Jueces

11 Chatum galaadita tiku xwanikan Jefté, chatum tliwakga soldado xwanit. Xkgawasa xwanit chatum puskat tiku ksta xmakni, chu xtlat xwanikan Galaad. 2 Pero xpuskat Galaad na takgalhilh kamanan. Akxni xlakan stakkgolh, tamakxtukgolh Jefté chu wanikgolh: «Wix nitu katilakgchan kxchik kintlatkan, xlakata wix atanu tiku mintse». 3 Wa xlakata Jefté katsalanilh xnatalan chu kxtiyat Tob tamakgxtakgli. Chu makgapitsi lakchixkuwin tiku ni xkgalhikgo xtaskujutkan akxtum talakgolh chu stalanikgolh.

4 Titaxtulh kilhtamaku, ammonitas tsukukgolh katalatlawakgo israelitas. 5 Chu akxni akxilhkgolh pi ammonitas xkatalatlawamakgo israelitas, lakgkgolotsin xalak Galaad lakapala ankgolh kxtiyat Tob xlakata namaspitparakgo Jefté. 6 Wanikgolh Jefté: «Katat, klakaskinaw pi wix kimpuxkukan kalitaxtu xlakata tlan nakkatalatlawayaw ammonitas». 7 Pero Jefté kakgalhtilh lakgkgolotsin xalak Galaad: «¿Ni wixin tiku nipara tsinu xkiʼakxilhputunatit chu kintlakgaxtutit kxchik kintlat? ¿Tuku xlakata kimputsayatit la uku akxni kgalhiyatit taʼakglhuwit?». 8 Wa xlakata lakgkgolotsin xalak Galaad wanikgolh Jefté: «Wa xlakata kkalilakgmiman. Komo nakilataʼanaw chu nakatalatlawaya ammonitas, wix xpuxkukan nakalitaxtuniya latamanin xalak Galaad». 9 Chu Jefté kawanilh lakgkgolotsin xalak Galaad: «Komo nakilalinaw xlakata nakkatalatlawa ammonitas chu Jehová natlawa pi nakkamakgatlaja, mimpuxkukan naklitaxtu». 10 Lakgkgolotsin xalak Galaad wanikgolh Jefté: «Jehová kakatsilh* tuku lichuwinanitaw chu xla kakinkalakputsananin komo ni naktlawayaw tuku wanti». 11 Wa xlakata Jefté kataʼalh lakgkgolotsin xalak Galaad, chu latamanin limaxtukgolh xpuxkukan ksoldados chu xpulalinakan. Chu Jefté wampa anta kMizpa, kxlakatin Jehová, putum tuku xwanit.

12 Alistalh Jefté kamalakgachanilh makatsininanin xmapakgsinakan ammonitas xlakata nawani: «¿Tuku nitlan ktlawaninitan xlakata natana talatlawaya kinkachikin?». 13 Xmapakgsinakan ammonitas kakgalhtilh xmakatsininanin Jefté: «Akxni Israel taxtucha kʼEgipto, akgchipalh tiyat nema xkintapakgsini lata kʼArnón asta kJaboc chu asta kJordán. La uku kakimaspitni, komo chuna natlawaya naʼanan takaksni». 14 Pero Jefté malakgachanipa makatsininanin xmapakgsinakan ammonitas 15 xlakata xwanilh:

«Wa uma tuku wan Jefté: “Israel ni akgchipalh xtiyatkan moabitas nipara xtiyatkan ammonitas. 16 Akxni israelitas taxtukgocha kʼEgipto, tlawankgolh kxakaskakni tiyat asta kxaSpinini pupunu chu chankgolh kCadés. 17 Wa xlakata Israel malakgachanilh makatsininanin mapakgsina xalak Edom xlakata nawani «Katlawa litlan, kakilamaxkiw talakaskin naktitaxtuyaw ktiyat nema tapakgsiniyan». Pero mapakgsina xalak Edom ni kakgaxmatnilh. Chu nachuna wanikgolh mapakgsina xalak Moab, pero xla na ni kamaxkilh talakaskin. Wa xlakata Israel tamakgxtakgli kCadés. 18 Akxni tlawankgolh kxakaskakni tiyat, makgstiliwilikgolh xtiyat Edom chu xtiyat Moab. Tlawankgolh kxʼoeste xtiyat Moab chu tawilakgolh kxtiyat Arnón, pero ni tanukgolh kxtiyat Moab, xlakata Moab xkitapakgta kʼArnón.

19 »”Alistalh, Israel malakgachanilh makatsininanin Sehón, xmapakgsinakan amorreos, nema xmapakgsinan kʼHesbón, xlakata nawani «Katlawa litlan, kakilamaxkiw talakaskin naktitaxtuyaw ktiyat nema tapakgsiniyan xlakata nakchanaw niku kilichanatkan». 20 Pero Sehón ni xkalipawan israelitas, chu ni kamaxkilh talakaskin natitaxtukgo ktiyat nema xtapakgsini. Wata kamamakxtumilh putum latamanin, tawilalh kJáhaz chu katalatlawalh israelitas. 21 Akxni Jehová, xDios Israel, akxilhli uma, kamakamaxkilh israelitas Sehón chu putum xkachikinin. Xlakan kamakgatlajakgolh amorreos chu akgchipakgolh putum tiyat nema xkatapakgsini. 22 Chuna akgchipakgolh putum xtiyatkan amorreos lata kʼArnón asta kJabóc chu lata kxakaskakni tiyat asta kJordán.

23 »”Wa Jehová, xDios Israel, tiku katamakxtulh amorreos kxlakatin xkachikin. ¿Chu la uku wix katamakxtuputuna israelitas? 24 ¿Pi ni tatamakgxtakga wix putum tuku maxkiyan midios Kemós? Nachuna akinin nakkatamakxtuyaw katiwa tiku Jehová kiDioskan katamakxtunit kkilakatinkan. 25 ¿Tlakg tlan litaxtuya wix nixawa Balac xkgawasa Zipor, mapakgsina xalak Moab? ¿Pi katatakglhuwilh israelitas o katalachipalh? 26 Israel akgtutu ciento kata lata lama kʼHesbón chu laktsu xkachikinin, kʼHaroer chu laktsu xkachikinin chu putum kachikinin nema wilakgolh kxkilhtun xchuchut Arnón. ¿Tuku xlakata ni skintit pi xkamaspitnikantit umakgolh kachikinin putum uma kilhtamaku? 27 Akit ni klakgalhinanit kmilakatin, pero xlakata kintalatlawapat, wix tlawapat tuku nitlan. Jehová, tiku Juez litaxtu, wa kakalakputsananilh israelitas chu ammonitas”».

28 Pero xmapakgsinakan ammonitas ni kgaxmatli tuku wanilh Jefté.

29 Alistalh xʼespíritu Jehová lakgmilh Jefté, chu xla tipuntaxtulh xtiyat Galaad chu Manasés xlakata naʼan kMizpé xla Galaad. Lata anta kalakgalh ammonitas xlakata nakatalatlawa.

30 Chu Jefté tlawanilh Jehová uma tamalaknun: «Komo nakimaxkiya talakaskin nakkamakgatlaja ammonitas, 31 tiku nataxtu kkinchik xlakata nakimakgamakglhtinan akxni kkakimakgatlajanita nawan ammonitas, wix natapakgsiniyan, oh Jehová. Nakmakamasta chuna la xalhkun tamakamastan».*

32 Jefté alh katalatlawa ammonitas, chu Jehová maxkilh talakaskin nakamakgatlaja. 33 Xla kamakgnitilhalh lata kʼAroer asta kMinit, akgchipalh akgpuxam kachikinin, chu asta kʼAbel-Keramim. Lhuwa nikgolh ama kilhtamaku. Chuna israelitas kaʼakgchipakgolh ammonitas.

34 Akxni Jefté taspitli kxchik, anta kMizpá, ¡xtsumat taxtulh xlakata xmakgamakglhtinalh, xtlakgtilha pandereta chu xtantlitilha! Kaj xachastum xtsumat xwanit. Ni xkgalhi achatum xkgawasa nipara xtsumat. 35 Akxni akxilhli, xtitli klhakgat chu wanilh: «¡Ay, kintsumat! Lu klilakgaputsa xlakata wix tiku makgat kmalakgachaman. Wi tuku kmalaknunilh* Jehová chu la uku kilimakgantaxtit».

36 Pero xla kgalhtilh: «Tlat, komo wix wi tuku malaknuni Jehová, katlawa chuna la malaknuni, xlakata Jehová makamaxkin mintalatlawananin, ammonitas». 37 Nachuna wanilh xtlat: «Kaj pulaktum tuku kskiniyan: kakimaxki talakaskin nakkataʼan kiʼamigas akgtiy papaʼ kkasipijni xlakata nakanaw tasayaw, xlakata nikxni ktitamakgaxtokgli».

38 Xtlat kgalhtilh: «Tlan napina». Maxkilh talakaskin nakataʼan xʼamigas akgtiy papaʼ kkasipijni xlakata natasakgo, xlakata nikxni xʼama tamakgaxtokga. 39 Xliʼakgtiy papaʼ, akxni xla taspitli kxchik xtlat, Jefté makgantaxtilh tamalaknun nema xtlawanit. Xla nikxni tatalakgxtumilh chatum chixku. Chu anta kʼIsrael tsukuka tlawakan uma talismanin: 40 akgatunu kata laktsuman xalak Israel xʼankgo makgpuwantinikgo xtsumat Jefté tiku galaadita xwanit; xʼankgo akgtati kilhtamaku akgatunu kata.