Xlimaktum Samuel
1 Xwi chatum efraimita xalak Ramataim-Zofim,* xalak kasipijni nema wi kʼEfraín, tiku xwanikan Elcaná. Xkgawasa Jeroham, xkgawasa Elihú, xkgawasa Tohu, xkgawasa Zuf. 2 Chu xkgalhi chatiy xlakpuskatin. Chatum xwanikan Ana, chu achatum xwanikan Peniná. Peniná xkgalhi kamanan, pero Ana ni xkgalhi nipara chatum. 3 Akgatunu kata, uma chixku xtalakakxtuyacha lata kxkachikin asta kSiló xlakata nakakninani Jehová tiku kapulalin lhuwa soldados chu namakamaxki tamakamastan. Anta Hofní chu Finehás, chatiy xlakgkgawasan Elí, kskujnanikgo Jehová chuna la sacerdotes.
4 Akgtum kilhtamaku, Elcaná tlawalh akgtum tamakamastan chu maxkilh liwat nema xlakgchan Peniná, xpuskat, chu putum xlakgkgawasan chu xlaktsuman, 5 pero Ana maxkilh tuku tlakg xatlan xlakata wa tiku lu xpaxki. Pero Jehová ni xmaxkinit kamanan. 6 Chu atanu xpuskat Elcaná, xtapuskat Ana, ankgalhin xlikgalhkgamanan xlakata nitlan namamakgkatsini xlakata Jehová ni xmaxkinit kamanan. 7 Akgatunu kata chuna xlikatsini. Makgatunu akxni Ana xʼan kxchik Jehová, xtapuskat lu xlikgalhkgamanan wa xlakata Ana xtasa chu ni xwayan. 8 Pero Elcaná, xchixku, wanilh: «Ana, ¿tuku xlakata tasaya? ¿Tuku xlakata ni wayana? ¿Tuku xlakata lu lilakgaputsapat?* Akit akxtum ktawilan. ¿Ni tlakg tlan akit nixawa kgalhkaw kamanan?».
9 Akxni wayankgolh chu kgotnankgolh kSiló, Ana tayalh chu alh. Ama kilhtamaku, sacerdote Elí xwi klaktawilh nema wi lakatsu kxmalakcha xtemplo* Jehová. 10 Xlakata Ana lu xlakgaputsama, tsukulh tlawani oración Jehová chu nila xmachokgo la xtasama. 11 Chu tlawalh uma tamalaknun: «¡Oh, Jehová, tiku kapulalin lhuwa soldados! Kaʼakxilhti la lu kpatinama. Komo nalakapastaka uma miskujni, chu ni nakimpatsankgaya chu nakimaxkiya chatum kgawasa, Jehová, akit nakmakamaxkiyan, xlakata naskujnaniyan xliputum xlatamat. Chu nikxni katichukunika xchixit».
12 Xla lu makgas tlawanilh oración Jehová chu Elí xʼakxilhma la xmatsuwima xkilhni.* 13 Ana pixtsu xtachuwinama Dios. Xkilhni xtatsuwi, pero ni xtakgaxmata tuku xwan. Wa xlakata Elí lakpuwa pi kaj xkgachi. 14 Wa xlakata Elí wanilh: «¿Tuku xlakata kgachiya? Nialh kawat vino». 15 Ana kgalhtilh: «¡Ni, kimalana! Nitu kwanit* vino nipara atanu tuku likgachikan. Kaj lu kpatinama, wa xlakata kwanima Jehová tuku kmakgkatsi. 16 Ni kakiliʼakxilhti la chatum puskat tiku nitu litaxtu. Lu klakgaputsama chu lu nitlan kmakgkatsi, wa xlakata chuna kchuwinanit putum uma kilhtamaku». 17 Alistalh Elí wanilh: «Kapit chu nitu kalilakgaputsa, chu xDios Israel kamaxkin tuku skininita». 18 Chu xla kgalhtilh: «Tlan kaʼakxilhti uma miskujni». Wa xlakata Ana alh chu wayalh, chu nialh tasiyalh pi xlipuwama.
19 Lichali, tsisa takikgolh chu akxni xkakninanikgonita Jehová taspitkgolh kxchikkan anta kRamá. Elcaná tatalakgxtumilh Ana, xpuskat, chu Jehová kgalhtilh xʼoración. 20 Ana xʼama kgalhi kskgata chu nipara akgtum kata titaxtulh, kgalhilh aktsu kgawasa. Limapakuwilh Samuel,* xlakata xwan: «Wa Jehová tiku kskinilh».
21 Alistalh, Elcaná kataʼalh kSiló putum tiku xalak xchik xlakata xmakamaxkikgolh Jehová tamakamastan nema xtlawa akgatunu kata, chu xlakata xmakamaxkilh akgtum tamakamastan xlakata tamalaknun nema xtlawanit. 22 Pero Ana ni alh xlakata wanilh xchixku: «Akxni nialh nakmatsiki aktsu kgawasa, naklini Jehová, chu lata amacha kilhtamaku anta natamakgxtakga». 23 Elcaná, xchixku, kgalhtilh: «Katlawa tuku tlan akxilha. Katamakgxtakgti unu asta akxni nialh namatsikiya. Jehová kamakgantaxtilh tuku lichuwinanita». Wa xlakata, Ana tamakgxtakgli kxchik asta akxni nialh matsikilh xkgawasa.
24 Akxni nialh matsikilh, lilh xkgawasa kSiló. Nachuna lilh tantum toro nema xkgalhi akgtutu kata, akgkawitu kilo* xla harina chu akgtum lanka xalu xla vino. Tachalh* aktsu xkgawasa kxchik Jehová, anta kSiló. 25 Alistalh makgnika toro chu linka aktsu kgawasa kxlakatin Elí. 26 Xla wanilh: «¡Kimalana, kakintapati! Kimalana, xlikana pi akit puskat tiku xya kmimpaxtun akxni xaktlawanima oración Jehová. 27 Ktlawanilh oración Jehová xlakata nakskini uma aktsu kgawasa, chu xla kimaxkilh tuku kskinilh. 28 Chu la uku akit kmakamaxki* Jehová. Natapakgsini Jehová putum xlatamat».
Chu Elcaná anta kakninanilh Jehová.