JUECES

1 Akxni xninita Josué, israelitas* kgalhskinkgolh Jehová: «¿Tiku pulana naʼan katalatlawa cananeos?». 2 Jehová kgalhtinalh: «Naʼan xtribu Judá. Kaʼakxilhtit, nakkamakamaxki* uma tiyat». 3 Alistalh Judá wanilh Simeón, xtala: «Kakintapi ktiyat nema kilakgchanit* chu akxtum kakatalatlawaw cananeos. Alistalh naktaʼanan ktiyat niku wix lakgchan». Wa xlakata Simeón akxtum taʼalh Judá.

4 Akxni Judá alh, Jehová kamakamastalh cananeos chu perizitas kxmakankan. Kamakgatlajakgolh akgkaw mil lakchixkuwin kBézec. 5 Tekgskgolh Adoni-Bézec kBézec, chu anta talatlawakgolh chu kamakgatlajakgolh cananeos chu perizitas. 6 Akxni Adoni-Bézec tsalalh, putsastalanika, chipakgolh chu chukunika xalanka* aktsu xmakan chu xalanka* aktsu xtantun.* 7 Alistalh Adoni-Bézec wa: «Wilakgolh tutumpuxamakaw mapakgsinanin tiku kachukunika xalanka aktsu xmakankan chu xalanka aktsu xtantunkan, tiku sakkikgo liwat kxtampin kimesa. Tuku akit kkatlawanilh, la uku Dios nachuna kintlawaninit». Alistalh linka kJerusalén, chu anta nilh.

8 Alistalh, lakchixkuwin xalak Judá talatlawakgolh Jerusalén chu akgchipakgolh; kalitalatlawakgolh espada kachikin chu lhkuyuwilikgolh. 9 Alistalh, lakchixkuwin xalak Judá taktakgolh xlakata nakatalatlawakgo cananeos nema xwilakgolh kkasipijni, kNégueb chu kSefelá. 10 Wa xlakata Judá alh katalatlawa cananeos tiku xlamakgolh kʼHebrón (xapulana Hebrón xwanikan Quiryat-Arbá) chu makgatlajalh Sesái, Ahimán chu Talmái.

11 Alistalh ankgolh katalatlawakgo tiku xwilakgolh kDebir (xapulana Debir xwanikan Quiryat-Séfer). 12 Alistalh Caleb wa: «Chixku tiku natalatlawa chu naʼakgchipa Quiryat-Séfer nakmakamaxki kintsumat Acsá xlakata xpuskat nawan». 13 Chu Otniel, xkgawasa Quenaz, xtala Caleb, akgchipalh kachikin. Quenaz tlakg kgawasaku xwanit nixawa Caleb. Wa xlakata Caleb maxkilh xtsumat, Acsá, xlakata xpuskat xlitaxtulh. 14 Akxni xʼamakgolh kxchikkan, Acsá tasaskinilh Otniel pi kskinilh xtlat akgtum putawilh. Wa xlakata Acsá taktalh kxburro,* chu Caleb kgalhskilh: «¿Tuku lakaskina?». 15 Acsá wanilh: «Katlawa litlan, kakintlawani akgtum tamaskiwin* nema nalimasiya pi kilakgalhamana. Kimaxkinitata akgtum putawilh ksur,* pero na kakimaxki Gulot-Maim».* Wa xlakata Caleb maxkilh Gulot xalak Sipi chu Gulot xalak Pakgalhu.

16 Chu xkamanan xputiatlat Moisés, tiku quenita xwanit, akxtum katataxtukgocha kJericó* kachikin Judá chu ankgolh kxakaskakni xtiyat Judá, ksur xla Arad. Ankgolh anta chu akxtum katalatamakgolh kachikin. 17 Pero Judá chu xtala, Simeón, chuntiya ankgolh; katalatlawakgolh cananeos tiku xwilakgolh kZefat chu malakgsputukgolh kachikin. Lata ama kilhtamaku kachikin limapakuwika Hormá.* 18 Alistalh, Judá akgchipalh Gaza chu xtiyat, Asquelón chu xtiyat, chu Ecrón chu xtiyat. 19 Jehová xmakgtayama Judá chu xlakan akgchipakgolh kasipijni. Pero ni katamakxtukgolh latamanin tiku xlamakgolh kxakaxtum xlakata xlakan xkgalhikgo xputlawkan tuku xlitlawakgo guerra nema kgalhikgo laklhman cuchillos kxllantaskan.* 20 Chuna la Moisés xmalaknunit, Caleb maxkika Hebrón chu xla katamakxtulh anta kgalhtutu xkamanan Anac.

21 Pero benjaminitas ni katamakxtukgolh jebuseos tiku xlamakgolh kJerusalén. Wa xlakata jebuseos chuntiyaku katalamakgolh benjaminitas kJerusalén asta la uku.

22 Chu tiku xalak xchik José ankgolh katalatlawakgo latamanin xalak Betel, chu Jehová xkamakgtayama. 23 Xlakan kamalakgachakgolh lakchixkuwin xlakata naskgalakgo Betel. (Xapulana uma kachikin xwanikan Luz). 24 Skgalananin akxilhkgolh chatum chixku tiku xtaxtuma kkachikin chu wanikgolh: «Katlawa litlan, kakilawaniw niku laktanukan kkachikin chu nakkalimasiyaniyan talakgalhaman».* 25 Wa xlakata chixku kawanilh niku laktanukan kkachikin. Alistalh xlakan kalitalatlawakgolh espada putum kachikin, pero mastakgolh talakaskin pi chixku chu putum xfamilia xtsalakgolh. 26 Chixku alh kxtiyatkan hititas chu malakatsukilh akgtum kachikin nema limapakuwilh Luz, chu chuna wanikan asta la uku.

27 Xtribu Manasés ni katamakxtukgolh latamanin xalak Bet-Seán chu kxkachikinin nema lakatsu wilanikgolh, nipara xalak Taanac chu kxkachikinin nema lakatsu wilanikgolh, nipara xalak Dor chu kxkachikinin nema lakatsu wilanikgolh, nipara xalak Ibleam chu kxkachikinin nema lakatsu wilanikgolh, nipara xalak Meguidó chu kxkachikinin nema lakatsu wilanikgolh. Cananeos chuntiyaku xlatamaputunkgo kʼuma tiyat. 28 Akxni israelitas lakgtliwakgan wankgolh, skujni kalimaxtukgolh cananeos, pero ni putum katamakxtukgolh.

29 Xtribu Efraín na ni katamakxtukgolh cananeos tiku xlamakgolh kʼGuézer. Cananeos akxtum katalatamakgolh kxlakgstipankan kʼGuézer.

30 Xtribu Zabulón ni katamakxtukgolh latamanin xalak Quitrón nipara xalak Nahalol. Cananeos akxtum katalatamakgolh kxlakgstipankan chu kaj skujni kalimaxtukgonit.

31 Xtribu Aser ni katamakxtukgolh latamanin xalak Akkó nipara xalak Sidón, Ahlab, Aczib, Helbá, Afic chu Rehob. 32 Xlakata ni katamakxtukgolh cananeos tiku xlamakgolh kkachikinin, aseritas tsukukgolh latamakgo kxlakgstipankan.

33 Xtribu Neftalí ni katamakxtukgolh latamanin xalak Bet-Semes nipara xalak Bet-Anat. Tsukukgolh latamakgo kxlakgstipankan cananeos tiku xwilakgolh kʼumakgolh kachikinin chu skujni kalimaxtukgolh latamanin xalak Bet-Semes chu xalak Bet-Anat.

34 Amorreos tlawakgolh pi xtribu Dan xtamakgxtakgkgolh kkasipijni, xlakata ni xkamaxkikgo talakaskin nataktakgo niku kxakaxtum. 35 Amorreos chuntiya latamakgolh ksipi Heres, kʼAyalón chu kSaalbim. Pero akxni tiku xalak xchik José lakgtliwakgan wankgolh,* amorreos skujni kalimaxtuka. 36 Xtiyatkan amorreos xtapakgta lata niku xlaktakxtukan kʼAcrabim chu na xtsuku lata kSela asta kkasipijni.

2 Alistalh xʼángel Jehová mincha lata kʼGuilgal asta kBokim chu wa: «Kkatamakxtuchan kʼEgipto chu ktlawalh pi xtanutit ktiyat nema kkamalaknunilh pi nakkamaxki xalakgmakgan minatlatnikan. Nachuna kkawanin: “Nikxni kaktilaktlawalh talakkaxlan nema kkatatlawan. 2 Chu wixin, ni nakatatlawayatit talakkaxlan latamanin xalak uma tiyat, chu nakamasputuyatit xpumakamastankan”. Pero wixin ni kgalhakgaxpatnitantit kintachuwin. ¿Tuku xlakata chuna tlawanitantit? 3 Wa xlakata na kkawanin: “Ni ktikatamakxtulh kmilakatinkan. Xlakan nalitaxtukgo la akgtum akgsiyat mimpalakatakan, chu natlawakgo pi nakakninaniyatit xdioseskan”».

4 Akxni xʼángel Jehová kawanilh umakgolh tachuwin putum israelitas, xlakan tsukukgolh tasakgo. 5 Wa xlakata niku tasakgolh limapakuwikgolh Bokim,* chu anta tlawanikgolh tamakamastan Jehová.

6 Akxni Josué katachuwinankgolh kachikin, chatunu chatunu ankgolh tawilakgo ktiyat nema xkatapakgsini. 7 Israelitas skujnanikgolh Jehová akxni xlamajku Josué, chu kxkilhtamakujkan lakgkgolotsin nema latamakgolh akxni xninita Josué tiku xkatsikgo putum tuku Jehová xtlawanit xpalakata Israel. 8 Josué xkgawasa Nun, kskujni Jehová, nilh akxni xkgalhi 110 kata. 9 Maknuka* ktiyat nema makglhtinalh, kTimnat-Heres, kxkasipijni Efraín, kxnorte sipi Gaas. 10 Putum tiku latamakgolh akxni xlama Josué na nikgolh chu lakachinkgolh atanu tiku ni xlakgapaskgo Jehová chu ni xkatsikgo tuku xtlawanit xpalakata Israel.

11 Chu israelitas tlawakgolh tuku nitlan kxlakatin Jehová chu kakninanikgolh Baales. 12 Makgxtakgkgolh Jehová, xDios xtlatkan, tiku katamakxtulh kʼEgipto, chu kastalanikgolh atanu dioses, dioses xalak kachikinin nema xlistilikgo. Kalakgtakilhputakgolh chu tlawakgolh pi Jehová lu ksitsilh. 13 Makgxtakgkgolh Jehová chu kakninanikgolh Baal chu xtatlawamakgxtu Astoret. 14 Wa xlakata Jehová lu kasitsinilh israelitas chu tlawalh pi xkaʼakgchipakgolh xtalatlawananinkan chu xkamakglhtikgolh tuku xkgalhikgo. Kaʼakgxtakgmakgalh* kxmakankan xtalatlawananinkan nema xlistilikgo chu nialhla kamakgatlajakgolh. 15 Kaniwa niku xʼankgo, Jehová ni xkamakgtaya, xkamalakgachani tuku nitlan, chuna la Jehová xlichuwinanit chu chuna la Jehová xmalaknunit. Chu lu lilakgaputsa xtawilakgo. 16 Wa xlakata Jehová xkamalakgachani jueces tiku xkalakgmaxtukgo kxmakankan xtalatlawananinkan.

17 Pero nipara jueces kakgalhakgaxmatkgolh, kajwatiya kakninanikgolh atanu dioses chu takilhputanikgolh. Lakapala tamakgatlinikgolh tiji niku xalakgmakgan xnatlatnikan xtlawankgonit. Xalakgmakgan xnatlatnikan kgalhakgaxmatkgolh xlimapakgsin Jehová, pero xlakan ni kgalhakgaxmatkgolh. 18 Makgatunu akxni Jehová xkamaxki chatum juez, Jehová xmakgtaya chu xkalakgmaxtu kxmakankan xtalatlawananinkan putum kilhtamaku akxni xlama uma juez. Xlakata Jehová xkalakgalhaman, xkakgaxmatni akxni xtasaskinikgo tamakgtay xlakata tiku xkamakgapatinan.

19 Pero akxni juez xniy, xlakan tlakg nitlan tuku xtlawakgo nixawa la xtlatkan. Kstalanikgo atanu dioses, xkakakninanikgo chu xkalakgtakilhputakgo. Ni xmakgxtakgkgo xtalismaninkan chu ni xatlan xtayatkan. 20 Wa xlakata, Jehová lu kasitsinilh israelitas chu wa: «Uma kachikin laktlawanit talakkaxlan nema kkatatlawalh xalakgmakgan xnatlatnikan chu ni kinkgalhakgaxmatkgonit. 21 Akit, ni kaktikatamakxtulh kxlakatinkan nipara akgtum kachikinin nema Josué makgxtakgli akxni nilh. 22 Chuna nakkalakputsanani israelitas chu nakakxilha komo nastalanikgo chu natlawankgo kxtiji Jehová chuna la tlawakgolh xnatlatnikan». 23 Wa xlakata Jehová mastalh talakaskin pi umakgolh kachikinin xtamakgxtakgkgolh. Ni tunkun katamakxtulh chu ni kamakamastalh kxmakan Josué.

3 Wa umakgolh kachikinin nema Jehová mastalh talakaskin pi xtamakgxtakgkgolh chu xkalakputsananikgolh israelitas nema ni xtitaxtukgonit nipara akgtum guerra kCanaán 2 (chuna xʼamakgo lakgapaskgo guerra, israelitas tiku xʼamakgo lakachinkgo alistalh tiku nikxni xtitaxtukgonit akgtum guerra): 3 kgalhkitsis xmapakgsinanin filisteos chu putum cananeos, sidonios chu heveos tiku xlamakgolh ksipi Líbano, lata ksipi Baal-Hermón asta kLebó-Hamat.* 4 Chu kalimaklakaskinka xlakata xkalakputsananika israelitas, xlakata xʼakxilhka komo xʼamakgo kgalhakgaxmatkgo xlimapakgsin Jehová nema Moisés xkamaxkinit xalakgmakgan xnatlatnikan. 5 Wa xlakata, israelitas latamakgolh kxlakgstipankan cananeos, hititas, amorreos, perizitas, heveos chu jebuseos. 6 Xkatatamakgaxtokgkgo xlaktsumankan uma kachikinin chu xlaktsumankan xkatamamakgaxtokgkgo xlakgkgawasankan chu tsukukgolh kakninanikgo xdioseskan.

7 Israelitas tlawakgolh tuku nitlan kxlakatin Jehová; nialh lakapastakkgolh Jehová, xDioskan, chu kakninanikgolh Baales chu xasanto xtalayawkan xakiwi.* 8 Wa xlakata Jehová lu kasitsinilh israelitas kaʼakgxtakgmakgalh* kxmakan Cusán-Risataim, mapakgsina xalak Mesopotamia.* Israelitas akgtsayan kata skujnanikgolh Cusán-Risataim. 9 Akxni israelitas tasaskinikgolh Jehová pi xkamakgtayalh, Jehová kamaxkilh chatum lakgmaxtuna: Otniel xkgawasa Quenaz, xa’awatiya xtala Caleb. 10 X’espíritu Jehová lakgmilh Otniel chu xla juez litaxtulh kʼIsrael. Akxni Otniel alh talatlawanan, makgatlajalh Cusán-Risataim, mapakgsina xalak Mesopotamia,* xlakata Jehová makamaxkilh. 11 Alistalh tipuxam kata analh takaksni kkachikin.* Titaxtulh kilhtamaku nilh Otniel xkgawasa Quenaz.

12 Chu amakgtum israelitas tsukuparakgolh tlawakgo tuku nitlan kxlakatin Jehová. Wa xlakata Jehová tlawalh pi Eglón, mapakgsina xalak Moab, tlakg tliwakga xwa ni xawa israelitas, xlakata xlakan xtlawamakgolh tuku nitlan kxlakatin Jehová. 13 Nachuna, xla kalimilh ammonitas chu amalequitas, tiku katalatlawakgolh Israel chu akgchipakgolh kachikin Jericó.* 14 Israelitas skujnanikgolh akgkutsayan kata Eglón, mapakgsina xalak Moab. 15 Alistalh israelitas tasaskinikgolh xtamakgtay Jehová, chu Jehová kamaxkilh chatum lakgmaxtuna, Ehúd xkgawasa Guerá, chatum benjaminita tiku pakgaxwiki xwanit. Titaxtulh kilhtamaku israelitas malakgachakgolh Ehúd xlakata nalakgaxokgonani tuku kskin Eglón, mapakgsina xalak Moab. 16 Alistalh Ehúd tlawalh kgantum espada nema xkgalhi puxamakutsayan centimetro xlilhman,* nema lakgaputiy xtaxakanit chu alistalh mawakalh kxtampulakgni kxtampin klhakgat. 17 Alistalh makamaxkilh lilakgaxokgon tuku kskin Eglón, mapakgsina xalak Moab, chixku tiku lu kgelanka xwanit.

18 Akxni Ehúd xmastanita lilakgaxokgon, katataspitpa lakchixkuwin tiku xtaʼankgonit. 19 Alistalh akxni chalh kʼGuilgal chu akxilhli tatlawamakgxtu nema xlitatlawanit chiwix, Ehúd taspitli chu wanilh mapakgsina: «Mapakgsina, wi akgtum tamakatsinin nema kaj wix milikatsit». Mapakgsina wa: «¡Kataxtutit!».* Alistalh putum kxlakskujnin taxtukgolh. 20 Akxni mapakgsina xʼakstu xwi kxcuarto* nema xwi xʼakgstin xchik, Ehúd talakatsuwinilh chu wanilh: «Dios wi tuku makatsiniputunan». Akxni kgaxmatli uma, mapakgsina tunkun tayalh. 21 Chu Ehúd, litamakxtulh xpakgaxwiki espada nema xwaka kxtampulakgni chu lipalhtukulh Eglón. 22 Putum espada tanunilh asta xmakglhtsan chu xmanteca maʼakgtsilh espada xlakata Ehúd ni tamakxtunilh chu mapakgsina taxtunilh xkgatsasa. 23 Ehúd laktaxtulh kventana chu limalakchuwalh llave xmalakcha cuarto nema xya xʼakgstin chiki. 24 Alistalh akxni xtaxtunita Ehúd, lakskujnin taspitkgolh chu akxilhkgolh pi xmalakcha cuarto nema xya xʼakgstin chiki xlitalakchuwanit llave. Wa xlakata wankgolh: «Max anit kbaño». 25 Akxni xkgalhkgalhikgonita, lu lakgaputsakgolh. Akxni akxilhkgolh pi mapakgsina ni xmalakki xcuarto nema xya kxʼakgstin chiki, tiyakgolh llave chu malakkikgolh. ¡Chu akxilhkgolh pi xmapakgsinakan xanin xma kpiso!*

26 Xlakata xlakan xmakgapalamakgo, Ehúd tsalalh, titaxtulh niku xwilakgo tatlawamakgxtu nema xlitatlawanit chiwix chu tlan chalh kSeirá chu nitu akgspulalh. 27 Akxni chalh matasilh akgalokgot xkasipijni Efraín, chu israelitas akxtum tataktakgolh kasipijni; chu xla xkapulanima. 28 Alistalh kawanilh: «Kakilastalaniw xlakata Jehová kamakamaxkinitan moabitas, mintalatlawananinkan». Xlakan stalanikgolh, chu xlakata moabitas ni xtsalakgolh tawilakgolh ktiji niku xlaktakutkan kgalhtuchokgo Jordán. Ni mastakgolh talakaskin pi xpatakutkgolh. 29 Ama kilhtamaku kamakgnika akgkaw mil moabitas, lakchixkuwin tiku ni xpekuankgo chu lakgtliwakgan xwankgonit. Nipara chatum tsalalh. 30 Chuna ama kilhtamaku israelitas kaʼakgchipakgolh moabitas. Chu tatipuxam kata analh takaksni kkachikin.*

31 Samgar xkgawasa Anat, tawi xlakgxokgo Ehúd, chu xla kalimakgnilh akgchaxan ciento filisteos kgantum xakinkasajaja* kiwi nema xkalitlakgakan wakax; xla na lakgmaxtulh Israel.

4 Pero akxni Ehúd nilh, israelitas tsukuparakgolh tlawakgo tuku nitlan kxlakatin Jehová. 2 Wa xlakata Jehová kaʼakgxtakgmakgalh* kxmakan Jabín, mapakgsina xalak Canaán, tiku xmapakgsinan kʼHazor. Sísara xapuxku ksoldado xwanit, tiku xlama kʼHaróset xalak kachikinin.* 3 Jabín* xkgalhi akgnajatsa ciento putlaw tuku xlitlawakgo guerra nema xkgalhikgo laklhman cuchillos kxllantaskan* chu akgpuxam kata lata xkamakgapatinama israelitas. Wa xlakata israelitas tasaskinikgolh xtamakgtay Jehová.

4 Ama kilhtamaku, Débora chatum palakachuwina, xpuskat Lapidot, xlakputsanani Israel. 5 Xlismaninit xtawila kxtampin mokgot xla Débora, xlakʼitat Ramá chu Betel, xkasipijni Efraín. Chu israelitas xlakgankgo xlakata nakawani tuku xwan Dios. 6 Xla matasaninalh Barac xkgawasa Abinoam tiku xlama kQuedes xla Neftalí, chu wanilh: «Jehová xDios Israel waniyan: “Katakxtu ksipi Tabor chu kakalipi akgkaw mil lakchixkuwin xalak xtribu Neftalí chu Zabulón. 7 Akit nakmakamaxkiyan Sísara, xpuxku ksoldados Jabín, chu xputlaw tuku litlawakgo guerra chu ksoldados, kpuxkga xla Cisón”».

8 Akxni kgaxmatli uma, Barac wanilh: «Komo wix nakintapina, akit nakan; pero, komo ni nakintapina, ni ktiʼalh». 9 Xla kgalhtilh: «Akit naktaʼanan. Pero ni wix katilimalankikanti uma tatalachipat, xlakata Jehová namakamasta Sísara kxmakan chatum puskat». Alistalh Débora tayalh chu taʼalh Barac kQuedes. 10 Barac kamamakxtumilh kQuedes, Zabulón chu Neftalí chu akgkaw mil lakchixkuwin stalanikgolh. Débora na kataʼalh.

11 Pero Héber tiku quenita xwanit xkatamakgatlininit makgapitsi quenitas, xkamanan Hobab, xputiatlat Moisés. Chu xtlawanit xchiki xaxuwa lakatsu klanka kiwi xla Zaananim, nema wi lakatsu kQuedes.

12 Makatsinika Sísara pi Barac xkgawasa Abinoam xtaʼakxtunit ksipi Tabor. 13 Wa xlakata Sísara kamamakxtumilh putum putlaw tuku xlitlawakgo guerra, akgnajatsa ciento putlaw nema kgalhikgo laklhman cuchillos kxllantaskan,* chu putum ksoldados nema xtaminkgoyacha lata kʼHaróset xalak kachikinin xlakata naʼankgo kpuxkga xla Cisón. 14 Débora wanilh Barac: «Kaʼaw, xlakata uma kilhtamaku Jehová namakamaxkiyan Sísara. ¿Ni wa Jehová tiku pulaliman?». Alistalh Barac taktacha ksipi Tabor chu kstalanimakgolh akgkaw mil lakchixkuwin. 15 Chu Jehová tlawalh pi xʼespada Barac xkamaʼakgtsankgelh Sísara, xputlaw tuku xlitlawakgo guerra chu putum ksoldados. Alistalh, Sísara taktalh kxputlaw chu tsalalh. 16 Barac kaputsastalanilh soldados chu putlaw tuku xlitlawakgo guerra asta kʼHaróset xalak kachikinin, chu putum ksoldados Sísara kalimakgnika espada. Nipara chatum lakgtaxtulh.

17 Pero Sísara tsalalh chu chalh asta kxchik xaxuwa xla Jael, xpuskat Héber tiku quenita xwanit, xlakata xchik Héber xtakgalhikgo takaksni Jabín, mapakgsina xalak Hazor. 18 Jael taxtulh chu alh lakgapaxtokga Sísara chu wanilh: «Katat kimalana, katanu. Ni kapekuanti». Wa xlakata xla tanulh kxchik xaxuwa chu Jael limakgtlapalh lhakgat. 19 Alistalh xla wanilh: «Katlawa litlan kakintawa chuchut xlakata lu kkgalhputima». Xla makgalhkgelh xuwa niku xtajuma leche chu maxkilh xlakata nawa. Alistalh makgtlapapa. 20 Chu wanipa: «Kataya niku laktanukan kchiki chu komo wi tiku namin chu nakgalhskinan “¿Tanuma chatum chixku kminchik?”, wix kawani pi ni».

21 Pero Jael, xpuskat Héber, tiyalh akgtum xatakinkalhpitni kiwi chu akgtum martillo. Chu akxni Sísara lu klhtatanit xlakata lu xtlakgwanit, xla tsinu tsinu lakgtalakatsuwilh chu lilakgxtilhtukulh kiwi asta xchalh kkatiyatni, chu xla nilh.

22 Akxni Barac chalh xlakata xputsama Sísara, Jael taxtulh chu wanilh: «Katat nakmasiyaniyan chixku tiku putsapat». Xla tatanulh kxchik chu akxilhli pi Sísara xanin xma chu xlakgxtitanuma kiwi.

23 Uma kilhtamaku Dios tlawalh pi israelitas xmakgatlajakgolh Jabín, mapakgsina xalak Canaán. 24 Chu israelitas tlakg tatliwakglhtilhakgolh chu chuntiya talachipakgolh Jabín, mapakgsina xalak Canaán, asta malakgsputukgolh.

5 Ama kilhtamaku, Débora chu Barac xkgawasa Abinoam kilhtlikgolh uma takilhtlin:

 3 ¡Kakgaxpattit, mapakgsinanin! ¡Kuenta katlawatit,

xpulalinanin kachikinin!

Akit nakkilhtlini Jehová. Naklimalanki tatlakgni* Jehová, xDios Israel.

¡Kamalankitit Jehová!

Wa xlakata xkachikin Jehová ankgolh kxmalakcha kachikinin.

12 ¡Kalakastakwananti, Débora, kalakastakwananti!

¡Kalakastakwananti, kalakastakwananti, kakilhtli uma takilhtlin!

¡Kataya, Barac! ¡Kakalipi mintachin, xkgawasa Abinoam!

Katantun alh niku kxakapuskan.

Kxlakgstipan xtribu Rubén lhuwa ni xkatsikgo tuku natlawakgo.*

Kxlakgstipan xtribu Rubén lhuwa ni xkatsikgo tuku natlawakgo.*

Kalaktayapi tiku lakgtliwakgan.

25 Xla skinilh chuchut; xla maxkilh leche.

Kʼakgtum pulhman pulatu nema lu stlan maxkilh xatalakgtawilan leche.*

¿Tuku xlakata ni kkakgaxmatni xkawayu?”.

Chu tipuxam kata analh takaksni kkachikin.*

6 Pero israelitas tsukuparakgolh tlawakgo tuku nitlan kxlakatin Jehová. Wa xlakata Jehová kamakamastalh akgtujun kata kxmakankan madianitas. 2 Chu madianitas xʼakgchipakgonit Israel. Xpalakatakan madianitas, israelitas tlawakgolh niku xtatsekgkgolh* kkasipijni, klhuku chu niku nila xchankan. 3 Akxni israelitas xchananankgo, madianitas, amalequitas chu tiku xwilakgolh kʼeste xkatalatlawakgo. 4 Anta xtawilakgo xlakata nakatalatlawakgo chu xkamalakgsputukgo putum tachanan, kputum kachikin asta kʼGaza, ni xmakgxtakgkgo tuku tlan xwakan kʼIsrael nipara borregos, toros chu burros. 5 Xliminkgo xʼanimaleskan chu xchikkan xaxuwa, chu lu lhuwa xwankgonit chuna la xtuki. Xlakan chu xcamelloskan lu lhuwa xwankgonit, nila xkaputlekgekan, chu xchankgo kkachikin xlakata namalakgsputukgo. 6 Chuna Madián tlawalh pi Israel nialhtu xkgalhilh; chu israelitas tasaskinikgolh tamakgtay Jehová.

7 Akxni israelitas tasaskinikgolh Jehová pi xkalakgmaxtulh kxmakan Madián, 8 Jehová kamalakgachanilh chatum palakachuwina, tiku kawanilh: «Wa uma tuku wan Jehová xDios Israel: “Akit kkatamakxtun ktiyat niku skujni xlitaxtuyatit, kkatamakxtuchan kʼEgipto. 9 Kkalakgmaxtun kxmakankan egipcios chu putum tiku xkamakgapatinanan. Kkamapanukgolh kmilakatinkan chu wixin kkamaxkin xtiyatkan. 10 Chu kkawanin: «Akit Jehová miDioskan. Ni nakakninaniyatit* xdioses amorreos, latamanin tiku xlamakgolh niku wixin lapatit». Pero wixin ni kilakgalhakgaxmatwi”».*

11 Alistalh, xʼángel Jehová chalh chu tawi kxtampin lanka kiwi nema xya kʼOfrá, nema xtapakgsini Joás tiku abí-ezrita xwanit. Gedeón xkgawasa Joás xlakpajma trigo niku xlakchitkan uvas xlakata madianitas ni xʼakxilhkgolh talhtsi. 12 Xʼángel Jehová tasiyanilh chu wanilh: «Jehová akxtum tawilan, tliwakga soldado». 13 Gedeón kgalhtilh: «Kakintapati, malana, pero komo Jehová akxtum kinkatawilan, ¿tuku xlakata kinkaʼakgspulaman putum uma? ¿Niku wilakgolh putum uma tuku lakstlan xkinkalitachuwinankgoyan kinatlatnikan? Xlakan xkinkawanikgoyan: “Wa Jehová tiku kinkatamakxtun kʼEgipto”. Pero la uku Jehová kinkaʼakgxtakgmakganitan chu kinkamakamastanitan kxmakankan madianitas». 14 Jehová lakgtalakgaspitli chu wanilh: «Kapit, xlakata militliwakga nalilakgmaxtuya Israel kxmakankan madianitas. ¿Ni akit tiku kmalakgachaman?». 15 Chu Gedeón kgalhtilh: «Kakintapati, Jehová, pero ¿la naklakgmaxtu Israel? Kaʼakxilhti, kifamilia* ni tlakg xlakaskinka kxtribu Manasés chu akit ni lu xlakaskinka klitaxtu kxchik kintlat». 16 Pero Jehová wanilh: «Akit nakmakgtayayan, chu ni tuwa katikamakgatlaja madianitas».

17 Alistalh Gedeón wanilh: «Komo wix nakimakgtayaya,* wi tuku kakilimasiyani pi wix kintachuwinampat. 18 Katlawa litlan, nina kapit asta akxni naktaspita chu nakwili kmilakatin tuku kmakamaxkiputunan». Ángel kgalhtilh: «Unu naktawila asta akxni nataspita». 19 Chu Gedeón alh, makgnilh tantum aktsu cabra, chu akgkawitu kilo* xla harina litlawalh kaxtalanchu nema ni xkgalhi limaxkutin. Wililh xaliwa kʼakgtum canasta chu xchuchut mujulh kpatum tlamink. Alistalh linilh ángel putum liwat chu maxkilh kxtampin lanka kiwi.

20 Xʼángel xaxlikana Dios wanilh: «Katiya liwa chu kaxtalanchu nema ni kgalhi limaxkutin, kawili kxkgalhni uma lanka chiwix chu kaxtakgamakganti xchuchut». Chu chuna tlawalh. 21 Alistalh xʼángel Jehová stonkgli kiwi nema xchipanit chu xkinkan kiwi litokglhli liwa chu kaxtalanchu nema ni xkgalhi limaxkutin. Chu kchiwix taxtulh lhkuyat nema lhkuyulh liwa chu kaxtalanchu nema ni xkgalhi limaxkutin. Chu kaj xalan xʼángel Jehová nialh tasiyalh. 22 Ama kilhtamaku, Gedeón akgatekgsli pi xʼángel Jehová tiku xtachuwinama.

Chu kaj xalan xla wa: «¡Kgoxota akit, Malana Jehová Tiku lakgchan namapakgsinan! ¡Klakaʼakxilhnit xʼángel Jehová!». 23 Pero Jehová wanilh: «Kakgalhi takaksni. Ni kapekuanti; ni katini». 24 Wa xlakata Gedeón tlawanilh anta akgtum pumakamastan Jehová, chu asta la uku wanikan Jehová-Salom.* Chuntiya wijku kʼOfrá nema katapakgsini abí-ezritas.

25 Uma katsisni Jehová wanilh: «Kachipa xtoro* mintlat, xlitantiy xtoro nema kgalhi akgtujun kata. Alistalh kalaktilhti xpumakamastan Baal nema kgalhi mintlat chu kakat xasanto talayaw* xakiwi nema ya lakatsu kpumakamastan. 26 Alistalh, niku tistum wilakgolh chiwix, katlawani akgtum pumakamastan Jehová miDios kʼuma niku xakatalhman. Alistalh katiya xlitantiy toro, kawili kxkgalhni xasanto talayaw xakiwi* nema kat chu laktsu laktsu tlawa chu kamakamasta la xalhkun tamakamastan». 27 Wa xlakata Gedeón katasanilh kgalhkaw xlakskujnin chu tlawalh chuna la xlimapakgsinit Jehová. Pero xlakata xkapekuani lakchixkuwin xalak kachikin chu tiku xalak xchik xtlat, ni kakuwani tlawalh uma, wata katsisni.

28 Tsisa, akxni lakchixkuwin xalak kachikin takikgolh akxilhkgolh pi wi tiku xlaktilhnit xpumakamastan Baal, chu xkanit xasanto talayaw xakiwi nema lakatsu xya kpumakamastan chu pi xmakamastanit xlitantiy toro kpumakamastan nema aku xtlawakanit. 29 Wa xlakata chatunu chatunu lakgalhskinkgolh: «¿Tiku tlawalh uma?». Akxni xlakputsanankgonita, wankgolh: «Wa Gedeón xkgawasa Joás». 30 Wa xlakata lakchixkuwin xalak kachikin wanikgolh Joás: «¡Kakilamakamaxkiw minkgawasa xlakata nani! Xla laktilhli xpumakamastan Baal chu kalh xasanto talayaw xakiwi nema xya kxpaxtun pumakamastan». 31 Pero Joás kakgalhtilh putum tiku xtalalakatawakamakgolh: «¿Maklakaskin Baal pi wixin nakgalhmakgtayayatit? ¿Maklakaskin pi wixin nalakgmaxtuyatit? Katiwa tiku nakgalhmakgtaya namakgnikan uma tsisa. Komo xla chatum dios xʼakstu kalakgmaxtuka, xlakata wa xpumakamastan laktilhka». 32 Chu ama kilhtamaku Gedeón lilakgapaska atanu tukuwani: Jerubaal.* Xwan: «Xʼakstu kalakgmaxtuka Baal, xlakata wa xpumakamastan laktilhka».

33 Madianitas, amalequitas chu tiku xwilakgolh kʼeste akxtum lakgolh, patakutkgolh kgalhtuchokgo chu tamakgxtakgkgolh kxakapuskan Jezreel. 34 Alistalh xʼespíritu Jehová lakgmilh* Gedeón. Xla matasilh akgalokgot chu abí-ezritas tatamakxtumikgolh chu stalanikgolh. 35 Nachuna malakgachalh makatsininanin kxlilakgatum xtiyat Manasés chu ksoldados tatamakxtumikgolh chu stalanikgolh. Chu malakgachalh makatsininanin kxlilakgatum xtiyatkan Aser, Zabulón chu Neftalí chu ksoldados talakakxtukgolh xlakata nakatatanokglhkgo.

36 Alistalh, Gedeón wanilh xaxlikana Dios: «Komo nakilimaklakaskina xlakata nalakgmaxtuya Israel, chuna la malaknu, 37 uma kakilimasiyani: nakwili xmakchixit borrego* niku lakpajnankan; komo monkganat kajwatiya namastaja makchixit, pero tiyat nitu stajnit, nakkatsi pi nakilimaklakaskina xlakata nalakgmaxtuya Israel chuna la malaknu. 38 Chu wa uma tuku lalh. Lichali akxni takilh chu chitli xmakchixit borrego, maxtulh chuchut chu limatsamalh akgtum xapulhman pulatu. 39 Pero Gedeón wanilh xaxlikana Dios: «Ni kakisitsini; kakimaxki talakaskin wi tuku nakskiniparayan. Katlawa litlan, nakwilipara xmakchixit borrego. Chu kajwatiya monkganat kamastajalh tiyat chu xmakchixit borrego ni kastajli». 40 Chu wa uma tuku Dios tlawalh uma katsisni. Monkganat kajwatiya mastajalh tiyat pero xmakchixit borrego nitu stajli.

7 Alistalh Jerubaal, uma wamputun, Gedeón, chu putum soldados tiku xtawilakgolh lakatsisa takikgolh chu takaxtawilakgolh lakatsu ktaxtunu xla Harod. Madianitas xwilakgolh knorte, lakatsu ksipi Moré, kxakaxtum. 2 Jehová wanilh Gedeón: «Lhuwa soldados kgalhiya. Chuna nila kmakamaxkiyan madianitas. Komo chuna xaktlawalh, Israel max xlitalankilh xlakata tuku naktlawa chu xwa: “Kiʼakstukan kinkalakgmaxtukan”. 3 Wa xlakata, katlawa litlan, kakawani misoldados: “Tiku lu pekuama tlan nataspita kxchik”». Chuna, Gedeón kaliʼakxilhli. Alistalh, puxamatiy mil soldados taspitkgolh chu akgkaw mil tamakgxtakgkgolh.

4 Pero Jehová wanilh Gedeón: «Lhuwaku soldados kgalhiya. Kakawani pi kaʼankgolh kpuxkga, chu anta naklaksaka tiku nataʼankgoyan. Komo akit nakwaniyan “Uma nataʼanan”, wa tiku nataʼanan. Pero komo nakwaniyan “Uma ni katitaʼan”, ni katitaʼan». 5 Wa xlakata Gedeón tlawalh pi ksoldados xʼankgolh kpuxkga.

Alistalh Jehová wanilh Gedeón: «Tiku anta kpuxkga nalitiya chuchut xmakan chu nalipukgotnan, ni akxtum kakatayawa tiku tatsokgostakgo akxni wakgo chuchut». 6 Xliputum soldados tiku lipukgotnankgolh xmakankan litakgatsikgolh akgtutu ciento. Amakgapitsin tatsokgostakgolh akxni kgotnankgolh.

7 Alistalh Jehová wanilh Gedeón: «Nakkalilakgmaxtuyan akgtutu ciento soldados tiku lipukgotnankgolh xmakankan chu nakkamakamaxkiyan madianitas. Chu amakgapitsin soldados kataspitkgolh kxchikkan». 8 Wa xlakata, akxni latamanin xkamaxkikgonit akgtutu ciento soldados tuku xʼamakgo maklakaskinkgo chu akgalokgot, Gedeón kamalakgachalh kxchikkan amakgapitsi israelitas. Kajwatiya katatamakgxtakgli akgtutu ciento soldados. Madianitas xwilakgolh kpuskan, kxakaxtum.

9 Ama katsisni Jehová wanilh Gedeón: «Kapit niku wilakgolh madianitas chu kakatalachipa xlakata nakmakamaxkiyan. 10 Pero, komo pekuana xlakata natalachipanana, katapi Purá mi makgtayana, niku wilakgolh madianitas. 11 Akxni nakgaxpata tuku lichuwinamakgolh, nialh katipekuanti* nakatalatlawaya madianitas». Alistalh xla chu Purá, xmakgtayana, talakatsuwikgolh asta kxkilhpan niku xwilakgolh madianitas.

12 Madianitas, amalequitas chu tiku xwilakgolh kʼeste, xmalakgatsamakgo niku kxakaxtum chuna la lhuwa xtuki. Chu xcamelloskan lu lhuwa xwankgonit, chu nila xkaputlekgekan chuna la muntsaya* nema anan kxkilhtun pupunu. 13 Akxni Gedeón chalh anta, xwi chatum chixku tiku xlitachuwinama achatum tuku manixnalh. Xwanima: «Kakgaxpatti tuku kmanixnalh. Maktum kaxtalanchu nema xlitatlawanit cebada takgolutanuchi niku xwilakgolh madianitas chu tawakanicha akgtum chiki xla xuwa. Lu tliwakga tawakanicha asta laktlawalh. Makgpuspitli chu chiki laklalh». 14 Chu tiku xtachuwinama kgalhtilh: «Liwana tasiya: max wa xʼespada Gedeón xkgawasa Joás, chatum israelita. Dios ama makamaxki Madián chu putum ksoldados».

15 Akxni Gedeón kgaxmatli tamanixnat chu tuku xkilhchanima, tsukulh kakninani Dios. Alistalh taspitli niku xwilakgolh israelitas chu wa: «¡Kaʼaw! Jehová makamastanit Madián chu ksoldados». 16 Alistalh pulaktutu la kamapitsilh akgtutu ciento soldados, chu xputumkan kamaxkilh akgalokgot chu xalu niku xtajuma limakgskgon. 17 Chu kawanilh: «Kakilaʼakxilhwi chu katlawatit tuku akit naktlawa. Akxni nakchan kxkilhpan niku wilakgolh madianitas katlawatit tuku naktlawa. 18 Akxni akit chu putum tiku nakintaʼankgo nakmatasiyaw akgalokgot wixin na namatasiyatit akgalokgot xlimakgstilili niku wilakgolh madianitas chu pixlanka nawanatit: “¡Talatlawanamaw xpalakata Jehová chu xpalakata Gedeón!”».

19 Gedeón chu akgtum ciento soldados tiku xtaʼankgonit chankgolh kxkilhpan niku xwilakgolh madianitas akxni xlimakgtiy xtsukumaka skgalanankan kkatsisni,* akxni aku xtalakgpalinit skgalana. Chu matasikgolh akgalokgot chu lakgpakglhkgolh xalu nema xchipakgonit. 20 Wa xlakata chuna la pulaktutu xtapitsikgonit matasikgolh akgalokgot nema xlinkgo chu lakgpakglhkgolh kxalujkan. Kxpakgxwikikan xlichipakgonit xlimakgskgotkan, matasikgolh akgalokgot nema xlinkgo kxpakgastakatkan* chu pixlanka wankgolh: «¡Xʼespada Jehová chu Gedeón!». 21 Soldados kaks tayakgolh xlimakgstilili niku xwilakgolh madianitas, pero putum xtalatlawananin lakapala tsalakgolh chu pixlanka xkatasatilhakgo.* 22 Chuntiya xmatasimakgolh akgalokgot akgtutu ciento soldados, chu Jehová tlawalh pi putum madianitas xlalimakgnikgolh xʼespadajkan. Xtalatlawananinkan tsalakgolh asta kBet-Sitá, chu asta kZererá, asta niku xkitapakgta Abel-Meholá, lakatsu kTabat.

23 Alistalh kamatasaninanka putum soldados xalak Israel: xalak xtribu Neftalí, xalak xtribu Aser chu putum xtribu Manasés. Chu xlakan kaputsastalanikgolh madianitas. 24 Gedeón kamalakgachalh makatsininanin kxlilakgatum kxkasipijni Efraín chu kawanilh: «Kapitit katalatlawayatit madianitas chu kaʼakgchipatit niku patakutkan kkgalhtuchokgo Jordán chu laktsu xpuxkga asta kBet-Bará». Wa xlakata putum ksoldados Efraín tamakxtumikgolh chu akgchipakgolh niku xpatakutkan Jordán chu laktsu xpuxkga asta kBet-Bará. 25 Nachuna, kachipaka chatiy príncipes xalak Madián: Oreb chu Zeeb. Makgnika Oreb kchiwix xla Oreb, chu makgnika Zeeb niku xlakgchita xʼuva Zeeb. Chuntiya kaputsastalanikgolh madianitas, chu linika Gedeón xʼakgxakga Oreb chu Zeeb, ktiyat xalak Jordán.

8 Alistalh lakchixkuwin xalak xtribu Efraín kgalhskinkgolh Gedeón: «¿Tuku xlakata kilatlawaniw uma? ¿Tuku xlakata ni kilamakatsiniw akxni pit katalatlawaya madianitas?». Chu lu katasitsi lilakawanikgolh. 2 Pero xla kakgalhtilh: «¿Tuku lu xlakaskinka ktlawanit akit nixawa tuku wixin tlawanitantit? ¿Ni tlakg tlan putum tuku akgataxtu kxtamakgalan* Efraín nixawa putum xʼuvas nema makgala Abí-Ézer? 3 Dios kamakamaxkin Oreb chu Zeeb, príncipes xalak Madián. ¿Tuku lu xlakaskinka ktlawanit nixawa tuku wixin tlawanitantit?». Akxni chuna kawanilh,* nialh taʼakglhuwikgolh.*

4 Alistalh Gedeón chalh kkgalhtuchokgo Jordán chu patakutli. Maski xla chu akgtutu ciento ksoldados nema xtaʼankgo xtlakgwankgonit, chuntiya kaputsastalanikgolh xtalatlawananinkan. 5 Wa xlakata kawanilh lakchixkuwin xalak Sucot: «Katlawatit litlan, kakamaxkitit kaxtalanchu lakchixkuwin tiku kintaminkgo, xlakata tlakgwankgonit chu kputsastalanimaw Zébah chu Zalmuná, mapakgsinanin xalak Madián». 6 Pero príncipes xalak Sucot wanikgolh: «¿Tuku xlakata nakkamaxkiyaw kaxtalanchu misoldados? ¿Kachipata* Zébah chu Zalmuná?». 7 Wa xlakata Gedeón kakgalhtilh: «Xlakata chuna wantit, nakkalimakgsnokgan lhtukun nema tayakgo kxakaskakni tiyat akxni Jehová nakimakamaxki Zébah chu Zalmuná». 8 Lata anta talakakxtulh kPenuel chu na watiya kaskinilh lakchixkuwin xalak Penuel, pero xlakan kakgalhtikgolh chuna la lakchixkuwin xalak Sucot. 9 Wa xlakata na kawanilh lakchixkuwin xalak Penuel: «Akxni naktaspita chu kkitlajananita nawan, naklaktilha uma torre».

10 Pero Zébah chu Zalmuná akxtum xkatawilakgolh ksoldados kCarcor, max akgkukitsis mil ksoldados. Wa umakgolh soldados xalak kʼeste nema xʼakgataxtukgonit, xlakata akgtum ciento akgpuxam mil soldados xkalimakgnikanit espada. 11 Gedeón chuntiya takxtulh kxtijikan tiku xwilakgolh kxchiki xla xuwa, kxʼeste Nóbah chu Jogbehá chu akgchipalh niku xwilakgolh xtalamakgasitsin tiku ni skgalalh xwilakgolh. 12 Zébah chu Zalmuná, chatiy mapakgsinanin xalak Madián, tsalakgolh. Pero xla kaputsastalanilh chu kachipalh, chu putum tiku xwilakgolh anta lu pekuankgolh.

13 Akxni Gedeón xkgawasa Joás kitaspitli ktatalachipat titaxtulh ktiji nema xlaktakxtukan kʼHeres. 14 Ktiji chipalh chatum kgawasa xalak Sucot chu tlawanilh makgapitsi takgalhskinin. Kgawasa katsokgnanilh xtukuwanikan príncipes chu lakgkgolotsin xalak Sucot: 77 lakchixkuwin. 15 Alistalh Gedeón kalakgalh lakchixkuwin xalak Sucot chu kawanilh: «Unu wilakgolh Zébah chu Zalmuná, lakchixkuwin tiku wixin kilalikgalhkgamanaw. Wixin kilawaniw: “¿Tuku xlakata nakkamaxkiyaw kaxtalanchu mi soldados nema tlakgwankgonit? ¿Chipata* Zébah chu Zalmuná?”». 16 Alistalh kachipalh lakgkgolotsin xalak kachikin chu lakchixkuwin xalak Sucot chu kalikgesnokgli lhtukun nema yakgolh kxakaskakni tiyat. 17 Nachuna, laktilhli torre xalak Penuel chu kamakgnilh lakchixkuwin xalak ama kachikin.

18 Xla kakgalhskilh Zébah chu Zalmuna: «¿La xtasiyakgo lakchixkuwin nema wixin kamakgnitit ksipi Tabor?». Xlakan kgalhtinankgolh: «La wix xtasiyakgo. Chatunu chatunu xtasiya la chatum xkgawasa mapakgsina». 19 Xla kawanilh: «Kinatalan xwankgonit, xkamanan kintse. Kkamalaknuniyan, kxlakatin Jehová tiku staknama, akit ni xakkamakgnin komo wixin ni xtikamakgnitit». 20 Alistalh limapakgsilh Jeter, xapuxku xkgawasa: «¡Kataya, kakamakgni!». Pero xla ni maxtulh xʼespada. Xpekuama xlakata lu kgawasaku xwanit. 21 Wa xlakata Zébah chu Zalmuná wanikgolh: «Komo lu chixku makgkatsikana, katat chu wix kakilamakgniw». Wa xlakata Gedeón makgnilh Zébah chu Zalmuná, chu tiyalh xlitakaxtaykan camellos kxpixnikan, nema xtasiyakgo la papaʼ.

22 Alistalh, lakchixkuwin xalak Israel wanikgolh Gedeón: «Wix kimapakgsinakan kalitaxtu, chu nachuna minkgawasa chu mintanat, xlakata kilalakgmaxtunitaw kxmakankan madianitas». 23 Pero Gedeón kakgalhtilh: «Ni akit tiku mimapakgsinakan kaktilitaxtulh nipara kinkgawasa. Jehová mimapakgsinakan nalitaxtu». 24 Chu Gedeón wampa: «Wi tuku nakkaskiniyan: chatunu chatunu wixin kakimaxkilh akgtum nariguera* xaʼoro». (Xlakata tiku xkamakgatlajakanit ismaelitas xwankgonit, xlakan xkgalhikgo narigueras xaʼoro). 25 Xlakan kgalhtikgolh: «Nakkamaxkiyan». Xlakan stonkgkgolh maktum lhakgat chu chatunu chatunu mujulh akgtum nariguera xliputum tuku xtlajakgonit. 26 Narigueras xaʼoro nema xla kaskilh xtsinkakgo akgkunajatsa kilo.* Chu ni kataputlekgeka litakaxtay nema xtasiyakgo la papaʼ, xamantajwa lhakgat nema xlitatlawanit lana chu xwilikgo mapakgsinanin xalak Madián, nipara xtapixnukan camellos.

27 Gedeón maklakaskilh putum oro xlakata nalitlawa akgtum efod chu alistalh kamasiyanilh putum tiku xwilakgolh kxkachikin, kʼOfrá. Anta putum israelitas tsukukgolh kakninanikgo efod chuna la akgtum tatlawamakgxtu, chu uma kalitaxtunilh akgtum akgsiyat Gedeón chu putum tiku xalak xchik.

28 Chuna israelitas akgchipakgolh Madián. Chu madianitas nialh katlawaniputunkgolh tuku nitlan.* Chu tipuxam kata analh takaksni kʼuma tiyat akxni xlama Gedeón.

29 Jerubaal* xkgawasa Joás taspitli kxchik chu anta tamakgxtakgli.

30 Gedeón kgalhilh tutumpuxamakaw kamanan,* xlakata lhuwa lakpuskatin kgalhilh. 31 Atanu xpuskat* nema xkgalhi kSiquem na kgalhilh chatum kskgata, tiku limapakuwilh Abimélec. 32 Chu Gedeón, xkgawasa Joás, akxni akglhuwata kata xlatamanit, nilh. Maknuka* kxputaknun Joás, xtlat, anta kʼOfrá, nema xkatapakgsini abí-ezritas.

33 Akxni Gedeón nilh, israelitas tsukuparakgolh kakakninanikgo Baales, chu laksakkgolh Baal-Berit xlakata xdioskan xkalitaxtunilh. 34 Israelitas ni lakapastakkgolh Jehová, xDioskan, tiku xkalakgmaxtunit kxmakankan xtalamakgasitsinkan nema xkastiliwilikgo. 35 Na ni kalimasiyanikgolh tapaxkit nema ni makgxtakgnan tiku xalak xchik Jerubaal, uma wamputun, Gedeón, maski lhuwa tuku tlan xtlawanit xpalakata Israel.

9 Titaxtulh kilhtamaku, Abimélec xkgawasa Jerubaal alh kaʼakxilha xnatalan xtse, kSiquem. Chu kawanilh xlakan chu putum xfamilia xtlat xtse: 2 «Katlawatit litlan, kakawanitit putum napuxkun* xalak Siquem: “¿Tuku tlakg tlan mimpalakatakan: kakamapakgsin tutumpuxamakaw xlakgkgawasan Jerubaal, o kakamapakgsin kaj chatum chixku? Chu kalakapastaktit pi akit na klin minkgalhnikan”».*

3 Wa xlakata xnatalan xtse kalinikgolh tamakatsinin putum napuxkun xalak Siquem, chu xlakan laksakkgolh nastalanikgo Abimélec, xlakata xwankgo: «Xla kintalakan». 4 Nachuna, maxkika tutumpuxamakaw tumin xaplata xalak xtemplo Baal-Berit. Abimélec limaklakaskilh uma tumin xlakata nakaxokgoni lakchixkuwin tiku nitlan xlikatsikgo chu ni xkgalhikgo taskujut xlakata xtaʼankgolh. 5 Alistalh alh kxchik xtlat, kʼOfrá, chu kʼakgtum chiwix kamakgnilh xnatalan, xkamanan Jerubaal, tutumpuxamakaw lakchixkuwin. Kajwatiya lakgtaxtulh Jotán, xaʼaktsujku xkgawasa Jerubaal, xlakata xtatsekgnit.

6 Alistalh, putum napuxkun xalak Siquem chu putum Bet-Miló tamakxtumikgolh lakatsu kxalanka kiwi, lakatsu ktalayaw nema xya kSiquem. Chu anta mapakgsina limaxtukgolh Abimélec.

7 Akxni litachuwinanka Jotán tuku lalh, xla tunkun alh kxʼakgspun* sipi Guerizim chu lata anta pixlanka kawanilh: «¡Kakinkgaxpatnitit, napuxkun xalak Siquem, chu Dios na nakakgaxmatniyan wixin!

8 »Akgtum kilhtamaku, makgapitsi kiwi ankgolh putsakgo* chatum mapakgsina xlakata xkamapakgsilh. Wa xlakata wanikgolh kiwi xla olivo: “Klakaskinaw pi kimapakgsinakan kalitaxtu”. 9 Pero olivo kakgalhtilh: “¿Nialh ktimakgalalh kiʼaceite,* nema tamaklakaskin xlakata nalitamalanki Dios chu lakchixkuwin, xlakata nakan kamapakgsi amakgapitsi laklanka kiwi?”.* 10 Wa xlakata amakgapitsi kiwi wanikgolh xakiwi higo: “Katat chu wix kakilamapakgsiw”. 11 Pero xakiwi higo kakgalhtilh: “¿Nialh kaktimastalh xasakgsi kintawakat, xlakata nakan kamapakgsi amakgapitsi laklanka kiwi?”. 12 Alistalh makgapitsi kiwi wanikgolh xakiwi uva: “Katat chu wix kakilamapakgsiw”. 13 Pero xakiwi uva kakgalhtilh: “¿Nialh ktimakgalalh xasasti vino, nema makgapaxuwa Dios chu lakchixkuwin, xlakata nakan kamapakgsi amakgapitsi laklanka kiwi?”. 14 Xaʼawatiya, makgapitsi kiwi wanikgolh xalhtukuniwa kiwi:* “Katat chu wix kakilamapakgsiw”. 15 Xalhtukuniwa kiwi kakgalhtilh amakgapitsi kiwi: “Komo xlikana akit* nakkamapakgsiyan, katantit* chu kaskgekgnantit. Komo nichuna, kataxtulh lhkuyat kxalhtukuniwa kiwi chu kakalhkuyuwililh puksnankiwi xalak Líbano”.

16 »Chu akxni mapakgsina limaxtutit Abimélec, ¿xkatsiyatit tuku xtlawapatit chu limasiyatit kakni? ¿Limasiyanitit talakgalhaman Jerubaal chu xfamilia? ¿Likatsinitit chuna la xlakgchan? 17 Akxni kintlat talatlawanalh mimpalakatakan, kalipekua wililh xlatamat xlakata nakalakgmaxtuyan kxmakankan madianitas. 18 Pero la uku lakatakinitantit xchik kintlat chu kʼakgtum chiwix kamakgnitit xkamanan, tutumpuxamakaw lakchixkuwin. Chu Abimélec, xkgawasa chatum skujni, mapakgsina limaxtunitantit kSiquem kaj xlakata mintalakan. 19 Komo la uku katsiyatit tuku tlawapatit chu limasiyaniyatit kakni Jerubaal chu tiku xalak xchik, katapaxuwatit Abimélec chu kamaxkitit talakaskin na nakatapaxuwayan. 20 Komo nichuna, Abimélec kakalimasputulh lhkuyat napuxkun xalak Siquem chu Bet-Miló, chu napuxkun xalak Siquem chu Bet-Miló kalimasputukgolh lhkuyat Abimélec».

21 Chu Jotán tsalalh, alh kBeer, anta tamakgxtakgli xlakata xpekuani Abimélec, xtala.

22 Abimélec mapakgsinalh kʼIsrael akgtutu kata. 23 Wa xlakata Dios tlawalh pi nialh xlatalalinkgolh* Abimélec chu napuxkun xalak Siquem, chu xlakan akgskgawimikgolh Abimélec. 24 Uma chuna lalh xlakata xmalakgaxokgenanka la kamakgnika tutumpuxamakaw xkamanan Jerubaal, xlakata tiku chuna tlawakgolh xkalimalakgaxokgeka kgalhni nema stajmakgankgolh: Abimélec, xlakata kamakgnilh xnatalan, chu napuxkun xalak Siquem, xlakata makgtayakgolh nakamakgnikgo. 25 Wa xlakata napuxkun xalak Siquem kayawalh lakchixkuwin kkasipijni xlakata nalipataxtukgo Abimélec. Umakgolh lakchixkuwin xkamakgkgalhanankgo tiku xkatilakatsalakgo ktiji. Titaxtulh kilhtamaku, makatsinika Abimélec tuku xlama.

26 Wa xlakata, Gaal xkgawasa Ébed chu xnatalan chankgolh chu tanukgolh kSiquem, chu napuxkun xalak Siquem kalipawankgolh. 27 Xlakan ankgolh kkapukuxtun, makikgolh xʼuvaskan, laktayamikgolh chu tlawakgolh akgtum paskua. Alistalh tanukgolh kxtemplo* xdioskan, tsukukgolh wayankgo, kgotnankgo chu tsukukgolh wankgo pi Abimélec xʼakgspulalh tuku nitlan. 28 Chu Gaal xkgawasa Ébed wa: «¿Tiku Abimélec chu tiku Siquem* xlakata nakkaskujnaniyaw? ¿Ni wa Abimélec xkgawasa Jerubaal chu ni wa Zebul xpalakachuwina? ¡Tlakg tlan nawan nakkaskujnaniyaw lakchixkuwin xalak Hamor, xtlat Siquem! Pero ¿tuku xlakata naskujnaniyaw Abimélec? 29 Komo akit xakpulalilh uma kachikin, xakmakglhtilh Abimélec xtamapakgsin». Wa xlakata likgalhkgamanalh Abimélec chu wa: «¡Kamalhuwi misoldados chu katat kintalatlawaya!».

30 Chu Zebul, príncipe xalak kachikin, lu sitsilh akxni katsilh tuku xlichuwinanit Gaal xkgawasa Ébed. 31 Wa xlakata tsekg malakgachanilh Abimélec makatsininanin xlakata nawanikgo: «Gaal xkgawasa Ébed chu xnatalan wilakgolh kSiquem chu tlawamakgolh pi kachikin nalakatakikgoyan. 32 Katantit katsisni, wix chu lakchixkuwin, chu tsekg kakakgalhkgalhitit kkapukuxtun. 33 Chu tsisa, akxni nataxtu chichini, kapitit chu kaʼakgchipatit kachikin. Akxni Gaal nakatataxtu ksoldados xlakata nakatalatlawayan, katlawa putum tuku matlaniya xlakata namakgatlajaya».

34 Wa xlakata Abimélec chu lakchixkuwin tiku xtaʼankgo taxtukgolh katsisni, chu pulaktati la tapitsikgolh, tsekg tawilakgolh kxkilhtin kachikin Siquem. 35 Akxni Gaal xkgawasa Ébed taxtulh chu tayalh kxmalakcha kachikin, Abimélec chu lakchixkuwin tiku xtaʼankgo taxtukgolh niku tsekg xwilakgolh. 36 Akxni Gaal kaʼakxilhli, wanilh Zebul: «¡Kaʼakxilhti! Taktamakgolh lakchixkuwin kkasipijni». Pero Zebul kgalhtilh: «Tuku akxilhpat ni wa lakchixkuwin, wata xmastilenkg kasipijni».

37 Alistalh, Gaal wa: «¡Kaʼakxilhti! Taktamakgolh lakchixkuwin kxlakʼitat kasipijni, chu akgtum grupo talakatsuwima ktiji niku ya lanka kiwi xla Meonenim». 38 Zebul kgalhtilh: «¿Patsankganita tuku xwanita? Wix wanti “¿Tiku Abimélec xlakata nakskujnaniyaw?”. ¿Ni wa umakgolh latamanin tiku xkalakgmakgana? La uku kapit chu kakatalatlawa».

39 Chu Gaal kapulalilh napuxkun xalak Siquem chu talatlawalh Abimélec. 40 Chu Abimélec putsastalanilh Gaal, tiku tsalalh. Lhuwa tiku xanin tamakgocha lata niku xwilakgolh asta kxmalakcha kachikin.

41 Abimélec chuntiya latamalh kʼArumá, chu Zebul katamakxtulh Gaal chu xnatalan kSiquem. 42 Lichali, latamanin ankgolh kkapukuxtun, chu Abimélec katsilh. 43 Wa xlakata, xla kataʼalh lakchixkuwin tiku xkalaksaknit, pulaktutu la kamapitsilh chu tsekg kakgalhkgalhilh. Akxni akxilhli pi latamanin xalak kachikin xtaxtumakgolh, kaʼakgchipalh chu kamakgnilh. 44 Abimélec chu lakchixkuwin tiku xkataʼankgonit takaxtayakgolh kxlakatin xmalakcha kachikin xlakata naʼakgchipakgo. Chu amakgapitsi akgtiy grupos kaʼakgchipakgolh tiku xwilakgolh kkapukuxtun chu kamakgnikgolh. 45 Putum ama kilhtamaku Abimélec talatlawalh kachikin chu akgchipalh. Kamakgnilh latamanin tiku anta xwilakgolh, malakgsputulh kachikin chu limalakgatsamalh matsat.

46 Akxni napuxkun tiku xwilakgolh ktorre xla Siquem katsikgolh tuku xlanit, tunkun ankgolh kputatsekgni nema xwi kxtemplo El-Berit.* 47 Akxni makatsinika Abimélec pi anta xwilakgolh putum napuxkun xalak torre xla Siquem, 48 xla chu lakchixkuwin tiku xtaʼankgo ankgolh ksipi Zalmón. Abimélec tiyalh akgtum hacha, kalh xpakgan kiwi, pakgxtutawakalh chu kawanilh tiku xtaʼankgo: «¡Lakapala! ¡Nachuna katlawatit!». 49 Wa xlakata putum kakgolh xpakgan kiwi chu stalanikgolh Abimélec. Limakgstiliwilikgolh putatsekgni chu mapasiwilikgolh. Chuna nikgolh putum latamanin xalak xtorre Siquem, lakpuskatin chu lakchixkuwin, max akgtum mil xwankgonit.

50 Alistalh, Abimélec alh kTebez, talatlawalh chu akgchipalh.* 51 Kxʼitat uma kachikin xwi akgtum lanka torre niku ankgolh tatsekgkgo putum lakchixkuwin chu lakpuskatin, nachuna putum napuxkun. Talakchuwatanukgolh chu ankgolh niku tlakg xatalhman ktorre. 52 Chu Abimélec chalh asta niku xwi torre xlakata namalakgsputu. Akxni talakatsuwilh niku xlaktanukan xlakata nalhkuyu, 53 chatum puskat tiku xwaka kxatalhman torre makanilh Abimélec xachiwix molino,* chu chiwix akgpakglhli. 54 Xla tunkun tasanilh kskujni tiku xmakgtaya chu wanilh: «Katamakxtu miʼespada chu kakimakgni xlakata niti nawan pi chatum puskat kimakgnilh». Wa xlakata, kskujni maxtulh xʼespada chu makgnilh.

55 Akxni lakchixkuwin xalak Israel akxilhkgolh pi Abimélec xninit, taspitkgolh kxchikkan. 56 Chuna Dios malakgaxokgelh Abimélec xlakata tuku nitlan xtlawaninit xtlat akxni kamakgnilh tutumpuxamakaw xnatalan. 57 Dios kamalakgaxokgelh lakchixkuwin xalak Siquem xlakata tuku nitlan xtlawakgonit.* Chuna kgantaxtulh tuku Jotán xkgawasa Jerubaal xlichuwinanit pi nitlan xʼama kaʼakgspula.

10 Akxni xninita Abimélec, Tolá, juez litaxtulh xlakata xlakgmaxtulh Israel. Xkgawasa Pua xwanit, xkgawasa Dodó, xalak xtribu Isacar. Xlama kSamir, kxkasipijni Efraín. 2 Puxamatutu kata juez litaxtulh kʼIsrael. Alistalh nilh chu maknuka* kSamir.

3 Alistalh juez litaxtulh Jaír chatum galaadita, tiku puxamatiy kata juez litaxtulh kʼIsrael. 4 Kgalhilh puxamakaw kamanan tiku xkgetawilakgo puxamakaw burros chu xkgalhikgo puxamakaw kachikinin. Umakgolh kachikinin kalimapakuwikan Havot-Jaír asta la uku chu wilakgolh kxtiyat Galaad. 5 Alistalh Jaír nilh chu maknuka kCamón.

6 Chu israelitas tsukuparakgolh tlawakgo tuku nitlan kxlakatin Jehová chu tsukuparakgolh kaskujnanikgo Baales, tatlawamakgxtu xla Astoret, dioses xalak Aram,* dioses xalak Sidón, dioses xalak Moab, xdioseskan ammonitas chu xdioseskan filisteos. Tamakgatlinikgolh Jehová chu nialh skujnanikgolh. 7 Wa xlakata Jehová lu kasitsinilh israelitas chu kaʼakgxtakgmakgalh* kxmakankan filisteos chu ammonitas. 8 Xlakan kamakgapatinankgolh chu katlawanikgolh tuku nitlan israelitas uma kata. Akgkutsayan kata kamakgapatinankgolh putum israelitas tiku xlamakgolh kxkilhtun Jordán, tiyat nema xapulana xkatapakgsini amorreos, kʼGalaad. 9 Nachuna ammonitas xpatakutkgo kgalhtuchokgo Jordán xlakata xkatalatlawakgolh tribus xalak Judá, Benjamín chu xalak xchik Efraín. Wa xlakata Israel lu lilakgaputsa tawi. 10 Chu israelitas tasaskinikgolh xtamakgtay Jehová. Xwanikgo: «Ktlawanitaw talakgalhin kmilakatin, xlakata kmakgxtakgnitaw kiDioskan chu kkaskujnaninitaw Baales».

11 Pero Jehová kakgalhtilh israelitas: «¿Ni akit tiku kkalakgmaxtun kʼEgipto chu kxmakankan amorreos, ammonitas, filisteos, 12 sidonios, amalequitas chu madianitas akxni xlakan xkamakgapatinankgoyan? Akxni wixin xkilatasaskiniyaw tamakgtay, akit xakkalakgmaxtuyan kxmakankan. 13 Pero wixin kilamakgxtakgwi chu kaskujnanitit atanu dioses. Wa xlakata nialh kaktikalakgmaxtun. 14 Kapitit kaskiniyatit tamakgtay dioses tiku wixin kalaksaknitantit; xlakan kakalakgmaxtun akxni lu lakgaputsapatit». 15 Pero israelitas wanikgolh Jehová: «Klakgalhinanitaw. Kakilatlawaniw tuku wix tlan akxilha. Pero katlawa litlan kakilalakgmaxtuw uma kilhtamaku». 16 Chu lakgmakgankgolh dioses xalak atanu kachikinin chu skujnaniparakgolh Jehová. Wa xlakata xla nialh tayanilh chuna la xʼakxilhma pi Israel xpatinama.

17 Titaxtulh kilhtamaku, ammonitas kamamakxtumiparaka chu tawilakgolh kʼGalaad. Pero israelitas tamakxtumikgolh chu tawilaparakgolh kMizpá. 18 Latamanin chu príncipes xalak Galaad xlawanikgo: «¿Tiku nakinkapulalinan kʼuma tatalachipat nema nakatakgalhiyaw ammonitas? Wa xpuxkukan kakalitaxtunilh putum latamanin xalak Galaad».

11 Chatum galaadita tiku xwanikan Jefté, chatum tliwakga soldado xwanit. Xkgawasa xwanit chatum puskat tiku ksta xmakni, chu xtlat xwanikan Galaad. 2 Pero xpuskat Galaad na takgalhilh kamanan. Akxni xlakan stakkgolh, tamakxtukgolh Jefté chu wanikgolh: «Wix nitu katilakgchan kxchik kintlatkan, xlakata wix atanu tiku mintse». 3 Wa xlakata Jefté katsalanilh xnatalan chu kxtiyat Tob tamakgxtakgli. Chu makgapitsi lakchixkuwin tiku ni xkgalhikgo xtaskujutkan akxtum talakgolh chu stalanikgolh.

4 Titaxtulh kilhtamaku, ammonitas tsukukgolh katalatlawakgo israelitas. 5 Chu akxni akxilhkgolh pi ammonitas xkatalatlawamakgo israelitas, lakgkgolotsin xalak Galaad lakapala ankgolh kxtiyat Tob xlakata namaspitparakgo Jefté. 6 Wanikgolh Jefté: «Katat, klakaskinaw pi wix kimpuxkukan kalitaxtu xlakata tlan nakkatalatlawayaw ammonitas». 7 Pero Jefté kakgalhtilh lakgkgolotsin xalak Galaad: «¿Ni wixin tiku nipara tsinu xkiʼakxilhputunatit chu kintlakgaxtutit kxchik kintlat? ¿Tuku xlakata kimputsayatit la uku akxni kgalhiyatit taʼakglhuwit?». 8 Wa xlakata lakgkgolotsin xalak Galaad wanikgolh Jefté: «Wa xlakata kkalilakgmiman. Komo nakilataʼanaw chu nakatalatlawaya ammonitas, wix xpuxkukan nakalitaxtuniya latamanin xalak Galaad». 9 Chu Jefté kawanilh lakgkgolotsin xalak Galaad: «Komo nakilalinaw xlakata nakkatalatlawa ammonitas chu Jehová natlawa pi nakkamakgatlaja, mimpuxkukan naklitaxtu». 10 Lakgkgolotsin xalak Galaad wanikgolh Jefté: «Jehová kakatsilh* tuku lichuwinanitaw chu xla kakinkalakputsananin komo ni naktlawayaw tuku wanti». 11 Wa xlakata Jefté kataʼalh lakgkgolotsin xalak Galaad, chu latamanin limaxtukgolh xpuxkukan ksoldados chu xpulalinakan. Chu Jefté wampa anta kMizpa, kxlakatin Jehová, putum tuku xwanit.

12 Alistalh Jefté kamalakgachanilh makatsininanin xmapakgsinakan ammonitas xlakata nawani: «¿Tuku nitlan ktlawaninitan xlakata natana talatlawaya kinkachikin?». 13 Xmapakgsinakan ammonitas kakgalhtilh xmakatsininanin Jefté: «Akxni Israel taxtucha kʼEgipto, akgchipalh tiyat nema xkintapakgsini lata kʼArnón asta kJaboc chu asta kJordán. La uku kakimaspitni, komo chuna natlawaya naʼanan takaksni». 14 Pero Jefté malakgachanipa makatsininanin xmapakgsinakan ammonitas 15 xlakata xwanilh:

«Wa uma tuku wan Jefté: “Israel ni akgchipalh xtiyatkan moabitas nipara xtiyatkan ammonitas. 16 Akxni israelitas taxtukgocha kʼEgipto, tlawankgolh kxakaskakni tiyat asta kxaSpinini pupunu chu chankgolh kCadés. 17 Wa xlakata Israel malakgachanilh makatsininanin mapakgsina xalak Edom xlakata nawani «Katlawa litlan, kakilamaxkiw talakaskin naktitaxtuyaw ktiyat nema tapakgsiniyan». Pero mapakgsina xalak Edom ni kakgaxmatnilh. Chu nachuna wanikgolh mapakgsina xalak Moab, pero xla na ni kamaxkilh talakaskin. Wa xlakata Israel tamakgxtakgli kCadés. 18 Akxni tlawankgolh kxakaskakni tiyat, makgstiliwilikgolh xtiyat Edom chu xtiyat Moab. Tlawankgolh kxʼoeste xtiyat Moab chu tawilakgolh kxtiyat Arnón, pero ni tanukgolh kxtiyat Moab, xlakata Moab xkitapakgta kʼArnón.

19 »”Alistalh, Israel malakgachanilh makatsininanin Sehón, xmapakgsinakan amorreos, nema xmapakgsinan kʼHesbón, xlakata nawani «Katlawa litlan, kakilamaxkiw talakaskin naktitaxtuyaw ktiyat nema tapakgsiniyan xlakata nakchanaw niku kilichanatkan». 20 Pero Sehón ni xkalipawan israelitas, chu ni kamaxkilh talakaskin natitaxtukgo ktiyat nema xtapakgsini. Wata kamamakxtumilh putum latamanin, tawilalh kJáhaz chu katalatlawalh israelitas. 21 Akxni Jehová, xDios Israel, akxilhli uma, kamakamaxkilh israelitas Sehón chu putum xkachikinin. Xlakan kamakgatlajakgolh amorreos chu akgchipakgolh putum tiyat nema xkatapakgsini. 22 Chuna akgchipakgolh putum xtiyatkan amorreos lata kʼArnón asta kJabóc chu lata kxakaskakni tiyat asta kJordán.

23 »”Wa Jehová, xDios Israel, tiku katamakxtulh amorreos kxlakatin xkachikin. ¿Chu la uku wix katamakxtuputuna israelitas? 24 ¿Pi ni tatamakgxtakga wix putum tuku maxkiyan midios Kemós? Nachuna akinin nakkatamakxtuyaw katiwa tiku Jehová kiDioskan katamakxtunit kkilakatinkan. 25 ¿Tlakg tlan litaxtuya wix nixawa Balac xkgawasa Zipor, mapakgsina xalak Moab? ¿Pi katatakglhuwilh israelitas o katalachipalh? 26 Israel akgtutu ciento kata lata lama kʼHesbón chu laktsu xkachikinin, kʼHaroer chu laktsu xkachikinin chu putum kachikinin nema wilakgolh kxkilhtun xchuchut Arnón. ¿Tuku xlakata ni skintit pi xkamaspitnikantit umakgolh kachikinin putum uma kilhtamaku? 27 Akit ni klakgalhinanit kmilakatin, pero xlakata kintalatlawapat, wix tlawapat tuku nitlan. Jehová, tiku Juez litaxtu, wa kakalakputsananilh israelitas chu ammonitas”».

28 Pero xmapakgsinakan ammonitas ni kgaxmatli tuku wanilh Jefté.

29 Alistalh xʼespíritu Jehová lakgmilh Jefté, chu xla tipuntaxtulh xtiyat Galaad chu Manasés xlakata naʼan kMizpé xla Galaad. Lata anta kalakgalh ammonitas xlakata nakatalatlawa.

30 Chu Jefté tlawanilh Jehová uma tamalaknun: «Komo nakimaxkiya talakaskin nakkamakgatlaja ammonitas, 31 tiku nataxtu kkinchik xlakata nakimakgamakglhtinan akxni kkakimakgatlajanita nawan ammonitas, wix natapakgsiniyan, oh Jehová. Nakmakamasta chuna la xalhkun tamakamastan».*

32 Jefté alh katalatlawa ammonitas, chu Jehová maxkilh talakaskin nakamakgatlaja. 33 Xla kamakgnitilhalh lata kʼAroer asta kMinit, akgchipalh akgpuxam kachikinin, chu asta kʼAbel-Keramim. Lhuwa nikgolh ama kilhtamaku. Chuna israelitas kaʼakgchipakgolh ammonitas.

34 Akxni Jefté taspitli kxchik, anta kMizpá, ¡xtsumat taxtulh xlakata xmakgamakglhtinalh, xtlakgtilha pandereta chu xtantlitilha! Kaj xachastum xtsumat xwanit. Ni xkgalhi achatum xkgawasa nipara xtsumat. 35 Akxni akxilhli, xtitli klhakgat chu wanilh: «¡Ay, kintsumat! Lu klilakgaputsa xlakata wix tiku makgat kmalakgachaman. Wi tuku kmalaknunilh* Jehová chu la uku kilimakgantaxtit».

36 Pero xla kgalhtilh: «Tlat, komo wix wi tuku malaknuni Jehová, katlawa chuna la malaknuni, xlakata Jehová makamaxkin mintalatlawananin, ammonitas». 37 Nachuna wanilh xtlat: «Kaj pulaktum tuku kskiniyan: kakimaxki talakaskin nakkataʼan kiʼamigas akgtiy papaʼ kkasipijni xlakata nakanaw tasayaw, xlakata nikxni ktitamakgaxtokgli».

38 Xtlat kgalhtilh: «Tlan napina». Maxkilh talakaskin nakataʼan xʼamigas akgtiy papaʼ kkasipijni xlakata natasakgo, xlakata nikxni xʼama tamakgaxtokga. 39 Xliʼakgtiy papaʼ, akxni xla taspitli kxchik xtlat, Jefté makgantaxtilh tamalaknun nema xtlawanit. Xla nikxni tatalakgxtumilh chatum chixku. Chu anta kʼIsrael tsukuka tlawakan uma talismanin: 40 akgatunu kata laktsuman xalak Israel xʼankgo makgpuwantinikgo xtsumat Jefté tiku galaadita xwanit; xʼankgo akgtati kilhtamaku akgatunu kata.

12 Alistalh lakchixkuwin xalak Efraín kamamakxtumika. Xlakan titaxtukgolh kZafón* chu kilhnikgolh Jefté: «¿Tuku xlakata ni kilawaniw pi nakkatanan akxni titaxtutit xlakata nakatalatlawayatit ammonitas? Naklhkuyuyaw minchik akxni anta tanupat». 2 Pero Jefté kakgalhtilh: «Kinkachikin chu akit kkatakgalhiw ammonitas akgtum lanka taʼakglhuwit. Chu kkaskinin tamakgtay, pero wixin ni tantit kilalakgmaxtuyaw kxmakankan. 3 Akxni kakxilhli pi ni xtampatit kilalakgmaxtuyaw, kalipekua kwililh kilatamat chu kkalh katalatlawa ammonitas, chu Jehová tlawalh pi nakkamakgatlaja. ¿Tuku xlakata tanitantit kilatalatlawayaw?».

4 Alistalh, Jefté kamamakxtumilh putum lakchixkuwin xalak Galaad chu katalatlawakgolh efraimitas. Lakchixkuwin xalak Galaad kamakgatlajakgolh efraimitas, tiku xwankgonit: «Wixin, galaaditas tiku lapatit kxtiyat Efraín chu Manasés, kaj ni lhuwa lakchixkuwin tiku tsalataxtutit kʼEfraín». 5 Galaaditas akgchipakgolh anta niku xpatakutkan kJordán akxni nina xchankgo lakchixkuwin xalak Efraín. Chu akxni chatum efraimita xtsalaputun, xwan «Kimaxki talakaskin naktitaxtu». Chu lakchixkuwin xalak Galaad xkakgalhskinkgo «¿Wix chatum efraimita?». Akxni xkgalhtinan «¡Ni!», 6 xwanikgo «Kawanti shibolet». Pero xla xwan «Sibolet», xlakata xla nila liwana xwan tachuwin. Alistalh xchipakan chu xmakgnikan anta, niku xpatakutkan Jordán. Amacha kilhtamaku nikgolh 42,000 efraimitas.

7 Jefté tiku galaadita xwanit, juez litaxtulh kʼIsrael akgchaxan kata. Alistalh nilh chu maknuka* kxkachikin, anta kʼGalaad.

8 Akxni xninita Jefté, Ibzán xalak Belén juez litaxtulh kʼIsrael. 9 Kgalhilh puxamakaw xlakgkgawasan chu puxamakaw xlaktsuman. Kamalakgachalh xlaktsuman xlakata xkatatamakgaxtokgkgolh lakchixkuwin tiku ni xalak xfamilia xwankgonit chu kalimilh puxamakaw lakpuskatin xlakata nakatamamakgaxtokgkgo xlakgkgawasan. Juez litaxtulh kʼIsrael akgtujun kata. 10 Alistalh Ibzán nilh chu maknuka kBelén.

11 Akxni xninita Ibzán, Elón tiku zabulonita xwanit, juez litaxtulh kʼIsrael. Akgkaw kata juez litaxtulh. 12 Alistalh Elón tiku zabulonita xwanit, nilh chu maknuka kʼAyalón, kxtiyat Zabulón.

13 Akxni xninita Elón, Abdón xkgawasa Hilel tiku piratonita xwanit, juez litaxtulh kʼIsrael. 14 Kgalhilh tipuxam kamanan chu puxamakaw natanatni, tiku xkgetawilakgo tutumpuxamakaw burros. Juez litaxtulh kʼIsrael akgtsayan kata. 15 Alistalh, Abdón xkgawasa Hilel tiku piratonita xwanit nilh chu maknuka kPiratón, kxtiyat Efraín, kxkasipijnikan amalequitas.

13 Israelitas tsukuparakgolh tlawakgo tuku nitlan kxlakatin Jehová. Wa xlakata tipuxam kata Jehová kamakgxtakgli kxmakankan filisteos.

2 Ama kilhtamaku latamalh chatum chixku tiku xwanikan Manóah, tiku xalak Zorá xwanit, xalak xfamiliajkan danitas. Xpuskat nila xkgalhi kamanan. 3 Akgtum kilhtamaku xʼángel Jehová tasiyanilh uma puskat chu wanilh: «La uku nila kgalhiya kamanan, pero nakgalhiya skgata chu namalakachitaniya chatum kgawasa. 4 Kuenta katlawa ni nalikgotnana vino nipara atanu tuku likgachikan, chu ni kawat tuku xaxkajwani. 5 Kaʼakxilhti, nakgalhiya skgata chu namalakachitaniya chatum kgawasa. Nikxni nachukunikan xchixit, xlakata uma aktsu kgawasa nazareo nalitaxtu lata akxni nalakachin,* tanu nawilikan xlakata naskujnani Dios, chu xla natsuku kalakgmaxtu Israel kxmakankan filisteos».

6 Alistalh puskat alh chu litachuwinalh xchixku. Wanilh: «Chatum chixku tiku tapakgsini xaxlikana Dios kilakgmilh. Lu kaks kimalakawanilh chuna la xtasiya, xtachuna la chatum xʼángel xaxlikana Dios. Ni kkgalhskilh niku xminacha, chu xla na ni kiwanilh xtukuwani. 7 Pero kiwanilh: “Kaʼakxilhti, nakgalhiya skgata chu namalakachitaniya chatum kgawasa. Ni kalikgotnanti vino nipara atanu tuku likgachikan chu ni kawat tuku xaxkajwani, xlakata aktsu kgawasa nazareo nalitaxtu lata akxni nalakachin asta akxni nani”».

8 Manóah tasaskinilh Jehová: «Kakintapati, Jehová, pero katlawa litlan, miskujni tiku makata amakgtum kamimpa xlakata nakinkawaniyan tuku naktlawayaw xpalakata uma kgawasa nema nalakachin». 9 Xaxlikana Dios kgaxmatnilh Manóah, wa xlakata, akxni xpuskat xwi kkapukuxtun, xʼángel xaxlikana Dios amakgtum lakgmimpa. Pero Manóah, xchixku, ni anta xtawi. 10 Puskat lakapala alh wani xchixku: «¡Kaʼakxilhti, kintasiyanipa chixku tiku xkilanitanchi!».

11 Manóah tayalh chu taʼalh xpuskat niku xwi chixku, chu kgalhskilh: «¿Wix chixku tiku tachuwinanti kimpuskat?». Xla kgalhtinalh: «Chuna, akit». 12 Chu Manóah wanilh: «¡Kakgantaxtulh mintachuwin! Pero, kakilawaniw ¿la nalin xlatamat uma aktsu kgawasa? ¿Chu tuku natlawa?». 13 Xʼángel Jehová kgalhtilh Manóah: «Mimpuskat ni xliwat putum tuku kwanilh. 14 Ni xliwat putum tuku litatlawanit uva, ni nalikgotnan vino chu atanu tuku likgachikan chu ni xliwat tuku xaxkajwani. Xlitlawat putum tuku klimapakgsinit».

15 Alistalh Manóah wanilh xʼángel Jehová: «Katlawa litlan, nina kapit. Nakkaxpupuniyan tantum aktsu cabra». 16 Pero xʼángel Jehová wanilh Manóah: «Komo naktamakgxtakga, ni kaktiwalh miliwat. Pero, komo nalakaskina, tlan namakamaxkiya Jehová akgtum xalhkun tamakamastan». Manóah ni xkatsi pi xʼángel Jehová xwanit. 17 Alistalh, Manóah wanilh xʼángel Jehová: «¿Tuku wanikana? Kkatsiputunaw xlakata nakkamaxkiyan kakni akxni nakgantaxtu putum tuku wanti». 18 Pero xʼángel Jehová kgalhtilh: «¿Tuku xlakata kinkgalhskina tuku kiwanikan? ¿Ni katsiya pi akgtum lu stlan tukuwani?».

19 Chu Manóah tiyalh aktsu cabra chu tamakamastan xla talhtsi, chu makamaxkilh Jehová kʼakgtum chiwix. Alistalh Dios tlawalh tuku kaks malakawaninan akxni Manóah chu xpuskat xʼakxilhmakgo. 20 Akxni lhkuyat xalak pumakamastan tachayawalh kʼakgapun, Manóah chu xpuskat akxilhkgolh pi xʼangel Jehová laktakxtulh klhkuyat. Chu tunkun talakgatsokgostakgolh. 21 Chu Manóah katsilh pi chatum xʼángel Jehová xwanit. Xʼángel Jehová nialh katasiyanilh Manóah chu xpuskat. 22 Chu Manóah wanilh xpuskat: «¡Amaw niyaw xlakata wa Dios tiku akxilhnitaw!». 23 Pero xpuskat wanilh: «Komo Jehová xkintikamakgniputun ni xmakgamakglhtinalh xalhkun kintamakamastankan nipara talhtsi nema makamaxkiw. Na ni xkinkamasiyanin putum uma chu ni xkinkawanin putum tuku kinkawanin».

24 Alistalh, xpuskat Manóah malakachinilh chatum kgawasa chu limapakuwilh Sansón. Chuna la kstaktilhama aktsu kgawasa Jehová ksikulunatlawama. 25 Titaxtulh kilhtamaku, xʼespíritu Jehová wi tuku tsukulh matlawi kMahané-Dan, kxlakʼitat Zorá chu Estaol.

14 Alistalh Sansón taktalh kTimná* chu anta akxilhli chatum puskat tiku filistea xwanit.* 2 Alh anta niku xwilakgolh xnatlatni chu kawanilh: «Kakxilhli anta kTimná chatum puskat tiku filistea litaxtu chu lu klakgatilh. Klakaskin kakimakgtayatit xlakata tlan naktatamakgaxtokga». 3 Pero xnatlatni Sansón kgalhskinkgolh: «¿Pi ni anan nipara chatum puskat kxlakgstipan mintalilakgapasni o kputum kinkachikinkan? ¿Tuku xlakata miliputsat chatum puskat kxlakgstipankan filisteos tiku ni skujnanikgo Dios?».* Pero Sansón wanilh xtlat: «Kakintamamakgaxtokgti, xlakata wa tiku akit tlan kakxilha».* 4 Xnatlatni ni xkatsikgo pi wa Jehová tiku chuna xmalakpuwanima, xputsama akgtum kilhtamaku xlakata tlan xkatalatlawalh filisteos, xlakata ama kilhtamaku filisteos xʼakgchipakgonit Israel.

5 Wa xlakata Sansón kataʼalh xnatlatni kTimná. Akxni chalh anta niku xchankanit uvas kTimná, tatanokglhli tantum tliwakga león. 6 Ama kilhtamaku, xʼespíritu Jehová matliwakglhli Sansón chu kajwatiya xmakan limaklakaskilh xlakata nalakgxwakga león, lakgxwakgli chuna la lakgxwakgkan tantum aktsu cabra. Pero ni kawanilh xtlat chu xtse tuku xtlawanit. 7 Alistalh alh kTimná chu tachuwinalh uma puskat; xpalakata Sansón, uma puskat chuntiya lu tlan xwanit.

8 Alistalh, akxni taspitli xlakata xlilh kxchik, alh akxilha león nema xmakgninit. Kxpulakni xanin león xtanumakgo lhuwa cera chu ksakgsi cera.* 9 Wa xlakata Sansón litiyalh xmakan ksakgsi cera chu xwatilhama ktiji. Chu, akxni kalakgchalh xnatlatni, na kamaxkilh ksakgsi cera xlakata na xwakgolh. Pero ni kawanilh pi xtiyanit kxanin kxmakni tantum león.

10 Xtlat alh anta niku xwi puskat. Anta Sansón tlawalh akgtum lanka taway, xlakata wa tuku xlismanikgo tlawakgo lakchixkuwin tiku nina lhuwa kata xlinkgo. 11 Akxni latamanin akxilhkgolh, liminikgolh puxamakaw lakchixkuwin xlakata xmakgtayakgolh. 12 Alistalh, Sansón kawanilh: «Kakimaxkitit talakaskin nakkatlawaniyan akgtum takgalhskinin nema kaks malakawaninan.* Komo nakatsiyatit tuku kilhchanima chu nakiwaniyatit tuku wamputun kʼumakgolh akgtujun kilhtamaku chuna la tlawamaw uma lanka taway, akit nakkamaxkiyan puxamakaw lhakgat nema litatlawanit lino chu amakgapitsi puxamakaw lhakgat. 13 Pero, komo ni nakiwaniyatit tuku kilhchanima, wixin nakimaxkiyatit puxamakaw lhakgat nema litatlawanit lino chu amakgapitsi puxamakaw lhakgat». Xlakan kgalhtikgolh: «Kakilawaniw mintakgalhskinin nema kaks malakawaninan; kkgaxmatputunaw». 14 Chu xla kawanilh:

Titaxtukgolh akgtutu kilhtamaku, chu xlakan chuntiya nina xkatsikgo tuku xwamputun xtakgalhskinin nema kaks malakawaninan. 15 Pero xliʼakgtati kilhtamaku wanikgolh xpuskat* Sansón: «Kaʼakgskgawi minchixku xlakata nawaniyan tuku kilhchanima xtakgalhskinin nema kaks malakawaninan. Komo nichuna natlawaya, nakkalhkuyuyan wix chu putum tiku xalak kxchik mintlat. ¿O kaj kilawaniw nakminaw xlakata nakilamakglhtiyaw tuku kinkatapakgsiniyan?». 16 Wa xlakata xpuskat Sansón xlakgatasa chu xwani: «Wix ni kiʼakxilhputuna; ni kimpaxkiya. Kawani kintachiki akgtum takgalhskinin nema kaks malakawaninan, pero akit ni kiwaninita tuku kilhchanima». Akxni Sansón kgaxmatli uma, kgalhtilh: «Nipara kintlat chu kintse kkawaninit tuku kilhchanima, ¿la nakwaniyan wix tuku wamputun?». 17 Pero xla chuntiya lu xlakgatasama asta akxni takgatsikgolh akgtujun kilhtamaku chuna la xtlawamaka lanka taway. Xliʼakgtujun kilhtamaku lu xmakgatlakgwanita, wa xlakata xla wanilh tuku xkilhchanima xtakgalhskinin chu xla kawanilh latamanin xalak xkachikin. 18 Wa xlakata xliʼakgtujun kilhtamaku, akxni nina xtsankga chichini,* lakchixkuwin xalak kachikin wanikgolh Sansón:

Xla kakgalhtilh:

19 Alistalh xʼespíritu Jehová matliwakglhli, chu alh kʼAsquelón, anta kamakgnilh puxamakaw lakchixkuwin, kamakglhtilh klhakgatkan chu kamaxkilh tiku xwankgonit tuku xkilhchanima xtakgalhskinin nema kaks malakawaninan. Alistalh xatasitsi talakakxtupa kxchik xtlat.

20 Chu xpuskat Sansón tamamakgaxtokgka chatum kgawasa tiku akxtum xkatatawilakgonit niku xtlawakanit lanka taway.

15 Makgapitsi kilhtamaku alistalh, akxni xmakimaka trigo, Sansón alh akxilha xpuskat chu xlimin tantum aktsu cabra, wa: «Ktanuputun niku lhtata kimpuskat». Pero xtlat xpuskat ni maxkilh talakaskin natanu. 2 Xtlat uma puskat wanilh: «Xaklakpuwan pi nipara tsinu xʼakxilhputuna, wa xlakata kmakamaxkilh tiku akxtum xkatawilan klanka taway. Pero ¿ni tlakg stlan akxilha xtala tiku tlakg xaʼaktsujku? Ktasaskiniyan pi wa katatamakgxtakgti nixawa achatum». 3 Wa xlakata Sansón wa: «Uma kilhtamaku filisteos nila nakilimawakakgo tuku nitlan nakkatlawani».

4 Wa xlakata Sansón alh chu kachipalh akgtutu ciento wekgni.* Alistalh katiyalh makgapitsi kiwi nema limakgskgokan, tantiyun tantiyun kachilh wekgni kstajankan chu wililh kgantum kiwi nema limakgskgokan kxlakʼitat kstajankan. 5 Alistalh kamapasilh kiwi nema xlimakgskgokan chu kamakgxtakgli wekgni kxkapukuxtunkan filisteos niku xchankgonit talhtsi. Putum lhkuyuwilikgolh: tuku makxtum xkawilikanit* chu talhtsi nema xyakgolhku chu asta niku xchankanit uvas chu olivos.

6 Filisteos kgalhskininankgolh: «¿Tiku tlawalh uma?». Kakgalhtikgolh: «Wa Sansón, xpuwiti* chixku xalak Timná. Xlakata xla makglhtilh xpuskat chu maxkilh tiku akxtum xtawi akxni xtlawamakgolh lanka taway». Akxni kgaxmatkgolh uma, filisteos takxtukgolh* chu lhkuyukgolh puskat chu xtlat. 7 Alistalh Sansón kawanilh: «Komo wixin chuna likatsiyatit, ni ktijaxli asta akxni kkmalakgaxokgekgonitan nawan». 8 Chu tsukulh kawilini chatunu chatunu. Lhuwa tiku nikgolh. Alistalh taktalh chu tamakgxtakgli kʼakgtum lhuku nema xwi ksipi xla Etam.

9 Alistalh, filisteos talakakxtukgolh kJudá chu anta tamakgxtakgkgolh. Lakatum lakatum xʼankgo xlilakgatum Lehí. 10 Alistalh lakchixkuwin xalak Judá kgalhskininankgolh: «¿Tuku lakgtanitantit? ¿Tuku kkatlawaninitan akinin?». Chu xlakan kgalhtinankgolh: «Kminitaw xlakata nakchipayaw* Sansón chu naktlawaniyaw chuna la kinkatlawanin akinin». 11 Wa xlakata akgtutu mil lakchixkuwin xalak Judá taktakgolh klhuku nema xwi ksipi xla Etam chu kgalhskinkgolh Sansón: «¿Ni katsiya pi wa filisteos tiku kinkamapakgsikgoyan? ¿Tuku xlakata chuna kilatlawaniw?». Xla kakgalhtilh: «Akit kajwatiya kkatlawanilh tuku xlakan kintlawanikgolh». 12 Xlakan kgalhtikgolh Sansón: «Kminitaw xlakata nakkachipayan* chu nakkamakamastayan kxmakankan filisteos». Chu Sansón kawanilh: «Kakilalitayaniw pi wixin nitu kintilatlawaniw». 13 Chu xlakan wanikgolh: «Ni, kajwatiya nakkachiyan chu nakkamakamastayan. Ni kaktikamakgnin».

Wa xlakata lichikgolh kgantiy xasasti tasiw, tamakxtukgolh ksipi chu tatalakakxtukgolh. 14 Akxni filisteos akxilhkgolh pi lichanka kLehí, tsukukgolh lipaxuwakgo. Uma kilhtamaku, xʼespíritu Jehová maxkilh litliwakga, chu tasiw nema xlimakachikanit talakpuchkgolh chuna la hilos xla lino nema klhkuyukanit chu likan nema xmakawilikanit taktanilh xtachuna la xlakstalankli. 15 Xla tekgsli akgtum xkilhlukut tantum burro nema aku xmakgnikanit, chu uma limaklakaskilh xlakata nakamakgni akgtum mil lakchixkuwin. 16 Alistalh Sansón wa:

«¡Xkilhlukut tantum burro kkalimakgnilh kintalamakgasitsin chu makxtum kkawilinit!

Xkilhlukut tantum burro kkalimakgninit akgtum mil lakchixkuwin».

17 Akxni chuwinankgolh, makgalh kilhlukut chu anta limapakuwilh Ramat-Lehí.* 18 Pero lu kgalhputilh chu wanilh Jehová: «Wix makgtaya miskujni xlakata natlajanan.* ¿Chu la uku nakni xlakata lu kkgalhputima chu naktawakayacha kxmakankan tiku ni skujnanikgoyan?». 19 Wa xlakata Dios tlawalh pi kʼakgtum lhuku nema xwi kLehí xtalakkilh, chu tsukulh taxtu chuchut. Sansón kgotnalh, kgalhipa litliwakga chu tlan makgkatsilh. Wa xlakata uma taxtunu, nema wi kLehí asta la uku, limapakuwilh En-Hacore.*

20 Kxkilhtamakujkan filisteos, Sansón Juez litaxtulh kʼIsrael akgpuxam kata.

16 Akgtum kilhtamaku, Sansón alh kʼGaza. Anta akxilhli chatum puskat tiku ksta xmakni chu tanulh kxchik. 2 Chu wi tiku kawanilh latamanin xalak Gaza: «¡Unu wi Sansón!». Wa xlakata makgstiliwilikgolh kachikin chu tantaskaka tamakgxtakgkgolh kxmalakcha kachikin xlakata nalipataxtukgo. Tantaskaka ni talakxijkgolh xlakata xlakpuwamakgo: «Akxni nataxtu chichini namakgniyaw».

3 Pero Sansón asta itat tsisni lhtatalh. Alistalh itat tsisni, takilh chu tiyalh xapakglanka malakcha xalak kachikin chu putum tuku xliya.* Chu alistalh akxni pakgxtutawakalh, lilh asta ksipi nema xwi kxlakatin Hebrón.

4 Alistalh akxni xtlawakgonit uma, lakgatilh chatum puskat tiku xlama kxakapuskan Sorec nema xwanikan Dalila. 5 Wa xlakata xmapakgsinanin filisteos ankgolh tachuwinankgo chu wanikgolh: «Kaʼakgskgawi xlakata nawaniyan niku minacha xlitliwakga. Kalakputsa la nakmakgatlajayaw, nakchiyaw chu nakmamaxaniyaw. Chu chatunu chatunu akinin nakkamaxkiyan 1,100 tumin xla plata.

6 Alistalh, Dalila wanilh Sansón: «Katlawa litlan, kakiwani niku tiyaya militliwakga chu tuku tlan nalichikana chu nalimakgatlajakana». 7 Sansón kgalhtilh: «Komo nakilichikan kgantujun kxnujut* nema nina skakkgo xla tantum animal, nialh ktikgalhilh uma litliwakga chu naklatama chuna la amakgapitsi lakchixkuwin». 8 Wa xlakata xmapakgsinanin filisteos linikgolh kgantujun kxnujut nema nina kskakkgo xla tantum animal, chu xla lichilh. 9 Chu xlakan lakkaxwilikgolh nalipataxtukgo kʼatanu cuarto nema xtapakgsini Dalila. Alistalh Dalila wanilh: «¡Sansón, unu wilakgolh filisteos!». Xla tunkun kalakpuchli xnujut chuna la lhkuyat lakpucha hilo nema litatlawanit lino maski kaj tsinu machichikan. Chu xlakan ni katsikgolh niku xminacha xlitliwakga.

10 Chu Dalila wanilh Sansón: «¡Kaj kintakgamanampat! ¡Kiʼakgskgawi! Katlawa litlan, kakiwani tuku tlan nalichikana». 11 Xla kgalhtilh: «Komo nakilichikan xalaksasti tasiw nema nina maklakaskinkan, nialh ktikgalhilh uma litliwakga chu naklatama chuna la amakgapitsi lakchixkuwin». 12 Wa xlakata Dalila tiyalh xasasti tasiw, lichilh chu pixlanka wanilh: «¡Sansón, unu wilakgolh filisteos!». (Putum uma kilhtamaku tiku xlipataxtuputunkgo chuntiyaku xwilakgolh kcuarto nema xtapakgsini Dalila). Xla tunkun lakpuchli tasiw nema xlimakachikanit xtachuna la lakpuchkan hilos.

13 Alistalh, Dalila wanilh Sansón: «Chuntiya kiʼakgskgawipat ni kiwanipat tuku xaxlikana. Kakiwani tuku tlan nalichikana». Xla kgalhtilh: «Mililakgastawat kgantujun kintakgonkgxni kmaktum lhakgat». 14 Wa xlakata, akxni chinilh xtakgonkgxni kxakinkasajaja* kiwi, xla pixlanka wanilh: «¡Sansón, unu wilakgolh filisteos!». Xla tunkun lakastakwanalh chu matikutulh xakinkasajaja kiwi chu hilos nema xlitlawakan lhakgat.

15 Alistalh xla wanilh: «¿Tuku xlakata wana pi kimpaxkiya akxni ni kilipawana? Makgtututa kiʼakgskgawi chu ni kiwaniya niku tiyaya militliwakga». 16 Xlakata xla lu xmakglhuwi chu chali chali chuna xtlawa, xla lu tlakgwalh chu asta xniputun. 17 Wa xlakata lipawa chu wanilh: «Nikxni kinchukunikanit kinchixit, xlakata Nazareo klitaxtu lata akxni klakachinit.* Komo nachukukan kinchixit, nialh ktikgalhilh litliwakga chu naklatama chuna la amakgapitsi lakchixkuwin».

18 Akxni Dalila akxilhli pi Sansón xwaninit tuku xaxlikana, tunkun kamatasaninalh xmapakgsinanin filisteos: «Katantit,* xlakata la uku kiwaninit tuku xaxlikana». Chu xmapakgsinanin filisteos linkgolh tumin anta niku xwi Dalila. 19 Akxni xtlawanita pi Sansón klhtatalh kxtsokgosni, Dalila tasanilh chatum chixku xlakata xchukunilh kgantujun xtakgonkgxni. Chu xla tsukulh makgatlaja xlakata nialh xkgalhi xlitliwakga. 20 Dalila pixlanka wanipa «¡Sansón, unu wilakgolh filisteos!». Xla stakwanalh chu wa: «Naklakgtaxtunipara uma chuna la ktlawanita». Pero ni xkatsi pi Jehová nialh xmakgtayama. 21 Wa xlakata filisteos chipakgolh, tamakxtunikgolh xlakgastapu chu linkgolh kʼGaza. Anta limakachika likan nema xlitatlawanit cobre chu kpulachin tsukuka mamakgalhstilinikan xchiwix molino. 22 Pero maski xchukunikanita xchixit, tsukupa stakni.

23 Xmapakgsinanin filisteos tamakxtumikgolh xlakata natlawanikgo tamakamastan xdioskan Dagón chu xlakata nalipaxuwakgo pi tlajanankgolh. Xwankgo: «¡Kidioskan kinkamakamaxkinitan Sansón, kintalatlawanakan!». 24 Akxni kachikin akxilhkgolh,* tsukukgolh malankikgo xdioskan. Xwankgo: «Kidioskan kinkamakamaxkinitan kintalatlawanakan, tiku tlawalh tuku nitlan kkinkachikinkan chu tiku lhuwa kamakgnilh kintachikikan».

25 Xlakata lu xpaxuwamakgo, wankgolh: «Kalitantit* Sansón xlakata nalikgalhkgamananaw». Wa xlakata tamakxtukgolh kpulachin Sansón xlakata xlikgalhkgamanankgolh. Yawaka kxlakʼitat kgantiy talayaw. 26 Sansón wanilh kgawasa tiku xmakgachipalin: «Kakimaxki talakaskin nakxama talayaw nema liya uma chiki xlakata naklitaya». 27 (Chiki xlitsamakgo lakchixkuwin chu lakpuskatin. Putum xmapakgsinanin filisteos na anta xwilakgolh. Xʼakgstin chiki xwilakgo akgtutu mil lakchixkuwin chu lakpuskatin tiku xlikgalhkgamanamakgolh Sansón).

28 Sansón tasaskinilh Jehová: «Malana Jehová Tiku lakgchan namapakgsinan, katlawa litlan, kakilakapastakti. Oh, Dios, katlawa litlan, maski kaj makgtum kakimaxkipara litliwakga. Kakimaxki talakaskin nakkalimalakgaxokge filisteos maski kaj akgtum kilakgastapu.

29 Alistalh Sansón limakgachipaxnalh kgantiy talayaw nema xliyakgo xlakʼitat chiki. Kxpakgastakat lichipalh kgantum talayaw chu kxpakgaxwiki lichipalh atanu talayaw. 30 Sansón pixlanka wa: «¡Akxtum kakkatanilh filisteos!». Alistalh xliputum xlitliwakga katokglhli talayaw chu chiki kaʼaktamalh mapakgsinanin chu putum latamanin tiku xwilakgolh anta. Tlakg lhuwa tiku kamakgnilh Sansón akxni nilh nixawa akxni xlamajku.

31 Alistalh, xnatalan chu putum xfamilia xtlat ankgolh putsakgo xmakni. Malakakxtukgolh chu maknukgolh* kxlakʼitat Zorá chu Estaol, kxputaknun Manóah, xtlat. Sansón Juez litaxtulh kʼIsrael akgpuxam kata.

17 Kxkasipijni Efraín xwi chatum chixku tiku xwanikan Miqueas. 2 Xla wanilh xtse: «¿Lakapastaka 1,100 tumin xla plata nema makglhtikanti? ¿Chu lakapastaka pi wanti pi xʼakgspulalh tuku nitlan tiku xkgalhanit? Kaʼakxilhti, akit kkgalhi. Akit ktiyalh uma plata». Akxni xtse kgaxmatli uma, wa: «Jehová kasikulunatlawalh kinkgawasa». 3 Xla maspitnipa xtse 1,100 tumin xla plata. Pero xla wanilh: «Uma tumin xla plata nakmakamaxki* Jehová. Klakaskin pi kamaklakaskinti uma xlakata natlawaya akgtiy tatlawamakgxtu, akgtum xatalhpitni chu akgtum xalikan nema mastalankkikanit. Wa xlakata, la uku uma plata mila».

4 Akxni xla maspitnilh xplata xtse, xla alakatanu wililh akgtiy ciento tumin xla plata chu maxkilh tiku xliskuja plata, tiku tlawalh akgtum xatalhpitni tatlawamakgxtu chu akgtum tatlawamakgxtu xalikan nema xmastalankkikanit. Chu kawilika kxchik Miqueas. 5 Uma chixku, Miqueas, xkgalhi akgtum chiki niku xkakakninani xtatlawamakgxtu. Tlawalh akgtum efod* chu amakgapitsi tatlawamakgxtu,* chu lakgayawalh chatum xkgawasa xlakata ksacerdote xlitaxtulh. 6 Amacha kilhtamaku ni xʼanan mapakgsina kʼIsrael. Chatunu chatunu xtlawa tuku tlan xʼakxilha.

7 Ama kilhtamaku, xwi chatum kgawasa tiku xalak Belén xwanit, kachikin nema wi kJudá, chu xminacha kxfamilia Judá.* Chatum levita xlitaxtu tiku kaj ni makgas xlatamanit anta. 8 Uma chixku taxtucha kBelén xalak Judá xlakata xputsama niku tlan xlatamalh. Chuna la xtlawantilhama chalh kxkasipijni Efraín, kxchik Miqueas. 9 Chu Miqueas kgalhskilh: «¿Niku xala wix?». Xla kgalhtilh: «Akit chatum levita chu kminacha kBelén xalak Judá. Kputsama niku tlan naklatama». 10 Alistalh Miqueas wanilh: «Unu kakintatamakgxtakgti xlakata kintlat* chu kisacerdote nakilitaxtuniya. Nakmaxkiyan akgkaw tumin xla plata akgatunu kata, maktum xaputuminika lhakgat nema namaklakaskina chu liwat». Chu levita tanulh kxchik. 11 Chuna, kgawasa tiku levita xwanit litayanilh natatamakgxtakga Miqueas, chu litaxtulh la chatum xkgawasa Miqueas. 12 Nachuna, Miqueas ksacerdote limaxtulh levita, chu xla tamakgxtakgli kxchik. 13 Alistalh Miqueas wa: «La uku kkatsi pi Jehová tlan nakilikatsini, xlakata levita kisacerdote».

18 Amacha kilhtamaku ni xʼanan chatum mapakgsina kʼIsrael. Chu xtribujkan danitas xputsamakgolh anta* niku tlan xlatamakgolh, xlakata amacha kilhtamaku nina xmakgamakglhtinankgo tiyat nema xkatapakgsinilh kxlakgstipan xtribus Israel.

2 Danitas kamalakgachakgolh kgalhkitsis lakchixkuwin xalak xtribujkan, lakchixkuwin tiku lakgtliwakgan xwankgonit xalak Zorá chu Estaol, kamalakgachakgolh xlakata naskgalakgo chu nalakgatsalakgo tiyat. Kawanikgolh: «Kapitit, kalakgatsalatit tiyat». Akxni xlakan chankgolh kxkasipijni Efraín, kxchik Miqueas, anta tamakgxtakgkgolh ama katsisni. 3 Akxni xwilakgolh lakatsu kxchik Miqueas, kgalhlakgapaskgolh kgawasa tiku levita xwanit, wa xlakata ankgolh chu kgalhskinkgolh: «¿Tiku limin unu? ¿Tuku tlawapat unu? ¿Tuku xlakata tamakgxtakgnita?». 4 Kgawasa tsukulh kawani tuku Miqueas xtlawanit xpalakata chu wampa: «Kilakgayawalh xlakata ksacerdote xaklitaxtulh». 5 Wa xlakata wanikgolh: «Katlawa litlan, kakgalhskinti Dios komo tlan nakitaxtu tuku kamaw tlawayaw». 6 Sacerdote kawanilh: «Tlan kapitit. Jehová nakamakgtayayan xlakata tlan nakitaxtu tuku pimpatit tlawayatit».

7 Wa xlakata kgalhkitsis lakchixkuwin chuntiya ankgolh chu chankgolh kLais. Akxilhkgolh pi latamanin xala anta ni xmaklakaskinkgo xtamakgtaykan amakgapitsin, chuna la sidonios. Xkgalhikgo takaksni chu nitu xlilakgaputsakgo, ni xʼanan tiku tlan xʼakgchipalh xkachikinkan, tiku nitlan xkalikatsinilh chu xkamakglhuwilh. Makgat xkawilanikgolh sidonios chu ni akxtum xkatalakgo amakgapitsi kachikinin.

8 Akxni xlakan taspitkgolh niku xwilakgolh xnatalankan, kZorá chu kʼEstaol, xlakan kakgalhskinkgolh: «¿La kakitaxtunin?». 9 Xlakan kgalhtinankgolh: «Kaʼaw, kakatalachipaw umakgolh latamanin, xlakata kakxilhnitaw pi tiyat lu stlan. ¿Tuku xlakata pekuanatit? Ni kamakgatsankgaw kilhtamaku. Kapitit chu kaʼakgchipatit. 10 Akxni nachipinatit, nakaʼakxilhatit pi xlakan nitu lilakgaputsakgo chu tiyat kalakgtilanka. Dios kamakamaxkinitan tiyat niku nitu tsankga».

11 Alistalh, akgchaxan ciento lakchixkuwin xalak xfamilia Dan taxtukgolh kZorá chu kʼEstaol. Chu xlinkgo tuku tlan xlitlawakgolh guerra. 12 Talakakxtukgolh kJudá chu tamakgxtakgkgolh lakatsu kQuiryat-Jearim. Wa xlakata, uma tiyat nema wi kxʼoeste Quiryat-Jearim, wanikan Mahané-Dan* asta la uku. 13 Lata anta ankgolh kxkasipijni Efraín chu chankgolh kxchik Miqueas.

14 Alistalh kgalhkitsis lakchixkuwin tiku kiskgalakgolh xtiyat Lais, kawanikgolh xnatalankan: «¿Katsiyatit pi kʼumakgolh chiki wilakgolh akgtum efod,* amakgapitsi tatlawamakgxtu,* akgtum xatalhpitni tatlawamakgxtu chu akgtum tatlawamakgxtu xalikan nema mastalankkikanit? Kalaksaktit tuku natlawayatit». 15 Wa xlakata tamakgxtakgkgolh anta chu kgalhkitsis lakchixkuwin ankgolh kxchik kgawasa tiku levita xwanit, lakatsu kxchik Miqueas chu kgalhskinkgolh la xwi. 16 Pero akgchaxan ciento lakchixkuwin xalak xtribu Dan, tiku xlinkgo tuku litlawakan guerra, tamakgxtakgkgolh niku xlaktanukan. 17 Kgalhkitsis lakchixkuwin tiku xkiskgalakgonit tiyat, tanukgolh xlakata nalinkgo xatalhpitni tatlawamakgxtu, efod, amakgapitsi tatlawamakgxtu chu tatlawamakgxtu xalikan nema xmastalankkikanit. (Sacerdote xkatalaya akgchaxan ciento lakchixkuwin tiku xlinkgo tuku litlawakan guerra anta niku xlaktanukan). 18 Tanukgolh kxchik Miqueas chu linkgolh xatalhpitni tatlawamakgxtu, efod, amakgapitsi tatlawamakgxtu chu tatlawamakgxtu xalikan nema xmastalankkikanit. Chu sacerdote kakgalhskilh: «¿Tuku tlawapatit?». 19 Pero xlakan kgalhtikgolh: «¡Katakilhkaksti! Nitu kawanti.* Katat xlakata kintlatkan* chu kisacerdotejkan nakilalitaxtuniyaw. ¿Tuku tlakg tlan mimpalakata? ¿Sacerdote nalitaxtuya kxchik kaj chatum chixku, o sacerdote nakalitaxtuniya akgtum tribu xalak xfamilia Israel?». 20 Uma tlan akxilhli sacerdote; wa xlakata, katiyalh efod, amakgapitsi tatlawamakgxtu, xatalhpitni tatlawamakgxtu chu akxtum kataʼalh.

21 Alistalh chuntiya ankgolh niku xʼamakgolh, kxlakatinkan kawilikgolh laktsu kamanan, xʼanimaleskan chu tuku xtapalh xkgalhikgo. 22 Akxni danitas xtamakgatlikgonita kxchik Miqueas, xtalakatsunin Miqueas tamakxtumikgolh chu kastalanikgolh. Alistalh kamataxtukkgolh. 23 Akxni pixlanka kalakgkilhankgolh danitas, xlakan talakgaspitkgolh chu kgalhskinkgolh Miqueas: «¿Tuku akgspulaman? ¿Tuku xlakata kamamakxtuminita umakgolh latamanin?». 24 Xla kakgalhtilh: «Wixin kimakglhtinitantit dioses nema kkatlawalh, nachuna lipinitantit kisacerdote. ¿Tuku kintamakgxtakgni? ¿Tuku xlakata kilakgalhskinaw tuku kiʼakgspulama?». 25 Danitas kgalhtikgolh: «Ni pixlanka kakilatachuwinaw, komo chuntiya chuna xtlawa makgapitsi xalaksitsin lakchixkuwin nakatlawanikgoyan tuku nitlan chu asta nakamakgnikgoyan wix chu putum tiku xalak minchik». 26 Alistalh danitas chuntiya ankgolh niku xʼamakgolh. Chu akxni Miqueas akxilhli pi xlakan lu lakgtliwakgan xwankgonit nixawa xla, taspitli kxchik.

27 Akxni linkgolh tuku Miqueas xtlawanit chu nachuna ksacerdote, ankgolh kLais, niku latamanin xkgalhikgo takaksni chu nitu xlilakgaputsakgo. Kalimakgnikgolh espada putum latamanin chu lhkuyuwilikgolh kachikin. 28 Ni analh tiku tlan xlakgmaxtulh kachikin, xlakata Sidón makgat xwi (kxakaxtum nema xtapakgsini Bet-Rehob) chu latamanin xala anta ni akxtum xkatalakgo tiku xalak atanu kachikin. Alistalh danitas kaxtlawaparakgolh kachikin chu anta latamakgolh. 29 Nachuna, wilinikgolh uma kachikin xtukuwani xtlatkan, Dan, tiku xkgawasa Israel xwanit, maski xapulana uma kachikin xwanikan Lais. 30 Alistalh, danitas anta wilikgolh xatalhpitni tatlawamakgxtu. Chu Jonatán, xkgawasa Guersom, xkgawasa Moisés, chu xkamanan sacerdotes litaxtunikgolh xtribu Dan asta akxni latamanin xalak ama kachikin kachilinka. 31 Chu anta wilikgolh xatalhpitni tatlawamakgxtu nema Miqueas xtlawanit. Uma tatlawamakgxtu chuntiya anta tawi putum kilhtamaku akxni xchik xaxlikana Dios tawi kSiló.

19 Amacha kilhtamaku, akxni ni xʼanan chatum mapakgsina kʼIsrael, chatum levita tiku kalakgamakgat xlama kxkasipijni Efraín, laksakli atanu puskat* tiku xalak Belén xwanit nema wi kJudá xlakata xpuskat xlitaxtulh. 2 Pero uma xpuskat akgskgawilh. Makgxtakgli chu alh kxchik xtlat kBelén xalak Judá, chu akgtati papaʼ anta tamakgxtakgli. 3 Alistalh, xchixku alh putsa xlakata natataspitpara (akxtum xtaʼan kskujni chu tantiy xburros). Xla manulh kxchik xtlat, chu xtlat lu lipaxuwalh akxni akxilhli. 4 Wa xlakata xputiatlat, xtlat tsumat, makgpuwantinilh xlakata anta xtamakgxtakgli akgtutu kilhtamaku. Wayankgolh chu kgotnankgolh, chu levita anta tamakgxtakgli makgapitsi tsisni.

5 Xliʼakgtati kilhtamaku, akxni tsisa takikgolh xlakata xʼankgolh, xtlat tsumat wanilh xpuwiti:* «Wi tuku kawat xlakata nakgalhiya litliwakga, chu alistalh napinatit». 6 Wa xlakata akxtum tawilakgolh chu xchatiykan wayankgolh chu akxtum kgotnankgolh. Alistalh, xtlat tsumat wanilh chixku: «Katlawa litlan, katamakgxtakgpara uma katsisni chu kalipaxuwa».* 7 Akxni uma chixku takilh xlakata xʼalh, xputiatlat makglhuwa wanilh pi xtamakgxtakgli, chu xla amakgtum lhtatapa anta.

8 Xliʼakgkitsis kilhtamaku, akxni sokg takilh xlakata xʼalh, xtlat uma tsumat wanilh: «Katlawa litlan, wi tuku kawat xlakata nakgalhiya litliwakga». Xchatiykan chuntiya wayankgolh chu makgapalakgolh asta akxni kgotanulh. 9 Akxni uma chixku tayalh xlakata nataʼan xpuskat chu kskujni, xtlat uma tsumat, wanilh: «Kaʼakxilhti, tsiswamaja. Katlawa litlan, unu kalhtatatit. Sputmaja uma kilhtamaku. Unu kalhtata, chu kalipaxuwa. Chali tlan sokg natakiyatit xlakata napinatit chu nataspita kminchik».* 10 Pero uma chixku nialh tamakgxtakgputulh anta ama katsisni. Wa xlakata tayalh chu alh asta kJebús, uma kilhchanima, Jerusalén. Xkalin tantiy xburros, xpuskat chu kskujni.

11 Akxni lakatsu xtitaxtumakgolh kJebús, xtsiswamaja. Wa xlakata skujni wanilh xmalana: «Katanuw kʼuma xkachikinkan jebuseos chu anta kalhtataw». 12 Pero xmalana kgalhtilh: «Ni kilitanutkan kʼakgtum kachikin niku wilakgolh tiku ni israelitas. Chuntiya natlawanaw asta kʼGuibeá».* 13 Wa xlakata wanilh kskujni: «Kaʼaw, kachaw kʼGuibeá o kRamá. Komo nachanaw kʼakgtum umakgolh kachikinin anta nalhtatayaw». 14 Wa xlakata chuntiya tlawankgolh chu chichini xtsankgamaja akxni xtalakatsuwimakgo kʼGuibeá, nema tapakgsini Benjamín.

15 Wa xlakata akxni xchankgonita kʼGuibeá, tanukgolh xlakata anta nalhtatakgo. Akxni xtanumakgolh kʼuma kachikin, tawilakgolh kplaza, pero niti kawanilh pi xtamakgxtakgkgolh kxchikkan. 16 Pero uma katsisni, chilh chatum kgolotsin tiku xkitaspitma kxkapukuxtun niku kiskujli. Xalak xkasipijni Efraín xwanit chu kaj tsinu kilhtamaku xlama kʼGuibeá. Pero latamanin xalak uma kachikin benjaminitas xwankgonit. 17 Akxni kgolotsin talakayawalh, chu akxilhli levita kplaza xalak kachikin, kgalhskilh: «¿Niku pimpat? ¿Niku xala wix?». 18 Xla kgalhtilh: «Kminachaw kBelén xalak Judá chu kamaw niku xala akit, kxaʼalakgamakgat kxkasipijni Efraín, kkilalh kBelén xalak Judá chu la uku kkama kxchik Jehová,* pero unu niti kiwaninit pi kaktamakgxtakgli kxchik. 19 Kkgalhiyaw tuku nawakgo kiburroskan, nachuna kkgalhiyaw kaxtalanchu chu vino, tuku nakwa akit, puskat chu kiskujnikan. Nitu kinkatsankganiyan». 20 «¡Tlan chitanita!,* wanilh kgolotsin. Akit nakmaxkiyan tuku nakitsankganiyan. Pero ni kalhtata unu kplaza». 21 Wa xlakata lilh kxchik ama chixku chu kamawilh xburros. Xlakan tuchakgankgolh chu tsukukgolh wayankgo chu kgotnankgo.

22 Akxni xlakan lu xpaxuwamakgolh, makgapitsi lakchixkuwin xalak kachikin tiku lixkajni xlikatsikgo makgstiliwilikgolh chiki chu tliwakga tsukukgolh lakgatlakgkgo malakcha. Chu xwanikgo kgolotsin, xmalana chiki: «¡Katamakxtu chixku tiku tanulh kminchik xlakata naktatalakgxtumiyaw!». 23 Xmalana chiki taxtulh chu kawanilh: «Ni, kinatalan, katlawatit litlan, ni katlawatit tuku lu lixkajni. Uma chixku tamakgxtakgma kkinchik. Ni katlawatit tuku lu limaxana. 24 Unu wi kintsumat, tiku nina tatalakgxtumi chatum chixku chu xpuskat uma chixku. Nakkatamakxtu chu chuna tlan nakamamaxaniyatit komo chuna lakaskinatit. Pero ni kamamaxanitit uma chixku».

25 Lakchixkuwin ni kuenta tlawanikgolh. Wa xlakata, levita tiyalh xpuskat, tamakxtulh chu kamakamaxkilh lakchixkuwin. Tantaskaka likgamanankgolh chu mamaxanikgolh. Akxni kxkgakgamaja makgxtakgkgolh. 26 Tsisa, puskat chalh kxchik kgolotsin, niku xwi xchixku, anta lhkgen tamacha niku xlaktanukan chu anta tamalh asta akxni xkgakgakgolh. 27 Akxni xchixku tsisa takilh, chu malakkilh xmalakcha chiki xlakata chuntiya naʼankgo niku xʼamakgolh, akxilhli xpuskat, pi anta xma chu xmakan xwilinit niku xlaktanukan. 28 Xla wanilh: «Kataki, kaʼaw». Pero xla ni kgalhtilh. Wa xlakata chixku mawakalh kxburro chu alh kxchik.

29 Akxni chalh kxchik, putsalh akgtum cuchillo, tiyalh xanin xpuskat chu akgkutiy laktsu laktsu tlawalh. Alistalh malakgachalh kʼakgatunu tribus xalak Israel kgalhtum* xliwa xanin xpuskat. 30 Putum tiku akxilhkgolh uma wankgolh: «Nikxni xakakxilhnitaw xtachuna la uma lata akxni israelitas taxtukgocha kʼEgipto. Liwana kalakputsananitit uma, kalichuwinantit chu kakilawaniw tuku naktlawayaw».

20 Wa xlakata taxtukgolh putum lakchixkuwin xalak Israel, tiku xwilakgolh ktiyat lata kDan asta kBeer-Seba chu tiku xwilakgolh ktiyat xalak Galaad. Chu putum kachikin* lakkaxwilikgolh natamakxtumikgo* kxlakatin Jehová kMizpá. 2 Xnapuxkun kachikin chu putum xtribus Israel takaxtawilakgolh niku xtamakxtuminit xkachikin Dios. Xlitakgatsikgo akgtati ciento mil soldados tiku xkgalhikgo xʼespadajkan.

3 (Benjaminitas katsikgolh pi lakchixkuwin xalak Israel xtalakakxtukgonit kMizpá).

Wa xlakata lakchixkuwin xalak Israel wankgolh: «Kakilawaniw, ¿la lalh uma tuku lu nitlan chu lu lixkajni?». 4 Chu levita, xchixku puskat tiku makgnika, kgalhtinalh: «Ktachalh kimpuskat kʼGuibeá xalak Benjamín xlakata anta naklhtatayaw. 5 Chu latamanin* xalak Guibeá kilakgminkgolh katsisni chu makgstiliwilikgolh chiki. Xkimakgniputunkgo, pero likgamanankgolh kimpuskat. Chu xla nilh. 6 Wa xlakata laktsu laktsu ktlawalh xmakni kimpuskat, chu kmalakgachalh kgalhatunu* xliwa kʼakgatunu tribus xalak Israel, xlakata kʼIsrael xtlawakanit tuku lu nitlan chu lu limaxana. 7 La uku, putum wixin, kachikin xalak Israel, kawantit tuku lakpuwanatit chu tuku natlawayatit».

8 Wa xlakata, putum kachikin* tayakgolh chu wankgolh: «Nipara chatum katitaspitli kxchik. 9 Wa uma tuku natlawayaw: lhkgen nakamakanaw laktsu chiwix* xlakata nakatsiyaw tiku naʼan katalatlawa latamanin xalak Guibeá; 10 xliputum tribus xalak Israel, lata akgtum ciento lakchixkuwin nakalaksakaw kgalhakaw, lata akgtum mil nakalaksakaw akgtum ciento, chu lata akgkaw mil nakalaksakaw akgtum mil xlakata nakaputsanikgo liwat soldados; chuna, soldados tlan nakatalakkaxlakgo Guibeá xalak Benjamín xlakata tuku nitlan chu xalimaxana tlawakgolh kʼIsrael». 11 Wa xlakata putum lakchixkuwin xalak Israel makxtum lakgolh* xlakata natalatlawakgo kachikin.

12 Xtribus Israel malakgachakgolh makatsininanin xlakata nakawanikgo lakchixkuwin xalak xtribu Benjamín: «¿Tuku xlakata lalh tuku lu nitlan chu lixkajni kmilakgstipankan? 13 La uku kakamakamastatit umakgolh lakchixkuwin tiku ni kaliʼakxilhputu xalak Guibeá xlakata nakkamakgniyaw chu nakmapanuyaw tuku lixkajni kʼIsrael». Pero benjaminitas ni kakgalhakgaxmatkgolh amakgapitsin israelitas.

14 Alistalh benjaminitas taxtukgolh kxkachikinkan xlakata natamakxtumikgo kʼGuibeá chu nakatalachipakgo lakchixkuwin xalak Israel. 15 Amacha kilhtamaku, benjaminitas kamamakxtumikgolh kxkachikinkan 26,000 lakchixkuwin tiku xkgalhikgo xʼespadajkan, nachuna akgtujun ciento soldados tiku xkatsinikgo tlawakgo guerra xalak Guibeá. 16 Xliputum umakgolh latamanin xwilakgolh akgtujun ciento tlakg xalaktlan soldados, putum xlakan pakgxwiki xwankgonit. Chatunu chatunu lu makastujwa xwankgonit, tlan xlimakgosokgo akgtum chiwix xlixkgontalatnikan chu xtalakgo kgantum chixit.

17 Lakchixkuwin xalak Israel, kamamakxtumikgolh akgtati ciento mil lakchixkuwin tiku xkgalhikgo xʼespadajkan: putum xlakan lu xkatsinikgo tlawakgo guerra, pero ni kataputlekgeka benjaminitas. 18 Ankgolh chu talakakxtukgolh kBetel xlakata nakgalhskinkgo Dios. Kachikin xalak Israel kgalhskilh: «¿Tiku lakatin naʼan xlakata nakatalatlawa benjaminitas?». Jehová kakgalhtilh: «Judá lakatin naʼan».

19 Alistalh, israelitas tsisa takikgolh chu tamakgxtakgkgolh xlakata natalatlawakgo latamanin xalak Guibeá.

20 Lakchixkuwin xalak Israel taxtukgolh xlakata nakatalatlawakgo benjaminitas; tistum tayakgolh xlakata natalatlawanankgo kxlakatin Guibeá. 21 Amacha kilhtamaku, benjaminitas taxtukgolh kʼGuibeá chu kamakgnikgolh 22,000 israelitas. 22 Pero lakchixkuwin xalak Israel ni pekuankgolh chu tistum tayaparakgolh xlakata natalatlawanankgo chuna la xapulana. 23 Israelitas talakakxtukgolh kBetel chu tasakgolh kxlakatin Jehová asta akxni tsiswalh chu kgalhskinkgolh Jehová: «¿Amakgtum kamparayaw katalatlawayaw kinatalankan, benjaminitas? Chu Jehová kakgalhtilh: «Kapitit».

24 Xliʼakgtiy kilhtamaku, israelitas katalakatsuwinikgolh benjaminitas. 25 Pero lakchixkuwin xalak Benjamín taxtukgolh xliʼakgtiy kilhtamaku xlakata nakatatanokglhkgo lata kʼGuibeá chu kamakgnikgolh atanu 18,000 israelitas, putum xlakan xlinkgo xʼespadajkan. 26 Alistalh, putum lakchixkuwin xalak Israel talakakxtukgolh kBetel niku tasakgolh chu tawilakgolh kxlakatin Jehová. Uma kilhtamaku kgalhxtakgnankgolh asta akxni tsiswalh chu makamastakgolh kxlakatin Jehová xalhkun tamakamastan chu tamakamastan xla takaksni. 27 Alistalh, israelitas kgalhskimparakgolh Jehová, xlakata amacha kilhtamaku, arca xla talakkaxlan nema tapakgsini xaxlikana Dios anta xwi. 28 (Finehás, xkgawasa Eleazar, xkgawasa Aarón, kskuja kxlakatin Arca amacha kilhtamaku). Xlakan kgalhskininankgolh: «¿Xlilat nakamparayaw katalatlawayaw kinatalankan, benjaminitas o chuna kmakgxtakgaw?». Jehová kakgalhtilh: «Kapitit, xlakata chali nakkamakamaxkiyan». 29 Alistalh Israel lakkaxwilikgolh nakalipataxtukgo kxlimakgstilili Guibeá.

30 Xliʼakgtutu kilhtamaku, israelitas talakakxtuparakgolh xlakata nakatalatlawakgo benjaminitas. Xlakata nakatalatlawakgo tiku xalak Guibeá chuna la xtlawakgonit xapulana. 31 Akxni benjaminitas taxtukgolh xlakata nakatatanokglhkgo israelitas, israelitas tlawakgolh pi xtamakgatlinikgolh kachikin. Alistalh chuna la xapulana, benjaminitas tsukukgolh katalatlawakgo chu kamakgnikgolh makgapitsi lakchixkuwin kxakatilanka katijinin (kgantum xʼan kBetel chu atanu kʼGuibeá). Kamakgnikgolh puxamakaw israelitas kkapukuxtun. 32 Benjaminitas xwankgo: «Kamakgatlajamaw chuna la xapulana». Pero israelitas xwankgo: «Nakaʼakgskgawiyaw komo natsalayaw chu nakamamakgatliyaw kkachikin xlakata naʼankgo kxakatilanka katijinin». 33 Pero putum lakchixkuwin xalak Israel taxtukgolh niku xyakgolh chu tistum tayakgolh xlakata natalatlawanankgo kBaal-Tamar. Nachuna, israelitas tiku xwilakgolh lakatsu kʼGuibeá xlakata nakalipataxtukgo, taxtukgolh niku xtatsekgkgonit chu talatlawanankgolh. 34 Chuna, akgkaw mil tlakg xalaktlan soldados xliputum Israel chankgolh kxlakatin Guibeá, chu lu lilakgaputsa tawi tatalachipat. Pero benjaminitas ni xʼakxilhkgo pi xkalakgmima tuku lu nitlan.

35 Jehová makgatlajalh Benjamín kxlakatin Israel. Ama kilhtamaku israelitas kamakgnikgolh 25,100 lakchixkuwin xalak Benjamín, putum xlakan xkgalhikgo xʼespadajkan.

36 Akxni benjaminitas akxilhkgolh pi lakchixkuwin xalak Israel xtapanumakgolh, lakpuwankgolh pi xʼamakgolh kamakgatlajakgo. Pero israelitas tapanukgolh xlakata xlipawankgo tuku xlakkaxwilikgonit, nalipataxtukgo Guibeá. 37 Soldados tiku tsekg xwilakgo xlakata nalipataxtunankgo, lakapala tanukgolh kʼGuibeá. Talakgatumikgolh chu kalimakgnikgolh espada latamanin xalak kachikin.

38 Lakchixkuwin xalak Israel xlakkaxwilikgonit pi soldados tiku xʼamakgo lipataxtunankgo xʼamakgo limasiyakgo jini pi anta xwilakgolha kkachikin.

39 Akxni israelitas tapanukgolh niku xlatalatlawamaka, lakchixkuwin xalak Benjamín tsukukgolh katalatlawakgo chu kamakgnikgolh puxamakaw lakchixkuwin xalak Israel. Xlawanikgo: «Xlikana pi kamakgatlajamaw, chuna la xapulana». 40 Pero jini tsukulh takxtu lata kkachikin. Wa tuku xkalimasiyanimaka. Akxni lakchixkuwin xalak Benjamín talakgaspitkgolh, akxilhkgolh pi kachikin klhkuma chu pi lhkuyat xtakxtuma kʼakgapun. 41 Ama kilhtamaku, lakchixkuwin xalak Israel talakgspitkgolh chu benjaminitas lu pekuankgolh akxni akxilhkgolh tuku nitlan kalakgchilh. 42 Wa xlakata katsalanikgolh israelitas kxakaskakni tiyat, pero nila xtsalanikgo tatalachipat. Nachuna, lakchixkuwin tiku xtaxtumakgolh kkachikinin na xkamakgnitilhamaka. 43 Kamakgstiliwilikgolh benjaminitas chu kaputsastalanikgolh. Kamakgatlajakgolh kxʼeste Guibeá. 44 Nikgolh 18,000 lakchixkuwin xalak Benjamín. Putum xlakan xalakgtliwakgan soldados xwankgonit.

45 Lakchixkuwin xalak Benjamín talakgspitkgolh chu tsalakgolh kxakaskakni tiyat, ksipi xla Rimón. Chu israelitas kamakgnikgolh* akgkitsis mil benjaminitas kxakatilanka katijinin. Kaputsastalanikgolh asta kʼGuidom; chuna kamakgniparakgolh akgtiy mil lakchixkuwin. 46 Amacha kilhtamaku, nikgolh 25,000 benjaminitas tiku xlinkgo xʼespadajkan. Xputumkan lakgtliwakgan soldados xlitaxtukgo. 47 Pero akgchaxan ciento lakchixkuwin ankgolh kxakaskakni tiyat, ksipi xla Rimón. Anta tamakgxtakgkgolh akgtati papaʼ.

48 Chu lakchixkuwin xalak Israel kalakgtaspitkgolh benjaminitas chu kalimakgnikgolh espada putum tiku xwilakgolh kkachikin, lakchixkuwin chu animales, putum tiku ni xkamakgnikanit. Nachuna, kalhkuyuwilikgolh putum kachikinin nema katekgskgolh.

21 Lakchixkuwin xalak Israel xmalaknukgonit anta kMizpá: «Nipara chatum akinin, natamamakgaxtokga xtsumat chatum chixku xalak Benjamín». 2 Wa xlakata kachikin alh kBetel chu anta tawilakgolh kxlakatin xaxlikana Dios, pixlanka xtasamakgo asta akxni tsiswalh. 3 Chu xwankgo: «Oh, Jehová, xDios Israel, ¿tuku xlakata lanit uma kʼIsrael? ¿Tuku xlakata la uku kitsankga akgtum tribu kʼIsrael?». 4 Lichali, kachikin tsisa takilh chu tlawalh anta akgtum pumakamastan xlakata xmakamastakgolh xalhkun tamakamastan chu tamakamastan xla takaksni.

5 Alistalh Israelitas wankgolh: «Xliputum tribus xalak Israel, ¿tiku ni akxtum kinkataʼan akxni tamakxtumiw kxlakatin Jehová?». Xlakata xtlawakgonit akgtum xasanto tamalaknun, pi putum tiku ni akxtum xkataʼalh kMizpá xlakata xtamakxtumikgolh kxlakatin Jehová, xʼama niy. 6 Israelitas nitlan limakgkatsikgolh xlakata tuku xʼakgspulanit xtalakan Benjamín. Xlawanikgo: «La uku masputukanit akgtum tribu kʼIsrael. 7 ¿Niku nakatekgsaw tiku xpuskatkan nakalitaxtunikgo benjaminitas tiku akgataxtukgonit? Akinin kmalaknuw kxtukuwani Jehová pi ni xʼamaw katamamakgaxtokgaw kilaktsumankan».

8 Chu kgalhskininankgolh: «Xliputum tribus xalak Israel, ¿tiku ni alh kxlakatin Jehová kMizpá?». Chu katsika pi akxni putum xtamakxtumikgonit, niti xʼanit xalak Jabés-Galaad. 9 Xlakata akxni kaputlekgeka latamanin, akxilhkgolh pi ni xtamakxtuminit nipara chatum tiku xalak Jabés-Galaad. 10 Wa xlakata kachikin* kamalakgachalh 12,000 tiku tlakg xalakgtliwakga soldados chu kalimapakgsikgolh: «Kapitit chu kakalimakgnitit espada putum tiku wilakgolh kJabés-Galaad, asta lakpuskatin chu laktsu kamanan. 11 Wa uma tuku militlawatkan: nakamakgniyatit putum lakchixkuwin, chu nachuna putum lakpuskatin tiku tatalakgxtumikgonit chatum chixku». 12 Chu kxlakgstipankan latamanin xalak Jabés-Galaad katekgskgolh akgtati ciento laktsuman, tiku nina xtatalakgxtumikgonit chatum chixku. Wa xlakata kalinka anta niku xwilakgo kSiló, kxtiyat Canaán.

13 Alistalh, kachikin kamalakgachanilh akgtum tamakatsin benjaminitas niku xwilakgolh ksipi xla Rimón chu kawanikgolh pi nialh xʼama katakgalhikgo taʼakglhuwit. 14 Wa xlakata lakchixkuwin xalak Benjamín taspitkgolh, chu israelitas kamaxkikgolh lakpuskatin xalak Jabés-Galaad tiku ni xkamakgnikgonit. Pero ni putum katekgsnikgolh xlakpuskatinkan. 15 Chu kachikin nitlan limakgkatsikgolh tuku xʼakgspulanit xtribu Benjamín, xlakata Jehová xtlawanit pi xʼanalh tapapitsit kxtribus Israel. 16 Lakgkgolotsin xalak Israel kgalhskininankgolh: «¿Niku nakatekgsniyaw xlakpuskatinkan lakchixkuwin tiku ni kgalhikgo? Xlakata lakpuskatin xalak Benjamín kamakgnika». 17 Kakgalhtika: «Tiku ni kamakgnika xalak xtribu Benjamín talakaskin chuntiya nakgalhikgo tiyat nema katapakgsini xlakata ni nalakgsputa akgtum tribu kʼIsrael. 18 Pero akinin ni kgalhiyaw talakaskin nakkatamamakgaxtokgaw kilaktsumankan benjaminitas, xlakata Israel malaknulh: “Kaʼakgspulalh tuku nitlan tiku namaxki chatum puskat lakchixkuwin xalak Benjamín”».

19 Wa xlakata wankgolh: «¡Kakgaxpattit! Akgatunu kata tlawanikan akgtum paskua Jehová kSiló, nema wi kxnorte Betel, kxʼeste kxakatilanka tiji nema takxtu lata kBetel asta kSiquem chu ksur Leboná». 20 Wa xlakata kamaxkika uma limapakgsin lakchixkuwin xalak Benjamín: «Kapitit chu katatsekgtit niku yakgolh uvas. 21 Chu, akxni nakaʼakxilhatit pi laktsuman xalak Siló nataxtukgo xlakata natantlikgo, wixin kataxtutit niku yakgolh uvas chu chatunu chatunu kalilh chatum tsumat xlakata xpuskat nawan. Alistalh kataspittit kxtiyat Benjamín. 22 Komo xnatlatnikan o xnatalankan naminkgo kinkaliwanikgoyan, nakkawaniyaw: “Xlakata tlan nakakitaxtuni, kakilaʼakgatekgsniw, xlakata nila kkatekgsniw xputumkan chatum puskat akxni ktatlawaw guerra Jabés-Galaad, chu wixin nila xkamaxkiyatit chatum puskat xlakata tuku xmalaknunitantit”».

23 Wa xlakata lakchixkuwin xalak Benjamín tlawakgolh chuna la kawanika. Chatunu chatunu lilh chatum puskat tiku xtantlima xlakata xpuskat xlitaxtulh. Alistalh taspitkgolh ktiyat nema xkatapakgsini, lakkaxtlawaparakgolh kachikinin chu anta tamakgxtakgkgolh.

24 Ama kilhtamaku israelitas talakgatumikgolh, chatunu chatunu kalakgtaspitkgolh xtribu chu xfamilia. Chatunu chatunu taspitli ktiyat nema xkatapakgsini.

25 Amacha kilhtamaku ni xʼanan chatum mapakgsina kʼIsrael. Chatunu chatunu xtlawa tuku tlan xʼakxilha.