2 Pedro
3 Natalan tiku kkapaxkiyan, uma xlimaktiy carta nema kkatsokgnaniman, nachuna la xapulana, kkamalakapastakaman uma tuku nakamakgtayayan liwana nalakapastaknanatit, 2 xlakata nalakapastakatit tuku xwankgonit xasantos palakachuwinanin pi aku xʼama la chu xtamasiy kiMalanakan* tiku kinkalakgmaxtun, nema kalitachuwinankgon apóstoles. 3 Pero tuku tlakg xlakaskinka, milikatsitkan pi kxaʼawatiya kilhtamaku latamanin nalikgalhkgamanankgo tuku xatlan chu natlawakgo tuku nitlan nema xlakan tlawaputunkgo 4 chu nawankgo: «Xla malaknulh pi namimpara, pero ¿niku wi? Xlakata lata nikgolh xalakgmakgan kinatlatnikan,* putum tuku anan chuntiya wilakgolh chuna la xkilhtsukut kakilhtamaku».
5 Xlakata xlakan ni lakapastakputunkgo pi akgapun makgasata lata wilakgolh chu xpalakata xtachuwin Dios tlawaka pi chuchut tanu xtawi xlakata tiyat xtaʼakgkutulh, 6 watiya umakgolh malakgsputukgolh latamanin xla ama kilhtamaku. Uma chuna lalh akxni chuchut makgtsilh putum katiyatni. 7 Pero xlakata watiya uma tachuwin akgapun chu katiyatni nema wilakgolh uku kalikgalhkgalhimaka lhkuyat chu kawilikanit asta kilhtamaku akxni nalakputsanankan chu nakamalakgsputukan latamanin tiku lixkajni likatsikgo.
8 Pero, natalan tiku kkapaxkiyan, ni kapatsankgatit* pi Jehová akgtum kilhtamaku* akxilha xtachuna akgtum mil kata chu akgtum mil kata xtachuna akgtum kilhtamaku. 9 Jehová ni mamakgapali akxni namakgantaxti tuku wanit pi natlawa, chuna la lakpuwankgo makgapitsi latamanin. Wata kakgalhkgalhiman xlakata ni lakaskin pi wi tiku namalakgsputukan, wata lakaskin pi putum latamanin kamakgxtakgkgolh tuku nitlan tlawamakgolh. 10 Pero xkilhtamaku Jehová namin xtachuna la kgalhana. Ama kilhtamaku akgapun lakapala nalakgsputkgo xtachuna la akxni jilinan chu tuku anan kʼakgapun chu kkatiyatni xlakata lu chichixnin nawankgo, nastalankkgo. Katiyatni chu tuku anan anta nakalhkuyukan.
11 Xlakata chuna nastalankkgo putum umakgolh, kalilakpuwantit mintayatkan chu tuku militlawatkan. Xaskulunku miliwanatkan chu militlawatkan tuku limasiya pi tamakamastaninitantit Dios 12 akxni kgalhkgalhipatit chu putum kilhtamaku lakapastakpatit* xkilhtamaku Jehová, xlakata uma, akgapun nakalimalakgsputukan lhkuyat chu tuku anan kkatiyatni chu tuku anan kʼakgapun nakalimastalankikan lhkuyat. 13 Chuna la malaknunit, kgalhkgalhimanaw xasasti akgapun chu xasasti katiyatni, anta putum kilhtamaku natlawakan tuku xaʼakgstitum.
14 Wa xlakata, natalan tiku kkapaxkiyan, xlakata kgalhkgalhipatit umakgolh, lu kaliskujtit xlakata Dios tlan nakaʼakxilhan, ni nakatekgsniyan tuku nitlan chu tlan natalalipinatit. 15 Nachuna, kalakpuwantit pi xlakata kgalhkgalhinama kiMalanakan uma tlawa pi tlan nalakgtaxtukan, chuna la kintalakan Pablo tiku lu paxkiyaw tsokgli xlakata Dios maxkinit liskgalala, 16 xla tsokgli xpalakata umakgolh anta kxcartas. Pero anta kxcartas anan makgapitsi tuku lu tuwa akgatekgskan* chu tiku nitu katsikgo* chu tiku ni tliwakga xtakanajlakan, lakgpalikgo, chuna la tlawakgo kxliputum Tatsokgni, chu uma xʼakstukan nakalimalakgsputukan.
17 Wa xlakata, natalan tiku kkapaxkiyan, xlakata katsiyatita uma, skgalalh katawilatit xlakata ni nakamaʼakgtsankgakanatit xpalakata xalixkajni xtayatkan nema ni lilakamaxanankgo tiku lixkajni likatsikgo chu nialh tliwakga natayayatit. 18 Wata chuntiya tlakg kamakglhtinantit talakgalhaman nema ni anan xtachuna* chu liwana kalakgapastit kiMalanakan chu kiLakgmaxtunakan Jesucristo. Xla kamaxkika kakni uku chu putum kilhtamaku. Chuna kalalh.