Lucas

22 Ama kilhtamaku, xtalakatsuwima Fiesta xla Kaxtalanchu nema ni kgalhi Limaxkutin, nema limapakuwikan Pascua. 2 Chu xanapuxkun sacerdotes chu lakgtsokgkinanin xputsamakgolh la tlakg tlan xwa namakgnikgo, xlakata xkapekuanikgo latamanin. 3 Alistalh, Satanás laktanulh Judas Iscariote, tiku na xkatatapakgsi kgalhkutiy apóstoles, 4 chu kalakgalh xanapuxkun sacerdotes chu tiku pulalinankgo ktemplo chu kalitachuwinalh chuna la xʼama kamakamaxki Jesús. 5 Xlakan lu lipaxuwakgolh uma chu lakkaxlakgolh namaxkikgo tumin xla plata. 6 Wa xlakata, wa pi tlan xwanit chu tsukulh lakputsa chuna la tlan xkamakamaxkilh akxni ni xʼanankgolh lhuwa latamanin.

7 Alistalh chalh xapulana kilhtamaku akxni xtlawakan Fiesta xla Kaxtalanchu nema ni kgalhi Limaxkutin, akxni xmakgnikan animal xlakata nawakan kPascua; 8 wa xlakata Jesús kamalakgachalh Pedro chu Juan, chu kawanilh: «Kapitit chu kakaxtlawatit tuku nawayaw kPascua». 9 Xlakan wanikgolh: «¿Niku lakaskina pi naklakkaxtlawayaw?». 10 Xla kawanilh: «¡Kaʼakxilhtit! Akxni natanuyatit klanka kachikin, nakatatanokglhan chatum chixku tiku lima chuchut kxalu. Kastalanitit asta kchiki niku natanu. 11 Chu kawanitit xmalana chiki: “Makgalhtawakgena waniyan: «¿Niku wi cuarto niku tlan nakkatawa Pascua kintamakgalhtawakgen?»”. 12 Chu ama chixku nakalinan kʼakgtum lanka cuarto kxlikilhmaktiy chiki. Uma cuarto kgalhiya niku tlan natawilayaw xlakata tlan anta nawayanaw». 13 Wa xlakata ankgolh chu tekgskgolh chuna la xkawaninit Jesús, chu lakkaxwilikgolh tuku xʼama tamaklakaskin kPascua.

14 Wa xlakata akxni chalh kilhtamaku, katatawilalh xʼapóstoles kmesa. 15 Chu kawanilh: «Lu klipaxuwa xlakata kkatawaman uma taway xla Pascua akxni nina kpatinan; 16 xlakata kkawaniyan, ni ktiwapa amakgtum asta akxni nakgantaxtu, akxni xTamapakgsin Dios namin mapakgsinan». 17 Chu xla makgamakglhtinalh patum copa, maxkilh paxtikatsinit Dios chu wa: «Kalikgotnantit uma chu kalamatitaxtinitit minchatunukan, 18 xlakata kkawaniyan, lata uku, nialh ktilikgotnampa xchuchut uvas asta akxni namin xTamapakgsin Dios».

19 Nachuna tiyalh maktum kaxtalanchu, mastalh paxtikatsinit, lakgchakgalh* chu kamaxkilh, kawanilh: «Uma kilhchanima kimakni, nema natamasta mimpalakatakan. Chuntiya katlawatit uma xlakata nakililakapastakatit». 20 Nachuna tlawalh xlakata copa, akxni xwayankgonita, wa: «Uma copa kilhchanima xasasti talakkaxlan nema natsuku akxni kinkgalhni nastajtamakgan mimpalakatakan.

21 »Pero ¡kaʼakxilhtit!, tiku nakimakamasta na anta kintawi kmesa. 22 Xlikana, putum tuku tatsokgnit xpalakata xKgawasa chixku, naʼakgspula, pero ¡kgoxota ama chixku tiku namakamasta!». 23 Wa xlakata, tsukukgolh lakgalhskinkgo chatunu chatunu tiku nialh makgas chuna xʼama tlawa.

24 Pero, na lu tsukukgolh litaʼakglhuwikgo tiku tlakg xlakaskinka xlitaxtu kxlakgstipankan. 25 Pero xla kawanilh: «Mapakgsinanin xalak kachikinin kamapakgsikgo latamanin chuna la lakaskinkgo, chu latamanin lu xlakaskinka tukuwani* kamaxki ama tiku kapuxkunanikgo. 26 Pero wixin ni chuna kalikatsitit. Wata tiku tlakg xlakaskinka kmilakgstipankan kalitaxtulh xtachuna tiku xakgawasaku, chu tiku lakapuxkunan skujni kalitaxtulh. 27 ¿Tiku tlakg xlakaskinka? ¿Tiku tawila kmesa o tiku limin taway? Tlakg xlakaskinka tiku tawila kmesa, ¿ni xlikana? Pero akit kwi kmilakgstipankan xtachuna miskujnikan.

28 »Pero wixin nikxni kimakgxtakgnitantit maski ktitaxtunit tuku lu tuwa; 29 chu akit kkatatlawayan akgtum talakkaxlan, chuna la kinTlat kintatlawanit akgtum talakkaxlan, xlakata akgtum tamapakgsin, 30 xlakata nawayanatit chu nakgotnanatit kkimesa kkinTamapakgsin, chu natawilayatit kpumapakgsin xlakata nakalakputsananiyatit akgkutiy laklanka xfamilia Israel.

31 »Simón, Simón, ¡kaʼakxilhti!, wa Satanás skinit talakaskin nakalakchikiyan xtachuna la akxni trigo makganikan xkgoxkga. 32 Pero akit kskininit Dios mimpalakata xlakata mintakanajla ni nataxlajwani; chu akxni wix taspitnitata nawan, kakamatliwakglhti minatalan».* 33 Alistalh xla wanilh: «Malana, liwana klakapastaknita pi naktaʼanan kpulachin chu naktaniyan». 34 Pero Jesús wanilh: «Kwaniyan, Pedro, uku ni katitasalh tantum puyu* asta akxni makgtutu kilakgmakganitata nawan».

35 Xla na kawanilh: «Akxni kkamalakgachan chu ni lipitit xpumakikan mintuminkan, mimurralhkan xla xuwa chu mintatunukan,* nitu katsankganin ¿ni xlikana?». Xlakan kgalhtinankgolh: «¡Ni!». 36 Alistalh Jesús kawanilh: «Pero uku, tiku kgalhi xpumakikan xtumin, kalilh, nachuna xmurralh xla xuwa, chu tiku ni kgalhi xʼespada, kastalh klhakgat nema wili kxkgalhni chu katamawalh kgantum. 37 Kkawaniyan pi tuku tatsokgnit kimpalakata xlilat nakgantaxtu, nema wan: “Likatsinika chuna la chatum makglakgalhina”. Wa uma tuku kgantaxtuma kimpalakata». 38 Alistalh xlakan wanikgolh: «Malana, ¡kaʼakxilhti!, unu wilakgolh kgantiy espadas». Xla kawanilh: «Kajwatiya umakgolh natamaklakaskin».

39 Akxni taxtucha, alh ksipi xla Olivos chuna la xlismaninit, chu xtamakgalhtawakgen na stalanikgolh. 40 Akxni chalh anta, kawanilh: «Chuntiya katlawatit mioracionkan, xlakata ni natlawayatit talakgalhin». 41 Chu xla katapanunilh chuna la xlimakgat lhkgen makankan akgtum chiwix, tatsokgostalh chu tsukulh tlawa xʼoración, 42 chu xwan: «Tlat, komo lakaskina, kakimapanuni uma copa. Pero ni kalalh tuku akit klakaskin, wata tuku wix lakaskina». 43 Alistalh tasiyanilh chatum ángel xalak akgapun chu matliwakglhli. 44 Pero xla lu xlipuwaxnima, wa xlakata chuntiya tlakg xtlawama xʼoración, chu kxunut* litaxtulh chuna la kgalhni nema kstajtaktama ktiyat. 45 Akxni tlawakgolh xʼoración chu kalakgalh xtamakgalhtawakgen, klhtatakgonit kamanokglhulh, nialh xkgalhikgo litliwakga xlakata lu xlipuwamakgolh. 46 Xla kawanilh: «¿Tuku xlakata lhtatapatit? Katayatit chu chuntiya katlawatit mioracionkan, xlakata ni natlawayatit talakgalhin».

47 Akxni chuntiya xchuwinama, ¡kaʼakxilhti!, lhuwa latamanin, chu tiku xwanikan Judas, tiku na xkatatapakgsi kgalhkutiy apóstoles, xkapulalima, chu lakgtalakatsuwilh Jesús xlakata nalakatsuka. 48 Pero Jesús wanilh: «Judas ¿kaj akgtum tatsukni limakamastapat xKgawasa chixku?». 49 Akxni tiku anta lakatsu xyakgolh, akxilhkgolh tuku xʼama la, wanikgolh: «Malana ¿nakmaklakaskinaw kiʼespadajkan?». 50 Chatum masipanilh* kskujni sacerdote tiku tlakg xkgalhi limapakgsin, maktinilh xtakgen* kxpakgastakat.* 51 Pero Jesús wa: «Ni talakaskin chuna natlawaya». Chu xamanilh xtakgen chu mapaksalh. 52 Alistalh Jesús kawanilh xanapuxkun sacerdotes, tiku xpulalinankgo ktemplo chu xpulalinanin judíos tiku xʼankgonit chipakgo: «¿Litanitantit espadas chu kiwi xlakata nakinchipayatit chuna la chipakan kgalhana? 53 Akxni chali chali xakkatawilan ktemplo, wixin ni kinchipatit. Pero uma minkilhtamakujkan chu kilhtamaku xlakata namapakgsinankgo tiku tatsekgnikgo xkgakganat».

54 Alistalh chipakgolh chu linkgolh, chu tamaknukgocha kxchik sacerdote tiku tlakg xkgalhi limapakgsin; pero Pedro lakgamakgat kstalanima. 55 Akxni mapasika lhkuyat kxlakʼitat kilhtin chu xputumkan tawilakgolh, Pedro na anta xkalakgstipawi. 56 Pero chatum skitiwina tiku akxilhli pi anta xwi kxlakatin lhkuyat, kaks lakaʼakxilhli chu wa: «Uma chixku na akxtum xtalapula». 57 Pero xla ni litayalh, chu wa: «Ni klakgapasa». 58 Kaj lipuntsu, achatum akxilhli, chu wa: «Wix na xkatalatapuliya». Pero Pedro wa: «Ni, ni xlikana». 59 Chu alistalh akxni xtitaxtunita akgtum hora, atanu chixku lakatanks tsukulh wan: «¡Xlikana uma chixku na xtalapula, xlakata xla xalak Galilea!». 60 Pero Pedro wa: «Chixku, ni kkatsi tuku wix kilhwampat». Chu tunkun, akxni xchuwinamajku, tasalh tantum puyu. 61 Wa xlakata Malana lakgtalakgaspitli chu lakaʼakxilhli Pedro, chu Pedro lakapastakli tuku xwanit Malana akxni tiwanilh: «Uku, akxni nina tasa tantum puyu, makgtutu kilakgmakganita nawan». 62 Chu taxtulh kkilhtin chu tasaxnilh xlakata lu xlipuwama.

63 Alistalh, lakchixkuwin tiku xkuentajtlawamakgolh Jesús, tsukukgolh likgalhkgamanankgo, chu lakgakgaxikgo; 64 chu akxni xlakgatlapakgonit, chuntiya xkgalhskinkgo: «Komo palakachuwina wix ¡kakinkawani! ¿Tiku kgaxin?». 65 Chu lhuwa atanu lixkajni tuku wanikgolh.

66 Chu akxni xkgakgalh, tamakxtumikgolh xpulalinanin judíos, chu xanapuxkun sacerdotes chu lakgtsokgkinanin, chu xlakan linkgolh kxpulakni niku xtamakxtumikgo xanaPuxkun Jueces chu wanikgolh: 67 «Komo wix Cristo, kakilawaniw». Pero xla kawanilh: «Maski xakkawanin, nipara tsinu katikanajlatit. 68 Nachuna, komo xakkakgalhskin, ni xkgalhtinantit. 69 Pero lata uma kilhtamaku chu nema aku mima, xKgawasa chixku natawila kxpakgastakat Dios tiku lu tliwakga». 70 Akxni chuna wa, putum wankgolh: «¿Wix xKgawasa Dios?». Xla kawanilh: «Wixin wanatit pi akit». 71 Xlakan wankgolh: «¿Tuku xlakata tilakaskinaw tiku nalichuwinan? Xlakata akinin kgaxmatnitaw tuku wanit».