Xlimaktum Samuel
31 Pero filisteos xtalatlawamakgolh Israel. Chu soldados xalak Israel katsalanikgolh filisteos chu lhuwa nikgolh anta ksipi Guilboa. 2 Filisteos kaputsastalanikgolh Saúl chu xlakgkgawasan, chu makgnikgolh Jonatán, Abinadab chu Malki-Súa, xlakgkgawasan Saúl. 3 Lu taliwakalh chuna la xtalatlawamaka Saúl. Tiku xlinkgo xʼarcojkan akxilhkgolh chu lu masipanikgolh.* 4 Alistalh Saúl wanilh tiku xlini xʼescudo: «Kamaxtu miʼespada chu kakilimakgni, ni klakaskin pi umakgolh tiku ni skujnanikgo Dios, naminkgo chu xlakan chuna nakintlawakgo, chu lixkajni nakilikatsinikgo». Pero tiku xlini xʼescudo nichuna tlawalh xlakata lu xpekuama. Wa xlakata Saúl tiyalh espada chu xʼakstu limakgnika. 5 Akxni tiku xlini xʼescudo akxilhli pi Saúl xninit, na tiyalh x’espada chu x’akstu limakgnika. 6 Chuna akxtum nikgolh ama kilhtamaku, Saúl, kgalhtutu xlakgkgawasan, tiku xlini xʼescudo chu putum ksoldados. 7 Akxni israelitas tiku xwilakgolh niku kxakaxtum chu kxtiyat Jordán, akxilhkgolh pi soldados xalak Israel xtsalakgonit chu pi Saúl chu xlakgkgawasan xnikgonit, akgxtakgmakgankgolh kachikin chu tsalakgolh. Filisteos minkgolh chu kaʼakgchipakgolh.
8 Lichali, akxni filisteos ankgolh kamakglhtikgo tuku lhuwa xtapalh tiku xnikgonit, tekgskgolh pi Saúl chu kgalhtutu xlakgkgawasan xanin xmakgolh anta ksipi Guilboa. 9 Pixkaktikgolh Saúl chu makglhtikgolh xtalhakgan nema xlitlawa guerra, chu malakgachaka akgtum tamakatsinin kxlilakgatum xtiyatkan filisteos xlakata namakatsininankan tuku xlanit kxlakʼitat kachikinin chu kxtemploskan xtatlawamakgxtukan. 10 Chu wilikgolh klhakgat nema litlawakan guerra anta ktemplo niku xkawilikan tatlawamakgxtu xla Astoret chu xtokgowakakgolh xanin xmakni kxpatsaps Bet-San. 11 Akxni latamanin xalak Jabés-Galaad katsikgolh tuku filisteos xtlawanikgonit Saúl, 12 putum soldados tantaskaka tlawankgolh chu kakimaktikgolh xmaknikan Saúl chu xlakgkgawasan kxpatsaps Bet-San. Taspitkgolh kJabés chu anta kalhkuyukgolh. 13 Alistalh maknukgolh* xlukutkan kxtampin xakiwi tamarisco nema xya kJabés chu kgalhxtakgnankgolh* akgtujun kilhtamaku.