Xlimaktum Samuel
16 Titaxtulh kilhtamaku, Jehová wanilh Samuel: «¿Chuntiyaku nalakglipuwana Saúl? ¿Ni akxilha pi akit klakgmakganit la mapakgsina xalak Israel? Kalimatsama aceite akgalokgot chu kapit, kalakgpi Jesé tiku xalak Belén, xlakata akit klaksaknit chatum xkgawasa xlakata mapakgsina nawan». 2 Pero Samuel wanilh: «¿La nakkan? Komo Saúl nakatsi, nakimakgni». Chu Jehová kgalhtilh: «Kalipi tantum xaskgata wakax chu kawanti: “Kmima makamaxki akgtum tamakamastan Jehová”. 3 Na kawani Jesé pi kaʼalh akxni natlawaya tamakamastan chu nakwaniyan tuku natlawaya. Nalaksaka tiku akit nakwaniyan».
4 Samuel tlawalh tuku Jehová wanilh. Akxni chalh kBelén chu lakgkgolotsin xalak kachikin akxilhkgolh, tsukukgolh pekuankgo chu kgalhskinkgolh: «¿Tuku lama?». 5 Xla kakgalhtilh: «Nitu lama. Kmima makamaxki akgtum tamakamastan Jehová. Kataskulunkitit chu kakilataʼaw ktamakamastan». Alistalh, akxni xkamaskulunkinita Jesé chu xlakgkgawasan, kamamakxtumilh akxni xʼama tlawa tamakamastan. 6 Akxni xlakan chinkgolh, Samuel akxilhli Eliab chu wa: «Max wa uma tiku Jehová laksaknit».* 7 Pero Jehová wanilh Samuel: «Ni kaʼakxilhti la tasiya nipara la xlichalhman,* xlakata ni wa klaksaknit. Dios nichuna akxilha la akxilha chixku. Chixku kaj akxilha chuna la tasiya chatum lataman, pero Jehová akxilha xnaku». 8 Alistalh Jesé tasanilh Abinadab chu lilh kxlakatin Samuel, pero xla wa: «Jehová na ni wa laksaknit». 9 Alistalh Jesé tasanilh Samá,* pero xla wa: «Jehová na ni wa laksaknit». 10 Chuna Jesé tlawalh pi kgalhtujun xlakgkgawasan xʼankgolh kxlakatin Samuel, pero Samuel wanilh Jesé: «Jehová ni wa kalaksaknit».
11 Awatiya, Samuel kgalhskilh Jesé: «¿Kajwatiya umakgolh milakgkgawasan?». Xla kgalhtinalh: «Tsankga tiku tlakg xaʼaktsujku. Anit kamapuchwayani borregos». Alistalh Samuel wanilh Jesé: «Kamatasaninanti, xlakata ni katiwayaw asta akxni xla namin». 12 Wa xlakata xla matasaninalh, chu liminka. Xla chatum kgawasa tiku tliwakga xtasiya, lakglilakgatit lakgastapu xkgalhi chu stlan xtasiya. Chu Jehová wa: «¡Kataya xlakata wa uma klaksaknit mapakgsina nalitaxtu!». 13 Wa xlakata Samuel tiyalh akgalokgot niku xtajuma aceite chu akmawakalh David kxlakatin xnatalan. Lata ama kilhtamaku, xʼespíritu Jehová maxkilh litliwakga David. Alistalh, Samuel alh kRamá.
14 Chu xʼespíritu Jehová xtamakgatlininit Saúl, chu Jehová xmasta talakaskin pi xmakgapatinalh ni xalaktlan talakapastakni. 15 Chu xlakskujnin Saúl wanikgolh: «Liwana tasiya pi Dios mastanit talakaskin namakgapatinanan ni xalaktlan talakapastakni. 16 Katlawa litlan, malana, kakaskini milakskujnin tiku unu wilakgolh pi kaputsakgolh chatum chixku tiku liwana katsini tlakga arpa. Chu akxni Dios namasta talakaskin pi namakgapatinanan ni xalaktlan talakapastakni, xla natlakga arpa chu wix tlakg tlan namakgkatsiya». 17 Wa xlakata Saúl kakgalhtilh xlakskujnin: «Tlan, katlawatit litlan kaputsatit chatum chixku tiku liwana katsini tlakgnan, chu kakilitanitit».
18 Chatum kskujni wanilh: «Kakgaxpatti, kakxilhnit pi chatum xkgawasa Jesé tiku xalak Belén lu liwana katsini tlakgnan, lu tliwakga chu ni pekuan. Nachuna, limasiya liskgalala akxni chuwinan chu stlan tasiya, chu Jehová makgtaya». 19 Wa xlakata Saúl malakgachanilh makatsininanin Jesé xlakata nawani: «Katlawa pi kakilakgmilh minkgawasa David, tiku kamapuchwayanima borregos». 20 Chu Jesé makukilh burro, kaxtalanchu, xuwa niku xmujunit vino chu tantum aktsu cabra, chu maxkilh xkgawasa David xlakata xmaxkilh Saúl. 21 Wa xlakata David lakgalh Saúl chu tsukulh skujnani. Saúl lu paxkilh, chu David xlini xʼescudo. 22 Alistalh Saúl malakgachanilh uma tamakatsinin Jesé: «Katlawa litlan, kamasta talakaskin pi David chuntiya kakiskujnanilh xlakata lu kimakgapaxuwa». 23 Chu akxni Dios xmasta talakaskin pi Saúl xmakgapatinalh ni xalaktlan talakapastakni, David xtiya xʼarpa chu xtlakgnan. Alistalh Saúl xkgoxamixa chu tlakg tlan xmakgkatsi, chu nialh xmakgapatinan ni xalaktlan talakapastakni.