TUKU KATSOKGNANIKA EFESIOS

1 Akit, Pablo, chatum xʼapóstol Cristo Jesús xlakata xtalakaskin Dios, kkatsokgnaniman wixin xasantos natalan tiku wilatit kʼÉfeso chu ni makgxtakgatit Cristo Jesús:

2 KinTlatkan* Dios chu Malana* Jesucristo kakamaxkin talakgalhaman nema ni anan xtachuna* chu takaksni.

3 Kamalankika xDios chu xTlat kiMalanakan Jesucristo, xlakata kʼakgapun kinkalisikulunatlawanitan putum tasikulunalin nema masta espíritu santo xlakata akxtum tawilaw Cristo, 4 xlakata xla kinkalaksakni akxtum natatawilayaw Cristo akxni nina xmakilhtsukikan kakilhtamaku, xlakata xasantos chu ni xataxkajwani xlitaxtuw kxlakatin Dios xlakata paxkiyaw. 5 Xlakata Dios alipulana lakkaxwililh pi xkamanan xlitaxtuw kaj xpalakata Jesucristo, chuna la xla lakgatilh chu chuna la lakaskilh. 6 Uma chuna kitaxtunit xlakata latamanin namalankikgo Dios xlakata limaklakaskilh xKgawasa tiku lu paxki xlakata nakinkalimasiyaniyan xtalakgalhaman nema ni anan xtachuna.* 7 Xpalakata xKgawasa kgalhiyaw lakgtaxtut xlakata lixokgonalh xkgalhni, chuna, kinkatapatikanan kintalakgalhinkan, xlakata putum tuku tlan kitaxtu xpalakata xtalakgalhaman nema ni anan xtachuna.*

8 Dios kinkamaxkin lhuwa talakgalhaman nema ni anan xtachuna* chu nachuna liskgalala chu taʼakgatekgsni,* 9 akxni kinkamakatsinin tuku tsekg xwilinit xpalakata xtalakaskin. Uma tuku tsekg xwilinit xʼakstu lakkaxwililh chu chuna lakgatilh. 10 Xlakata nalakkaxwili la* nakuentajtlawakan tuku anan chu uma chuna nala akxni natakgatsi kilhtamaku nema laklhkawilinit, namamakxtumi putum tuku anan kxlakatin Cristo, tuku anan kʼakgapun chu tuku anan kkatiyatni. Chuna, kxlakatin Cristo 11 tiku akxtum ktawilaw. Dios kinkalaksakni xlakata nakmakglhtinanaw tuku xla kinkamalaknunin, alipulana xkinkalaksaknitan chuna la xlakkaxwilinita tiku makgantaxti putum tuku lakpuwanit natlawa chuna la wi xtalakaskin, 12 xlakata akinin tiku pulana kkanajlaniw Cristo xakliskujwi xlakata nakmaxkiyaw kakni chu nakmalankiyaw Dios. 13 Pero wixin na kanajlanitit akxni kgaxpattit xaxlikana, wa xatlan tamakatsinin nema lichuwinan pi Dios kalakgmaxtuman. Akxni wixin xkanajlanitantita, limaklakaskilh espíritu santo nema xmalaknunit xlakata nakawiliniyan sello. Xla limaklakaskilh Cristo xlakata chuna natlawa. 14 Espíritu santo xtachuna akgtum tamalaknun* nema masiya pi namakglhtinanaw tuku Dios kinkamalaknunin. Dios chuna tlawalh xlakata naxokgo chu nalakgmaxtu xkachikin, uma natlawa pi nalimaxkikan lhuwa kakni.

15 Wa xlakata, lata akxni kkgaxmatli pi kgalhiniyatit takanajla Malana Jesús chuna la kalimasiyaniyatit tapaxkit putum tiku xasantos, 16 ni klimakgxtakga chuna la kpaxtikatsini Dios mimpalakatakan. Chu chuntiya ktlawa oración mimpalakatakan, 17 xlakata Dios, Tlat tiku kgalhi putum lilanka, xDios kiMalanakan Jesucristo, kakamaxkin litliwakga xlakata lakgskgalalan nawanatit chu naʼakgatekgsatit* tuku makatsininan, chu liwana nalakgapasatit. 18 Dios malakki minakujkan xlakata tlan naʼakxilhatit chu nalakgapasatit takgalhkgalhin nema kamaxkiyan, chu tuku xatlan nema ni anan xtachuna, nema xla kamalaknuninit tiku xasantos, 19 chu xlakata nalakgapasatit lhuwa xlitliwakga nema kinkamasiyaninitan akinin tiku kanajlanin. Litasiyanit xpalakata taskujut nema xla tlawanit kaj xlakata lhuwa xlitliwakga, 20 nema limasiyalh akxni malakastakwanilh Cristo kkalinin chu wililh kxpakgastakat* anta kʼakgapun, 21 tlakg talhman wililh nixawa putum mapakgsinanin chu puxkunanin chu tiku kgalhikgo litliwakga chu pulalinanin, chu putum tukuwani, ni kajwatiya kʼuma kakilhtamaku* nachuna kkakilhtamaku nema aku mima. 22 Xla na wililh putum tuku anan kxtampin xtantun chu xʼakgxakga tlawalh putum tuku anan kcongregación, 23 nema xmakni litaxtu chu xla kamaxki xlakskujnin putum tuku maklakaskinkgo.

2 Nachuna, xpalakata mintalakgalhinkan, xtachuna xninitantit, pero Dios kamaxkiparan latamat. 2 Milh kilhtamaku wixin xlapatit chuna la kakilhtamaku chu xtlawayatit tuku xlakaskin xmapakgsina uma kakilhtamaku. Xla mapakgsi uma un nema kamapakgsi latamanin, wa uma un o talakapastakni nema uku kamapakgsi tiku ni kgalhakgaxmatnankgo. 3 Xlikana, putum akinin xlinaw kilatamatkan chuna la xlakaskin kimaknikan, xtlawayaw tuku xtlawaputun kimaknikan, chu xtlawayaw tuku xlakpuwanaw, chu lata akxni lakachiw xkinkalakgchanan xtasitsi Dios chuna la amakgapitsin. 4 Pero Dios, tiku lu lakgalhamanan chu xlakata lu kinkapaxkin, 5 kinkamaxkin latamat chu akxtum kinkatawilin Cristo, maski xninitaw xpalakata kintalakgalhinkan, kalakgmaxtukanitantit xpalakata talakgalhaman nema ni anan xtachuna.* 6 Nachuna, Dios kinkamaxkiparanitan latamat chu kinkamaxkinitan niku tlan natawilayaw kʼakgapun, xlakata Dios akgtuma kinkatatlawanitan Cristo Jesús, 7 Dios tlawa uma xlakata kkakilhtamaku* nema aku mima, xla nalimasiya pi lu tlan kinkalikatsiniyan akxni natlawa tuku tlan kimpalakatakan, tiku akxtum tapakgsiniyaw Cristo Jesús.

8 Xpalakata uma talakgalhaman nema ni anan xtachuna* wixin kalilakgmaxtukanitantit takanajla, uma ni wixin lakkaxwilinitantit; wata xtamaskiwin* Dios. 9 Ni, ni wa xlakata tuku tlawanitantit, xlakata ni naʼanan tiku wi tuku nalitlankajwanan. 10 Xlakata Dios kinkalimalakatsukinitan xmakan chu xlakata akxtum tawilaw Cristo Jesús, kinkamalakatsukikan xlakata namakgantaxtiyaw laktlan tatlaw, nema Dios alipulana lakkaxwililh pi xmakgantaxtiw.

11 Wa xlakata, kalakapastaktit pi wixin ni judíos, chu latamanin tiku lakchixkuwin «kaʼakstilichukunikgonit kxuwa xlichixkukan» kalimapakuwikgoyan latamanin tiku «ni kaʼakstilichukunikanit kxuwa xlichixkukan». 12 Ama kilhtamaku ni xlakgapasatit Cristo, makgat xwilanitit kachikin Israel chu ni xmakgtanuyatit ktalakkaxlan xla tamalaknun; chu akxni xlapatit kkakilhtamaku ni xlakgapasatit Dios, na ni xkgalhiyatit takgalhkgalhin. 13 Pero xlakata uku akxtum tawilatit Cristo Jesús, wixin tiku makgasata ni xlakgapasatit Dios, la uku* lakgapasatit xlakata xkgalhni Cristo. 14 Xlakata Cristo kinkaliminin takaksni, xla makxtum tlawalh akgtiy grupo chu lakxtlawalh patsaps nema xkinkamapapitsiyan. 15 Xlakata makamastalh xmakni, masputulh xLimapakgsin Moisés nema xkinkamapakgsiyan, uma xtlawa pi ni xlatalalinkgolh pulaktiy grupo. Chu xlakata uma pulaktiy grupo makxtum tlawalh, xlikana, uma pulaktiy grupo kstalaninanin chu Cristo tlawalh pi tlan xlatalalinkgolh, 16 chu xlakata liwana nakamakgtaya pulaktiy grupo nema xtachuna la akgtum xmakni litaxtu xlakata tlan natalalinkgo Dios, kaj xlakata kiwi nema makgapatinan,* xlakata xmakni limapanulh talamakgasitsin. 17 Chu xla milh chu kalitachuwinan xatlan tamakatsinin xlakata takaksni, wixin tiku ni xlakgapasatit Dios, chu na kalitachuwinalh tiku xlakgapaskgo, 18 xpalakata xla, akinin, pulaktiy kachikinin nitu kinkamalakgachokgoyan chu tlan natalakatsuwiniyaw xaTlat* kaj xpalakata akgtum espíritu.

19 Wa xlakata wixin nialh xalak atanu país, wata makgtapakgsiyatit kxkachikinkan tiku xasantos chu na makgtapakgsiyatit kxchik Dios, 20 chu wixin xtachuna chiwix nema Dios lakkaxwililh kxkilhtsukutkan apóstoles chu palakachuwinanin, chu Cristo Jesús wa tiku tlakg xlakaskinka chiwix nema limakilhtsukinankan. 21 Ama chiki nema tatlawama putum tuku litakgatsi liwana lakgnu. Chu xlakata akxtum tawi Cristo, staktilhama xlakata akgtum xasanto templo nalitaxtuni Jehová. 22 Xlakata akxtum tawilatit Cristo, Dios akxtum katlawanitan wixin chu amakgapitsin akgtum chiki niku xla wi, xlakata anta wi xʼespíritu.

3 Wa xlakata akit, Pablo, ktanuma kpulachin xlakata ktapakgsini Cristo Jesús chu xlakata nalitamakgtayayatit wixin, tiku ni judíos. 2 Wixin xlikana kgaxpatnitantit pi kmakglhtinanit taskujut nakkamakgtayayan nalitamakgtayayatit xtalakgalhaman Dios nema ni anan xtachuna.* 3 Chuna, Dios kimakatsinilh tuku tsekg xwilinit; akit kaj ni lhuwa kkatsokgnanin xlakata uma kkilhtamaku nema titaxtulh. 4 Wa xlakata, akxni nalikgalhtawakgayatit uma, nakatsiyatit pi liwana kʼakgatekgsa* tuku tsekg xwi xla Dios xpalakata Cristo. 5 Uma tuku tsekg xwi xla Dios ni kamakatsinika tiku latamakgolh makgasa, chu uku xpalakata espíritu kamakatsinika xasantos xʼapóstoles chu xpalakachuwinanin. 6 Wa uma tuku tsekg xwi: tiku ni judíos chu akxtum tawilakgolh Cristo Jesús namakglhtinankgo tuku namakglhtinan Cristo, chu namakgtapakgsikgo kʼakgtum makni. Xlakan na namakglhtinankgo tuku Dios kinkamalaknuninitan xlakata xatlan tamakatsinin. 7 Kskujni klitaxtunilh uma tuku tsekg xwi kaj xlakata xtalakgalhaman Dios nema ni anan xtachuna.* Xla kimaxkilh uma tamaskiwin* kaj xachunata akxni kimaxkilh xlitliwakga.

8 Akit, tiku tlakg nitu klitaxtu nixawa tiku ni lu xlakaskinka xliputum tiku xasantos, kimaxkika xtalakgalhaman Dios nema ni anan xtachuna,* xlakata nakkamakatsini atanu kachikinin xatlan tamakatsinin nema nila putum akgatekgskan* xpalakata Cristo, 9 chu uma natlawa pi latamanin naʼakxilhkgo la* Dios, tiku tlawalh putum tuku anan, pulalima tuku tsekg xwi, nema matsekgnit lata makgasata. 10 Uma chuna lalh xlakata uku mapakgsinanin chu napuxkun xalak akgapun xkatsikgolh xpalakata congregación pi tipalhuwa la* tasiya xliskgalala Dios. 11 Dios wi tuku lakkaxwilinit natlawa chu xla nalimaklakaskin Cristo Jesús kiMalanakan* xlakata natlawa chuna la nalakaskin, 12 xpalakata xla, akinin ni pekuanaw akxni chuwinanaw chu liwana katsiyaw pi tlan nalakgtalakatsuwiniyaw Dios, xlakata kanajlaniyaw Cristo. 13 Wa xlakata kkaskiniyan pi ni kalitaxlajwanitit kintalakgaputsit nema kkgalhi mimpalakatakan, xlakata kaliminiyan kakni.

14 Wa xlakata klakgtatsokgosta xaTlat,* 15 xpalakata Xla, wilakgolh putum familia xalak akgapun chu xalak katiyatni. 16 Ktlawa oración xlakata Dios, tiku kgalhi lhuwa kakni, kalimaklakaskilh litliwakga nema masta xʼespíritu xlakata namatliwakglha minakujkan chu mintalakapastaknikan. 17 Ktlawani oración Dios xlakata nakgalhiyatit Cristo kminakujkan, chu nachuna tapaxkit xpalakata amakgapitsin, xlakata mintakanajlakan. Tliwakglh katawilatit xtachuna la kgantum lanka kiwi nema tliwakglh ya. 18 Xlakata wixin chu putum xasantos liwana naʼakgatekgsatit* la* xlitilanka, xlilhman, xlitalhman chu xlipulhman xaxlikana, 19 chu nalakgapasatit chuna la paxkinan Cristo, uma tlakg xlakaskinka nixawa takatsin, xlakata Dios nakamaxkiyan putum tayat nema kgalhi.

20 Chu Dios tiku kinkamaxkinitan xlitliwakga, tiku xlikana tlakg lhuwa tuku tlawa nixawa tuku skinaw chu nixawa tuku lakpuwanaw, 21 wa kalimaxkika kakni congregación chu Cristo Jesús putum kilhtamaku. Chuna kalalh.

4 Wa xlakata akit, tiku kintamaknukanit kpulachin xpalakata Malana,* kkaskiniyan pi chuna kalilatapatit tuku kalilaksakkanitantit, 2 katataktujutit* chu kakgalhitit tsatata naku, kakgalhkgalhinantit, kalimasiyatit tapaxkit akxni latatayaniyatit chatunu chatunu. 3 Makxtum wilatit xpalakata espíritu santo. Lu kaliskujtit xlakata chuntiya makxtum natawilayatit, ni nalatakgalhiyatit taʼakglhuwit chatunu chatunu. 4 Akgtum makni anan, akgtum espíritu santo anan, nachuna kaj akgtum takgalhkgalhin anan nema kalitasanikanitantit; 5 chatum Malana, akgtum tamasiy nema kanajlayaw, akgtum tamunut; 6 chatum Dios tiku xTlatkan* putum latamanin, tiku putum kamapakgsi, chu putum kalimaklakaskin xlakata wi tuku natlawa.

7 Dios kinkamasiyanin xtalakgalhaman nema ni anan xtachuna.* Uma litasiya chuna la Cristo kinkamapapitsinin tasikulunalin kinchatunukan. 8 Tatsokgni wan: «Akxni alh talhman, xla kalakgmaxtulh tiku xatachin xwilakgolh chu kamastalh la* akgtum tasikulunalin». 9 Chu, ¿tuku wamputun tachuwin «alh talhman»? Wamputun pi xla na milh katutsu, uma kilhchanima, katiyatni. 10 Ama tiku milh kkatiyatni, nachuna alh tlakg talhman nixawa akgapun, xlakata putum xkgantaxtulh.

11 Chu xla kamaxkilh congregación xlakata makgapitsi xlitaxtukgolh chuna la apóstoles, makgapitsi palakachuwinanin, makgapitsi tiku lichuwinankgo xatlan tamakatsinin, makgapitsi kuentajtlawananin chu makgalhtawakgenanin, 12 xlakata nakalinkgo kxatlan tiji* tiku xasantos, xlakata nakaskujnanikgo amakgapitsin, xlakata namatliwakglhkgo xmakni Cristo.* 13 Xlakan nakinkamakgtayakgoyan xlakata watiya tuku nakanajlayaw kimputumkan chu liwana nalakgapasaw xKgawasa Dios, chu chuna tliwakga natawila kintakanajlakan xtachuna la Cristo. 14 Wa xlakata nialh laktsu kamanan kalitaxtuw, xlakata tiku stalani tipakgatsi xtamasiykan lakchixkuwin tiku kaʼakgskgawikgo amakgapitsin, nalitaxtu xtachuna akgtum barco nema lhkgen lhkgen makan taʼakgayawana chu anu anu lin. 15 Kalawaniw tuku xaxlikana chu kalamasiyaniw tapaxkit, xlakata chuna xliputum tuku natlawayaw tliwakga nakgalhiyaw kintakanajlakan chuna la Cristo, xʼakgxakga makni. 16 Xpalakata Cristo, putum makni makgtaya makni xlakata nastaka chu tliwakga nakgalhi xtapaxkit. Chuna, akgatunu tuku litakgatsi makni liwana tatastukkgonit* chu xlilat nalalimakgtaya tuku litatastukkgo nema liwana tlawakgo xtaskujutkan, tuku litakgatsi makni tlawa xtaskujut chuna la lakgayawakanit.

17 Wa xlakata, kkalistakyawayan kxlakatin Malana pi wixin nialh kalatapatit chuna la tiku ni kanajlakgo, xlakata xlakan kaj lilamakgolh xtalakapastaknikan nema nitu litaxtu. 18 Xlakan kapukswa wilakgolh chu ni makglhtinankgo latamat nema Dios kinkamalaknuniyan, xlakata ni lakgapasputunkgo Dios, xlakata tsakatlanit* xnakujkan. 19 Nipara liʼakxilhkgo la* tuku nitlan akgtum talakgalhin, tamakamastanikgolh natlawakgo tuku ni xlilat chu ni lilakamaxanankgolh,* xlakata lu xtlawaputunkgo putum tuku lu xalixkajni.

20 Pero wixin ni makglhtinantit uma tamasiy xpalakata Cristo, 21 Jesús masiyalh tuku xaxlikana chu komo kgaxpatnitit chu wa kamasiyanin, liwana lakgapasatit uma. 22 Xlakata kamasiyanikantit pi nalakgmakganatit chuna la xlikatsiyatit makgasa chu tuku tlawatit makgasa. Xlakata mintayatkan xalamakgasa talakglakgalhinit, xlakata kaʼakgskgawin tuku xtlawaputunatit. 23 Xlilat chuntiya nakgalhiyatit akgtum xasasti talakapastakni,* 24 chu kalilhakganantit xasasti tayat nema litlawaka xtalakaskin Dios, chu uma tayat xlikana xaʼakgstitum chu ni makgxtakgnan.

25 Xlakata uku lakgmakganitantita taʼakgsanin, minchatunukan kawanilh xtalataman tuku xaxlikana, xlakata tatakgatsin litaxtuyaw nema latapakgsiniyaw. 26 Kasitsitit pero ni kalakgalhinantit; ni chuntiya sitsipatit nawan asta akxni natsankga chichini; 27 ni kamaxkitit talakaskin Akgskgawini wi tuku nakamatlawiyan. 28 Tiku kgalhanan nialh kakgalhanalh; wata katlawalh palha taskujut, kalitlawalh xmakan laktlan taskujut, xlakata tlan nakgalhi tuku namaxki tiku maklakaskin. 29 Ni kataxtulh kminkilhnikan nipara akgtum xamasni tachuwin, kajwatiya tuku matliwakglhnan chuna la talakaskima, xlakata nalitamakgtayakgo tiku kgaxmatmakgolh. 30 Nachuna, ni kamakgalipuwantit xʼespíritu santo Dios, nema kaliwilinin sello xpalakata kilhtamaku akxni nachin milakgtaxtutkan xlakata kapalakgaxokgon.

31 Katamakgatlinitit putum takiklhkatsa, tasitsi, lu sitsikan, takgaw, chu tachuwin nema tlawaninan tuku nitlan, nachuna putum tuku nitlan. 32 Wata tlan kalikatsitit chu kalalakgalhamantit chu lu kalatapatiputuntit chatunu chatunu, chuna la Dios lu katapatiputun xpalakata Cristo.

5 Wa xlakata, nachuna kalikatsitit la* Dios, xlakata wixin xkamanan tiku kapaxki, 2 chuntiya kalimasiyatit tapaxkit, chuna la Cristo kinkapaxkin* chu xla tamakamastalh kimpalakatakan* chu uma xtachuna la xamuksun tamakamastan kgankgawanan Dios.

3 Nipara nalichuwinanatit talakgxtumit nema ni xlitatlawat,* nipara putum tuku xalixkajni, nipara lhuwa tuku nakgalhiputunatit, xlakata ni xlilat chuna xlitlawatkan tiku tapakgsinikgo Dios; 4 nipara natlawayatit tuku xalimaxana, nipara nawanatit tuku nitu litaxtu, nipara lixkajni nakgalhkgamananatit, chu putum tuku ni xlilat, wata kamaxkitit paxtikatsinit Dios. 5 Xlakata katsiyatit uma chu liwana akgatekgsatit* pi nipara chatum tiku tlawa talakgxtumit nema ni xlitatlawat,* nipara tiku tlawa tuku lu xalixkajni, nipara tiku lhuwa tuku kgalhiputun nema xtachuna tiku kakninani tatlawamakgxtu* ni katimakgtanulh kxTamapakgsin Cristo chu Dios.

6 Niti kakaliʼakgskgawin ni xaxlikana tachuwin, xlakata uma nakalakgmin xtasitsi Dios tiku ni kgalhakgaxmatkgo. 7 Wa xlakata, ni katlawatit tuku xlakan tlawakgo;* 8 xlakata milh kilhtamaku wixin kapukswa xwilatit, pero uku kxkgakganat wilatit xlakata tapakgsiniyatit Malana.* Chuntiya kalipitit milatamatkan chuna la tiku tapakgsinikgo xkgakganat, 9 xlakata lilatamakan xkgakganat wamputun tlan likatsikan xliputum tuku tlawakan, xaʼakgstitum litaxtukan chu lakatitum latamakan. 10 Chuntiya kakatsitit komo tuku tlawayatit tlan o nitlan xpalakata Malana; 11 chu nialh kamakgtlawatit tuku ni kgalhi xtapalh nema tapakgsini tuku xalak kapukswa; wata kalimasiyatit pi nitlan. 12 Xlakata lu limaxana tuku tsekg tlawakgo nipara lichuwinamputu. 13 Chu putum tuku ni xaʼakgstitum, xkgakganat tlawa pi natasiya,* xlakata putum tuku tasiya xkgakganat. 14 Wa xlakata wankan: «Kalakastakwananti, wix tiku lhtatapat chu kataki kxlakgstipankan tiku nikgonita chu Cristo namaxkiyan xkgakganat».

15 Wa xlakata kuenta katlawatit pi chuna la lipimpatit milatamatkan nichuna kawa la* tiku ni liwana lakapastaknankgo,* wata chuna la tiku xalakgskgalalan, 16 liwana kalimaklakaskintit minkilhtamakujkan* xlakata lamaw kxakatuwa kakilhtamaku. 17 Wa xlakata nialh kalikatsitit chuna la tiku ni liwana lakapastaknankgo, wata chuntiya kaʼakgatekgstit tuku xtalakaskin Jehová. 18 Nachuna, ni kakgachitit, xlakata uma matlawinan tuku ni xlilat,* wata chuntiya kalitatsamatit espíritu. 19 Chatunu chatunu* kalalitachuwinaw salmos, tuku limalankikan Dios chu takilhtlin nema limaxkikan kakni chu kakilhtlinitit Jehová kminakujkan, 20 putum kilhtamaku kapaxtikatsiniw Dios kinTlatkan* kxtukuwani kiMalanakan Jesucristo xlakata putum tuku tlawa kimpalakatakan.

21 Kalakgalhakgaxpattit xlakata lu maxkiyatit kakni Cristo. 22 Lakpuskatin kakgalhakgaxmatkgolh xchixkukan chuna la kgalhakgaxmatkgo Malana, 23 xlakata xachixku wa xʼakgxakga xapuskat, chuna la Cristo xʼakgxakga congregación, wa xmakni, nema xla lakgmaxtulh. 24 Chuna, xtachuna la congregación kgalhakgaxmata Cristo, xapuskat xlikgalhakgaxmatat xchixku putum kilhtamaku. 25 Lakchixkuwin, chuntiya kakapaxkitit mimpuskatkan, chuna la Cristo paxkilh congregación chu nilh xpalakata, 26 xla chuna tlawalh xlakata namasantujli, limaskulunkilh xtachuwin Dios, xtachuna la xlipaxilh chuchut, 27 xlakata congregación stlan xtasiyalh kxlakatin, xla lakaskin pi xasanto kawa congregación chu ni kakgalhilh tuku nitlan.

28 Nachuna, lakchixkuwin xlipaxkitkan xpuskatkan chuna la akstu paxkikgo xmaknikan. Chatum chixku tiku paxki xpuskat,* xʼakstu paxkikan, 29 xlakata nitiku lakgmakgan xmakni,* wata mawi chu kuentajtlawa, chuna la Cristo likatsini congregación, 30 xlakata akinin xtatakgatsin xmakni. 31 Tatsokgni wan: «Wa xlakata chixku namakgxtakga xtlat chu xtse chu akxtum natatawila xpuskat,* chu xchatiykan akgtum makni nalitaxtukgo». 32 Uma tuku tsekg wi xla Dios lu xlakaskinka. Chu akit klichuwinama xlakata Cristo chu congregación. 33 Pero, chatunu chatunu xlipaxkit xpuskat* chuna la xʼakstu paxkikan; nachuna, xapuskat lu xlimaxkit kakni xchixku.

6 Kamanan, kakakgalhakgaxpattit minatlatnikan* chuna la xtalakaskin Malana,* xlakata uma xaʼakgstitum akxilha Dios. 2 «Kamaxki kakni mintlat chu mintse»,* wa xapulana limapakgsin nema limin uma tasikulunalin: 3 «Xlakata tlan nakitaxtuniyan chu makgas nalatapaya kkatiyatni». 4 Chu wixin natlatni,* ni kakamakgasitsitit minkamanankan, wata kakamakgastaktit chuna la wi xtastakyaw chu xlimapakgsin* Jehová.

5 Skujnin, kakgalhakgaxpattit mimalanakan xliputum minakujkan, kakamaxkitit kakni chu kakapekuanitit, chuna la kgalhakgaxpatatit Cristo, 6 ni kaj akxni kaʼakxilhpakantit, xlakata kaj nakamakgapaxuwayatit lakchixkuwin, wata xtachuna la kskujnin Cristo katlawatit xtalakaskin Dios xliputum milatamatkan.* 7 Xatapaxuwan kaskujtit chuna la lakskujnin, xtachuna la skujnanipatit Jehová chu ni wa lakchixkuwin, 8 xlakata chuna la katsiyatit, skujnin chu tiku ni skujnin wa Jehová nakamaspitnipara putum tuku tlan tlawakgo. 9 Chu wixin malananin, nachuna kakalikatsinitit miskujnaninkan, ni kakamakgapekuantit, xlakata wixin katsiyatit pi xMalanakan chu miMalanakan wilacha kʼakgapun chu xla ni laksakpaxkinan.

10 Xaʼawatiya, Malana kakamaxkin xlitliwakga, xlakata xlitliwakga lu lanka. 11 Kawilitit putum talhakgan nema Dios mastanit xlakata nalitlawakan guerra, xlakata chuna tlan natayaniyatit xliʼakgsiyat Akgskgawini; 12 xlakata ni wa latamanin katalatlawamaw,* wata katalatlawamaw lhuwa demonios nema wilakgolh kʼakgapun tiku mapakgsinamakgo chu pulalinamakgo kkakilhtamaku nema puks wi. 13 Wa xlakata, kawilitit putum talhakgan nema Dios mastanit xlakata nalitlawakan guerra, xlakata akxni nachin ni xatlan kilhtamaku tlan natayaniyatit, chu akxni putum lakkaxwilinitantita nawan, tliwakglh natayayatit.

14 Wa xlakata, tliwakglh kalitatampulakgchitit xaxlikana xtachuna la akgtum litatampulakgchin, kalitakuxmumakgtayatit tuku xaʼakgstitum. 15 Chu katatununantit xlakata tunkun nalichuwinamputunatit xatlan tamakatsinin xpalakata takaksni. 16 Nachuna, katiyatit lanka escudo xla takanajla nema tlan nalimamixiyatit putum xalakpasani xflechas Satanás. 17 Chu kalilakpuwantit lakgtaxtut, chu uma namakgtaya miʼakgxakgakan xtachuna la akgtum takgnu xalikan, chu katiyatit espada xla espíritu, uma wamputun, xTachuwin Dios. 18 Nachuna, chuntiya katlawanitit oración Dios, chu putum kilhtamaku kamastatit talakaskin pi espíritu nakapulalinan akxni natlawayatit mioracionkan, tipalhuwa chuna la katlawanitit oración chu tipalhuwa chuna la katasaskinitit Dios. Wa xlakata, skgalalh katawilatit, ankgalhin katasaskinitit xpalakata tiku xasantos. 19 Na katlawatit oración kimpalakata, xlakata akxni nakchuwinan nakilakgchin tachuwin nema xlilat, xlakata ni nakpekuan akxni naklichuwinan tuku tsekg wi xla Dios xpalakata xatlan tamakatsinin. 20 Dios wa tiku kimalakgachanit naklichuwinan xatlan tamakatsinin. Wa xlakata ktanuma kpulachin. Katlawanitit oración Dios kimpalakata xlakata ni nakpekuan akxni naklichuwinan xatlan tamakatsinin, chuna la xlilat.

21 Nachuna, xlakata nakatsiyatit kimpalakata chu la kinkitaxtunima, tala Tíquico tiku lu paxkikan chu kskujni Malana tiku ni makgxtakga, putum nakamakatsiniyan. 22 Wa uma tuku xlakata kkamalakgachaniman: xlakata nakatsiyatit la kwilaw chu xlakata tlan namamakgkatsini minakujkan.

23 Putum kinatalankan kakgalhikgolh takaksni, chu tapaxkit nema akxtum talanit takanajla tuku masta Dios xaTlat chu Malana Jesucristo. 24 Kakgalhikgolh talakgalhaman nema ni anan xtachuna* putum tiku kgalhinikgo tapaxkit nema ni lakgsputa kiMalanakan Jesucristo.