Éxodo
3 Moisés xkamapuchwayani xborregos Jetró, xputiatlat,* sacerdote xalak Madián. Akgtum kilhtamaku, akxni xkalima borregos kxʼoeste xakaskakni tiyat, chalh kʼHoreb, ksipi xaxlikana Dios. 2 Uma kilhtamaku xʼángel Jehová tasiyanilh kʼakgtum lhkuyat kxʼitat kgantum aktsu kiwi.* Chu Moisés akxilhli pi xlakgpasama aktsu kiwi pero nitu klhkuma. 3 Wa xlakata Moisés wa: «Naktalakatsuwi xlakata liwana nakakxilha tuku lama chu nakkatsi tuku xlakata ni lhkuma uma aktsu kiwi». 4 Jehová akxilhli pi Moisés xtalakatsuwima xlakata naʼakxilha tuku xlama. Wa xlakata Dios chuwinalh lata niku xya aktsu kiwi chu wanilh: «¡Moisés! ¡Moisés!». Chu xla kgalhtilh: «Unu kwi». 5 Dios wanilh: «Nialh katalakatsuwi. Katatuxtu mintatunu, xlakata niku yat xasanto».
6 Alistalh wanilh: «Akit xDios mintlat, xDios Abrahán, xDios Isaac chu xDios Jacob». Wa xlakata Moisés talakgatlapalh xlakata xpekuan naʼakxilha xaxlikana Dios. 7 Jehová wanipa: «Kakxilhnit xtapatin kinkachikin kʼEgipto chu kkgaxmatnit pi tasaskimakgo tamakgtay xlakata egipcios palha kamaskujumakgo. Liwana klakgapasa xtapatinkan. 8 Wa xlakata nakan kalakgmaxtu kxmakankan egipcios xlakata nakkalin kxatilanka chu kxatlan tiyat, ktiyat niku anan lhuwa leche chu ksakgsi cera,* kxtiyatkan cananeos, hititas, amorreos, perizitas, heveos chu jebuseos. 9 Kaʼakxilhti, asta unu kilakgchinit chuna la tasaskimakgo tamakgtay kachikin Israel. Na kakxilhnit chuna la egipcios kamakgapatinamakgo. 10 La uku, nakmalakgachayan kxlakatin faraón. Wix nakalakgmaxtuya kinkachikin Israel kʼEgipto».
11 Pero Moisés wanilh xaxlikana Dios: «¿Tiku akit xlakata nakan kxlakatin faraón chu nakkalakgmaxtu israelitas kʼEgipto?». 12 Xla kgalhtilh: «Akit nakmakgtayayan. Wa uma tuku nalikatsiya pi akit tiku kmalakgachaman: akxni nakamaxtuya kʼEgipto kinkachikin, putum wixin natanatit kʼuma sipi, chu akit, xaxlikana Dios, nakiskujnaniyatit».*
13 Pero Moisés wanilh xaxlikana Dios: «Kalilakpuwaw pi nakkalakgan israelitas chu nakkawani: “Kimalakgachanit xDioskan xalakgmakgan minatlatnikan”. Chu komo xlakan nakinkgalhskinkgo “¿Tuku wanikan?”, ¿tuku nakkawani?». 14 Wa xlakata Dios kgalhtilh Moisés: «Akit Naklitaxtu tuku Akit Naklitaxtuputun».* Chu wampa: «Wa uma tuku nakawaniya israelitas: “Akit Naklitaxtu kimalakgachanit”». 15 Alistalh Dios wanipa Moisés:
«Wa uma tuku nakawaniya israelitas: “Jehová, xDioskan xalakgmakgan minatlatnikan, xDios Abrahán, xDios Isaac chu xDios Jacob, kimalakgachanit”. Wa uma kintukuwani putum kilhtamaku, chu chuna nakililakgapaskgo tiku nalatamakgo kkilhtamaku nema aku mima. 16 La uku kapit, kakamamakxtupi lakgkgolotsin xalak Israel chu kakawani: “Jehová, xDioskan xalakgmakgan minatlatnikan, xDios Abrahán, Isaac chu Jacob, kintasiyaninit chu kiwanilh: «Akit xlikana kkaʼakxilhman chu kakxilhnit tuku katlawanipakantit kʼEgipto. 17 Wa xlakata kkalitayaniyan pi nakkalakgmaxtuyan kxmakankan egipcios tiku lu kamakgapatinamakgon chu nakkalinan kxtiyatkan cananeos, hititas, amorreos, perizitas, heveos chu jebuseos, ktiyat niku anan lhuwa leche chu ksakgsi cera»”.
18 »Xlakan nakgalhakgaxmatkgoyan. Wix nakatapina lakgkgolotsin xalak Israel kxlakatin mapakgsina xalak Egipto, chu miliwanitkan: “Jehová, xDioskan hebreos, kinkatachuwinan. Wa xlakata, katlawa litlan, kakinkamaxki talakaskin nakanaw akgtutu kilhtamaku kxakaskakni tiyat xlakata nakmakamaxkiyaw tamakamastan Jehová kiDioskan”. 19 Pero akit liwana kkatsi pi komo ni ktimaklakaskilh xatliwakga kimakan, mapakgsina xalak Egipto ni katikamaxkin talakaskin napinatit. 20 Wa xlakata nakmaklakaskin kilitliwakga xlakata naklimalakgaxokge Egipto putum tuku kaks malakawaninan nema naktlawa anta. Alistalh, faraón nakamaxkiyan talakaskin nataxtuyatit. 21 Na naktlawa pi egipcios tlan nakalikatsinikgoyan. Chu akxni wixin napinatit, lhuwa tuku nalipinatit. 22 Chatunu lakpuskatin naskini xtalakatsu* tuku litatlawanit plata, tuku litatlawanit oro chu lhakgat, chu puskat* tiku wi kxchik na naskini putum uma. Wixin nakalimalhakgeyatit milakgkgawasankan chu milaktsumankan. Nakamakglhtiyatit egipcios tuku kgalhikgo».