TUKU KATSOKGNANIKA GÁLATAS

1 Akit, apóstol Pablo kkatsokgnaniman, ni chatum chixku kilaksakli apóstol nakwan, wata wa Jesucristo chu kinTlatkan* Dios tiku malakastakwanilh kkalinin. 2 Chuna, akit Pablo chu putum natalan* tiku akxtum kintawilakgolh kkatsokgnaniyan wixin, congregaciones nema wilakgolh kxlikalanka Galacia:

3 KinTlatkan Dios chu Malana* Jesucristo kakamaxkin talakgalhaman nema ni anan xtachuna* chu takaksni. 4 Xla mastalh xlatamat xpalakata kintalakgalhinkan, xlakata tlan xkinkalakgmaxtun kʼuma xalixkajni kakilhtamaku* chuna la xtalakaskin kinTlatkan Dios, 5 wa putum kilhtamaku kamaxkika kakni. Chuna kalalh.

6 Kaks kimalakawani pi lakapala tamakgatlinipatit* Tiku kalimasiyanin xtalakgalhaman nema ni anan xtachuna* xpalakata Jesucristo, xlakata namakglhtinanatit atanu tamakatsinin chuna la xatlan tamakatsinin. 7 Ni wa para wi atanu xatlan tamakatsinin; wata wilakgolh tiku kamakglhuwimakgon chu laktlawaputunkgo xatlan tamakatsinin xpalakata Cristo. 8 Pero para akinin o chatum ángel xalak akgapun xkalitachuwinan atanu tamakatsinin nixawa nema kkalitachuwinan, tiku lichuwinama uma kamalakgsputuka. 9 Chuna la kkawanin xapulana, chu amakgtum kkawaniparayan uku: komo anan tiku kalitachuwinaman atanu xatlan tamakatsinin chu ni wa tuku makgamakglhtinantit, tiku lichuwinama uma kamalakgsputuka.

10 Ni kputsa xlakata tlan nakiʼakxilhkgo latamanin, wata kputsama tlan nakiʼakxilha Dios, xlikana, ni wa kkamakgapaxuwaputun latamanin. Komo chuntiya xakkamakgapaxuwalh latamanin, ni xlakskujni Cristo xakwa. 11 Natalan, klakaskin kakatsitit pi ni wa makilhtsukikgolh latamanin xatlan tamakatsinin nema kkalitachuwinan; 12 xlakata nipara chatum chixku kimakamaxkilh chu ni chatum chixku kimasiyanilh, wata wa Jesucristo kimaʼakxilhnilh.

13 Xlikana, wixin kgaxpattit xlakata chuna la xaklikatsi xapulana akxni xakmakgtapakgsi kxtakanajlakan judíos, pi lu kputsastalanilh* xcongregación Dios chu xaklaktlawatilha; 14 chu akit tlakg xakkamakgatlajama kxtakanajlakan judíos, tiku na watiya kinkata xkgalhikgo xalak kinkachikin, xlakata xakmakgantaxtima xtalismaninkan kinatlatni xliputum kinaku. 15 Pero akxni Dios, tiku tlawalh pi xaklakachilh chu kintasanilh xlakata lhuwa xtalakgalhaman nema ni anan xtachuna,* lipaxuwalh 16 nakilimaklakaskin xlakata nakkalitachuwinan xatlan tamakatsinin latamanin xalak atanu kachikinin xlakata tlan xlakgapaskgolh xKgawasa, ni tunkun kskinilh tastakyaw chatum lataman;* 17 nipara kalh kJerusalén xlakata xakkakgalhskilh tiku apóstoles xlitaxtukgoya akxni akit nina apóstol xakwanit, wata kalh kʼArabia, chu alistalh ktaspitli kDamasco.

18 Alistalh, titaxtulh akgtutu kata kalh kJerusalén xlakata naklakgapaxialhnan Cefas* chu ktatamakgxtakgcha akgkukitsis kilhtamaku. 19 Pero nipara chatum apóstol kakxilhli, kajwatiya Santiago, xtala Malana. 20 Chu xlakata tuku kkatsokgnaniman, liwana kkawaniyan kxlakatin Dios pi ni kʼakgsaninama.

21 Alistalh, ktanulh kxkachikinin Siria chu Cilicia. 22 Pero kstalaninanin Cristo tiku wilakgolh kcongregaciones xalak Judea nikxni xkiʼakxilhkgonit. 23 Kajwatiya xkgaxmatkgo: «Chixku tiku mincha kilhtamaku xkinkaputsastalaniyan, uku lichuwinama xatlan tamakatsinin xlakata takanajla nema mincha kilhtamaku xlaktlawatilha». 24 Wa xlakata tsukukgolh malankikgo Dios kimpalakata.

2 Alistalh, titaxtulh akgkutati kata, kampa kJerusalén chu ktaʼalh Bernabé chu Tito. 2 Kalh xlakata Malana* kimakatsinilh pi kiliʼanat xwanit chu kkamakatsinilh natalan tlan tamakatsinin nema xakkalitachuwinama tiku xalak atanu kachikinin. Pero kajwatiya kkatatamakxtumilh lakchixkuwin tiku tlakg xlakaskinka xlitaxtukgo kcongregación, xlakata xakkatsiputun komo tlan o nitlan tuku ktlawalh xpalakata Dios, komo nitlan, tuku ktlawalh kaj nitu litaxtulh. 3 Maski chuna, Tito tiku xkintaʼanit, ni xafuerza wanika pi naʼakstilichukunikan kxuwa xlichixku* maski griego xwanit. 4 Uma taʼakglhuwit malakatsukikgocha ni xaxlikana natalan* tiku minkgolh kinkaskgalakgoyan kcongregación, xlakan xlaktlawaputunkgo lakgtaxtut nema kgalhiyaw xpalakata akinin kstalaninanin Cristo, xlakata xlakskujnin nakalitaxtuniyaw; 5 ni kkakgaxmatniw, ni, nipara puntsu,* xlakata wixin ni xmakgatsankgatit xaxlikana nema kgalhiyatit xpalakata xatlan tamakatsinin.

6 Pero amakgolh lakchixkuwin tiku xtasiyakgo pi xlakaskinka xlitaxtukgo, ni kimasiyanikgolh tuku xasasti. Akit ni kinkuenta tuku xlitaxtukgo kilhtamaku nema mincha, xlakata Dios ni kaj akxilha chuna la tasiya chatum lataman. 7 Pero xlakan akxilhkgolh pi akit xkilakgayawakanit nakkalitachuwinan xatlan tamakatsinin tiku ni kaʼakstilichukunikanit kxuwa xlichixkukan* chuna la Pedro xlakgayawakanit nakalitachuwinan tiku kaʼakstilichukunikanit kxuwa xlichixkukan. 8 Dios maxkilh litliwakga Pedro xlakata apóstol nakalitaxtuni tiku kaʼakstilichukunikanit kxuwa xlichixkukan.* Chu Dios na kimaxkilh litliwakga xlakata naktlawa ama taskujut kxlakgstipan kachikinin. 9 Akxni xlakan akxilhkgolh pi Dios xkimaxkinit lhuwa talakgalhaman nema ni anan xtachuna,* Santiago* chu Cefas* chu Juan tiku la xanapuxkun* xlitaxtukgo kcongregación, kinkalimakgachipakgon xpakgastakatkan* akit chu Bernabé xlakata xlimasiyakgolh pi tlan xʼakxilhkgo pi akinin xakkalitachuwinaw xatlan tamakatsinin tiku xalak atanu kachikinin, chu xlakan tiku xkaʼakstilichukunikanit kxuwa xlichixkukan.* 10 Xlakan kajwatiya kinkaskinikgon pi putum kilhtamaku xakkalakapastakwi tiku limaxkgenin* chu lu kliskujnit xlakata chuna naktlawa.

11 Pero akxni Cefas* milh kʼAntioquía, kxlakatin kwanilh pi ni xlilat tuku xtlawanit. 12 Xlakata, akxni nina xminkgo lakchixkuwin tiku xkamalakgachanit Santiago,* xlismani xkatawayan latamanin xalak atanu kachikinin; pero akxni chinkgolh, nialh chuna tlawalh chu katamakgatlinilh xlakata kapekuanilh tiku xkaʼakstilichukunikanit kxuwa xlichixkukan.* 13 Nachuna amakgapitsin judíos tsukukgolh lakgaputiyunankgo chu asta Bernabé nachuna tsukulh lakgaputiyunan. 14 Akxni kakxilhli pi ni xlilamakgolh xatlan tamakatsinin, nema xaxlikana, kwanilh Cefas* kxlakatin xputumkan: «Komo wix, maski judío, lapat chuna la latamanin xalak atanu kachikinin chu nichuna la judíos, ¿tuku xlakata kamafuerzajniya latamanin nalilatamakgo xtalismaninkan judíos?».

15 Akinin tiku judíos lakachinitaw, chu ni lakgalhinanin xalak atanu kachikinin, 16 katsiyaw pi chatum lataman ni xaʼakgstitum litaxtu kxlakatin Dios kaj xlakata makgantaxtima tuku skin limapakgsin, wata komo kanajlani Jesucristo. Wa xlakata kanajlaninitaw Cristo Jesús, xlakata xaʼakgstitum nakinkaʼakxilhkanan xlakata kanajlaniyaw Cristo chu ni kaj xlakata makgantaxtimaw tuku skin limapakgsin, xlakata nila tiku* xaʼakgstitum naʼakxilhkan kaj xlakata makgantaxti limapakgsin. 17 Komo lakgalhinanin kinkalimaxtukanitan xlakata putsamaw xaʼakgstitum nalitaxtuyaw xpalakata Cristo, ¿wa Cristo tiku tlawa pi nalakgalhinanaw? ¡Nichuna! 18 Komo ama tuku klaktlawalh kʼatanu kilhtamaku kkaxtlawapara amakgtum, klimasiya pi akit ni kkgalhakgaxmata limapakgsin. 19 Akit kninit xlakata tuku wan limapakgsin, pero xlakata uma, klama xpalakata Dios. 20 Na kixtokgowakakanit kkiwi chuna la Cristo. Nialh akit tiku klama; wata wa Cristo tiku akxtum kintalama. Xlikana, klin kilatamat chuna la wi takanajla nema kkgalhini xKgawasa Dios, tiku kimpaxkilh chu tamakamastalh kimpalakata. 21 Ni klakgmakgan xtalakgalhaman Dios nema ni anan xtachuna,* xlakata komo chatum lataman tlan xaʼakgstitum litaxtu xpalakata limapakgsin, uma wamputun pi kaj nitu litaxtulh chuna la nilh Cristo.

3 ¡Xalaktontos* wixin gálatas! ¿Tiku kaʼakgskgawin akxni liwana xkamasiyanikanitantita chuna la Jesucristo kxtokgowakakanit kkiwi? 2 Kaj pulaktum tuku kkakgalhskimputunan:* ¿makglhtinantit espíritu kaj xlakata makgantaxtitit tuku skin limapakgsin o xlakata kanajlatit tuku kgaxpattit? 3 ¿Lu xalaktontos wixin? Xtsukunitantita mastayatit talakaskin pi espíritu xkapulalin, ¿pero uku lakgchipimputunatit tuku xlakkaxwilinitantit kaj xlakata xtalakapastaknikan latamanin?* 4 ¿Kaj nitu litaxtulh chuna la lhuwa patinantit? Liwana kkatsi pi nichuna. 5 Wa xlakata, ama tiku masta espíritu chu tlawa tuku kaks malakawaninan kmilakgstipankan, ¿chuna tlawa kaj xlakata makgantaxtiyatit tuku skin limapakgsin o xlakata kanajlayatit tuku kgaxpattit? 6 Chuna la Abrahán «kanajlanilh Jehová chu xaʼakgstitum liʼakxilhka xlakata xtakanajla».

7 Wixin liwana katsiyatit pi tiku kgalhikgo takanajla wa xkamanan Abrahán. 8 Makgasa, Dios wa kxtachuwin nema tatsokgnit pi xaʼakgstitum xʼama kalimaxtu tiku xalak atanu kachikinin xlakata xtakanajlakan, wa xlakata, Dios alipulana litachuwinalh Abrahán xatlan tamakatsinin akxni wanilh: «Kaj mimpalakata natasikulunatlawakgo putum kachikinin». 9 Wa xlakata, tiku kgalhikgo takanajla na kasikulunatlawamaka chuna la Abrahán, tiku kgalhilh takanajla.

10 Putum latamanin tiku kaj wa lipawankgo limapakgsin kakaʼakgspulalh tuku nitlan, xlakata tatsokgnit: «Kaʼakgspulalh tuku nitlan putum tiku ni ankgalhin kgalhakgaxmatkgo putum tuku tatsokgnit klibro xla Limapakgsin». 11 Nachuna, liwana tasiya pi kaj xlakata limapakgsin niti xaʼakgstitum akxilhkan kxlakatin Dios, xlakata «tiku xaʼakgstitum, nalatama xlakata xtakanajla». 12 Chu Limapakgsin ni takilhtinit ktakanajla. Wata «putum tiku natlawa tuku xaʼakgstitum chuna la wan Limapakgsin, nalikgalhi latamat». 13 Cristo xokgonalh chu kinkalakgmaxtun xlakata tuku nitlan xʼama kinkaʼakgspulayan xpalakata Limapakgsin, akxni akgspulalh tuku nitlan kimpalakatakan, xlakata tatsokgnit: «Kaʼakgspulalh tuku nitlan putum lataman tiku mawakakan kkiwi». 14 Uma chuna lalh xlakata xtasikulunalin Abrahán tlan xkalakgchalh latamanin xalak atanu kachikinin kaj xpalakata Cristo Jesús, xlakata kintakanajlakan xlimakglhtinaw espíritu nema xmalaknukanit.

15 Natalan, xtachuna la liʼakxilhtit klimaklakaskima tuku tlawakgo latamanin chali chali xlakata nakkatachuwinanan: akxni akgtum talakkaxlan lakkaxwilikanita, maski kaj chatum lataman lakkaxwilinit, niti laktlawa chu niti maliwaka. 16 Chu tamalaknun tlawanika Abrahán chu xkam.* Ni wan «minkamanan»* xtachuna xkilhchanilh lhuwa latamanin. Wata wan «minkam»,* uma kilhchanima kaj chatum lataman, wa Cristo. 17 Nachuna, kkawaniyan uma: Limapakgsin nema lakatsukulh akgtati ciento puxamakaw kata alistalh, ni laktlawa talakkaxlan nema xapulana xtlawanit Dios, wa xlakata ni laktlawa tamalaknun. 18 Xlakata komo tamaskiwin nema Dios masta takilhti klimapakgsin, nialh takilhti kʼakgtum tamalaknun; pero Dios xalakgalhamana limakamaxkilh Abrahán akgtum tamalaknun.

19 ¿Tuku xlakata mastaka Limapakgsin? Mastaka xlakata xtasiyalh talakgalhin, asta akxni xchilh xkam* Abrahán, tiku xtlawanikanit tamalaknun; Dios kamaklakaskilh ángeles xlakata xmaxkikgolh Moisés Limapakgsin. Chu Moisés kamaxkilh latamanin. 20 Pero akxni kaj chatum lataman makgtanuma, ni talakaskin pi wi tiku namasta talakkaxlan. Chuna kitaxtu xpalakata Dios, xla kaj xʼakstu xwi akxni tlawalh ama tamalaknun. 21 Wa xlakata, ¿lakataki Limapakgsin xtamalaknun Dios? ¡Nichuna! Xlakata komo xmastaka akgtum limapakgsin nema tlan xmastalh latamat, tuku xaʼakgstitum xʼanalh kaj xpalakata limapakgsin. 22 Pero xTachuwin Dios masiyalh pi talakgalhin xtachuna la xatachin xkawilikgonit latamanin. Chuna tiku kgalhikgo takanajla tlan namakglhtinankgo tuku tlan nema kamalaknunikanit tiku kgalhinikgo takanajla Jesucristo.

23 Pero akxni nina xkanajlaniyaw Cristo xtapakgsiniyaw limapakgsin, xkinkamakamastakanitan xlakata xkinkapulalin, xkgalhkgalhimaw takanajla nema xʼamakaja masiyakan. 24 Wa xlakata Limapakgsin litaxtulh tiku kinkapulalin* kxlakatin Cristo, xlakata xaʼakgstitum xkinkalimaxtukan xpalakata takanajla. 25 Pero la uku kanajlaniyawa Cristo, chu nialhti kinkapulaliman.*

26 Mimputumkan xkamanan Dios litaxtuyatit xlakata kanajlaniyatit Cristo Jesús. 27 Xlakata putum wixin tiku kamunukantit chu uku akxtum tawilatit Cristo, lilhakgananitantit xtayat Cristo. 28 Ni anan nipara judío o griego, nipara skujni o tiku ni skujni, ni anan nipara chixku o puskat, xlakata putum wixin makxtum wilatit chuna la kstalaninanin Cristo Jesús. 29 Nachuna, komo tapakgsiniyatit Cristo, xlikana xkamanan* Abrahán litaxtuyatit, chu tlan namakglhtinanatit tamaskiwin* nema malaknunika Abrahán.

4 Pero kkawaniyan, pi komo kajku aktsu kgawasa tiku xlilakgchanat putum tuku kgalhi xtlat, xla na xtachuna la skujni litaxtu, maski wa xmalana* putum tuku anan, 2 xlakata anan tiku kuentajtlawama chu tiku kuentajtlawa tuku kgalhi kxchik asta akxni nachan kilhtamaku nema laklhkawilinit xtlat.* 3 Nachuna akinin, akxni kajku laktsu kamanan xwanitaw, kskujni xlitaxtuniyaw chuna la lakpuwan chu chuna la likatsi uma kakilhtamaku. 4 Pero akxni takgatsilh kilhtamaku, Dios malakgachalh xKgawasa, nema malakachinilh chatum puskat chu lilh xlatamat chuna la xwi limapakgsin, 5 xlakata tlan kxokgonalh chu xkalakgmaxtulh tiku xatachin xkawilinit limapakgsin, xlakata akinin tlan xkamanan Dios xlitaxtuw.

6 Chu xlakata wixin xkamanan Dios, wa xlakata Dios wilinit espíritu santo kkinakujkan. Wa espíritu santo nema maxkilh xKgawasa. Chu uma espíritu santo tlawa pi nawanaw: «¡Abba,* Tlat!».* 7 Wa xlakata, wix nialh skujni litaxtuya, xlakata xkgawasa Dios wix. Chu komo wix xkgawasa Dios, xla na namaxkiyan putum tasikulunalin.

8 Pero akxni wixin nina xlakgapasatit Dios, kskujnin xlitaxtuniyatit tiku ni xaxlikana dioses. 9 Xlakata la uku lakgapasnitantita Dios o, wata wa Dios kalakgapasnitana, ¿tuku xlakata lakgtaspitpatit tuku xaxlajwani chu xtapuwan nema nitu litaxtu chu la likatsi uma kakilhtamaku chu xlakskujnin litaxtuputumparayatit amakgtum? 10 Chu lu liwana makgantaxtipatit tuku lakgchan akgtum chichini, papaʼ, kilhtamaku* chu kata. 11 Kpekuan xlakata max kaj paxkat litaxtulh kintaskujut nema ktlawalh mimpalakatakan.

12 Mincha kilhtamaku, akit nachuna xaklikatsi la wixin. Wa xlakata, natalan,* kkatasaskiniyan pi nachuna kalikatsitit chuna la klikatsi uku. Wixin nitu kintlawanitit tuku nitlan. 13 Nachuna, wixin katsiyatit pi akxni xlimakgtumku kkalitachuwinan xatlan tamakatsinin, chuna lalh xlakata kintajatat 14 wixin ni xkajnitit kintajatat, maski kaliminin taʼakglhuwit. Ni kilakgmakgantit, wata tlan kilikatsinitit; kimakgamakglhtinantit chuna la chatum xʼángel Dios, xtachuna la Cristo Jesús. 15 ¿Niku wi mintapaxuwankan nema xkgalhiyatit? Xlakata liwana kkatsi pi asta xtimaxtuputuntit milakgastapukan xlakata xkimaxkitit, komo uma xkimakgtayalh. 16 Pero la uku, ¿mintalatlawanakan klitaxtu kaj xlakata kkawaniyan tuku xaxlikana? 17 Umakgolh lakchixkuwin lu liskujmakgolh xlakata nakgalhankgo minakujkan, pero ni xlakata lakaskinkgo pi tlan nakakitaxtuniyan, wata lakaskinkgo pi nakintamakgatliniyatit chu wata wa nakastalaniyatit. 18 Pero komo wi tiku lu kaputsayan xlakata tlan nakakitaxtuniyan, uma lu tlan mimpalakatakan. Komo uma chuna lay putum kilhtamaku chu ni kaj akxni anta kkatawilachan, 19 kinkamanan, uma lu tlan mimpalakatakan. Kmakgkatsi takatsanajwat xtachuna la akxni chatum tse* ama malakachini kskgata. Chu chuntiya nakmakgkatsi uma takatsanajwat asta akxni nalimasiyayatit pi kgalhiyatit xtayat Cristo. 20 Klakpuwan pi anta xakkatatawilachan la uku, chu tanu la xakkatachuwinan, xlakata ni kʼakgatekgsa tuku kaʼakgspulaman.

21 Kakiwanitit, wixin, tiku kgalhakgaxpatputunatit limapakgsin, ¿ni katsiyatit tuku wan Limapakgsin? 22 Akgtum liʼakxilhtit, anta tatsokgnit pi Abrahán kgalhilh chatiy xlakgkgawasan, chatum xla skitiwina chu chatum xla puskat tiku ni skujni xlitaxtu; 23 pero xkgawasa skitiwina lakachilh chuna la lakachinkgo putum kamanan, chu xkgawasa puskat tiku ni skujni xlitaxtu lakachilh xpalakata akgtum tamalaknun. 24 Uma kaj wi tuku kilhchanima; xlakata umakgolh chatiy lakpuskatin kilhchanima pulaktiy talakkaxlan, xapulana wa nema tlawaka ksipi Sinaí, nema kamalakachini xkamanan xlakata skujnin nalitaxtukgo chu uma wa Agar. 25 Wa xlakata, Agar kilhchanima Sinaí, akgtum lanka sipi xalak Arabia, chu xla Jerusalén xala uku, xlakata skujni litaxtu chu nachuna xkamanan. 26 Pero Jerusalén xala talhman ni skujni litaxtu, chu wa kintsekan.

27 Anta kxTachuwin Dios wan: «Kapaxuwa puskat maski ni kgalhinita kamanan, pixlanka* kapaxuwa maski nikxni makgkatsinita takatsanajwat akxni malakachinikan skgata. Puskat tiku akgxtakgwilikanit tlakg kgalhi kamanan nixawa puskat tiku kgalhi xchixku». 28 Wa xlakata, natalan, wixin kamanan xpalakata akgtum tamalaknun, nachuna la litaxtulh Isaac. 29 Xtachuna la ama kilhtamaku tiku lakachilh chuna la lakachinkgo putum kamanan, tsukulh putsastalani tiku lakachilh xpalakata xlitliwakga espíritu, la uku nachuna. 30 Pero ¿tuku wan tatsokgni? «Katlakgalipi skitiwina chu xkgawasa, xlakata tuku lakgchan xkgawasa puskat tiku ni skujni litaxtu, ni katitatapapitsilh xkgawasa skitiwina». 31 Wa xlakata, natalan, akinin ni xkamanan skitiwina wata wa xkamanan puskat tiku ni skujni litaxtu.

5 Wa Cristo kinkalakgmaxtun xlakata nalipaxuwayaw uma lakgtaxtut. Wa xlakata, ni kamakgatsankgatit chu ni amakgtum kalitaxtuparatit xtachuna la skujnin.

2 ¡Kaʼakxilhtit! Akit, Pablo, kkawaniman pi komo wixin kaʼakstilichukunikanatit kxuwa milichixkukan,* tuku tlawanit Cristo ni katilitamakgtayatit. 3 Amakgtum kmalakapastaka putum lataman tiku akstilichukunikanit kxuwa xlichixku,* pi xlilat namakgantaxti putum Limapakgsin. 4 Tamakgatlininitantit Cristo, wixin tiku putsapatit xaʼakgstitum nalitaxtuyatit xpalakata limapakgsin; makgat wilanitit xtalakgalhaman nema ni anan xtachuna.* 5 Kimpalakatakan, lu kgalhkgalhimaw xaʼakgstitum nalitaxtuyaw kxlakatin Dios, nema chuna tlan kitaxtu kaj xlakata espíritu santo chu kintakanajlakan. 6 Xlakata akxni litaxtukan kstalanina Cristo Jesús, ni xlakaskinka komo chatum lataman akstilichukunikanit kxuwa xlichixku* o ni, pero takanajla wa tuku xlakaskinka, chu tuku tlawa takanajla chuna tlawa kaj xlakata tapaxkit.

7 Wixin tlan chuna la xkgosnampatit.* ¿Tiku kamalaktlawin xlakata nialh xkgalhakgaxpattit tuku xaxlikana? 8 ¿Tiku tlawalh pi chuna natlawayatit? Ni wa Tiku katasaniman. 9 Kaj tsinu limaxkutin maxkuti putum harina nema talakgwilhakanit chuchut. 10 Liwana kkatsi pi wixin tiku akxtum tawilatit Malana* nachuna lakpuwanatit xtachuna la akit; pero putum tiku katlawaniyan tuku nitlan namalakgaxokgekan. 11 Chu kimpalakata, natalan, komo chuntiya xaklichuwinalh xpalakata akstilichukunikan kxuwa xlichixku* chatum lataman, xlakan ni xkimputsastalanikgolh, chu kintamasiy xlakata chuna la nilh Jesús kkiwi nema makgapatinan* nialh xlisitsikgolh latamanin. 12 Xaklakaskilh pi xkachukuktinikgoka xlichixkukan* lakchixkuwin tiku kalaktlawaputunan.

13 Natalan, wixin kalaksakkanitantit xlakata nalakgtaxtuyatit, ni kalimaklakaskintit uma lakgtaxtut kaj xlakata natlawayatit tuku tlawaputun mimaknikan; kamastatit talakaskin pi skujnin nalalitaxtuniyatit chatunu chatunu kaj xlakata tapaxkit. 14 Xlakata putum Limapakgsin kaj akgtum limapakgsin litaxtu chu wa uma: «Milipaxkit mintalataman chuna la miʼakstu paxkikana». 15 Pero komo wixin chuntiya laxkapatit chu lawapatit chatunu chatunu, kuenta katlawatit xlakata ni nalamasputuyatit.

16 Pero kkawaniyan: chuntiya kamastatit talakaskin nakapulalinan xʼespíritu Dios chu ni natlawayatit tuku tlawaputun xamakglakgalhina mimaknikan. 17 Xlakata tuku tlawaputun xamakglakgalhina makni talatlawa xtalakaskin espíritu, chu espíritu talatlawa xamakglakgalhina makni; umakgolh latalatlawakgo, xlakata ni natlawayatit tuku tlawaputunatit. 18 Nachuna, komo wa espíritu kapulaliman, nialh wa tapakgsiniyatit limapakgsin.

19 Chu xtatlaw xamakglakgalhina makni liwana tasiya, chu wa umakgolh: talakgxtumit nema ni xlitatlawat,* tuku xalixkajni, tlawakan tuku ni xlilat chu ni lilakamaxanankan,* 20 kakninanikan tatlawamakgxtu,* taskuwan, lasitsinikan, lakilhnikan, lalakgkatsalakanikan, lu sitsikan, lataratlawakan, tapapitsikan, stalanikan xtamasiykan lakchixkuwin, 21 lalakgsitsilakankan, kgachikan, xaʼakglakgwa paskua* chu amakgapitsi xtachuna la umakgolh. Chu alipulana kkamakatsiniyan xlakata uma, chuna la kkawaninitana, pi tiku lismanikgo tlawakgo uma, ni katimakglhtinankgolh xTamapakgsin Dios.

22 Pero tayat nema espíritu tlawa pi latamanin nakgalhikgo wa umakgolh: paxkinankan, paxuwakan, kgalhikan takaksni, kgalhkgalhinankan,* tlawakan tuku tlan, tlan likatsikan, kgalhikan takanajla, 23 kgalhikan tsatata naku, machokgokan tuku tlawaputunkan. Ni anan limapakgsin nema wan pi ni natlawakan putum uma. 24 Nachuna, tiku tapakgsinikgo Cristo Jesús, makgnikgonit* tuku ni xatlan nema lu tlawaputun xmaknikan.

25 Komo lilamaw xtapulalit espíritu, chuntiya kastalaniw xtapulalit espíritu. 26 Ni lankajwa kakinkamakgkatsikan, ni kamalakatsukiw pi nalatlajaputunaw, ni nalalakgkatsalakaniyaw chatunu chatunu.

6 Natalan, asta maski chatum chixku nina katsi pi ama ktiji nema ni xatlan, wixin tiku kapulaliman espíritu, kalimasiyatit pi kgalhiyatit tsatata naku akxni nalitsakgsayatit namaspitatit ktiji nema xatlan. Pero miʼakstukan kuenta kakatlawakantit xlakata max na nakamatlawiputunkanatit tuku nitlan. 2 Chatunu chatunu chuntiya kalalipinitit mintakukakan chu chuna namakgantaxtiyatit xlimapakgsin Cristo. 3 Xlakata komo wi tiku lakpuwan pi xlakaskinka litaxtu pero nichuna, xʼakstu taʼakgskgawima. 4 Pero chatunu chatunu kuenta katlawalh tuku tlawa. Komo chuna natlawa, nalipaxuwa xtatlaw, chu ni akxni natamalakxtumi tuku tlawakgo amakgapitsin. 5 Xlakata chatunu chatunu nalin xtakuka nema lakgaya.

6 Nachuna, putum tiku masiyanimaka* xTachuwin Dios kalimakgtayalh putum tuku tlan tiku masiyama.*

7 Ni kataʼakgskgawitit: nila likgalhkgamanankan Dios. Xlakata putum tuku chatum lataman chantilhama, na wa namakgala; 8 xlakata tiku chananama chu wa lilakpuwama tuku lu tlawaputun xalakgalhina xmakni, namakgala tuku nitlan kaj xlakata xtatlawaputu xalakgalhina xmakni; pero tiku chananama chu wa lilakpuwan tuku tlawaputun espíritu, namakgala latamat nema ni kgalhi xlisputni kaj xlakata espíritu. 9 Wa xlakata ni kalimakgxtakgwi chuna la tlawamaw tuku tlan, xlakata namakgalananaw akxni xlilat komo ni natlakgwanaw.* 10 Wa xlakata akxni tlan chuna natlawayaw,* putum kakatlawaniw tuku tlan, pero liwaka kakamakgtayaw tiku watiya takanajla kgalhikgo chuna la akinin.

11 Kaʼakxilhtit pi laklanka letras nema akit kkalitsokgnanin.

12 Putum ama tiku makgapaxuwaputunkgo latamanin wa tiku litsakgsamakgo nakamafuerzajniyan nakaʼakstilichukunikanatit kxuwa milichixkukan,* xlakan chuna tlawakgo xlakata ni nakaliputsastalanikan Cristo.* 13 Xlakata asta tiku kaʼakstilichukunikan kxuwa xlichixkukan* ni makgantaxtikgo Limapakgsin, pero lakaskinkgo pi wixin kakaʼakstilichukunikantit kxuwa milichixkukan xlakata nalilankajwanankgo kaj xlakata tuku tlawanika miliwakan. 14 Pero akit nikxni kaklilankajwanalh, kajwatiya xpalakata kiMalanakan* Jesucristo, tiku nilh kkiwi nema makgapatinan.* Kimpalakata, xlakata Jesús nilh, latamanin kalakgchan nakamakgnikan,* pero xpalakata latamanin, akit kilakgchan nakimakgnikan xlakata Jesús nilh. 15 Komo akstilichukunikanita kxuwa milichixku* o ni, uma ni xlakaskinka, pero akgtum xasasti tamalakatsukin wa tuku xlakaskinka. 16 Putum tiku xaʼakgstitum makgantaxtikgo uma limapakgsin nema pulalin kilatamatkan, chuna, xʼIsrael Dios, kakgalhilh takaksni chu Dios kalimasiyanilh talakgalhaman.

17 Wi kkimakni tuku litasiya pi kskujni Jesús akit, wa xlakata nialhti kalichuwinalh tuku nitlan kimpalakata.

18 Natalan, kakgalhitit xtalakgalhaman kiMalanakan Jesucristo nema ni anan xtachuna* akxni wixin limasiyapatit nawan xalaktlan tayat. Chuna kalalh.