Xlimaktum Samuel

21 Alistalh, David alh kNob, niku xwi sacerdote Ahimélec. Akxni Ahimélec akxilhli, tsukulh lhpipi xlakata xpekuama chu kgalhskilh: «¿Tuku xlakata miʼakstu wila? ¿Tuku xlakata niti taminitan?». 2 David kgalhtilh sacerdote Ahimélec: «Mapakgsina wi tuku kilakgayawalh naktlawa, pero kiwanilh: “Niti kakatsilh tuku klakgayawanitan nipara limapakgsin nema kmaxkinitan”. Akit kkawaninit kisoldados pi wi niku nakkatatanokglha. 3 La uku komo kgalhiya makkitsis kaxtalanchu kakimaxki o kakimaxki tuku kgalhiya». 4 Pero sacerdote kgalhtilh David: «Ni kkgalhi atanu kaxtalanchu, kajwatiya xasanto kaxtalanchu. Tlan nakmaxkiyan komo misoldados ni katatalakgxtumikgonit lakpuskatin». 5 David kgalhtilh sacerdote: «Xlikana kwaniyan pi chuna la amakgapitsi kilhtamaku akxni kanitaw talatlawananaw ni ktatalakgxtuminitaw puskat. Komo akxni kinkalakgayawakanitan naktlawayaw tuku ni xasanto nitu klimaxkajwinitaw kimaknikan, ¡la uku tlakg nitu klixkajwananitaw!». 6 Wa xlakata sacerdote maxkilh xasanto kaxtalanchu, nema kajwatiya xkgalhi. Uma kaxtalanchu nema xwilikan ktabernáculo nialh xwi kxlakatin Jehová, xlakata xlilakgpalikanita xasasti kaxtalanchu kilhtamaku akxni xlitalakgpalit xwanit.

7 Pero chatum kskujni Saúl, xpuxkukan mapuchwayaninanin, anta xwi ama kilhtamaku xlakata xlitamakgxtakgat xwanit kxlakatin Jehová. Xwanikan Doeg, tiku xalak Edom xwanit.

8 Alistalh David wanilh Ahimélec: «¿Ni kgalhiya kgantum lanza o kgantum espada? Xlakata tunkun xlitatlawat xwanit taskujut nema kilakgayawalh mapakgsina, ni klimilh kiʼespada chu nipara tuku klitalatlawanan». 9 Sacerdote kgalhtilh: «Kkgalhi xʼespada Goliat, filisteo tiku makgni kxakaxtum Elá. Ya kxkgen efod chu litamakgswitnit maktum lhakgat. Kajwatiya uma tuku tlan nakmaxkiyan. Komo maklakaskimputuna kalipi». David wanilh: «Tlan, kakimaxki». Ni anan atanu xtachuna.

10 Ama kilhtamaku, David taxtulh anta chu chuntiya tsalanilh Saúl. Alistalh, chalh kʼGat niku xwi mapakgsina Akís. 11 Chu xlakskujnin Akís wanikgolh xmapakgsinakan: «¿Ni wa uma David, mapakgsina xalak xpaís? ¿Ni wa tiku xwanimaka akxni xkilhtlitilhamaka chu xtantlitilhamaka:

12 Umakgolh tachuwin lu malakpuwanilh David, chu lu pekuanilh mapakgsina Akís xalak Gat. 13 Wa xlakata kaj limasiyaputulh pi xʼakgwitinit,* chu la akgwiti likatsilh xlakgstipankan. Tsukulh lakalhtitmi xmalakcha kachikin chu tlawalh pi xkgalhxlawat* xtaktalh kxkgalhchixit. 14 Alistalh Akís kawanilh xlakskujnin: «¡Uma chixku akgwiti! ¿Tuku xlakata litantit? 15 ¿Ni lhuwata lakchixkuwin tiku akgwitikgo anan kkachikin xlakata nakilitaniparayatit atanu? ¿Lakaskinatit pi kaktamaknulh kkinchik?».