Filipenses
2 Xlakata wixin lamakgpuwantiniyatit chatunu chatunu xlakata tapakgsiniyatit Cristo, xlakata tlan lamamakgkatsiniyatit xlakata lapaxkiyatit, xlakata lalilakgaputsayatit chatunu chatunu, xlakata lapaxkiyatit chu lalakgalhamanatit, 2 chuntiya kalilatapatit uma, watiya tapuwan kakgalhitit, watiya tapaxkit kakgalhitit, makxtum kalatit, watiya talakapastakni kakgalhitit, xlakata chuna lu nakimakgapaxuwayatit. 3 Nitu katlawatit kaj xlakata nalitalatlawananatit chu nipara natlankajwananatit, wata katataktujutit* chu amakgapitsin tlakg xlakaskinka kakaʼakxilhtit nixawa wixin, 4 chu ni kajwatiya kalilakpuwantit tuku tlakg tlan kitaxtu mimpalakatakan, wata na kalilakpuwantit tuku tlakg tlan xpalakatakan amakgapitsin.
5 Chuntiya kalakapastaknantit chuna la Cristo Jesús, 6 tiku maski la* Dios xwanit, nipara tsinu lakpuwa xtachuna Dios nawan. 7 Ni, wata makgxtakgli putum tuku xkgalhi chu skujni litaxtulh chu lataman litaxtulh.* 8 Ni kajwatiya uma, akxni lataman litaxtulh,* tataktujulh chu kgalhakgaxmatninalh asta klinin, chuna, makgnika kkiwi nema makgapatinan.* 9 Wa xlakata, Dios tlakg talhman wililh nixawa xapulana chu lakgalhamalh akxni maxkilh tlakg xlakaskinka tukuwani nixawa atanu tukuwani, 10 xlakata kxtukuwani Jesús natalakgatsokgostakgo putum tiku xalak akgapun, tiku wilakgolh kkatiyatni chu kxtampin katiyatni, 11 chu putum xliwanatkan kxlakatin amakgapitsin pi Jesucristo Malana* litaxtu xlakata nalimalankikan Dios tiku xaTlat.
12 Natalan tiku lu kkapaxkiyan, akxni akxtum xakkatawilan putum kilhtamaku kgalhakgaxpatnantit, chu uku maski ni anta kkatawilachan tlakg kgalhakgaxpatnanatit. Wa xlakata, chatunu chatunu kaliskujtit xlakata tlan nalakgtaxtuyatit chu akxni chuna natlawayatit kamastatit kakni chu kakgalhitit tapekua. 13 Dios kamatliwakglhan kaj xlakata xtalakaskin, chu tlawa pi natlawaputunatit chu kamaxkiyan litliwakga xlakata chuna natlawayatit. 14 Xliputum tuku natlawayatit ni kataʼakglhuwitit chu ni kalatalatlawatit, 15 xlakata ni xataxkajwani nakgalhiyatit minakujkan chu ni nakgalhiyatit talakgalhin, chuna la xkamanan Dios ni kakgalhitit talakgalhin kxlakgstipankan umakgolh latamanin tiku lixkajni likatsikgo chu ni tlawakgo tuku xaʼakgstitum, wixin tiku mastayatit xkgakganat kkakilhtamaku, 16 tliwakglh kakgalhitit tachuwin nema masta latamat. Komo chuna nawan naklipaxuwa kxkilhtamaku Cristo, xlakata nakkatsi pi ni kaj xachunata la kkgosnalh* chu ni kaj paxkat wa kintaskujut. 17 Pero maski kixtakgamakgamaka xtachuna la tamakamastan xla vino kxʼakgspun* tamakamastan akxni kmakgtayanan kxasanto taskujut, lu kkatapaxuwayan, xlakata mintakanajlakan na kamatlawinitan uma. 18 Nachuna wixin kakintapaxuwatit.
19 Komo chuna lakaskin Malana Jesús, nialh makgas nakkamalakgachaniyan Timoteo, xlakata nakimatliwakglha akxni xla nakilitachuwinan mimpalakatakan. 20 Xlakata ni kkgalhi atanu tiku likatsi chuna la xla, xlakata nakmalakgacha tiku xlikana kalilakgaputsayan. 21 Xlakata putum amakgapitsin putsakgo tuku tlan kakitaxtuni pero ni putsakgo tuku lakaskin Jesucristo. 22 Wixin katsiyatit pi limasiyalh pi nichuna likatsi, xla kintaskujli xtachuna la chatum kgawasa taskuja xtlat, xatapaxuwan kintaskujli xlakata nastaka chuna la talichuwinama xatlan tamakatsinin. 23 Wa xlakata, wa tiku nialh makgas nakkamalakgachaniyan akxni nakakxilha tuku nakinkitaxtuni. 24 Xlikana, komo xtalakaskin Malana nialh makgas akit na nakkalakganachan.
25 Pero uku, klakpuwan pi xlakaskinka nakkamalakgachaniyan Epafrodito, kintala chu tiku akxtum kintaskuja chu na ksoldado Cristo, tiku wixin malakgachatit xlakata nakimakgtaya, 26 xlakata xla kaʼakxilhputunan putum wixin chu lu lilipuwan xlakata wixin katsitit pi xtatatlanit. 27 Xlikana pi xtatatla, atsinu ni xniy; pero Dios lakgalhamalh, chuna, ni kaj xla lakgalhamanka, nachuna akit, xlakata ni xʼanalh tuku tlakg xaklilipuwa. 28 Wa xlakata, lakapala kmalakgachamacha, xlakata akxni naʼakxilhatit napaxuwaparayatit chu akit ni lu naklilakgaputsa. 29 Wa xlakata, tlan kamakgamakglhtinantit chuna la wixin lismaninitantit xatapaxuwan kamakgamakglhtinanatit tiku kstalaninanin Malana, chuntiya kakamakgamakglhtinantit natalan tiku chuna la xla, 30 xlakata atsinu ni xniy xlakata xtaskujut Cristo,* kalipekua xwilima xlatamat xlakata xkimaxkima tamakgtay nema wixin nila kimaxkitit xlakata ni unu xwilatit.