XLIMAKTIY TUKU KATSOKGNANIKA CORINTIOS

1 Akit Pablo, xʼapóstol Cristo Jesús xlakata xtalakaskin Dios, chu Timoteo kintalakan,* kkamalakgachaniman uma carta wixin tiku xcongregación Dios nema wi kCorinto, chu putum natalan* nema wilakgolh kputum Acaya:

2 KinTlatkan* Dios chu Malana* Jesucristo kakamaxkin talakgalhaman nema ni anan xtachuna* chu takaksni.

3 Kamalankika xDios chu xTlat Malana Jesucristo, xla chatum Tlat tiku kgalhi lhuwa talakgalhaman chu Dios tiku tlan kamamakgkatsini latamanin xliputum tuku titaxtukgo, 4 tiku tlan kinkamamakgkatsiniyan xliputum taʼakglhuwit* nema titaxtuyaw, xlakata akinin na tlan nakamamakgkatsiniyaw tiku titaxtumakgolh tanu tanu taʼakglhuwit chu nalimaklakaskinaw tuku Dios tlan kinkalimamakgkatsiniyan. 5 Lhuwa tuku patiyaw xlakata akinin kstalaninanin Cristo, chu xpalakata Cristo na lhuwa kgalhiyaw tuku tlan kinkamamakgkatsiniyan. 6 Nachuna, komo ktitaxtuyaw taʼakglhuwit,* wa xlakata tlan nakamamakgkatsinikanatit chu nalakgtaxtuyatit; chu tlan kinkamamakgkatsinimakan xlakata wixin na tlan nakamamakgkatsinikanatit, uma kamakgtayayan natayaniyatit tapatin nema na kinkamapatiniman. 7 Chu akinin lu kkalipawanan, xlakata kkatsiyaw pi patinampatit chuna la akinin, wa xlakata, na tlan nakamamakgkatsinikanatit chuna la akinin.

8 Xlakata klakaskinaw kakatsitit, natalan, xpalakata taʼakglhuwit nema kkgalhiw kxtiyat Asia. Uma tuku ktitaxtuw lu tuwa kmakgkatsiw asta nila kiʼakstukan ktayaniw, chu ni liwana xakkatsiyaw komo xakamaw lakgtaxtuyaw o ni. 9 Chuna, klakpuwaw pi xakamaw niyaw. Pero uma tuku ktitaxtuw kinkamasiyanin ni kiʼakstukan nakinkalipawankanan, kinkamasiyanin naklipawanaw Dios tiku kamalakastakwani tiku nikgonita. 10 Chuna, xla kinkalakgmaxtun kʼuma tuku atsinu ni xkinkamakgniyan; chu klipawanaw pi chuntiya nakinkalakgmaxtuyan. 11 Wixin na tlan nakilamakgtayayaw akxni natlawaniyatit oración Dios kimpalakatakan. Xlakata komo lhuwa tiku naskinkgo kimpalakatakan, Dios nakgaxmata chu nakinkamakgtayayan chu xpalakata uma lhuwa tiku namastakgo paxtikatsinit.

12 Lanka kinkamakgkatsikanan xlakata xaskulunku talakapastakni kkgalhiyaw chu xaskulunku klinaw kilatamatkan chu ni klakgaputiyunanaw kʼuma kakilhtamaku, tlakg liwaka chuna ktlawayaw kmilakgstipankan, klakgalhamananaw chuna la Dios lakgalhamaninan chu ni klipawanaw xliskgalalakan latamanin. 13 Xlakata kkatsokgnaniman tuku ni tuwa likgalhtawakgakan* chu ni tuwa akgatekgskan, chu klakaskin pi chuntiya liwana* kaʼakgatekgstit putum uma, 14 chuna la makgapitsi wixin akgatekgsnitantita, pi lanka kalimakgkatsikanatit kimpalakatakan, nachuna lanka nakinkamakgkatsikanan mimpalakatakan kxkilhtamaku kiMalanakan Jesús.

15 Xlakata liwana xakkatsi uma, akit xaklakpuwanit pi pulana wixin nakkalakganachan xlakata amakgtum xpaxuwaparatit; 16 xlakata xaklakpuwanit nakkatilakgapaxialhnanan akxni xakalh kMacedonia, chu xakkatilakgapaxialhnamparan akxni xakkitaspitli kMacedonia, chu wixin kaj ni makgat xkilataʼaw ktiji akxni xakalh kJudea. 17 Akxni xaklakkaxwilinit nakkalakganachan, ni kaj takgaman kliʼakxilhli. ¿O kkgalhi kintalakapastakni chuna la latamanin tiku wankgo pi naʼankgo chu alistalh ni ankgo? 18 Chuna la tlan lipawankan Dios, na tlan lipawankan kintachuwinkan. Ni kwanaw pi wi tuku naktlawayaw chu alistalh ni kmakgantaxtiyaw. 19 Xlakata xKgawasa Dios, Jesucristo, ama tiku akit chu Silvano* chu Timoteo klichuwinanitaw kmilakgstipankan, xla ni wan pi wi tuku natlawa chu ni makgantaxti, akxni xla wan pi wi tuku natlawa, makgantaxti. 20 Xlakata putum xtamalaknun Dios kgantaxtukgonit* xpalakata Jesús. Wa xlakata na waniyaw Dios «Chuna kalalh» anta kxtukuwani xlakata nalimalankiyaw Dios. 21 Pero tiku liwana makatsininan pi wixin chu akinin tapakgsiniyaw Cristo, chu ama tiku kinkalaksakni, wa Dios. 22 Xla kinkawilininitan ksello chu kinkamaxkinitan espíritu santo kkinakujkan. Akxni chuna tlawalh xla kinkamaxkin akgtum tamalaknun xpalakata tuku aku namin.*

23 Nina kanacha kCorinto xlakata ni tlakg kkamakgalipuwamputunan chu kliwili Dios pi katsi uma, kgoxota akit komo kʼakgsaninama. 24 Ni wa para akinin xmalananin mintakanajlakan, akinin akxtum kkataskujman xlakata napaxuwayatit, xlakata wa mintakanajlakan tliwakglh liwilatit.

2 Xlakata klakkaxwilinit pi akxni amakgtum nakkalakgapaxialhnanan ni nakkamakgalipuwanan. 2 Xlakata komo nakkamakgalipuwanan, ¿tiku natawila xlakata nakimakgapaxuwa? Kajwatiya tiku kkamakgalipuwa. 3 Wa xlakata kkatsokgnanin, xlakata akxni nakanacha, ni nakimakgalipuwankgo ama tiku xkimakgapaxuwakgolh, xlakata liwana kkatsi pi tuku kimakgapaxuwa akit, na kamakgapaxuwayan mimputumkan. 4 Xlakata akxni kkatsokgnanin xaktitaxtuma lhuwa tapatin chu lu xaklipuwama kkinaku, asta xaktasa. Chu ni kkatsokgnanin xlakata nakkamakgalipuwanan, chuna ktlawalh xlakata nakkamakatsiniyan pi lu kkapaxkiyan.

5 Nachuna, komo wi tiku wilinit talipuwan, ni akit kimakgalipuwanit, wata putum wixin kamakgalipuwanitan (pero ni tlakg klichuwinamputun xlakata uma). 6 Tlantiya chuna la mimputumkan palha stakyawanitantit ama chixku; 7 pero uku xliputum minakujkan katapatitit chu tlan kamamakgkatsinitit, xlakata ni lu nalipuwan asta nialhla natayani. 8 Wa xlakata, akit kkastakyawayan pi kalimasiyanitit pi paxkiyatit. 9 Nachuna, kkatsokgnanin xpalakata uma: xlakata nakkatsi komo nakgalhakgaxpatatit putum tuku kkawanin. 10 Tiku wixin katapatiyatit, akit na kkatapati. Pero akxni akit ktapatinan tuku nitlan (komo wi tuku ktapatinanit) chuna ktlawanit xlakata nakkamakgtayayan, chu Cristo katsilh pi chuna. 11 Chuna ni nakinkamakgatlajayan Satanás, xlakata liwana katsiyawa tuku kinkaliʼakgskgawiputunan.*

12 Nachuna, akxni kchalh kTroas xlakata naklichuwinan xatlan tamakatsinin xlakata Cristo chu kimalakkinika akgtum malakcha* xlakata naktlawa xtaskujut Malana,* 13 lu klilakgaputsalh xlakata ni ktekgsli kintala Tito. Wa xlakata kkawanilh pi kiliʼanata xwanit chu kalh kMacedonia.

14 Pero paxtikatsiniyaw Dios, tiku kinkapulalinan akinin chu Cristo chuna la soldados tiku taspitmakgo kʼguerra niku tlajanankgolh. Xtakatsin Dios xtachuna tuku stlan takgankgawanan chu xla limaklakaskin taskujut nema tlawayaw xlakata kaniwa nakgankgawanankgo latamanin. 15 Akinin chu tamakatsinin xpalakata Cristo wa tuku stlan kgankgawanan Dios. Chu na kgankgawanankgo ama tiku nakalakgmaxtukan chu tiku nakamalakgsputukan; 16 xpalakata tiku nakamalakgsputukan, kgankgawanankgo* linin xlakata nanikgo, chu xpalakatakan tiku nalakgtaxtukgo limuksunkgo latamat xlakata nalatamakgo. ¿Chu tiku lakgchan natlawa uma taskujut? 17 Akinin, xlakata ni klitaxtuyaw xtachuna lhuwa latamanin tiku lapulakgo xlakata nalitlajakgo* xtachuwin Dios. Akxni klichuwinanaw Dios lu kkinakujkan minacha chuna naktlawayaw, klitaxtuyaw kstalaninanin Cristo tiku Dios kalakgayawalh uma taskujut, chu chuna ktlawamaw kxlakatin Dios.

3 ¿Talakaskin amakgtum nakkamasiyaniparayan tiku akinin? ¿O talakaskin pi nakkamaxkiyan cartas nema tlan nakinkalichuwinankgoyan, chuna la maklakaskinkgo amakgapitsin? ¿O wixin tiku nakilamaxkiyaw umakgolh cartas? 2 Wixin litaxtuyatit kincartajkan nema tatsokgtawilanit kkinakujkan chu nema lakgapaskgo chu likgalhtawakgakgonit putum latamanin. 3 Xlakata liwana tasiyanit pi wixin xcarta Cristo nema akinin tiku kskujnaniyaw Dios, ktsokgwilinitaw, ni tinta litatsokgnit, wata litatsokgnit xʼespíritu xastakna Dios, ni tatsokgtawilanit kchiwix wata tatsokgtawilanit knaku.

4 Xpalakata Cristo, Dios tlawanit pi liwana nakatsiyaw uma. 5 Ni kwanaw pi akinin tlan ktlawayaw uma taskujut, pero Dios wa tiku kinkamakgtayayan xlakata tlan naktlawayaw. 6 Xla wa tiku tlawanit pi tlan naktlawayaw uma taskujut xlakata xlakskujnin naklitaxtuniyaw xasasti talakkaxlan, ni xla Limapakgsin,* wata xla espíritu; xlakata Limapakgsin makgninan, pero espíritu masta latamat.

7 Pero Limapakgsin limin linin chu xlitalhkatawilanit letras kchiwix, tasiyalh xlilanka nema lu xmakaxkgakgenan kxlakan Moisés wa xlakata xkamanan Israel nila xlakaʼakxilhkgo xpalakata lilanka nema kxlakan xmakaxkgakgenan, lilanka nema alistalh xʼamaka masputukan, 8 komo akxni mastaka limapakgsin tasiyalh xlilanka, ¿ni tlakg natasiya xlilanka akxni mastakan espíritu? 9 Xlakata, komo Limapakgsin nema limin linin litasiyalh xlilanka, ¡tlakg natasiya xlilanka taskujut nema tlawa pi xaʼakgstitum nakaʼakxilhkan latamanin! 10 Xlilanka Limapakgsin nitu litaxtu akxni tamalakxtumikan xlilanka xasasti talakkaxlan. 11 Chu komo tuku xʼamaka masputukan limastaka lilanka, ¡wa xlakata tlakg lhuwa lilanka makglhtinan tuku wi uku!

12 Xlakata kgalhiyaw uma takgalhkgalhin, ni kilhpekuanaw akxni chuwinanaw, 13 chu ni tlawayaw tuku Moisés tlawalh akxni xlitalakgatlapa lhakgat xlakata xkamanan Israel ni kaks xʼakxilhkgolh tuku xʼama akgspula tuku xʼamaka masputukan. 14 Pero xlakan nila akgatekgskgolh.* Chu asta uku xtachuna la litalakgatlapakgonit lhakgat akxni likgalhtawakgakan xamakgan talakkaxlan, kajwatiya xpalakata Cristo tlan makgenukan lhakgat nema litalakgatlapakgonit. 15 Nachuna, asta uku, xnakujkan litalakgatlapanit lhakgat, wa xlakata nila akgatekgskgo tuku tsokgwililh Moisés. 16 Pero akxni wi tiku lakgtaspita Jehová, makgenunikan lhakgat tuku litalakgatlapanit. 17 Chu Jehová wa Espíritu, chu niku wi xʼespíritu Jehová, anan lakgtaxtut. 18 Chu kimputumkan tiku mapanunitaw tuku xlitalakgatlapanitaw, xtachuna la espejos litaxtuyaw nema limasiyayaw xlilanka Jehová. Chuntiya kinkalakgpalimakan xlakata xtachuna la Dios nawanaw chu tlakg nalimasiyatilhayaw xlilanka Dios,* chuna la lakaskin Jehová tiku Espíritu.*

4 Xlakata kkgalhiyaw uma xasanto taskujut xpalakata talakgalhaman nema kinkalimasiyanikan, ni ktlakgwanaw.* 2 Pero klakgmakganitaw putum tuku tsekg tlawakan nema xalimaxana, ni kʼakgskgawinanaw chu ni klaktlawayaw xtachuwin Dios; wata kmasiyayaw tuku xaxlikana, chu kxlakatin Dios tlan liʼakxilhtit klitaxtuyaw xpalakata putum xtalakapastaknikan latamanin. 3 Nachuna, komo xatlan tamakatsinin nema klichuwinanaw kamatsekgkanit,* kamatsekgnikanit tiku amaka kamalakgsputukan, 4 tiku ni kanajlakgo, tiku dios xalak uma kakilhtamaku* kamalakgatsininit xtalakapastaknikan xlakata ni nakalakgchan xtaxkgakget xatlan tamakatsinin nema kgalhi lhuwa kakni chu lichuwinan xlakata Cristo, tiku kinkamasiyaniyan la* likatsi Dios. 5 Xlakata ni klichuwinanaw kimpalakatakan, wata klichuwinanaw pi Jesucristo Malana* litaxtu, chu klichuwinanaw pi akinin miskujnikan kkalitaxtuniyan xpalakata Jesús. 6 Xlakata Dios wa tiku wa: «Anta niku kapukswa kataxtucha xkgakganat», chu xla limaxkgakgenanit kkinakujkan xtakatsin Dios nema kgalhi lhuwa lilanka xpalakata xlakan Cristo.

7 Maski akinin klitaxtuyaw chuna la xalu xla tiyat kkgalhiyaw uma tuku lhuwa xtapalh, xlakata liwana natasiya pi kkgalhiyaw litliwakga tuku latamanin nila kgalhikgo, uma litliwakga ni kilakan wata wa Dios masta. 8 Xlakata tipalhuwa taʼakglhuwit kinkastiliwilinitan, pero ni kinkalakgachinukanitan chuna la nialhla naktatsuwiyaw; ni kkatsiyaw tuku naktlawayaw, pero ni wamputun pi nila naktaxtuniyaw; 9 kinkaputsastalanikanan, pero Dios ni kinkamakgxtakgan; lhkgen kinkamamikanachan katutsu, pero ni kinkamasputukanan. 10 Xanikuta niku kanaw ktatalakastukaw linin chuna la Jesús, xlakata latamanin naʼakxilhkgo pi kpatinanaw chuna la Jesús patinalh. 11 Maski klamaw, kalipekua wi kilatamatkan putum kilhtamaku xlakata kstalaniyaw Jesús. Uma chuna kitaxtu xlakata latamanin naʼakxilhkgo pi kpatinamaw chuna la Jesús patinalh. 12 Wa xlakata, maski atsinu ni kinkamakgnikanan, latamat kitaxtu mimpalakatakan.

13 Wa uma tuku tatsokgnit: «Kkanajlalh, wa xlakata kchuwinalh». Akinin klimasiyayaw pi na watiya takanajla kkgalhiyaw, wa xlakata kchuwinanaw, 14 xlakata kkatsiyaw pi tiku malakastakwanilh Jesús na nakinkamalakastakwaniyan xlakata akxtum natatawilayaw Jesús, chu xla nakinkawiliyan akinin chu wixin kxlakatin Jesús. 15 Putum uma chuna lalh xlakata tlan nakakitaxtuniyan, xlakata talakgalhaman nema ni anan xtachuna* tlakg natalhuwi; talhuwi akxni tlakg lhuwa latamanin malankikgo Dios, akxni maxkikgo paxtikatsinit.

16 Wa xlakata, ni tlakgwanaw, maski kimaknikan talakglakgalhima, kinakujkan chali chali sastima. 17 Xlakata maski taʼakglhuwit* ni makgapala chu tlan tayaniyaw, tlawa pi namakglhtinanaw tasikulunalin, chu ni anan tuku tatalakxtumi* uma tasikulunalin chu putum kilhtamaku makgapala; 18 wa xlakata ni wa lilakpuwanaw tuku tasiya, wata wa lilakpuwanaw tuku ni tasiya. Xlakata tuku tasiya ni makgas makgapala, pero tuku ni tasiya putum kilhtamaku makgapala.

5 Xlakata katsiyaw pi komo xlaktilhka kinchikkan xalak katiyatni, uma aktsu chiki xaxuwa, Dios nakinkamaxkiyan akgtum chiki nema putum kilhtamaku natawila anta kʼakgapun, akgtum chiki nema ni makan litlawakanit. 2 Xlakata kʼuma chiki* lu talipuwaniyaw, lu makgamakglhtinamputunawa chiki xalak akgapun,* uma nalitaxtu chuna la lhakgat nema nakinkamakgtlapayan, 3 xlakata akxni nalilhakgananaw ni xalhtantala* nakinkamanokglhukanan. 4 Wa xlakata, akinin tiku wilaw kʼuma chiki talipuwanimaw chu lakgaputsamaw,* ni xlakata maktaktaputunaw uma, wata xlakata lilhakganamputunaw atanu, xlakata latamat nema ni kgalhi xlisputni xlakgxokgo natawila kimaknikan nema niy. 5 Chu wa Dios tiku kinkamakaxni xlakata uma, tiku kinkamaxkin espíritu santo, chu akxni chuna tlawalh kinkamaxkin akgtum tamalaknun xpalakata tuku aku namin.*

6 Wa xlakata, putum kilhtamaku lipawanaw chu liwana katsiyaw pi komo kgalhiyawku kinchikkan kʼuma makni makgat wilaniw Malana,* 7 chu katsiyaw uma xlakata lilamaw takanajla, ni wa tuku kaj akxilhaw. 8 Pero liwana katsiyaw chu paxuwayaw xlakata nialh nakgalhiyaw uma makni chu akxtum natatawilayaw Malana. 9 Wa xlakata, komo akxtum tawilaw o makgat wilaniw Malana, chuntiya kaliskujwi pi tlan nakinkaʼakxilhan. 10 Xlakata kimputumkan natayayaw* kxlakatin putawilh niku nalakputsanan Cristo, xlakata chatunu chatunu naxokgonikan chuna la tlawalh akxni xkgalhijku xmakni, komo tlan o nitlan* tuku tlawalh.

11 Nachuna, xlakata katsiyaw tuku kilhchanima pekuanikan Malana, chuntiya kamakanajlimaw latamanin, pero akinin liwana kinkalakgapasan Dios. Chu na klakaskin pi mintalakapastaknikan kakamakgtayan naʼakgatekgsatit tiku akinin. 12 Ni amakgtum kiʼakstukan tlan kinkalichuwinankanan kmilakatinkan, wata kkawaniman putum uma xlakata naktlawayaw pi lanka nakamakgkatsikanatit kimpalakatakan, xlakata tlan nakakgalhtiyatit tiku lanka kalimakgkatsikan tuku kaj tasiya chu ni wa tuku wi knaku. 13 Komo wi tuku ktlawaw xtachuna la tiku ni stalanka lakapastaknan, chuna ktlawaw xpalakata Dios; chu komo wi tuku ktlawayaw chuna la tiku stalanka lakapastaknan, chuna ktlawayaw mimpalakatakan. 14 Xlakata tapaxkit nema Cristo limasiyanit tlawa pi nakkgalhakgaxmatniyaw, xlakata wa uma tuku kʼakgatekgsnitaw:* kaj chatum chixku nilh xpalakata putum latamanin, xlakata putum xnikgonit. 15 Chu xla nilh xpalakatakan, xlakata tiku lamakgolh nialh xʼakstukan nakamakgapaxuwakan, wata namakgapaxuwakgo tiku nilh xpalakatakan chu malakastakwanika.

16 Wa xlakata, lata uma kilhtamaku nialhti klilakputsananiyaw tuku kaj akxilha kilakgastapukan. Maski makgasa kilakgastapukan xaklilakputsananiyaw Cristo, uku nialh chuna klakputsananiyaw. 17 Wa xlakata, komo wi tiku kstalanina Cristo, chatum xasasti tamalakatsukin litaxtu; tuku xalakgmakgan titaxtukgolha; ¡kaʼakxilhtit!, malakatsukikanit tuku xalaksasti. 18 Pero putum tuku anan wa Dios masta, xla tlawanit pi tlan natalalimparayaw xpalakata Cristo, chu kinkamalakgachanitan xlakata nakamakgtayayaw amakgapitsin tlan natalalimparakgo, 19 uma wamputun pi Dios limaklakaskima Cristo xlakata latamanin tlan natalalimparakgo, chu xla ni kakuentajtlawanima xtalakgalhinkan. Chu Dios kinkalakgayawanitan nakkawaniyaw latamanin pi tlan natalalimparakgo.

20 Wa xlakata, xmakatsininanin Dios klitaxtuyaw, kxlakgxokgo Cristo, xtachuna pi Dios kinkamaklakaskiman xlakata nakatasani latamanin. Akinin tiku xlakgxokgo Cristo, kkatasaskiniyaw latamanin: «Tlan katalalipimparatit Dios». 21 Cristo nikxni lakgalhinalh chu Dios makamastalh xpalakata kintalakgalhinkan, xlakata xaʼakgstitum xlitaxtuw kxlakatin Dios xpalakata Cristo.

6 Akxtum ktaskujmaw Dios, chu akinin na kkatasaskiniyan pi kamakgamakglhtinantit xtalakgalhaman nema ni anan xtachuna,* chu liwana kamaklakaskintit. 2 Dios wan: «Akit kkakgaxmatnin kkilhtamaku akxni kmatlanilh, chu kkamakgtayan kkilhtamaku xla lakgtaxtut». ¡Kaʼakxilhtit! Wa uma kilhtamaku nema Dios matlani, chu ¡kaʼakxilhtit!, wa uma kilhtamaku xlakata Dios nakinkalakgmaxtuyan.

3 Nitiku kmaʼakgchakgxniyaw xlakata ni nalakgmakgankan taskujut nema ktlawaniyaw Dios; 4 pero pulaklhuwa chuna la klimasiyayaw pi kskujnin Dios klitaxtuyaw: tanu tanu tuku ktayaninitaw, takatsanajwat, ktitaxtunitaw tuku nitlan chu taʼakglhuwit. 5 Kinkakgaxikan,* kinkatamaknukan kpulachin, nitlan kinkalikatsinikan, palha kskujwi, ni klhtataw makgapitsi katsisni, ni xakkgalhiyaw tuku nakwayaw. 6 Xaskulunku klinaw kilatamatkan, chu kkatsiyaw tuku xaxlikana, kkgalhkgalhinanaw, tlan klikatsiyaw, kmastayaw talakaskin pi espíritu santo kapulalilh kilatamatkan, ni kaj klimasiyayaw pi kpaxkinanaw. 7 Kwanaw tuku xaxlikana, wa klipawanaw xlitliwakga Dios, xtachuna la xakkgalhiw tuku klitamakgtayayaw kkimpakgastakatkan* chu kkimpakgaxwikikan nema kinkamakgtayayan naktlawayaw tuku xaʼakgstitum. 8 Kinkamaxkikanan kakni chu kinkamamaxanikanan, nitlan kinkalichuwinankanan chu kinkamalankikanan. Akgskgawinanin kinkalimaxtukgoyan latamanin, pero akinin kwanaw tuku xaxlikana. 9 Xtachuna la ni kinkalakgapaskanan, pero Dios kinkalakgapasan, tasiya pi knimaw,* pero ¡kaʼakxilhtit!, kstaknamaw, xtachuna la kinkamalakgaxokgemakan,* pero ni kinkamakgnimakan. 10 Latamanin lakpuwankgo pi klipuwamaw, pero putum kilhtamaku kpaxuwamaw, pi limaxkgen akinin,* pero kkamaxkiyaw lhuwa tuku tlan amakgapitsin, pi nitu kkgalhiyaw, pero kkgalhiyaw putum tuku anan.

11 Lakatanks kkatachuwinaman, natalan xalak Corinto, chu xlikana kkapaxkiyan.* 12 Akinin ni kmaʼaktsuwinitaw chuna la kkalimasiyaniyan kintapaxkitkan, pero wixin ni kilamasiyaniyaw mintapaxkitkan. 13 Kkatachuwinaman xtachuna la kinkamanan. Katlawatit litlan, kakilalikatsiniw chuna la kkalikatsiniyan. Nachuna lanka kamalakkitit minakujkan.

14 Ni lakxtum kakatatawilatit tiku ni kanajlakgo.* Xlakata, ¿tuku lakxtum katlawa tuku xaʼakgstitum chu tuku ni xatlan? ¿O tuku lakxtum katlawa xkgakganat chu niku kapukswa? 15 ¿Wi tuku tlan akxtum tlawakgo Cristo chu Belial?* ¿O tuku lakxtum katlawa tiku ni makgxtakga Dios chu tiku ni kanajla? 16 Ni xlilat pi tatlawamakgxtu* anta natawilakgo kxtemplo Dios. Akinin xtemplo xastakna Dios; chuna la wanit Dios: «Nakkatatawila chu naktawila kxlakgstipankan, chu akit xDioskan nakkalitaxtuni chu xlakan kinkachikin nalitaxtukgo». 17 «Jehová nachuna wan: “Wa xlakata kataxtutit kxlakgstipankan chu kakatamakgatlinitit chu nialh kaxamatit tuku xalixkajni chu akit nakkamakgamakglhtinanan”». 18 «“Chu akit mintlatkan naklitaxtu chu wixin nalitaxtuyatit kilakgkgawasan chu kilaktsuman”, wan Jehová, Tiku kgalhi putum litliwakga».

7 Chu xlakata kgalhiyaw umakgolh tamalaknun, natalan tiku kkapaxkiyan, kachakgamakgaw putum tuku maxkajwani makni chu espíritu, uma natlawa pi tlakg xasantos nawanaw xlakata pekuaniyaw Dios.

2 Kakilamakgamakglhtinaw kminakujkan. Niti ktlawaninitaw tuku ni xaʼakgstitum, niti kmaʼakgtsankgeyawanitaw, chu niti kʼakgskgawimakglhtinitaw tuku kgalhi. 3 Uma nichuna kwan xlakata nakkalimawakayan tuku nitlan. Xlakata xapulana klichuwinanita pi wixin wilatit kkinakujkan xlakata lakxtum naniyaw chu lakxtum nalatamayaw. 4 Lu ni kkilhpuwan akxni kkatachuwinanan. Anan lhuwa tuku xlakata lanka kilimakgkatsikan mimpalakatakan. Lu tlan klimakgkatsi; lu kkgalhi tapaxuwan xliputum kintaʼakglhuwitkan.

5 Nachuna, akxni kchaw kMacedonia, ni kkgalhiw takaksni, wata pulaklhuwa chuna la kinkamalakgaputsikan: latamanin xkinkatalatlawamakgon, chu nachuna xakkalilakgaputsamaw congregaciones. 6 Pero Dios, tiku tlan kamamakgkatsini* tiku lipuwamakgolh, tlan kinkamamakgkatsinin xlakata Tito kinkalakgmin; 7 chu ni kajwatiya xlakata kinkalakgmin, wata nachuna tlan kinkalimamakgkatsinin* tuku wixin tlan limamakgkatsinitit. Xlakata kinkalitachuwinan pi lu kiʼakxilhputunatit, kilakglipuwampatit chu kililakgaputsapatit, uma tlawalh pi tlakg xakpaxuwalh.

8 Wa xlakata, maski kkalimakgalipuwan kincarta, ni klakpuwan para ni xaktitsokgli. Chuna, xapulana nitlan klimakgkatsilh xlakata kkalimakgalipuwan; pero xlakata kaj ni makgas kkamakgalipuwan, 9 uku klipaxuwa, ni xlakata kkamakgalipuwan, klipaxuwa xlakata uma tlawalh pi xmakgxtakgtit tuku nitlan xtlawapatit. Lipuwantit chuna la lakaskin Dios, chu uma kamakgtayan. Wa xlakata tuku kkawanin ni katlawanin tuku nitlan. 10 Xlakata putum kilhtamaku nalitamakgtayayaw talipuwan chuna la lakaskin Dios, nema tlawa pi latamanin namakgxtakgkgo tuku nitlan tlawamakgolh chu nakgalhikgo lakgtaxtut; pero chuna la lipuwankgo latamanin xalak kakilhtamaku linan klinin. 11 Liwana tasiya pi lipuwantit chuna la Dios lakaskin, chu wa xlakata lu liskujtit natlawayatit tuku xalakatitum. Kgalhiparatit xatlan mintukuwanikan, xlisitsiyatit tuku nitlan xtlawakanit, pekuanitit Dios, xmakgxtakgputunatit tuku nitlan xtlawapatit, skujnitit Dios xliputum minakujkan, chu lakkaxtlawatit tuku nitlan xtlawakanit. Putum tatlawalh chuna la xlilat xlakata xlakkaxtlawaka uma taʼakglhuwit. 12 Akxni kkatsokgnanin, nichuna ktlawalh xpalakata tiku tlawalh talakgalhin, nipara wa xpalakata tiku tuwa tuku titaxtulh xpalakata talakgalhin; wata wa kkalitsokgnanin xlakata nakkatsi komo xlikana xlimasiyatit kxlakatin Dios pi xmakgantaxtiputunatit tuku kkawanin. 13 Wa uma tuku tlan kinkalimamakgkatsinikan.

Pero ni kajwatiya tlan kinkamamakgkatsinikan, nachuna tlakg klipaxuwaw xlakata xtapaxuwan Tito, xlakata mimputumkan matliwakglhtit. 14 Xlakata komo lanka kimakgkatsikanit kxlakatin Tito mimpalakatakan, ni ktamamaxaninit; xlakata chuna la putum tuku kkalitachuwinanitan xaxlikana, nachuna xaxlikana litaxtunit ama tuku lanka kinkalimakgkatsikanan kxlakatin Tito. 15 Nachuna, xla tlakg kapaxkiyan akxni lakapastaka pi mimputumkan kgalhakgaxpatnanatit, chuna la lu maxkitit kakni akxni makgamakglhtinantit. 16 Kpaxuwa xlakata kilimatliwakglhatit xliputum tuku tlawayatit.

8 Natalan, uku klakaskinaw kakatsitit xpalakata xtalakgalhaman Dios nema ni anan xtachuna,* nema kamaxkinit congregaciones xalak Macedonia. 2 Akxni xtitaxtumakgolh tuku lu tuwa nema xkamapatinima, limasiyakgolh lhuwa tapaxuwan chu xtalakgalhamankan, uma chuna tlawakgolh maski lu limaxkgen* xwankgonit. 3 Xlakata xlakan mastakgolh putum tuku xmatlanikgo, asta tlakg lhuwa nixawa la* xmatlanikgo. Akit liwana kkatsi pi chuna tlawakgolh, 4 chu xlakata chuna lakaskinkgolh, makglhuwa kinkaskinikgon xakkamaxkiw talakaskin pi xatapaxuwan namastakgo akgtum tamaskiwin* chu na nakamakgtayakgo tiku xasantos. 5 Chu ni kajwatiya tlawakgolh chuna la xaklakpuwanitaw, pulana skujnanikgolh Malana* xliputum xnakujkan chu kinkamakgtayakgon chuna la xtalakaskin Dios. 6 Wa xlakata, kwaniw Tito pi xmasputulh taskujut nema matsukilh kmilakgstipankan, uma wamputun, xmastokgli tuku wixin xatapaxuwan maskiwinantit. 7 Wixin lhuwa tuku tlawapatit chuna la uma, kgalhiyatit takanajla, lakatanks chuwinanatit, kgalhiyatit takatsin, xatapaxuwan putum tuku tlawayatit, chu nachuna kgalhiyatit tapaxkit nema akinin kkamasiyaniyan. Nachuna, kamalhuwitit chuna la xatapaxuwan maskiwinanatit.

8 Kkawaniman uma, ni xlakata nakkamapakgsiyan, chuna kkawaniman xlakata nakatsiyatit tuku xatapaxuwan tlawakgo amakgapitsin chu xlakata nalimasiyayatit pi xlikana paxkinanatit. 9 Xlakata wixin liwana lakgapasatit talakgalhaman nema ni anan xtachuna* nema masiyalh kiMalanakan Jesucristo, tiku maski lhuwa tuku xkgalhi, limaxkgen litaxtulh mimpalakatakan, xlakata wixin lhuwa tuku xkgalhitit xpalakata xtalimaxkget.

10 Wa uma tuku klakpuwan: Tlan nakakitaxtuniyan komo namakgantaxtiyatit uma taskujut, xlakata titaxtunita akgtum kata akxni wixin tsukutit tlawayatit. Chu ni kajwatiya uma, nachuna lu xtlawaputunatit. 11 Wa xlakata, uku, kamaspututit taskujut nema matsukitit. Xatapaxuwan kamakgalhspututit chuna la matsukitit, kamastatit tuku kgalhiyatit uku. 12 Akgtum tamaskiwin nema mastakan xliputum naku, wa tuku Dios tlakg tlan akxilha, xlakata Dios lakaskin pi chatum lataman namasta tuku matlani, ni wa namastaputun tuku ni kgalhi. 13 Xlakata ni klakaskin pi ni tuwa nakakitaxtuni amakgapitsin, pero tuwa nakakitaxtuniyan wixin; 14 xlakata akxtum nakakitaxtuniyan, tuku nakaʼakgataxtuniyan uku namakgatsi tuku xlakan nakakitsankgani, xlakata tuku nakaʼakgataxtuni na namakgatsi tuku wixin nakakitsankganiyan, chu akxtum nakakitaxtuniyan. 15 Chuna la tatsokgtawilanit: «Tiku lhuwa tuku xkgalhi ni tlakg kgalhilh, chu tiku kaj aktsu xkgalhi ni kitsankganilh».

16 Kamaxkika paxtikatsinit Dios xlakata na watiya tapaxuwan wilininit kxnaku Tito nema akinin kkgalhiyaw mimpalakatakan. 17 Xlakata xla matlanilh tuku kwaniw, pero xla na xlikana xmakgantaxtiputun tuku kskiniw, wa xlakata xʼakstu xtalakpuwan kalakgamachan. 18 Pero akxtum ktamalakgachaw Tito chatum tala tiku maxkikan kakni kputum congregaciones xlakata lichuwinan xatlan tamakatsinin. 19 Ni kajwatiya uma, nachuna putum congregaciones laksakkgolh xlakata akxtum nakinkataʼanan chu chuna nakinkamakgtayayan nakmaʼakgpitsiyaw tamakgtay tuku mastokgkanit. Uma tamakgtay nakmaʼakgpitsiyaw xlakata natamalanki kiMalanakan, chuna nalimasiyayaw pi tunkun kamakgtayayaw amakgapitsin. 20 Chuna nipara chatum chixku nakinkatekgsniyan tuku nitlan xpalakata uma lhuwa tamakgtay nema kmaʼakgpitsimaw. 21 Xlakata “putum kuentajtlawayaw chuna la xlilat, ni kajwatiya kxlakatin Jehová, nachuna kxlakatinkan lakchixkuwin”.

22 Nachuna, kkatamalakgachaw chatum kintalakan tiku makglhuwa kliʼakxilhnitaw chu ktekgsnitaw pi lu liskujnit xliputum tuku tlawanit, pero uku tlakg naliskuja xlakata lu kalipawanan. 23 Pero komo wi tiku nakakgalhskinan tiku Tito, tlan nawaniyatit pi xla wa tiku ktaskuja xlakata nakkamakgtayayan. Chu nachuna, komo wi tiku nakakgalhskinan xpalakatakan umakgolh natalan, apóstoles litaxtukgo kcongregaciones chu xlakan malankikgo Cristo. 24 Wa xlakata, kakalimasiyanitit pi kapaxkiyatit, chu kakalimasiyanitit congregaciones tuku xlakata lanka kinkamakgkatsikanan mimpalakatakan.

9 Chu ni talakaskin pi nakkatsokgnaniyan xlakata nakatsiyatit pi xlilat nakamakgtayayatit natalan,* 2 xlakata kkatsi pi makgtayanamputunatit. Lanka kimakgkatsikan mimpalakatakan kxlakatinkan tiku xalak Macedonia. Kkawanilh pi anta kʼAcaya lata katata wixin skgalalh wilatit xlakata namakgtayananatit. Xlakata wixin lu makgtayanamputunatit, lhuwa xalak Macedonia nachuna makgtayanamputunkgo. 3 Pero kkamalakgachama natalan xlakata chuna la lanka kimakgkatsikan mimpalakatakan ni kaj tachuwin nalitaxtu uma chu xlikana wixin skgalalh natawilayatit, chuna la kkawanilh pi xpimpatit tlawayatit. 4 Komo nichuna, chu komo akxtum xkintaminkgolh xalak Macedonia chu xkatekgsni pi ni skgalalh wilatit, komo chuna xlalh, akinin xaktamamaxaniw xlakata kkalipawanan chu na xtamamaxanitit wixin. 5 Wa xlakata kakxilhli pi xtalakaskin nakkawani natalan pi xkalakganchan akxni akit nina kchanacha chu xmakaxtit lhuwa mintamaskiwinkan* nema xmalaknunitantit, xlakata chuna nalitaxtu lhuwa talakgalhaman nema makaxnitantita nawan, chu uma nalitasiya pi ni kaj xafuerza kamakglhtikanitantit.

6 Chu wa xlakata, tiku ni lhuwa talhtsi chan, ni lhuwa namakgala, chu putum tiku lhuwa talhtsi chan, na lhuwa namakgala. 7 Chatunu chatunu katlawalh chuna la lakkaxwilinit kxnaku, ni xatasitsi chu ni xafuerza katlawalh, xlakata Dios paxki tiku xatapaxuwan masta.

8 Nachuna, Dios kgalhi lhuwa litliwakga xlakata nakalimasiyaniyan lhuwa xtalakgalhaman nema ni anan xtachuna* xlakata lhuwa nakgalhiyatit putum tuku maklakaskinatit chu chuna tlan natlawayatit putum xalaktlan tatlaw. 9 (Chuna la tatsokgtawilanit: «Xla lhuwa tamaskiwin maʼakgpitsinit chu kamaxkinit limaxkgenin.* Xaʼakgstitum xtatlaw putum kilhtamaku nalakapastakkan». 10 Chu Ama tiku maxki lhuwa talhtsi tiku chananan chu kaxtalanchu xlakata nawakan, namasta chu nakamalhuwiniyan mintalhtsikan xlakata nachanananatit, chu namalhuwi tuku tlan nakitaxtu xlakata xaʼakgstitum tuku tlawayatit). 11 Dios kamaxkiyan tasikulunalin xlakata chuna pulaklhuwa xatapaxuwan namastayatit, chu latamanin napaxtikatsinikgo Dios xlakata tamaskiwin nema nakamaxkiyaw amakgapitsin; 12 akxni namastayaw uma tamakgtay xpalakata amakgapitsin ni kaj wa nalitamakgtayakgo natalan,* nachuna lhuwa latamanin napaxtikatsinikgo Dios xpalakata uma tamakgtay. 13 Tuku tlawanitantit limasiya tiku litaxtuyatit chu xlakan malankikgo Dios xlakata kgalhakgaxpatatit xatlan tamakatsinin xpalakata Cristo nema wixin kalitachuwinanatit latamanin chu xlakata lhuwa tuku xatapaxuwan kamaxkinitantit xlakan chu putum latamanin. 14 Chu xlakan tasaskinikgo Dios mimpalakatakan chu kapaxkikgoyan xpalakata talakgalhaman nema ni anan xtachuna* nema Dios kalimasiyaninitan.

15 Kapaxtikatsiniw Dios xpalakata xtamaskiwin nema kaj xachunata, nema ni anan xtachuna.

10 Xlikana klakaskin pi katlawatit tuku kkawaniyan. Akxni kkawaniman uma, kstalanima xliʼakxilhtit Cristo tiku taktuju chu tlan likatsi, pero makgapitsi kmilakgstipankan wankgo pi ni lu xlakaskinka ktasiya chu ni kkilhpuwan akxni liwana kkatachuwinanan kcartas. 2 Xlikana, klakaskin pi tiku lakpuwankgo pi akinin klamaw chuna la latamanin, kalakgpalikgolh chuna la lakpuwankgo xlakata ni tliwakga nakkastakyawa akxni anta nakkatatawilayachan. 3 Xlakata maski lamaw kʼuma kakilhtamaku, ni tlawayaw guerra chuna la latamanin xalak kakilhtamaku. 4 Xlakata tuku litlawayaw guerra ni wa tuku limaklakaskinkgo latamanin xalak kakilhtamaku, wata wa tuku Dios kinkamaxkinitan; lu lakgtliwakga xlakata nalaktlawa tuku tliwakglh wilakgo. 5 Xlakata laktilhmaw talakapastakni chu putum tuku tlawa pi ni nalakgapaskgo Dios. Xtachuna la xkachiliw chu xkapulaliw xtalakapastaknikan latamanin xlakata nakgalhakgaxmatkgo Cristo; 6 chu chuntiya klakkaxwilinitaw nakmalakgaxokgeyaw tiku ni kgalhakgaxmatninan, akxni limasiyanitantita pi kgalhakgaxpatatit putum tuku kkawaniyan.

7 Wixin kalakputsananiyatit latamanin kaj xlakata chuna la tasiyakgo. Tiku liwana kanajla pi tapakgsini Cristo, amakgtum kalilakpuwampa uma: Chuna la xla tapakgsini Cristo, nachuna akinin tapakgsiniyaw. 8 Malana* kinkamaxkin limapakgsin xlakata nakkamatliwakglhan ktakanajla chu ni xlakata nakkalaktlawayan, chu maski tsinu lanka xkimakgkatsika xlakata limapakgsin nema kmakglhtinanitaw, ni xaktamamaxanilh. 9 Xlakata ni klakaskin nalakpuwanatit pi kkalimakgapekuamputunan kincartas. 10 Xlakata xlakan wankgo: «Xcartas liminkgo lakgtliwakga tachuwin chu lichuwinankgo tuku lu xlakaskinka, pero akxni unu kinkatawilan ni xlakaskinka tasiya, chu akxni tsuku chuwinan xtachuwin nitu litaxtu». 11 Tiku chuna chuwinankgo kakatsikgolh pi chuna la ktsokgwiliw kkincartaskan, nachuna naktlawayaw akxni nakkalakgchanachan. 12 Ni ktatalakxtumiputunaw tiku lanka kamakgkatsikan chu ni klitaxtuputunaw chuna la xlakan. Xlakan xʼakstukan kalilakputsananikan tuku xlakan wankgo pi tlan, chu chuna limasiyakgo pi ni kgalhikgo taʼakgatekgsni.

13 Ni lanka nakinkalimakgkatsikanan xlakata tuku ni ktlawanitaw, kajwatiya lanka nakinkalimakgkatsikanan xpalakata niku Dios kinkalaklhkawilininitan naklichuwinanaw chu makgtanuma asta niku wilatit. 14 Ni kmalakatsaliw chuna la Dios xkinkalaklhkawilininitan naktlawayaw akxni kkalakganchan, akinin pulana kkalitachuwinan wixin xatlan tamakatsinin xpalakata Cristo. 15 Ni, akinin ni lanka kinkamakgkatsikanan xpalakata xtaskujutkan amakgapitsin anta niku ni kinkalaklhkawilinikanitan, pero klakaskinaw pi mintakanajlakan kastakli. Xlakata taskujut nema ktlawanitaw chuntiya nastaka kmilakgstipankan. Chu chuna tlakg natalhuwi kintaskujutkan, 16 xlakata naklichuwinanaw xatlan tamakatsinin kpaíses nema tlakg lakgamakgat wilakgolh nixawa niku wilatit, xlakata ni lanka nakinkalimakgkatsikanan tuku tlawakgonita amakgapitsin niku kalaklhkawilinikanit. 17 «Pero tiku lanka makgkatsikan, lanka kamakgkatsika xpalakata putum tuku Jehová tlawanit». 18 Xlakata ni wa tiku xʼakstu lanka makgkatsikan wa tiku Dios tlan akxilha, wata wa Jehová laksaka tiku tlan akxilha.

11 Maski tasiya pi ni liwana klakapastaknan, xaklakaskilh pi xkimakgamakglhtinantit. ¡Pero chuna tlawapatita! 2 Xlakata kkakuentajtlawaputunan chuna la Dios kakuentajtlawaputunan,* xlakata akit kkamalaknun xlakata natatamakgaxtokgatit kaj chatum chixku, wa Cristo, chu kkamakamastaputunan chuna la chatum xaskulunku tsumat.* 3 Pero kpekuan pi, chuna la luwa xpalakata xliskgalala akgskgawimilh Eva, wi tiku namaxkajwani mintalakapastaknikan chu natlawa pi nialh nastalaniyatit Cristo xliputum minakujkan chu nialh skulunku nalatapaniyatit. 4 Xlakata chuna la wilaw, komo wi tiku min chu lichuwinan chatum Jesús tiku ni akinin klichuwinanaw, o makglhtinanatit espíritu nema ni xmakglhtinanitantit, o xatlan tamakatsinin nema ni xmakglhtinanitantit, wixin makglhtinanatit. 5 Xlakata akit klakpuwan pi ni anan tuku nalimasiya pi akit tlakg nitu klitaxtu nixawa miʼapostoleskan tiku tlakg xlakaskinka litaxtuputunkgo. 6 Pero maski ni liwana kchuwinan, kkgalhi takatsin xlakata Dios; akinin tipalhuwa chuna la kkalimasiyaninitan uma.

7 ¿O klakgalhinalh akxni ktaktujulh xlakata xkamalankikantit, xlakata xatapaxuwan chu xachunata kkalitachuwinan xatlan tamakatsinin xpalakata Dios? 8 Kmakglhtinalh xtamakgtaykan amakgapitsi congregaciones chu uma xtachuna xakkamakgkgalhanalh xlakan xlakata tlan xakkamakgtayan wixin. 9 Pero, akxni akxtum xakkatawilachan chu nitu xakkgalhi, ni kaj chatum limawit kkalitaxtunin, xlakata natalan xalak Macedonia minkgolh kimaxkikgo lhuwa tuku xakmaklakaskin. Chuna, lu kliskujli xlakata nitu xakkaskinin, chu chuntiya chuna naktlawa. 10 Akit kwan tuku xaxlikana chuna la Cristo xtlawalh, wa xlakata kxlikalanka Acaya chuntiya lanka nakilimakgkatsikan xpalakata uma. 11 ¿Tuku xlakata? ¿Xlakata ni kkapaxkiyan? Dios katsi pi kkapaxkiyan.

12 Pero tuku ktlawama chuntiya naktlawa xlakata tiku limasiyaputunkgo pi litaxtukgo chuna la akinin, ni nakgalhikgo tuku lanka nakalimakgkatsikan* xlakata tuku tlawakgonit. 13 Xlakata umakgolh lakchixkuwin ni xaxlikana apóstoles litaxtukgo, kaj akgskgawinankgo, kaj limasiyakgo pi xʼapóstoles Cristo litaxtukgo. 14 Chu uma ni kaks kimalakawani, xlakata Satanás chuntiya kaj limasiya pi xatlan ángel* litaxtu. 15 Wa xlakata ni kaks kimalakawani komo kskujnanin chuntiya kaj limasiyakgo pi tlawakgo tuku xaʼakgstitum. Pero tuku nakaʼakgspula kxlisputni, chuna nala xpalakata tuku tlawakgolh.

16 Amakgtum kkawaniparayan: Niti kalakpuwa pi ni liwana klakapastaknan. Pero komo chuna lakpuwanatit, kakimakgamakglhtinantit xtachuna la chatum tiku ni liwana lakapastaknan, xlakata maski kaj tsinu na lanka nakimakgkatsikan. 17 Chuna la kchuwinama uku nialh kstalanima xliʼakxilhtit Malana,* wata kchuwinama xtachuna chatum tiku ni liwana lakapastaknan, tiku xʼakstu lipawankan chu lanka makgkatsikan. 18 Lhuwa lanka kamakgkatsikan xlakata tuku anan kkakilhtamaku, chu akit nachuna naktlawa. 19 Wixin lakpuwanatit pi lu lakgskgalalan, komo chuna, ¿tuku xlakata xatapaxuwan katatayaniyatit tiku ni liwana lakapastaknankgo? 20 Wixin asta katatayanikgoyatit putum tiku kskujnin katlawakgoyan, putum tiku kamakgkgalhankgoyan tuku katapakgsiniyan, putum tiku kamakglhtikgoyan tuku kgalhiyatit, tiku lanka limakgkatsikgo akxni nitu kaliʼakxilhkgoyan, chu putum tiku kalakalasan.

21 Limaxana naklichuwinanaw uma, xlakata makgapitsi wixin max nalakpuwanatit pi akinin lu xaxlajwananin xlakata nakmaklakaskinaw kilimapakgsinkan chuna la xlilat.

Pero komo makgapitsi latamanin ni maxanankgo lanka nakamakgkatsikan, akit na ni kmaxanan lanka nakimakgkatsikan, maski wi tiku xlakpuwa pi akit ni liwana klakapastaknan. 22 ¿Hebreos litaxtukgo? Akit nachuna. ¿Israelitas litaxtukgo? Akit nachuna. ¿Xkamanan* Abrahán litaxtukgo? Akit nachuna. 23 ¿Kskujnanin Cristo litaxtukgo? Kkgalhtinan chuna la tiku akgwitinit,* klimasiyanit chuna la ni anan xtachuna pi kskujni Cristo klitaxtu nixawa xlakan, tlakg lhuwa kskujnit, makglhuwa kimanukanit kpulachin, makglhuwa kiwilinikanit chu makglhuwa atsinu ni knilh. 24 Judíos makgkitsis kisnokgkgonit puxamakunajatsan. 25 Makgtutu kilisnokgka kiwi, makgtum kiʼaktalamika, makgtutu atsinu ni xlakgtsankga kpupunu barco niku xakan chu milh kilhtamaku tantaku chu tantaskaka xaklawaka kxkgalhni kxakapulhman pupunu; 26 lakalhuwa niku xakan, lipekua tuku ktitaxtulh kkgalhtuchokgo, xpalakata kgalhananin, xpalakata tiku kintachiki, xpalakata tiku xalak atanu kachikinin, ktitaxtulh tuku lipekua kkachikin, kxakaskakni tiyat, kpupunu, ktitaxtulh tuku lipekua xpalakata ni xaxlikana natalan, 27 ni analh tajaxni kskujli, makgapitsi katsisni ni klhtatalh, kkilhtsinksli chu kkgalhputilh,* makglhuwa ni kkgalhilh tuku nakwa, ktitaxtulh lonkgni chu ni xakkgalhi lhakgat.*

28 Chu ni kajwatiya putum uma, nachuna chali chali kkalilakgaputsa putum congregaciones. 29 Akxni wi tiku taxlajwani, ¿na ni ktaxlajwani akit? Akxni wi tiku maʼakgchakgxnikan, ¿na ni klisitsi?

30 Komo lanka nakimakgkatsikan, lanka nakilimakgkatsikan tuku limasiya pi xaxlajwani akit. 31 Ama tiku namalankikan putum kilhtamaku, xDios chu xTlat* Malana Jesús, katsi pi ni kʼakgsaninama. 32 Anta kDamasco, gobernador tiku kskujnani mapakgsina Aretas, kayawalh skgalananin kxmalakcha kachikin xlakata nakinchipakgo, 33 pero akit kimujuka kʼakgtum lanka canasta* chu kilakmaktika kʼakgtum ventana nema xwi kxpatsaps kachikin, chu ktsalalh.

12 Lanka nakimakgkatsikan, wa xlakata naklichuwinan tamalakawanin nema Malana* kimaʼakxilhnilh chu tamakatsinin nema kimaxkilh, maski uma ni klitamakgtaya. 2 Klakgapasa chatum chixku tiku kstalanina Cristo, tiku akgkutatita kata lata lakapala linka kxlikilhmaktutu akgapun, komo putum xmakni o ni, ni kkatsi, pero Dios katsi. 3 Chuna, klakgapasa ama chixku. Malana lakapala lilh kparaíso, 4 chu akxni anta xwilacha kparaíso kgaxmatli tachuwin nema nila wankan chu lataman ni xlilat nawan. 5 Lanka nakimakgkatsikan xpalakata ama chixku, pero akit ni kiʼakstu lanka nakimakgkatsikan, kajwatiya xpalakata tuku kimaxlajwani. 6 Pero maski lanka xkimakgkatsiputunka, ni xaklitaxtulh xtachuna tiku ni liwana lakapastaknan, xlakata xaxlikana tuku xakwa. Pero nichuna ktlawaputun xlakata niti nalakpuwan pi wi tuku tlakg ktlawanit nixawa tuku kiʼakxilha pi ktlawa o kgaxmata tuku kwan. 7 Kaj xlakata lhuwa tamakatsin nema kimaxkikanit niti xlilakpuwanat pi tlakg lhuwa tuku ktlawanit.

Xlakata ni lu lanka nakimakgkatsikan, kimaxkika xtachuna la lhtukun kkimakni, chatum kskujni Satanás, nema chuntiya xkimakgapatinalh* xlakata ni lu lanka nakimakgkatsikan. 8 Makgtutu ktasaskinilh Malana xlakata xkimakglhtilh uma lhtukun. 9 Pero xla kiwanilh: «Talakgalhaman nema ni anan xtachuna* tuku klimasiyaninitan akchaniyana, xlakata kilitliwakga tlakg talhuwi akxni taxlajwaniya». Wa xlakata, xatapaxuwan naklitalanki tuku klitaxlajwani, xlakata xlitliwakga Cristo nalitaxtu xtachuna akgtum putatsekgni kimpalakata. 10 Wa xlakata, klipaxuwa pi xaxlajwani akit, pi nitlan tuku kiwanikanit, wi tuku kintsankganinit, kimputsastalanikanit chu ktitaxtunit tuku tuwa xpalakata Cristo. Akxni ktaxlajwani, lu ktatliwakglha.

11 Klitaxtunit xtachuna la tiku ni liwana lakapastaknan. Wixin tlawatit pi chuna xaklitaxtulh, xlakata ni lichuwinantit putum tuku laktlan ktlawanit. Xlakata ni anan tuku nalimasiya pi akit tlakg nitu klitaxtu nixawa miʼapostoleskan tiku tlakg xlakaskinka litaxtuputunkgo, maski xlikana pi nitu klitaxtu. 12 Xlikana, lu xaktayanima tuku nitlan akxni wixin akxilhtit tuku limasiya pi akit apóstol, ktlawalh tuku kaks malakawaninan chu milagros nema nila kanajlakan. 13 Akit ni chatum limawit kkalitaxtunin, kajwatiya uma tuku tanu katlawayan xpalakata atanu congregaciones. ¿Ni tlan tuku ktlawalh? Komo chuna, kakilatapatiw xlakata uma tuku nitlan ktlawalh.

14 ¡Kaʼakxilhtit! Uma xlimakgtutu lata ktakaxnita xlakata nakkalakganachan chu ni limawit ktilitaxtulh. Xlakata ni kputsama tuku kgalhiyatit, wata wixin kkaputsaman; xlakata ni xlilat pi kamanan namaʼakgstokgwilikgo tuku xtapalh xpalakata xanatlatni,* wata wa xanatlatni tiku namaʼakgstokgwilikgo tuku xtapalh xpalakata xkamanan. 15 Nakimakgapaxuwa pi mimpalakatakan naklaktlawa putum tuku kkgalhi chu nakmakgasputa kilatamat. Komo akit lu kkapaxkiyan, ¿ni xlilat nakimpaxkiyatit chuna la akit lu kkapaxkiyan? 16 Chu maski ni chatum limawit kkalitaxtunin, wixin wanatit pi «kkaʼakgskgawin» chu kkalimakgatlajan «taʼakgsiyat». 17 Tiku kkamalakgachanichan nituku kkaliʼakgskgawimakglhtin, ¿ni xlikana? 18 Kskinilh Tito pi xkalakganchan chu ktamalakgachalh chatum tala.* ¿Wi tuku kaʼakgskgawimakglhtin Tito? Nichuna. Akinin na watiya tayat kmasiyaw, ¿ni xlikana? Chu nachuna klikatsiw, ¿ni xlikana?

19 Wixin max lakpuwanatit pi kiʼakstukan ktakgalhmakgtayamaw kmilakatinkan, pero nichuna. Wata chuna la kstalaninanin Cristo klichuwinamaw tuku xaxlikana kxlakatin Dios. Natalan tiku lu kkapaxkiyan, putum tuku ktlawayaw, chuna ktlawayaw kaj xlakata nakkamatliwakglhan. 20 Xlakata kpekuan, pi akxni nakchanacha, nichuna nakkamanokglhuyan chuna la klakaskin, chu akit ni naklitaxtu chuna la wixin kgalhkgalhipatit, wata naʼanan lakilhnit, talakgsitsin, tasitsi, tapapitsit, nitlan tachuwin limawakanankan, laʼakgsankan, lu tlankajwanankan chu akchili tawilakan. 21 Max akxni nakkalakgamparayachan, kiDios namasta talakaskin pi naktamamaxani akxni kwi nawan kmilakatinkan, chu akit nakkalakglipuwan lhuwa ama tiku lakgalhinankgolh, pero ni limasiyakgo pi nitlan limakgkatsikgo tuku xalixkajni tlawakgonit chu talakgxtumit nema ni xlitatlawat,* chu tlawakgonit tuku ni xlilat chu ni lilakamaxanankgo.*

13 Uma xlimakgtutu akxni kwan: «Nakkalakganachan». «Xlakata natakatsi komo tuku wankan xlikana o ni, xliʼanat chatiy o kgalhtutu tatayananin». 2 Maski ni anta kkatawilachan, kmakgkatsi pi anta kkatawilaparachan. Wa xlakata alipulana kkawanima tiku tlawakgolh talakgalhin, chu nachuna putum amakgapitsin: Komo xchalh kilhtamaku nakanacha, ni ktikatapatilh. 3 Akxni chuna naktlawa nakkalimasiyaniyan pi Cristo kilimaklakaskin xlakata nachuwinan. Chu Cristo ni xaxlajwani akxni wi kmilakgstipankan, wata xla limasiya lanka xlitliwakga. 4 Xlakata xla makgnika kkiwi xlakata xaxlajwani xlitaxtu, pero lama kaj xlakata xlitliwakga Dios. Xlikana pi akinin na xaxlajwananin chuna la xla xwanit, pero akxtum natalatamayaw xpalakata xlitliwakga Dios nema skujma kmilakgstipankan.

5 Chuntiya kakalakputsananikantit xlakata nakatsiyatit komo tliwakga wi mintakanajlakan. Chuntiya kakalakputsananikantit xlakata nalimasiyayatit tiku wixin. ¿Ni liwana katsiyatit pi Jesucristo akxtum katawilan? Komo nichuna, Dios kalakgmakganitan. 6 Dios ni kinkalakgmakganitan akinin chu klakaskinaw pi kakatsitit uma.

7 Ktlawaniyaw oración Dios mimpalakatakan xlakata ni natlawayatit tuku nitlan, ni kaj xlakata nalitasiya pi tlan kinkaʼakxilhan Dios, wata xlakata wixin natlawayatit tuku xatlan, maski amakgapitsin nitlan nakinkaʼakxilhkgoyan. 8 Xlakata nila lakatakiyaw tuku xaxlikana, kajwatiya tlan skujaw xpalakata tuku xaxlikana. 9 Xlikana klipaxuwayaw akxni akinin xaxlajwananin, pero wixin lakgtliwakga. Chu wa uma tuku kskimaw kkiʼoracionkan: Pi wixin kalakkaxwiliparatit mintapuwankan. 10 Wa xlakata kkatsokgnaniman akxni ni anta kkatawilachan, xlakata akxni kkatawilachan nawan, ni palha nakkalikatsiniyan akxni naklimaklakaskin limapakgsin nema Malana* kimaxkilh, xlakata nakkamatliwakglhan chu ni kaj nakkalaktlawayan.

11 Natalan, wa uma tuku xaʼawatiya kkawaniman, chuntiya kapaxuwatit, chuntiya kalakkaxwiliparatit mintapuwankan, chuntiya kamastatit talakaskin tlan nakamamakgkatsinikanatit, akxtum kalakpuwantit, ni kakatakgalhitit taʼakglhuwit amakgapitsin; chu Dios tiku paxkinan chu masta takaksni akxtum nakatatawilayan. 12 Akxni nalamakgachipayatit chatunu chatunu kalamaxkitit xasanto tatsukni.* 13 Putum tiku xasantos kamalakgachanikgoyan xtamakgachipatkan.

14 Xtalakgalhaman nema ni anan xtachuna* xla Malana Jesucristo chu xtapaxkit Dios chu espíritu santo nema kimputumkan litamakgtayamaw, akxtum kakatatawilan.