu? 20 Nichuna; pero tuku kwan wa pi atanu kachikinin makamaxkikgo tamakamastan demonios chu ni wa Dios; chu ni klakaskin pi wixin makxtum nakatalayatit demonios. 21 Nila nalikgotnanatit xcopa Jehová chu xcopajkan demonios; nila nawayanatit «kxmesa Jehová» chu kxmesajkan demonios. 22 ¿Tuku tlawaputunaw? ¿Tlawaputunaw “pi kasitsilh Jehová”? ¿Tlakg lakgtliwakgan akinin nixawa xla?
23 Mastakan talakaskin pi putum tlan natlawakan, pero ni putum tlan kitaxtu. Mastakan talakaskin pi putum tlan natlawakan, pero ni putum matliwakglhnan. 24 Chatunu chatunu chuntiya kaputsalh ni wa tuku xʼakstu nalitamakgtaya, wata wa tuku nalitamakgtaya achatum.
25 Kawatit putum liway nema stakan niku stakan liway, chu ni talakaskin nakgalhskininanatit xlakata mintalakapastaknikan ni nakamakglhuwiyan, 26 xlakata «Jehová tapakgsini katiyatni chu putum tuku anta anan». 27 Komo chatum tiku ni kanajlani Cristo kawaniyan pi kapitit tawayanatit chu wixin pimputunatit, kawatit tuku nawilikan kmilakatinkan, chu ni talakaskin nakgalhskininanatit xlakata mintalakapastaknikan ni nakamakglhuwiyan. 28 Pero komo wi tiku nakawaniyan: «Uma liway makamaxkikanit tatlawamakgxtu», ni kawatit, xpalakata tiku kawanin chu xpalakata talakapastakni. 29 Ni wa klichuwinama mintalakapastaknikan, wata xtalakapastakni achatum. Maski wi tuku tlan ktlawa, ni xlilat chuna naktlawa komo xtalakapastakni achatum nakilakputsanani xlakata uma, ¿ni xlikana? 30 Komo kway chu kpaxtikatsini Dios, ¿chuna kilitlawat maski amakgapitsin nitlan nakilichuwinankgo?
31 Wa xlakata, komo wayampatit, o kgotnampatit, o katuwa tuku tlawapatit, putum chuna katlawatit xlakata namalankiyatit Dios. 32 Lu kuentajkatlawatit xlakata ni nakamaʼakgchakgxniyatit judíos, griegos chu xcongregación Dios, 33 chuna la akit xliputum tuku ktlawa kkalimakgapaxuwaputun putum latamanin, ni wa kputsa tuku akit tlan nakinkitaxtuni, kputsa tuku tlan nakakitaxtuni lhuwa latamanin, xlakata tlan nalakgtaxtukgo.